108 Buddhist stotras · અધ્યાય 46

યસ્યાઃ સ્મરણમાત્રેણ સર્વે પાપાઃ ક્ષયં ગતાઃ ।
યયા યુક્તો વજ્રકાયો નમસ્તસ્યૈ નમો નમઃ ॥

યાં સ્મરન્ રાક્ષસઃ ક્રૂરો માઠરં કુક્ષિસંસ્થિતમ્ ।
પ્રાક્ષિપદ્ ગોવિષં નદ્યાં નમસ્તસ્યૈ નમો નમઃ ॥

યા ઽરક્ષત્ વણિજઃ પુત્રં ક્રૂરસર્પાદ્ વધોદ્યતાત્ ।
વિષદાહમુમૂર્ષું ચ નમસ્તસ્યૈ નમો નમઃ ॥

બ્રહ્મદત્તો મહારાજો યયા રક્ષિતમસ્તકઃ ।
રિપું જિત્વા વિરાજો ઽભૂન્નમસ્તસ્યૈ નમો નમઃ ॥

ભિક્ષુર્દુઃશીલકો રોગી યયા કણ્ઠે પ્રબન્ધિતઃ ।
પ્રાણાન્મુક્ત્વા યયૌ સ્વર્ગં નમસ્તસ્યૈ નમો નમઃ ॥

સમુદ્રે પોતસંક્ષુબ્ધે વણિજાં પ્રાણરક્ષકઃ ।
યાં સ્મરન્ સાર્થવાહો ઽભૂન્નમસ્તસ્યૈ નમો નમઃ ॥

યસ્યાં ચ પ્રતિબદ્ધાયાં ભાર્યાયાં સુતમાપ્તવાન્ ।
પ્રસારિતભુજો રાજા નમસ્તસ્યૈ નમો નમઃ ॥

દરિદ્રો યાં પ્રતિ સ્મૃત્વા દીનારાન્ પ્રદદૌ જિને ।
રાજા ઽભીષ્ટપ્રદાતા ઽભૂન્નમસ્તસ્યૈ નમો નમઃ ॥

યાં પ્રબદ્ધ્વા ઽસુરૈર્યુદ્ધં શક્રશ્ચૂડામણૌ પ્રભુઃ ।
લબ્ધવાન્ વિજયં વજ્રી નમસ્તસ્યૈ નમો નમઃ ॥

યસ્યા મન્ત્રબલેનૈવ પૂર્ય પારમિતાશ્ચ ષટ્ ।
મારા જિતા જિનૈર્બુદ્ધૈર્નમસ્તસ્યૈ નમો નમઃ ॥

અપધીરો વધાર્હો ઽપિ પ્રક્ષિપ્તઃ સર્વસઙ્કટે ।
યાં સ્મૃત્વા પરિમુક્તો ઽભૂન્નમસ્તસ્યૈ નમો નમઃ ॥

યયા બન્ધિતકણ્ઠશ્ચ મુક્તો ઽભૂત્ પાપસઙ્કટાત્ ।
નગરે નાયકો ઽભૂચ્ચ નમસ્તસ્યૈ નમો નમઃ ॥

યા ચા ઽપરાજિતા વિદ્યા સર્વબુદ્ધૈશ્ચ ધારિતા ।
મુદ્રિતા ભાષિતા નિત્યં પઠિતા પરિદેશિતા ॥

લિખિતા મોદિતા સત્ત્વહિતાય પૂજિતા સદા ।
સ્મૃતા કાયગતા કૃત્વા નમસ્તસ્યૈ નમો નમઃ ॥

યસ્યાઃ સ્મરણમાત્રાન્ન દુર્લભં ભુવનત્રયે ।
પાઠસ્વાધ્યાયનાદ્વાપિ નમસ્તસ્યૈ નમો નમઃ ॥

યા વિદ્યા દુર્લભા બુદ્ધૈર્વ્યાકૃતા સુપ્તશંસિતા ।
મહતી ધારણી ખ્યાતા સર્વપાપક્ષયઙ્કરી ॥

મહાબલા મહાવીર્યા મહાતેજા મહત્પ્રભા ।
મહાગુણવતી વિદ્યા સર્વભારવિદારણી ॥

પાપસન્ધિસમુદ્ઘાતી મારબન્ધપ્રમોચની ।
જનની બોધિસત્ત્વાનાં સર્વદુષ્ટવિનાશિની ॥

રક્ષણી પોષણી ધાત્રી પરમન્ત્રવિઘાતિની ।
કાર્ખોદવિષયોગાનાં વિધ્વંસનકરી શિવા ॥

મહાધ્યાનરતાનાં ચ ગૃહ્ણતાં લિખતાં સદા ।
પાઠાધ્યયનકૃતાં નિત્યં દધતાં શૃણ્વતાં તથા ॥

