108 Buddhist stotras · અધ્યાય 39

ભાસ્વન્માણિક્યભાસો મુકુટભૃતિ નમન્નાકનાથોત્તમાઙ્ગે ભક્તિપ્રહ્વે સરોજાસનશિરસિ હસન્માલતીમાલિકાભઃ ।
મૌલૌ મીલન્મૃગાઙ્ગામકૃશકપિશતાં શામ્ભવે શાતયન્ત્યો લોકે લોકેશપાદામલનખશશભૃત્કાન્તયઃ સન્તુ શાન્ત્યૈ ॥

નિર્ધૂતા ધૂર્જટીન્દોર્ન ખલુ પટુ જટાપિઙ્ગમાસઙ્ગશારૈઃ સારૈરારાન્મયૂખૈર્ન ચ હરિમુકુટામન્દમાણિક્યભાભિઃ ।
કાલિમ્નો નાપિ લીના વિબુધગણલલત્કુન્તલાલીનલીનાલ્ લોકેશ્વર્યો ઽનિવાર્યાશ્ચરણનખરુચઃ સન્તુ વો ધ્વાન્તશાન્ત્યૈ ॥

પર્યાપ્તોદારકોષસ્ફુટતરકમલાભોગસંપત્તિહેતુર્ દૂરીભૂતપ્રિયાણામપહૃતવિષમાતઙ્કશઙ્કા જનાનામ્ ।
ન ક્ષિપ્તાલઙ્ઘનૈરપ્યુપશમિતતમોદુર્ગ્રહોદ્ભૂતભીતિર્ લોકેશાઙ્ઘ્ર્યોરપૂર્વા નખશિશિરરૂચાં ચન્દ્રિકા વઃ પુનાતુ ॥

નિઃશેષં ક્લેશરાશીન્ધનદહનમહાપાવકોચ્ચૈઃ શિખા વો લીલાલોકાસ્ત્રિલોક્યામપહૃતગહનાબદ્ધમોહાન્ધકારાઃ ।
વહ્નિસ્કન્ધેષ્વબન્ધ્યા નરકભુવિ સુધાવારિવિસ્તારધારાઃ સંસારીં સંહરન્તાં નખનિવહરુચઃ પદ્મભૃત્પાદજાતાઃ ॥

સ્વચ્છન્દચ્છેદિવાઞ્ચ્છાવિતરણચતુરાચિન્ત્યચિન્તામણીનામ્ ઉદ્ગાઢાતઙ્કશઙ્કોદ્ગમશમનમનોહારિણી હારભાસામ્ ।
સ્પષ્ટાવિર્ભૂતનાનાગુણનિવહધૃતાદર્શબિમ્બચ્છવીનાં છાયા વઃ પાતુ લોકેશ્વરચરણભુવામુન્મયૂઉખા નખાનામ્ ॥

નાથસ્યોદઞ્ચદુચ્ચામિતરુચિરુચિભી રોચમાનોરુચૂડા રોચિષ્ણોરુચ્ચકાસચ્ચરણનખરુચાં સંચયો ઽસૌ ચિરં વઃ ।
અત્યુચ્ચીયાત્ તદર્ચાચતુરસુરશિરશ્ચારુરત્નોચ્ચયોચ્ચૈર્ નાનાનિશ્ચારિરોચિશ્ચયરચિતશચીરુચ્યચાપોપચારઃ ॥

શ્રીમદ્ભોગોન્નતીનામભિમતવિષયપ્રાપ્તિદાનાદહીનાં સેવાભાજાં સમન્તાદવિચલિતરુચઃ પ્રીતિમુત્પાદયન્તઃ ।
વૈમલ્યાતુલ્યબિમ્બોપહસિતશશિનઃ શાતિતધ્વાન્તદોષાસ્ તોષં માણિક્યદીપા ઇવ દદતુ નખાઃ પદ્મપાણેઃ પદોર્વઃ ॥

રાજદ્રાજીવપાણેર્નખનિવહરુચાં પાદપદ્મોદ્ભવાનામ્ ઉદ્ભેદો ભેદકો ઽસૌ ભવતુ ભવભિયાં નિર્ભરાણાં ભરં વઃ ।
જાતસ્તદ્દેહભૂમેચવિરતકરુણાવારિદત્તોપકારો યો ઽનલ્પઃ કલ્પવૃક્ષાઙ્કુરનિકર ઇવોપાત્તવિજ્ઞાનબીજઃ ॥

લોકેશસ્યાઙ્ઘ્રિપદ્મપ્રભવનખરુચો દત્તમારારિસેના સંત્રાસાઃ શોણતૂણોન્મુખનિહિતફલામોઘબાણાંશુશોભાઃ ।
શશ્વત્સંસારઘોરાવટપતિતજનોત્તારણાસજ્જરજ્જુ પ્રારોહા રોહયન્તાં દુરધિગમમહાસંપદુચ્ચૈઃ પદં વઃ ॥

ભાસ્વન્તઃ ક્લેશકર્મશ્રમવિવશજગત્તાપવિચ્છેદશૂરાં દૂરાદ્દોષોપલબ્ધેઃ પટુબુધગુરવસ્તારકા યે જનસ્ય ।
સાન્દ્રાનન્દં દદાનાઃ સકલશશધરશ્રીભૃતો નિષ્કલઙ્કાસ્ તે વશ્ચિન્તામચિન્ત્યાઃ કમલકરનખાઃ પાદજાતા જયન્તુ ॥

ભાસ્વત્ખણ્ડેન્દુખણ્ડૈરપચિતિરચના કિં કૃતા શમ્ભુનેયં ન્યસ્તા રત્નાવલી વા કિમુ નિરતિશયોત્કણ્ઠયા બોધિલક્ષ્મ્યા ।
દેવૈર્દિવ્યાદ્ભુતાનામસમસુમનસાં લમ્બિતા માલિકા નુ પ્રીયાત્પઙ્ક્તિર્નખાનામિતિ જનિતમતિર્લોકનાથાઙ્ઘ્રિજા વઃ ॥

ક્વાયં રાજીવજન્મા નમદમરશિરસ્તુઙ્ગમાણિક્યશય્યા શશ્વત્સુપ્તાઙ્ઘ્રિરેણુઃ ક્વ ચ ધરણિતલાલમ્બમૌલિપ્રણામઃ ।
ઇત્થં સંજાતહાસા ઇવ રુચિનિચયૈર્દન્તુરા યે દુરન્તા ધ્વાન્તચ્છેદાય લોકેશ્વરચરણભવાસ્તે નખા વો ભવન્તુ ॥

શૂરાસ્તાપાપહારે શિશિરતરસુધાશીકરાસારકારાઃ પ્રાકારાઃ ક્રૂરદૂરપ્રસરદુરુશરાસારમારાપકારે ।
સંસારાકારકારાગૃહબૃહદુદરોદારદુઃખપ્રકારં ઘોરં વઃ સંહરન્તાં ચરણનખરુચઃ શ્રીકરાઃ પદ્મપાણેઃ ॥

