108 Buddhist stotras · અધ્યાય 33

કુન્દપ્રસૂનસદૃશીં રુચિરાઙ્ગરાગાં નાનાવિભૂષણવિભૂષિતવજ્રદેહામ્ ।
સવ્યેન હસ્તકમલેન ભયાર્તિહન્ત્રીં યક્ષેશ્વરીં બહુસુતાં પ્રણમામિ ભક્ત્યા ॥

આલિઙ્ગિતાં નિજમસવ્યભુજેન પુત્રાન્ નેત્રૈસ્ત્રિભિશ્ચ પરિશોભિતચારુદેહામ્ ।
નાનાવિધૈર્મણિગણૈ રચિતં કિરીટં યક્ષેશ્વરીં બહુસુતાં પ્રણમામિ ભક્ત્યા ॥

તાં વહ્નિમણ્ડલગતાં વસુપત્રપદ્મે શ્રીરત્નપીઠ ઉપરિસ્થિતપાદપદ્મામ્ ।
યક્ષાદિભિઃ પરિવૃતાં લલિતાસનસ્થાં યક્ષેશ્વરીં બહુસુતાં પ્રણમામિ ભક્ત્યા ॥

લોકત્રયાર્તિશમનીં શિશુજીવદાત્રીં શ્રીહારતીં કરુણયા નિજભક્તદક્ષામ્ ।
દુઃખાપહાં જનમનોહરભોગભાજાં યક્ષેશ્વરીં બહુસુતાં પ્રણમામિ ભક્ત્યા ॥

સંત્રાસિનીં પિશુનવૃત્તિવતાં જનાનાં વિસ્ફોટકાદિરુજરાશિવિનાશકર્ત્રીમ્ ।
ભક્તેષુ ધાતૃસદૃશીં ચ સુશીતલાઙ્ગીં યક્ષેશ્વરીં બહુસુતાં પ્રણમામિ ભક્ત્યા ॥

બુદ્ધાનુશાસનરતામતિસૂક્ષ્મરૂપાં લોકત્રયાર્ચિતપદાં કરુણાર્ચિભૂતામ્ ।
ગન્ધર્વકિન્નરગણૈઃ પરિસેવ્યમાનાં યક્ષેશ્વરીં બહુસુતાં પ્રણમામિ ભક્ત્યા ॥

કેયૂરકુણ્ડલસુકઙ્કણનૂપુરાઢ્યાં નાનાવિચિત્રવસનપ્રદધાનશીલામ્ ।
સંરક્ષણીં શિશુગણાન્ પરિપાલયન્તીં યક્ષેશ્વરીં બહુસુતાં પ્રણમામિ ભક્ત્યા ॥

સ્વર્ભૂરસાતલમવસ્થિતભુક્તિદાન સંસક્તપૂર્ણહૃદયાં ત્રિગુણાત્મરૂપામ્ ।
તાં સંસ્મરામ્યહરહઃ શરણં પ્રપદ્યે યક્ષેશ્વરીં બહુસુતાં પ્રણમામિ ભક્ત્યા ॥

રક્ષાકરીં સ્તુતિમિમાં પ્રપઠેન્મનુષ્યઃ શ્રીહારતીં નિજગૃહે શિશુરક્ષણાય ।
વાચં શ્રિયં સુવિપુલં ચ સુખાદિ સર્વં દાત્રી ત્રિકં પઠતિ યઃ પ્રયતઃ પ્રભાતે ॥