પરેભ્યો દેશિતા ચૈવ નિત્યં મનસિ ભાવિતા ।
સા પુસ્તકગતાં કૃત્વા પૂજ્યમાના નમસ્કૃતા ॥

સર્વપાપહરી ભદ્રા બોધિસંભારપૂરિણી ।
નમસ્તસ્યૈ નમસ્તસ્યૈ નમસ્તસ્યૈ નમો નમઃ ॥

યસ્યા મન્ત્રપ્રભાવેણ સર્વભયાન્યુપદ્રવાઃ ।
દુષ્ટાઃ સુરમનુષ્યાશ્ચ દૈત્યગન્ધર્વરાક્ષસાઃ ॥

ગ્રહાઃ સ્કન્દા અપસ્મારાઃ પિશાચા યક્ષકિન્નરાઃ ।
ડાકિન્યઃ શાકિનીસંઘા નાગા કાર્ખોદવ્યાધયઃ ॥

જ્વરાશ્ચ વિવિધા રોગાઃ પરકર્મકૃતાસ્તથા ।
વિષાગ્નિશસ્ત્રમન્ત્રાણિ વિદ્યુતઃ કાલવાયવઃ ॥

અતિવૃષ્ટિરનાવૃષ્ટિઃ સર્વશત્રુભયાનિ ચ ।
તથાન્યે પાપસર્ગા વા વિનશ્યન્તિ ન સંશયઃ ॥

સર્વકાર્યાણિ સિદ્ધ્યન્તિ નમસ્તસ્યૈ નમો નમઃ ।
યશ્ચૈતાં ધારયેદ્વિદ્યાં કણ્ઠે બાહૌ ચ મસ્તકે ॥

નિત્યં રક્ષન્તિ દેવાસ્તં દૈત્યા નાગાશ્ચ માનુષાઃ ।
ગન્ધર્વાઃ કિન્નરા યક્ષા ભૂતપ્રેતપિશાચકાઃ ॥

ડાકિન્યો રાક્ષસા દૂત્યઃ કૂષ્માણ્ડાઃ કઠપૂતનાઃ ।
ત્રિસન્ધ્યં યઃ પઠેન્નિત્યં બુદ્ધા રક્ષન્તિ તં સદા ॥

પ્રત્યેકાઃ શ્રાવકાશ્ચૈવ બોધિસત્ત્વા મહર્ધિકાઃ ।
યોગિનઃ સિદ્ધમન્ત્રાશ્ચ મહાવીર્યા મહર્ષયઃ ॥

વજ્રપાણિશ્ચ યક્ષેન્દ્રઃ શક્રશ્ચ ત્રિદશૈઃ સહ ।
ચત્વારશ્ચ મહારાજા બ્રહ્મવિષ્ણુમહેશ્વરાઃ ॥

નન્દિકૃષ્ણો મહાકાલઃ કાર્તિકેયો ગણેશ્વરઃ ।
ભૈરવા માતૃકા દુર્ગાસ્તથા ઽન્યે મારકાયિકાઃ ॥

વિદ્યાદેવ્યો મહાવીર્યા મહાબલપરાક્રમાઃ ।
મામકી ભૃકુટી તારા ચાઙ્કુશી વજ્રશૃઙ્ખલા ॥

મહાશ્વેતા મહાકાલી વજ્રદૂતી સુપાશિકા ।
વજ્રમાલા મહાવિદ્યા સુવીર્યા ઽમૃતકુણ્ડલી ॥

વજ્રા ઽપરાજિતા ચણ્ડી કાલકર્ણી મહાબલા ।
તથા ધન્યા મહાભાગા પદ્મકુણ્ડલિરેવ ચ ॥

મણિચૂડા પુષ્પદન્તી સ્વર્ણકેશી ચ પિઙ્ગલા ।
એકજટા મહાદેવી ધન્યા વિદ્યુન્માલિની ॥

કપાલિની ચ લઙ્કેશી બ્રહ્મક્ષિતિકનાયિકા ।
હારીતી પાઞ્ચિકાશ્ચૈવ શઙ્ખિની કૂટદન્તિની ॥

શ્રીઃ સરસ્વતી લક્ષ્મીઃ સિદ્ધેશ્વરી સદાનુગા ।
તમેવા ઽન્યે ઽપિ રક્ષન્તિ યસ્ય વિદ્યા કરે સ્થિતા ॥

સ ભવેત્ સર્વસત્ત્વાનાં મોક્ષાર્થં ચ સમુદ્યતઃ ।
નમસ્તસ્યૈ નમસ્તસ્યૈ નમસ્તસ્યૈ નમો નમઃ ॥