ભાસો લોકેશપાદપ્રભવનખભુવાં દૂરદુર્વારમાર વ્યામુક્તવ્યાપિબાણાવરણજવનિકાભ્રાન્તિમુત્પાદયન્ત્યઃ ।
સંક્લેશાનીકનાશસ્ફુટપિશુનમહાકેતુસંઘાતકલ્પાસ્ ત્રૈલોક્યાશક્યશક્તિત્રિભવજયબૃહદ્વૈજયન્ત્યો જયન્તિ ॥

સમ્યક્સંબોધિચેતઃ શશિન ઇવ સમુદ્ભાસિભાસાં સમૂહો નિર્દગ્ધક્લેશભૂતિપ્રચય ઇવ બૃહન્મુક્તિમાર્ગાનિલાસ્તઃ ।
વિન્યસ્તાદભ્રશુભ્રોપલફલક ઇવ ક્રૂરમારૈરભેદ્યઃ પાયાદુત્પ્રેક્ષિતો વો નખરુચિનિકરઃ પાદજઃ પદ્મપાણેઃ ॥

વૈલક્ષ્યેણેક્ષણીયાઃ ક્ષણમસમતમઃક્ષેપદક્ષાઃ ક્ષપાણા નાથેનાક્ષુણ્ણપક્ષક્ષતિનિજવિપદા નિષ્કલઙ્કાક્ષયા યે ।
અક્ષીણારાતિપક્ષક્ષપણપટુજગદ્રક્ષણાક્ષુણ્ણદીક્ષા રક્ષા રક્ષન્તુ લોકેશ્વરચરણનખાસ્તે ઽક્ષણક્ષેપતો વઃ ॥

સત્સંપત્સાધનસ્ય પ્રવરકમલભૃત્પાદદુર્ગાશ્રયસ્ય ત્રૈલોક્યશ્રીજિગીષોર્નખરુચિનિવહસ્યાતુલો ઽભ્યુચ્ચયો વઃ ।
મિત્રેણાપ્તોદયેન સ્ફુટમનુવલતાલમ્ભિતાત્યન્તવૃદ્ધેઃ પાયાત્ સાપાયસર્વવ્યસનરિપુમહાયાનસંસિદ્ધિહેતુઃ ॥

અવ્રીડશ્ચૂડયા ઽસૌ વહતિ પશુપતિઃ કામમર્ધેન્દુભૂષાં શૌરેઃ શોભાભિલાષઃ કથમપિ કૃતિનઃ કૌસ્તુભેનાસ્તમેતિ ।
દૃષ્ટે ઽસ્મિન્ સો ઽપિ મોઘો મઘવમણિમહામૌલિરિત્યાપ્તચિત્તૈર્ યત્કાન્ત્યાચિન્તિ લોકૈશ્ચરણનખગણઃ પદ્મપાણેઃ સ જીયાત્ ॥

આરાદુચ્ચૈરુદઞ્ચત્કૃતવિતતિરધસ્તારકો નારકાણામ્ । ઉદ્યન્નીહારરોચિઃ શુચિરરિવદનશ્યામતાપાતહેતુઃ ।
દુર્વિજ્ઞેયાનુભાવો નિખિલજગદતિસ્પષ્ટદૃષ્ટિપ્રકાશઃ પાદામ્ભોજાવલમ્બી નખકિરણચયઃ પાતુ વો બુદ્ધમૌલેઃ ॥

દૃષ્ટો હૃષ્ટામરેશાર્ચનચતુરવધૂમુક્તકર્પૂરપાંશુ પ્રોદ્ભાસો ભક્તિભારપ્રવણહરજટાભૂતિવિભ્રાન્તભૂમિઃ ।
પૂજાવિક્ષિપ્તલક્ષ્મીકરકમલગલત્કેશરાગ્રાણુરેણુ ચ્છાયઃ પાયાદપાયાન્નખકરવિસરઃ પદ્મહસ્તાઙ્ઘ્રિજો વઃ ॥

મેરૌ નિષ્પીતપીતદ્યુતિરમરકરિસ્ફારસિન્દૂરધૂલી શોણશ્રીશાન્તશૂરો હરિતહરિહયાહીનહારિત્યહારી ।
મીલન્નીલાવભાસો નખરુચિવિસરઃ પદ્મભૃત્પાદપદ્માદ્ ઉદ્યદ્દુગ્ધાબ્ધિવૃદ્ધિત્રસદમરવધૂવીક્ષિતો રક્ષતાદ્ વઃ ॥

શોભા સંભાવ્યતે ઽસ્મિન્ હિમકરધવલૈર્નામરૈશ્ચામરૈર્વા ભક્ત્યારમ્ભેણ રમ્ભે પરિકિરસિ મુધા કિં નુ કર્પૂરધૂલીઃ ।
કિં તે પુષ્પૈઃ પ્રકીર્ણૈઃ શચિશુચિભિરિતિ સ્વામિના સ્વર્ભુવાં વઃ પૂજાયામબ્જપાણેર્નખરુચિનિવહઃ પાદજો વર્ણિતો ઽવ્યાત્ ॥

કૈલાસોદ્ભાસિવિન્ધ્યે કવલિતબલિજિત્કાયકાલિમ્નિ કાલી લીલાલાવણ્યલેપે વિહતહરિતિમશ્વેતપૂષાશ્વરશ્મૌ ।
લોકેશાઙ્ઘ્રેર્નખાનામુરુકરનિકરે કિં મયેતીવ શીર્ણં શીતાંશોઃ પાતુ પૂજાચતુરસુરજનાકીર્ણકુણ્ડચ્છલાદ્ વઃ ॥

પાદાઃ પાદોદ્ભવાનામતિવિતતિભૃતાં બુદ્ધમૌલેર્નખાના પારે સંસારયાદઃપતિગમનમહાસેતુબન્ધાયમાનાઃ ।
ઉદ્યદ્દુર્વારદુઃખાનલશમનમહાપુણ્યસંભારવારિ સ્વચ્છન્દાચ્છચ્છટાભા ઝટિતિ વિઘટનં કુર્વતાં વો ભવસ્ય ॥

કાલીકાન્તેન્દુકાન્તેઃ પરિભવવિધૃતિર્ભૂરિકૈલાસભૂભૃદ્ ભાસાં હાસાવગીતિર્હતિરપિ હિમવદ્ગૌરતાગૌરવસ્ય ।
ક્ષીરાકૂપારપૂરપ્લુતિરપિ કકુભાં નાકનાગીયદન્ત ચ્છેદચ્છાયાક્ષતિર્વો નખરુચિવિતતિઃ પાતુ લોકેશ્વરાઙ્ઘ્ર્યોઃ ॥

