108 Buddhist stotras · અધ્યાય 48

ઘોરરૂપે મહારાવે સર્વશત્રુક્ષયઙ્કરિ ।
ભક્તેભ્યો વરદે દેવિ ત્રાહિ માં શરણાગતમ્ ॥

સુરાસુરાર્ચિતે દેવિ સિદ્ધગન્ધર્વસેવિતે ।
જાડ્યપાપહરે દેવિ ત્રાહિ માં શરણાગતમ્ ॥

સર્વમણ્ડલ(મધ્યસ્થે) સર્વસત્ત્વહિતે ઽનઘે ।
સિદ્ધાનાં પૂજિતે દેવિ ત્રાહિ માં શરણાગતમ્ ॥

ઘોરરૂપસ્થિતે દેવિ સર્વપ્રાણહરે સ્તુતે ।
ઉગ્રતારે નમો નિત્યં ત્રાહિ માં શરણાગતમ્ ॥

જટાજૂટસમાયુક્તે લલજ્જિહ્વોર્ધ્વકારિણિ ।
દ્રુતબુદ્ધિપ્રદે દેવિ ત્રાહિ માં શરણાગતમ્ ॥

સોમરૂપે કોટ્ટરૂપે ચન્દ્રરૂપે નમો ઽસ્તુ તે ।
શક્તિરૂપે નમસ્તુભ્યં ત્રાહિ માં શરણાગતમ્ ॥

જડો ઽહં શક્તિહીનો ઽહં ન તવાધિગમે ક્ષમઃ ।
મન્દો મન્દમતિશ્ચાહં ત્રાહિ માં શરણાગતમ્ ॥

સ્નાને દાને તથા જાપ્યે બલિદાને તથા ક્રતૌ ।
પ્રસ્થાને ચ ન શક્તો ઽહં ત્રાહિ માં શરણાગતમ્ ॥

શક્તિહીનમનાથં ચ સર્વપાપસમન્વિતમ્ ।
ત્વાં વિના ન ગતિર્યસ્ય ત્રાહિ માં શરણાગતમ્ ॥

ગૌરી લક્ષ્મીર્મહામાયા ઉમા દેવી સરસ્વતી ।
સર્વાસ્ત્વમેવ હે માતસ્ત્રાહિ માં શરણાગતમ્ ॥

ગન્ધપુષ્પાદિદ્રવ્યૈશ્ચ વન્ધનાદિભિરેવ ચ ।
દેવીં સમ્પૂજ્ય યત્નેન લભતે વાઞ્છિતં ફલમ્ ॥

અષ્ટમ્યાં ચ ચતુર્દશ્યાં નવમ્યાં યઃ પઠેન્નરઃ ।
પરમાં સિદ્ધિમાપ્નોતિ નાત્ર કાર્યા વિચારણા ॥

મોક્ષાર્થી લભતે મોક્ષં ધનાર્થી લભતે ધનમ્ ।
વિદ્યાર્થી લભતે વિદ્યાં તર્કવ્યાકરણાદિકામ્ ॥

ઇદં સ્તોત્રં પઠિત્વા તુ સંગ્રામે પ્રવિશેન્નરઃ ।
તસ્ય શત્રુઃ ક્ષયં યાતિ સદા પ્રજ્ઞા પ્રજાયતે ॥

પીડાયામથ સંધાને વિપદાયાં તથા ભયે ।
ય ઇદં પઠતે સ્તોત્રં શુભં તસ્ય ન સંશયઃ ॥