108 Buddhist stotras · અધ્યાય 37

કલ્પાદિકે ભવસિ કો હિ મમાગભાવ સર્વસ્વસાર કરુણામય વિશ્વમૂર્તે ।
કાર્યાદિકે પ્રણમતીતિ સમન્તકં ત્વાં શ્રીલોકનાથ તવ પાદયુગં નમે ઽહમ્ ॥

આકૃષ્ણકેન રજસા વિનિવર્તમાનશ્ચાયાસિ સૌમ્ય સકલઃ પ્રતિવાસરે ચ ।
હેમસ્વરૂપરથકેન સમુજ્જ્વલેન શ્રીલોકનાથ તવ પાદયુગં નમે ઽહમ્ ॥

બ્રહ્મા ત્વમેવ હિ સ વિપ્રકુલપ્રસિદ્ધો વિષ્ણુશ્ચ વૈષ્ણવમતે વરધર્મકેતુઃ ।
સર્વજ્ઞકો ઽસિ વિમતે પ્રભવો ઽવ્યયશ્ચ શ્રીલોકનાથ તવ પાદયુગં નમે ઽહમ્ ॥

બૌદ્ધાન્વયે ભવસિ વજ્રકસૂર્યરૂપો યોગેશ્વરો હિ શુભયોગકમાર્ગકેષુ ।
ગઙ્ગાધરો ભવભયસ્ય વિનાશકારિ શ્રીલોકનાથ તવ પાદયુગં નમે ઽહમ્ ॥

કારુણ્યભાવહૃદયઃ સહજઃ સરોચિર્વિચ્છિન્નકલ્મષચયો ગુણસાગરશ્ચ ।
ચિન્તામણિસ્ત્વમસિ લોકગુરુઃ કૃપેશ શ્રીલોકનાથ તવ પાદયુગં નમે ઽહમ્ ॥

બન્ધૂકવર્ણ બહુરૂપ વિશાલનેત્ર સર્વપ્રસૂતિકૃતનિષ્કૃતિકઃ સુદન્ત ।
ત્વં પદ્મપાણિ વિમલોત્તમ મિત્રરૂપઃ શ્રીલોકનાથ તવ પાદયુગં નમે ઽહમ્ ॥

તવ બહુલચરિત્રં કઃ સમર્થો ઽસ્તિ વક્તું તદપિ મુખરભાવૈઃ સ્તૂયસે ત્વં મયાત્ર ।
યદપિ પદમશુદ્ધં સર્વમેતત્ ક્ષમસ્વ સ્તુતિરિતિ કુસુમસ્રક્ ભક્તિમાત્રાર્ચનં સ્યાત્ ॥