યત્પૂજાપારિજાતે વલિતમલિકુલં મીલતિ શ્રીસરોજે સેવાસક્તઃ સ્વયંભૂર્મુકુલિતનલિનાદ્ દુઃસ્થિતો યત્ર તસ્થૌ ।
યેનાશ્યામા દિનશ્રીઃ શમિતસુરવધૂક્લાન્તિદોષા નિશા ઽભૂત્ પાદો ઽસૌ પદ્મપાણેર્નખવિધુવિલસચ્ચન્દ્રિકઃ પાતુ યુષ્માન્ ॥

કાન્તો વિભ્રાન્તકાન્તામરયુવતિજનૈરર્ચિતો દૃષ્ટિપાતૈઃ શુભ્રં વિભ્રાણ્મૃણાલીનિકરમિવ નખોદ્યોતનોદ્ભૂતશોભઃ ।
કામીવાનલ્પકામપ્રસરપરવશાનેકચર્યાપ્રવૃત્તઃ પાદો વઃ પદ્મપાણેરવતુ સુરપુરીચન્દનામન્દચર્ચઃ ॥

આનન્દામન્દભારોલ્લસદમરકરૈઃ પારિજાતે વિકીર્ણે કાલીયઃ કાલકૂટોત્કટપટલ ઇવ પ્રોલ્લસદ્ભૃઙ્ગસાર્થે ।
શ્રેયો વઃ શ્રીર્વિધત્તામલમમલનખદ્યોતદુગ્ધાબ્ધિમધ્યાદ્ ઉદ્યન્તી પદ્મપાણેશ્ચરણસરસિજસ્યાચ્યુતપ્રીતિહેતોઃ ॥

વાઞ્છાવિચ્છિત્તિખેદોચ્છલદનલશિખાછેદકચ્છોચ્છ્ર્યો વઃ પદ્મચ્છાયાનુકારચ્છલિતમધુકરાચ્છાદનાચ્છાદિતશ્રીઃ ।
સ્વચ્છન્દાનચ્છમૂર્છચ્છુચિનખકિરણોચ્છૂનગુચ્છૈરતુચ્છો દેયાત્ પાદો ઽબ્જકાન્તિચ્છુરિતકરરૂચો ઽચ્છિન્નમિચ્છામકૃચ્છ્રાત્ ॥

ઉદ્ભૂતોદ્ભાસિચક્રદ્યુતિરમલનખૈરદ્વિતીયોદિતશ્રીર્ બિભ્રાણો લક્ષણાનાં ગણમતુલગુણાગણ્યપુણ્યોપનીતમ્ ।
નિઃશેષદ્વીપદીપપ્રભવદતિમહદ્વૈભવો બુદ્ધમૌલેઃ પાયાત્ પાદો નમસ્યદ્ભુવનપતિશિરશ્ચક્રવર્તી ચિરં વઃ ॥

કીર્ણૈરાકાશગઙ્ગાકનકકમલિનીકુડ્મલૈઃ કો ગુણો ઽસ્મિન્ કિં ગીતૈર્ગીતમેવ સ્ફુટસરસિરૂહભ્રાન્તિભૃઙ્ગાવલીભિઃ ।
શક્યં માણિક્યદામ્નામિહ રૂચિરનખે શોભિતું નેત્યવાદીદ્ યત્પૂજાયાં સુરેશઃ સ જયતિ ચરણો વારિજવ્યગ્રપાણેઃ ॥

યો નાથસ્યૈવ નાસીદપિ ખલુ સુગતેઃ કારણં જન્મભાજાં યસ્મિન્ પદ્માભિલાષી ન મધુપનિવહઃ પક્ષપાતી જનો ઽપિ ।
યેનોર્વી નાતિગુર્વી નતિમતિગુરુણા લમ્ભિતાપિ ત્રિલોકી લોકં પાદઃ સ પાયાત્ સુગતશશધરદ્યોતવિદ્યોતમૌલેઃ ॥

યો ઽલીનાં પાનદાનાદકૃત ધૃતમુદં સંહતિં સેવકાનાં યસ્મિન્નાલં વિહીનં ન ખલુ હરિતતાત્યન્તશોભોપધાનમ્ ।
દેયાદ્વો લૌકનાથિશ્ચિરમમરશિરઃશાયિરેણૂત્કરો ઽસૌ શ્રેયઃ શ્રીવાસભૂમિર્નખકિરણહસત્કેશરઃ પાદપદ્મઃ ॥

દેહદ્રોહાવહોગ્રાહિતહતિવિહિતો દેહિનાં હેતિરીહા સિદ્ધેરાહૂતિરાહો હૃતિરતિમહતો બૃંહતાંહોમહિમ્નઃ ।
ક્લેશવ્યૂહાહિતેહાહુતિવિહિતબૃહદ્દ્રોહિદુઃખાગ્નિદાહ વ્યાપોહા વાહિની સ્તાદ્વહુવિહિતહિતા પદ્મહસ્તાઙઘ્રિભાવઃ ॥

બુદ્ધાલંકારમૌલેરવિકલકમલભ્રાન્તિભૃદ્ભૃઙ્ગમાલા વાચાલા નિર્વિચારા રચયતુ ચરણોત્સર્પિણી સંપદં વઃ ।
સત્ત્વત્રાણૈકકાર્યા સ્થિરતરસુચિરાવસ્થિતિસ્થાપનાર્થં વિન્યસ્તા શૃઙ્ખલેવ પ્રચુરકરુણયા સ્થૂલકાલાયસસ્ય ॥

રાજીવાન્તઃપલાશાવલિરુચિરમૃદુર્વજ્રસારો વિસારો ક્રુધ્યદ્વૈરિપ્રમુક્તપ્રહરણનિવહસ્યોદ્ભવદ્ભઙ્ગભૂમિઃ ।
રક્તો રાગોપશાન્તેરતિશયબલવત્કારણં તારણાયાં સંસારામ્ભોનિધેર્વઃ સુગતશશિભૃતો ઽપાસ્તખેદો ઽસ્તુ પાદઃ ॥

જમ્ભારેર્જૃમ્ભિતામ્ભોરુહરુચિરચયે ચાપલેનાપ્યલીન્ નાલં લોલાપિ લોલા હરકરવિહિતાનન્દકુન્દોત્કરે ઽપિ ।
ભ્રાજિષ્ણૌ વિષ્ણુકીર્ણે પરિમલિનિ પુરઃ પારિજાતે ઽપ્યજાત પ્રીતિર્યત્રાલિમાલા રમતિ જિનભૃતઃ સો ઽઙઘ્રિપદ્મો ઽવતાદ્ વઃ ॥

ભૂયાદુદ્ભૂતભૂરિદ્યુતિનિવહલસત્કેશરોદ્ભાસુરો વો રક્તચ્છાયાનુવિદ્ધોન્મુખનખદશનોદ્ભાસિકાન્ત્યા કરાલઃ ।
ત્રસ્યદ્દુર્વૃત્તવૈરિદ્વિપતરલચલલ્લોચનાલોકનીયો લોકેશસ્યાઙઘ્રિસિંહઃ કમલભવજટારણ્યશાયી શિવાય ॥

