108 Buddhist stotras · અધ્યાય 47

માતર્નીલસરસ્વતિ પ્રણમતાં સૌભાગ્યસમ્પત્પ્રદે પ્રત્યાલીઢપદસ્થિતે શવહૃદિ સ્મેરાનનામ્ભોરુહે ।
ફુલ્લેન્દીવરલોચનત્રયયુતે કર્તીકપાલોત્પલે ખડ્ગં ચાદધતી ત્વમેવ શરણં ત્વામીશ્વરીમાશ્રયે ॥

વાચામીશ્વરિ ભક્તકલ્પલતિકે સર્વાર્થસિદ્ધીશ્વરિ સદ્યઃ પ્રાકૃતગદ્યપદ્યરચનાસર્વાર્થસિદ્ધિપ્રદે ।
નીલેન્દીવરલોચનત્રયયુતે કારુણ્યવારાંનિધે સૌભાગ્યામૃતવર્ષણેન કૃપયા સિઞ્ચ ત્વમસ્માદૃશમ્ ॥

ખર્વે ગર્વસમહપૂરિતતનો સર્પાદિભૂષોજ્જ્વલ્ વ્યાઘ્રત્વક્પરિવીતસુન્દરકટિવ્યાધૂતઘણ્ટાઙ્કિતે ।
સદ્યઃકૃત્તગલદ્રજઃપરિલસન્મુણ્ડદ્વયીમૂર્ધજ ગ્રન્થિશ્રેણિનૃમુણ્ડદામલલિતે ભીમે ભયં નાશય ॥

માયાનઙ્ગવિકારરૂપલલનાબિન્દ્વર્ધચન્દ્રાત્મિકે હુંફટ્કારમયિ ત્વમેવ શરણં મન્ત્રાત્મિકે માદૃશઃ ।
મૂર્તિસ્તે જનનિ ત્રિધામઘટિતા સ્થૂલાતિસૂક્ષ્મા પરા વેદનાં નહિ ગોચરા કથમપિ પ્રાપ્તાં નુ તામાશ્રયે ॥

ત્વત્પાદામ્બુજસેવયા સુકૃતિનો ગચ્છન્તિ સાયુજ્યતાં તસ્ય શ્રીપરમેશ્વરી ત્રિનયનબ્રહ્માદિસૌમ્યાત્મનઃ ।
સંસારામ્બુધિમજ્જને પટુતનૂન્ દેવેન્દ્રમુખ્યાન્ સુરાન્ માતસ્ત્વત્પદસેવને હિ વિમુખાન્ કો મન્દધીઃ સેવતે ॥

માતસ્ત્વત્પદપઙ્કજદ્વયરજોમુદ્રાઙ્કકોટીરિણ સ્તે દેવાસુરસંગરે વિજયિનો નિઃશઙ્કમઙ્કે ગતાઃ ।
દેવો ઽહં ભુવને ન મે સમ ઇતિ સ્પર્દ્ધાં વહન્તઃ પરે તત્તુલ્યા નિયતં તથા ચિરમમી નાશં વ્રજન્તિ સ્વયમ્ ॥

ત્વન્નામસ્મરણાત્ પલાયનપરા દ્રષ્ટું ચ શક્તા ન તે ભૂતપ્રેતપિશાચરાક્ષસગણા યક્ષાશ્ચ નાગાધિપાઃ ।
દૈત્યા દાનવપુઙ્ગવાશ્ચ ખચરા વ્યાઘ્રાદિકા જન્તવો ડાકિન્યઃ કુપિતાન્તકાશ્ચ મનુજા માતઃ ક્ષણં ભૂતલે ॥

લક્ષ્મીઃ સિદ્ધગણાશ્ચ પાદુકમુખાઃ સિદ્ધાસ્તથા વારિણાં સ્તમ્ભશ્ચાપિ રણાઙ્ગણે ગજઘટાસ્તમ્ભસ્તથા મોહનમ્ ।
માતસ્ત્વત્પદસેવયા ખલુ નૃણાં સિદ્ધ્યન્તિ તે તે ગુણાઃ કાન્તિઃ કાન્તતરા ભવેચ્ચ મહતી મૂઢો ઽપિ વાચસ્પતિઃ ॥

તારાષ્ટકમિદં રમ્યં ભક્તિમાન્ યઃ પઠેન્નરઃ ।
પ્રાતર્મધ્યાહ્નકાલે ચ સાયાહ્ને નિયતઃ શુચિઃ ॥

લભતે કવિતાં દિવ્યાં સર્વશાસ્ત્રાર્થવિદ્ ભવેત્ ।
લક્ષ્મીમનશ્વરાં પ્રાપ્ય ભુક્ત્વા ભોગાન્ યથેપ્સિતાન્ ॥

કીર્તિ કાન્તિં ચ નૈરુજ્યં સર્વેષાં પ્રિયતાં વ્રજેત્ ।
વિખ્યાતિં ચૈવ લોકેષુ પ્રાપ્યાન્તે મોક્ષમાપ્નુયાત્ ॥