108 Buddhist stotras · અધ્યાય 40

નાનાકૃતિં સુકૃતિનં જગતઃ શરણ્યં લોકેશકેશવહરાત્મધરૈરવશ્યમ્ ।
સંસારસાગરતરં કમલાયતાક્ષં શ્રીલોકનાથવિબુધં શુભદં ભજામિ ॥

રક્ષાકરં સકલભીતિવતાં જનાનાં વામાનનં કનકકુણ્ડલચારુકર્ણમ્ ।
ગ્રૈવેયકાદિમણિકાભરણેન શોભં શ્રીલોકનાથવિબુધં શુભદં ભજામિ ॥

ભક્ત્યા નતસ્ય મનુજસ્ય વિપદ્વિરામં સ્વર્ગાપવર્ગફલદં વરદં દયાલુમ્ ।
દેવાધિદેવમમરં જિનસંઘવન્તં શ્રીલોકનાથવિબુધં શુભદં ભજામિ ॥

સન્તપ્તરૂપતિલકં તિલકં સુરાણાં રત્નાકરં કનકકુન્તકશોભહસ્તમ્ ।
ભ્રાજિષ્ણુમાભરણધારણદિક્પ્રદં તં શ્રીલોકનાથવિબુધં શુભદં ભજામિ ॥

દુર્ગન્ધદુર્ગતિહરં દુરિતાપહારં દુર્ભિક્ષનાશકરણં કરુણાકરં તમ્ ।
વિદ્યાપ્રદં ગુણનિધિં શુભશુદ્ધદેહં શ્રીલોકનાથવિબુધં શુભદં ભજામિ ॥

ઇત્થં વરં સકલભૂતગણાધિનાથં ત્રૈલોક્યનાથમમરૈરપિ વન્દ્યમાનમ્ ।
એવં ક્વચિદ્ રથવરે સુખસંપ્રવિષ્ટં શ્રીલોકનાથવિબુધં શુભદં ભજામિ ॥

યક્ષાદિકિન્નરનરૈર્મુનિભિશ્ચ નાગૈર્વિદ્યાધરૈઃ સુરગણૈર્દનુજૈઃ પિશાચૈઃ ।
સર્વોપકારનમિતં પુટિતા ગ્રહસ્તૈઃ શ્રીલોકનાથવિબુધં શુભદં ભજામિ ॥

ગન્ધાદિચન્દનયુતં મૃગનાભિભિશ્ચ કર્પૂરકુઙ્કુમવરૈર્હરિચન્દનૈશ્ચ ।
તસ્યાનુલેપનકૃતેન સુશોભિતાઙ્ગં શ્રીલોકનાથવિબુધં શુભદં ભજામિ ॥

રોગાદિનાશનકરં ભજતાં સુનામ શોકાદિદુઃખહરણં સુખચિન્તનીયમ્ ।
પીયૂષતુલ્યવચનં મૃદુજાતગાત્રં શ્રીલોકનાથવિબુધં શુભદં ભજામિ ॥

આજાનુલમ્બિતકરં ગજરાજમધ્યં સૌન્દર્યકુણ્ડશિખરં સ્ફટિકાભદન્તમ્ ।
અત્યન્તસુન્દરતનું શુભલક્ષણાઙ્ગં શ્રીલોકનાથવિબુધં શુભદં ભજામિ ॥

યે લોકનાથસ્ય સદા સુરભ્યં સ્તોત્રં પઠિષ્યન્તિ જના સભાવાઃ ।
શ્રીલોકનાથો ઽપિ તદીપ્સિતાર્થં સ્વહસ્તગ્રસ્તસ્ત્વરિતં દદાતિ ॥