અચ્છીયાનપ્યનચ્છો લઘુરપિ ન લઘુર્લઙ્ઘને દિઙ્મુખાનાં ત્રૈલોક્યાનન્દનો ઽપિ પ્રબલપરપુરવ્યાપિસન્તાપહેતુઃ ।
લાવણ્યાલેપલિપ્તો ઽપ્યતિશયમધુરો વૈધુરાધેર્નિરોદ્ધા પાદોદ્દ્યોતઃ ક્રિયાદ્ વો જિનરૂચિવિકસન્માલિકાશેખરસ્ય ॥

રાજીવૈ રાજરાજો હરિરપિ હરિતૈર્હારિભિઃ પારિજાતૈઃ કુન્દૈઃ સાનન્દમિન્દુર્બહુવસુવિસરૈર્વાસવો ભાસમાનૈઃ ।
પ્રીતઃ પાશી પલાશૈરિતિ વિબુધજનઃ પ્રાજ્યપૂજાવિશેષં યત્રાનુપ્રાસકાવ્યાયિતમતત સ વઃ પાતુ પાદો ઽબ્જપાણેઃ ॥

ભાનુર્ભાસાં વિકાશે નુતિમકૃત નખેષૂન્મુખો નાકનાથઃ શર્વઃ શાખાગ્રપર્વણ્યવિચલનયનો ઽપ્યન્તકઃ પ્રાન્તકાન્તૌ ।
યસ્યાસામાન્યશોભાવિષયમતિશયં દ્રષ્ટુમાસીદનીશો નિઃશેષં દિવ્યલોકઃ સ જયતિ ચરણો બુદ્ધબિમ્બાઙ્કમૌલેઃ ॥

સમ્યક્સંબુદ્ધભાનુસ્ફુટવિકટજટાપુઞ્જકુઞ્જોરુમૂર્તેઃ સંસારામ્ભોધિમજ્જદ્ગુરુતરજનતામેદિનીસ્તમ્ભનસ્ય ।
ભૂયાદ્ ભદ્રાય પાદઃ કમલધરગિરેઃ સેવિતઃ સિદ્ધસાર્થૈઃ પર્યન્તોદ્વાન્તકાન્તિસ્રવદરુણમહાધાતુમન્નિર્ઝરો વઃ ॥

સંસારાધ્વપ્રબન્ધશ્રમસકલજગત્ક્લાન્તિસંશાન્તિહેતુ ચ્છાયસ્યેચ્છાફલસ્ય સ્ફુટનખકુસુમોદ્ભાસિશાખાભૃતો વઃ ।
લોકેશાઙઘ્રિદ્રુમસ્ય પ્રણતસુરજનૈર્મૌલિમાલાલવાલે મૂલે સંપાદિતો ઽવ્યાન્મણિકલશભૃતઃ સ્વચ્છધામામ્બુસેકઃ ॥

સંમૂલક્લેશજાલપ્રબલરિપુબલોન્મૂલનસ્થૂલલાભા લ્લબ્ધોલ્લાસો વિલાસી બલવિજયિલસન્મૌલિલીલાલયો વઃ ।
પાદ પાયાદતુલ્યામલકમલભૃતો ઽલીકફુલ્લાબ્જલોભ વ્યાલોલાનલ્પલાપોલ્લસદલિપટલાલ્લુપ્તસંગીતિલોલઃ ॥

ત્રૈલોક્યૈશ્વર્યલક્ષ્મીચપલકરિવધૂસંયમાલાનદણ્ડઃ કષ્ટક્લેશાહિદષ્ટસ્ખલદખિલજગત્પાલને દક્ષતર્ક્ષઃ ।
દુર્વારાન્તઃપ્રવેશાકૃશનરકપુરે દ્વારગાઢાર્ગલો વો ભૂત્યૈ લોકેશપાદો ભવજલધિસમુલ્લઙ્ઘનૈકપ્લવો ઽસ્તુ ॥

ઇતિ પાદુકાદેશના વૃત્તો નૃત્તપ્રકારઃ સપદિ વિઘટિતા વાદ્યવિદ્યાનવદ્યા નો ગીતં નાવગીતં કૃતરસરચનૈર્નૈવ ભાવૈરભાવિ ।
ઇત્યન્તઃ સ્મેરશાક્રે સદસિ ન શકિતા યત્ર પૂજાપ્સરોભિઃ કર્તું ભાવાતુરાભિઃ સ જયતિ જનિતાતૃપ્તિરૂપઃ સરોજી ॥

ઉદ્દામસ્થામવામક્રમવિષમમિલન્મારમાનપ્રમાથી મધ્યાદુન્માથિમોહોદ્ગમમમિતમહોમૌલિરાયામભીમમ્ ।
શ્રીમન્નિઃસીમભૂમાસમમહિમમહાકામધામાતિભૂમૌ સત્ત્વપ્રેમપ્રકામપ્રથિતમૃદુમના નિર્વિરામાશ્રયો વઃ ॥

સારપ્રાકારઘોરાવરણનિવરણો બન્ધનક્રૂરદૂર સ્ફારાવારાતિરૌદ્રે નરકનગરિકાકારધારિણ્યરીણામ્ ।
કારાગારોદરે યઃ સ્મરણશરણતાં કારણાકાતરાણાં યાતઃ સત્કારકારી ગુરુતરકરુણઃ પાતુ લોકેશ્વરો વઃ ॥

કલ્પાન્તોલ્લાસિહેલાચલદનિલચલોલ્લોલકલ્લોલમાલા વાચાલે નક્રજાલાકુલકલિલજલે વારિધાવુલ્લલન્તઃ ।
આલમ્બે યસ્ય નીલોત્પલવિમલમહાકુટ્ટિમાલીનલીલામ્ આલીયન્તે લધીયઃ સ જગતિ કમલી પાલનાયાલ મસ્તુ ॥

ધૂમૌઘોબન્ધબન્ધીકૃતવિધુરવિધુબ્રધ્નનિર્બન્ધધામા નીરોધોદ્ભેદબાધાબુધવિબુધવધૂધીરતોદ્ધારધુર્યઃ ।
યન્નામાધીતિધારાધરવિધૃતિકૃતામેતિ ધૂમધ્વજો ઽપિ પ્રધ્વંસં સાધુ ધેયાન્નિરવધિ સ વિધિં બુદ્ધધારો ધૃતેર્વઃ ॥

ક્રોધાદુત્ક્ષિપ્તકાલાયુધકરનિકરઃ ક્રૂરસૂત્કારકારી દાનક્લિદ્યત્કપોલાકુલમધુપકુલાકાણ્ડકાલોરુકાયઃ ।
ક્રાન્તો યન્નામકષ્ટાઙ્કુશહતિકૃપણઃ કાતરેણ કરીન્દ્રો લોકેશઃ સ પ્રકામોપકરણકરુણઃ કામકૃત્યં ક્રિયાદ્ વઃ ॥

સૂત્કારિશ્વાસપોષાકૃશવિષવમથુપ્લોષિરોષાશ્રયાશા દંશાશાદર્શિતાસ્યા ભૃશતતશિરસો નાશને દન્દશૂકાઃ ।
યન્નામાશીવિષેશદ્વિષિ વિશતિ વિષાં ધીષુ નશ્યન્ત્યનીશા લોકેશઃ સો ઽસ્તુ વિશ્વશ્રયદતિવિષમક્લેશરાશેઃ શમાય ॥

ગન્ધોદ્ગારોરુગર્વગ્રહણગજગણગ્રાસગીતોગ્રવેગઃ સાવેગોદગ્રગામી ગલગહનગુહાગાઢગમ્ભીરગર્જઃ ।
યોગૈર્યુગ્યોપયોગાનગમિ મૃગપતિર્યદ્ગણોદ્ગીતિયોગાદ્ દુર્યોગં વઃ સ યોગી સ્થગયતુ સુગતાસઙ્ગિતુઙ્ગોત્તમાઙ્ગઃ ॥

ભૂયો ઽપાયાનુમેયઃ ક્ષતદયહૃદયો ભીવિધાયી વિહાય સ્થેયાન્ શૈલોપમેયઃ શ્રયદલિગવયચ્છાયકાયો નિકાયઃ ।
સદ્યોગોપાયમાયામય ઇવ વિલયં યાતવાન્ યાતવીર્યો યત્પાદધ્યાયિનેયઃ સ સુગતનિલયો જાયતાં વો જયાય ॥

સંત્રાસાવાસભૂમિં કલિવિસરસરદ્યાદસં ભાસ્વરાસિ પ્રાસપ્રોલ્લાસિભઙ્ગં પ્રસૃતસિતલસત્કેતુસત્ફેનહાસ્યામ્ ।
યત્સેવાસાધુનાવા દ્વિષદસમસમિત્સારસેનાસ્રવન્તીં સોત્સાહાઃ સંચરન્તે સુખમસુખમસૌ સંહ્રિયાદ્ વઃ સરોજી ॥

ભૂભૃત્સંભારભેદપ્રભુકરવિભવો ભૂરિભૂભોગભીમં બિભ્રાણશ્ચિત્રભાનું ભવદતિભરભીસંભ્રમોદ્ભ્રાન્તિભૂતઃ ।
દમ્ભોલિર્ભીતિભાજામભવદભિપતન્નાશુનાભાવભૂમિર્ ભક્તેર્યસ્ય પ્રભાવાત્ સ ભવતુ ભવભિદ્વો ભૃતામ્ભોજશોભી ॥

આબાધાધૂતધૈર્યશ્ચ્યુતિવિધિસવિધો દુર્વિધક્રોધવેધ્ બાધાદુઃસાધરોધોદ્ધુરબહુવિવિધવ્યાધિસંબાધદેહઃ ।
યસ્ય ધ્યાનાવધાનાદધિકધૃતિસુધાધાનસંધારિતાસુ ર્ધીમાન્નાધેર્વિધેયો ધિયમવતુ સ વો બોધયે બુદ્ધમૂર્ધા ॥

આરાદાહૂતિયાતૃક્ષિતિપતિરતુલારાતિશાતિપ્રતાપ પ્રોદ્ગીતિર્દણ્ડનીતિપ્રથિતપિતૃપતિખ્યાતિજિદ્દણ્ડનીતિઃ ।
યત્પાદાધીતિશક્તેઃ કુપિતમતિરતિપ્રીતિમાયાતિ ભૂતેર્ વ્યાઘાતોદ્ભૂતિહેતુર્જિનવૃષવસતિઃ સંહ્રિયાદ્ વઃ સ ભીતિમ્ ॥

બ્રહ્મા જિહ્માયિતો ઽભૂદગુરુરપિ ગુરુઃ ખણ્ડિતાખણ્ડલોક્તિર્ વિષ્ણુસ્તૂષ્ણીમધૃષ્ટો વચનવિરચને વીતગર્વો ઽપિ શર્વઃ ।
તુષ્ટાસ્તુષ્ટૂષવો ઽપિ સ્ફુટમિતિ વિબુધા નો બુધા યદ્ગુણોક્તૌ સ શ્રીમાનબ્જપાણિર્જયતિ જિનમનોગોચરાન્તર્ગુણૌઘઃ ॥

ધાત્રા ચિત્રં ચરિત્રં સુરરિપુરિપુણા સત્રિનેત્રેણ નેત્ર્ ગોત્રામિત્રેણ ગોત્રં ગતિરપિ ગુરુણા રાત્રિપેણાપિ ગાત્રમ્ ।
મૈત્રં મિત્રેણ પુત્રીયિતસકલજગત્પ્રેમ પુત્રેણ ચાત્રે ર્યત્રેદં સ્તોત્રપાત્રં સ્તુતમવતુ સ વો ઽમાત્રસત્તો ઽબ્જપાણિઃ ॥

યસ્મિન્ બ્રહ્મા બહુત્વં બહુબહુમતવાનાનનાનાં નિજાના સ્કન્દો ઽપ્યાનન્દગર્ભં નુતિષુ નતિકૃતૌ નાગનાથો ઽપિ મૂર્ધ્નઃ ।
શક્રઃ શ્લાઘ્યામનૈષીન્નયનદશશતાં યં વિલોક્ય ત્રિલોકી લોકેશો નિર્વિરામાનતિનયનરતિસ્તોત્રપાત્રં સ પાયાત્ ॥

ખેદી ખે દીપ્તરશ્મિઃ કિલ વિફલમસાવધ્વનીનોધ્વનીનો લોકાલોકાર્થમાસ્તે નનુ કમલભૃતો દીપ્તતાપઃ પ્રતાપઃ ।
ધીરૈર્ધીરૈરકારિ સ્તુતિરિતિ વિહિતોલ્લાસભાસાં સભાસાં યસ્યાર્યસ્યાસ્તુ તસ્માજ્જગતિ કૃતરિપુક્ષિપ્રસાદઃ પ્રસાદઃ ॥

ન્યસ્તા યસ્મિન્નમસ્યે નતિરપિ નિતરામુન્નતિઃ પુણ્યધામ્નાં નિઃસામાન્યૈકમાન્યે ઽપચિતિરુપચિતિર્ભૂયસી ભક્તિભાજામ્ ।
ધ્યાનસ્થાનસ્ય યસ્ય સ્મૃતિરપિ સહસા વિસ્મૃતિર્ભૂતભીતેઃ સો ઽનન્તાચિન્ત્યલોકે વિહિતહિતપથો લોકનાથો ઽવતાદ્વઃ ॥

દમ્ભો દમ્ભોલિરૈન્દ્રઃ ક્વચિદકૃત સુરારાતિશાતો ઽતિશાત્ હારી હારીરણાસૌ બલવતિ વિફલાભીષુ રાજીષુ રાજી ।
ચક્રે ચક્રેણ નાર્થં હરિરિતિ જનતા નૂનમાહેતિ હેતિ વ્યાસવ્યાસક્તિમુક્તાન્ જયતિ રિપુજનોલ્લાસરોજી સરોજી ॥

લોકાતોતં દધાનઃ સુખમપિ જગતાં તીવ્રદુઃખેન દુઃખી નિત્યં નિત્યાનુરક્તો ઽપ્યશરણકૃપણપ્રાણભૃદ્યોગયુક્તઃ ।
ત્રૈલોક્યસ્યૈકનાથો ઽપ્યસમરુચિજનારાધનાબન્ધુરો યઃ સો ઽવ્યાત્ સંબુદ્ધમૌલિર્વિહિતવિસદૃશાચિન્ત્યચર્યશ્ચિરં વઃ ॥

નિર્વિચ્છેદત્રિલોકીનિહિતનિરુપમસ્નેહયોગાનુયોગા નિર્વાણો ન પ્રકમ્પ્યો બલવદલઘુભિસ્તીર્થિકોન્મત્તવાતૈઃ ।
જીયાલ્લોકેશદીપઃ સ ભુવનભવનોદ્ભૂતમોહાન્ધકાર ધ્વંસો ઽવિધ્વંસધામા પરહિતકરણોદ્યોગસંવૃત્તવર્ત્તિઃ ॥

ક્વાસૌ સર્વત્ર મૈત્રી ક્વ વિષમબહલક્લેશવિદ્વેષિદાહઃ ક્વ પ્રૌઢા મુક્તિશક્તિઃ ક્વ ચ દૃઢકરુણાપાશનિષ્પન્દબન્ધઃ ।
ક્વોપેક્ષાપક્ષપાતઃ ક્વપરહિતકૃતિવ્યગ્રતા તદ્વિચિત્રં ચિત્રં રાજીવપાણેશ્ચરિતમતિજગજ્જાયતાં જ્યોતિજિદ્વઃ ॥

સર્વાગ્રઃ સર્વરૂપપ્રથનપૃથુનયઃ સર્વદા સર્વનાથઃ સર્વેષાં સર્વથા યો વિનયવિધિમહાસર્વગુર્વર્થસિદ્ધ્યૈ ।
સર્વૈઃ સાતોતગર્વૈર્ગુરુમહિમગુણૈઃ ખર્વયન્ સર્વગર્વાન્ સર્વઃ સર્વપ્રદો વઃ સફલયતુ રૂચીઃ સર્વવિન્મૌલિરુર્વીઃ ॥

ઈશઃ સ્વામી પ્રજાનાં પતિરમરગુરુર્લોકપાલો મહેન્દ્રો ભાસ્વાન્ દત્તારિદણ્ડઃ પરજયબલિજિદ્ વિત્તદો જૈત્રપાશઃ ।
ઇત્યન્તર્હાસગર્ભં ભણતિ પરિજને ઽન્વર્થનામ્નાં નિજાનાં પાત્રે યત્રાનુલજ્જૈર્નતમમરગણૈરબ્જપાણિઃ સ જીયાત્ ॥

વર્યાર્યાણાં વરેણ્યો વરપરવિધુરોત્સારણા સંવરો વ્ દુર્વારૈઃ સારમારૈરમિતકરધરો દુર્ધરો વૈરિવીરૈઃ ।
વીરો વીરારિવારી પ્રચુરતરવરોદારસંભારવારિ સ્ફારાસારોરુધારાવિસરવિતરણાધીરધારાધરઃ સ્યાત્ ॥

નિત્યોદ્યુક્તે ઽતિશક્તે પ્રભવતિ નલિનોદ્ભાસિ હસ્તે સમસ્તો નાથી સંસારયાદઃપતિપથપથકો લોક ઇત્યાકલય્ય ।
યસ્મિન્ વિન્યસ્ય ભારં લઘુરલઘુકૃપો વિશ્વદીપં પ્રપેદે બુદ્ધો ઽવન્ધ્યપ્રતિજ્ઞાકૃતધૃતિવિધૃતિર્નિર્વૃતિં સો ઽવતાદ્વઃ ॥

ઉચ્ચૈરૂઢો ગરીયાન્ સુગત ઇવ જગત્કાર્યસંભારભારો ન્યસ્તા હસ્તે પ્રશસ્તા નિજ ઇવ કમલાલંકૃતિર્ભક્તિભાજામ્ ।
નિર્વાણં નારકાગ્નેર્નિચય ઇવ ચિરં પ્રાપિતઃ સત્ત્વસાર્થઃ તીવ્રક્લેશપ્રબન્ધો જન ઇવ શમિતો યેન પાયાત્ સ યુષ્માન્ ॥

યો નાનાનન્તરૂપપ્રકટનપટિમખ્યાતમાયો ઽપ્યમાયઃ સંશાન્તાશેષભીરપ્યતિકરુણતયા કાતરાચારકારી ।
વીતક્રોધો ઽપિ દુષ્ટાશયદમનબુધક્રોધનિત્યાનુબન્ધઃ સંબુદ્ધોદ્ભાસિમૌલિઃ સ જયતિ મહતાં ચિન્તનીયો ઽપ્યચિન્ત્યઃ ॥

ધત્તે નૈવોત્તમાઙ્ગં પરમપિતુ વપુર્યો ઽમિતાભાભિરામં સન્નાલં નારવિન્દં ગુરુભયવિધુરા વૈરિસેનાપિ યસ્ય ।
યેનાબદ્ધા જટા નો જગદહિતહતિવ્યાપૃતેનાપિ કક્ષા દક્ષો ઽસૌ રક્ષતાદ્વઃ કુપિતયમમુખાલોકનાલ્લોકનાથઃ ॥

શેષાશઙ્કી ચકમ્પે ભવસલિલનિધિઃ ક્લેશસાર્થૈઃ પ્રલીન વિશ્રાન્તં બોધિસત્ત્વૈર્મુનિરપિ શુશુભે શ્લાઘ્યનિર્વાણલીલઃ ।
યસ્મિન્નાબદ્ધકક્ષે પ્રસરતિ પરિતો ઽશેષસત્ત્વાર્થકાર્ય વ્યાયામે સ પ્રકામં શમયતુ સુગતાવાસમૌલિર્મલં વઃ ॥

પ્રત્યૂહવ્યૂહબાધાવિઘટનવિષમે માનસસ્યાપ્યભૂમૌ કર્મણ્યેકાન્તશર્મચ્છિદિ જગદહિતોચ્છિત્તયે પદ્મપાણિઃ ।
નિઘ્નઃ ક્રીતો ઽથ ભીતો બલવદિવ યયા નિર્વિકારો નિયુક્તઃ સા નાથસ્યાતિગુર્વી પ્રભુરવતુ કૃપા નિષ્કૃપાદન્તકાદ્વઃ ॥

ભૂમિર્નૈવાભિભૂતેર્મૃદુતરમપિ યલ્લોકધાતૂનનન્તાન્ અત્યન્તાવીર્યવીર્યં યુગપદપિ ભૃશં ભાસયંસ્ત્રાસશાન્ત્યૈ ।
ખદ્યોતોદ્યોતલેશાનુકૃતિવિલિસિતાશેષતેજસ્વિતેજસ્ તેજો લોકેશ્વરં વો હરતુ હૃદિ ભવદ્ભૂરિમોહાન્ધકારમ્ ॥

નિઃશેષાકાશધાતુર્જન ઇવ જનિતાપૂરિતાશઃ સમન્તાત્ પ્રારબ્ધઃ સર્વભાસામિવ નિરતિશયાપાયરાશેર્વિલોપઃ ।
સાર્ધં સાન્દ્રાન્ધકારૈઃ શમમગમિ મહાનૃદ્ધિમાન્માનિમારો યેનોદ્ભાસઃ સ ભૂયાત્ સરસિરૂહભૃતો ભૂતયે જાયતાં વઃ ॥

ઈશો ઽન્યદ્યોતનાશો બલભિદિતરભાદુઃશમધ્વાન્તરાશેઃ સત્ત્વદ્રોહાશયાનામનુપમતપનો યો ઽચ્યુતશ્ચિત્રભાનુઃ ।
નાનાનન્તાચલાદિવ્યવહિતવિષયોદ્ભાસને શક્તિધારી લોકેશોદ્ભાસ એકોપ્યમરગણનિભો ભીભિદે વઃ સ ભૂયાત્ ॥

સંપન્નાશેષસત્ત્વપ્રચુરજલચરેચ્છાસુખં યત્ર દૂરં દુર્લઙ્ઘયે યાન્ત્યધસ્તાદ્ ગિરય ઇવ જનાનર્થદુસ્તીર્થ્યસાર્થાઃ ।
દુર્વારો ઽસૌ સમન્તાત્ પૃથુભવભુવનાભાવસંરમ્ભજૃમ્ભી ભીદાવાગ્નિપ્રશાન્ત્યૈ કરકમલવિભામ્ભોનિધિર્જૃમ્ભતાદ્વઃ ॥

નિર્વાણો નારકાગ્નિઃ કિમિતિ યદિ વિનેયેષુ ધર્મામૃતૌઘો રાશિર્બદ્ધો જટાનાં યદિ ગતિરહિતઃ કિં સમહો રિપૂણામ્ ।
મર્ધાગારે ગરીયાન્ યદિ વસતિ જિનો બન્ધુરા કિં ત્રિલોકી નાથસ્યેત્થં વિચિત્રા વ્યવહૃતિરહિતં હન્તુ વો લોકબન્ધોઃ ॥

મૂર્ચ્છત્યેકાપિ સત્ત્વાશયવશવિહિતાકારભેદાભિરામ્ દુર્ભેદાભૂતકલ્પા ચલદચલમહારમ્ભદમ્ભોલિકોટિઃ ।
લૌકેશી સન્મનીષાકુમુદશશિરુચિસ્તીર્થિકાનર્થકોટિ ધ્વાન્તાન્તર્ધાનભાનુર્ભવતુ ભવભિદે દેશના શાસની વઃ ॥

દુર્વાદોન્માદનાદિપ્રચુરમદકણાદાક્ષપાદાદિવાદિ પ્રોદ્યન્નાનાવિવાદાસ્પદમદસદસાં સાપવાદો વિવાદઃ ।
ઉત્સાદઃ સપ્રમાદોન્મદજનવિપદાં કોવિદાનાં પ્રસાદો ભાવાનુત્પાદવાદો જયતિ જિનવપુઃ પાદસંપાદમૌલેઃ ॥

ત્રસ્તવ્યસ્તારિશસ્ત્રં ત્રયિ જગતિ ચકાસ્તિ સ્તુતો યદ્ગભસ્તિ સ્તોમો વિસ્તીર્ણતોયં મરુનિલયસદાં વિસ્તરધ્વસ્તતાપઃ ।
સ સ્તાદસ્તાહિતાસ્ત્રો બલિવલિકુલિશઃ પદ્મહસ્તસ્ય હસ્તો ઽનાપાસ્ત્યૈઃ વં સમસ્તત્રિભુવનવિકસત્સાધ્વસાપાસ્તિશસ્તઃ ॥

સંવર્તોદ્વૃત્તવાતવ્યતિકરવિષયોત્તુઙ્ગશૈલદ્રુમાલી નિર્મૂલોન્મૂલનાય પ્રભુરરિકરિણાં શાતિતાનલ્પદર્પઃ ।
ભદ્રો લોકેશ્વરસ્ય પ્રણયિમધુકરાકર્ષદાનૌઘવર્ષી હસ્તસ્તમ્બેરમો વો ભવરિપુનગરીભઞ્જનાયાલમસ્તુ ॥

સત્કોષં સન્નિધાનં ઘનરુચિજિનતાવાઞ્છિતાચ્છેદસિદ્ધૌ યદ્યાતં શાતકોટિમનુકૃતિમહિતત્રાસિસત્પત્રકોટિ ।
સમ્યક્સંબોધિલક્ષ્મીકૃતવસતિગુણશ્લાઘયૈવાવિમુક્તં મુક્તેસ્તત્કારણં વઃ કરકમલમલં લોકનાથસ્ય ભૂયાત્ ॥

શશ્વદ્વર્ધિષ્ણુતૃષ્ણાવિકલગલદરીવિહ્વલપ્રેતરાશેર્ આહ્લાદોત્પાદિ સત્યં કમલમધિવસદ્બોધિલક્ષ્મીકમબ્જમ્ ।
સત્પદ્મં ભૂતિવાઞ્ચ્છાવિનિહિતમનસાં સાધુસેવાપદં યત્ તલ્લોકેશસ્ય યુષ્માન્ પટુરુચિપટલીરાજિરાજીવમવ્યાત્ ॥

નાનાદુઃખપ્રતાનાં તનુકિરણઘનોત્તાપનક્લેશભાનુ મ્લાનં દીનાનનં યજ્જનમનુજનયત્યાતપત્રોપમાનમ્ ।
ગ્લાનિં મા ગાદહીનં તદખિલભુવનાન્યૂનભાનૂદ્વિતાનં લીનં લોકેશપાણૌ નલિનમમલિનં મ્લાનિમેનો નયેદ્વઃ ॥

સ્થામ્નઃ સ્થાનં મહિમ્નો મહદુદયપદં ધામધામ્નાં પ્રથિમ્નસ્ ત્રાસાવાસો રિપૂણાં દુરભિભવભવાદ્ભીભિદોદ્ભૂતિભૂમિઃ ।
કાન્તં શોભાનિશાન્તં વસતિરતિજગદ્વીર્યવિસ્તારિરાશેર્ લોકેશસ્યાસ્તુ બાહુર્બહુજગદહિતોચ્છેદનાચણ્ડદણ્ડઃ ॥

યલ્લાવણ્યામૃતૌઘં ક્ષરદપિ જનિતાતઙ્કમેવાહિતાનાં તૃપ્તિં નૈવ પ્રયચ્છત્યથ પુનરતનુપ્રીણનં લોચનાનામ્ ।
શોભાગારં વિશોભીકૃતસકલજગદ્ભૂષણં ભૂષણાનાં તદ્ભુયાદેકચીરં સુખમસુખનુદે ભાસ્વદમ્ભોજિનો વઃ ॥

મ્લાનં રૂપાભિમાનૈર્જગતિ સફલતાં લોચનૈઃ પુણ્યભાજાં યાતં ઘાતં તુ તૃષ્ણાતતિતરલતરૈર્યત્ર લાવણ્યસિન્ધૌ ।
મન્યે ઽસંખ્યૈઃ શશાઙ્કપ્રભૃતિભિરતુલં કાન્તિમદ્ભિઃ કૃતં સ્યાદ્ એકં યદ્યાસ્યમસ્યાપ્યતિજયિ જયતાં તન્મુખં પદ્મપાણેઃ ॥

યસ્મિન્ વિદ્વેષભાજામવિરતવિલસત્કાન્તિતોયૌઘમેઘૈઃ સંવૃત્તં દાહદાયિ સ્ફુટતરમસકૃદ્દુર્દિનં દેહિનાં તુ ।
ધૌતા ધ્વસ્તાનુબન્ધા બહુલમલમષીપઙ્કલેપપ્રબન્ધાઃ તદ્બુદ્ધાગારમૂર્દ્ધામુખમતિસુખદં સ્તાદ્વિચિત્રક્રિયં વં ॥

ઇષ્ટાબ્જાક્લિષ્ટપાણેઃ સ્ફુટવિકટકુટીકુટ્ટિમાન્તોપવિષ્ટ સ્પષ્ટશ્લિષ્ટામિતાભદ્યુતિપટુપટલાપાટલાભાપટિમ્નઃ ।
શોભાવિષ્ટૈરદૃષ્ટોપરિઘનઘટનસ્યોત્કટાટોપબન્ધઃ કૂટસ્યાવ્યાજ્જટાનાં કટુરકટસુહૃત્સંકટાત્કઙ્કટો વઃ ॥

અત્યન્તાહ્લાદહેતોરવિરતવિસ્તૃતસ્યામિતાભપ્રભામ્ભ સંભારસ્યૈવ સેકાન્ નિરતિશયમૃજાસુન્દરો લબ્ધવૃદ્ધિઃ ।
ઉદ્દામામોદિદિવ્યાદ્ભુતકુસુમચયૈરર્ચિતશ્ચિન્તિતાર્થ પ્રાપ્તેઃ સંપત્તયે સ્તાન્નલિનધરજટાકલ્પવલ્લીચયો વઃ ॥

યાસાં બદ્ધો વિમુક્તિં ગમયતિ નિયતામુજ્ઝિતાન્યાધિવાસો નિઃસામાન્યાં વિભૂષાં જનયતિ વપુષા યાસુ નાથો ઽમિતાભઃ ।
સર્વામોદચ્છિદો યા નિરુપમવહલામોદલિપ્તાખિલાશા લૌકેશ્યો ઽવશ્યલભ્યાં મૃતિમતિવિકટાસ્તા જટા વો હરન્તુ ॥

સંઘાતો નો જટાનામખિલજનમનોબન્ધને પાશરાશિર્ લાવણ્યં નાપિ દુઃખાનલવિકલજગજ્જીવનીયો ઽમૃતૌઘઃ ।
નામ્ભોજં દુષ્ટદમ્યાન્તકતુરગકશાક્લેશદોષાતિમોષઃ પ્રત્યાશા પોષસિદ્ધિં દિશતુ જિનશશિશ્લેષિકેશઃ શ્રિયો વઃ ॥

ઉદ્દામાપિઙ્ગતેજઃપ્રસરવિરચિતાશેષદિગ્દાહમોહ ત્રસ્તાત્રાણાત્રિલોકીકવલનરભસોલ્લાસિકાલાગ્નિકલ્પમ્ ।
દષ્ટૌષ્ઠં દુષ્ટદૃષ્ટિજ્વલિતમનુહયગ્રીવમાબદ્ધલક્ષ્મ્યા જાતા લોકેશ્વરી વઃ ક્ષણમતુલકૃપાકાતરા દૃષ્ટિરવ્યાત્ ॥

લોપં લોકઃ પ્રયાતિ સ્ફુટમખિલમહાભૂભૃતામદ્ય તૂર્ણ ચૂર્ણીભાવો ધરાણામપિ જલનિધયઃ શોષમાયાન્ત્યનન્તાઃ ।
ઇત્થં યસ્યાન્તકોપભ્રુકુટિભરભવદ્ભઙ્ગભીમાલ્લલાટા ન્નિર્યાન્તીં વીક્ષ્ય દેવીમતુલભુજબલૈસ્ત્રસ્તમબ્જી સ જીયાત્ ॥

સ્તુત્યૈઃ સ્તુત્યા ગુરૂણામપિ જગતિ ગુરુર્વન્દિતા વન્દનીયૈર્ મૂર્તેવાનલ્પકલ્પાર્જિતસકલજગત્ત્રાણનિર્વ્યાજશક્તિઃ ।
લોકસ્યાર્તિચ્છિદા યૈઃ સ્વયમતુલકૃપૈવાબ્જિનો નિર્ગતા સ્તાત્ તારા સંસારકારોદરગુરુવિલસત્કારણાહારિણી વઃ ॥

ગીર્વાણગ્રામગીતો ગુરુગણનગુણો ગીષ્પતેરગ્રગાભિર્ ગ્રાહ્યોનુદ્ગાઢવર્ગસ્ફુટગતિગહનો હંસગામ્યુગ્રગાભિઃ ।
ગમ્ભીરોદ્ગારિણીભિર્નિગદિતગરિમાગેયપૂગાલ્પભાગઃ સમ્યગ્ગમ્યઃ સમગ્રો ઽવતુ સુગતગિરામબ્જિનો વો ગુણૌઘઃ ॥

કવિરપિ જન્મનિ જન્મનિ ભક્તશ્ચરણે ઽવલોકિતેશ્વરસ્ય ।
પ્રકૃતિશરણગોત્તરધીઃ પરહિતગુરુકાર્યકાર્યઃ સ્યામ્ ॥