108 Buddhist stotras · અધ્યાય 19

સંબુદ્ધં પુણ્ડરીકાક્ષં સર્વજ્ઞં કરુણાત્મકમ્ ।
સમન્તભદ્રં શાસ્તારં શાક્યસિંહં નમામ્યહમ્ ॥

શ્રીઘનં શ્રીમતિં શ્રેષ્ઠં શીતરાશિં શિવંકરમ્ ।
શ્રીમન્તં શ્રીકરં શાન્તં શાન્તમૂર્તિં નમામ્યહમ્ ॥

નૈરાત્મ્યવાદિનમિન્દું નિરવદ્યં નિરાશ્રયમ્ ।
શ્રુતિજ્ઞં નિર્મલાત્માનં નિસ્થૂલકં નમામ્યહમ્ ॥

નિરોધકં નિત્યજ્ઞાનં નિર્વિકલ્પં તથાગતમ્ ।
નિયતં નિધિનાકેશં નિષ્પ્રપઞ્ચં નમામ્યહમ્ ॥

વિશ્વેશ્વરં વિમુક્તિજ્ઞં વિશ્વરુપં વિનાયકમ્ ।
વિશ્વબ્રહ્મ સુસમ્પન્નં વીતરાગં નમામ્યહમ્ ॥

વિદ્યાચરણસંપન્નં વિશ્વેશં વિમલપ્રભમ્ ।
વિનિમજ્ઞં સવિષ્ટમ્ભં વીતમોહં નમામ્યહમ્ ॥

દુર્દાન્તદમકં શાન્તં શુદ્ધં શૌદ્ધોદનિં મુનિમ્ ।
સુગતં સુગતિં સૌમ્યં શુભ્રકીર્તિં નમામ્યહમ્ ॥

યોગેશ્વરં દશબલં લોકજ્ઞં લોકપૂજિતમ્ ।
લોકાચાર્યં લોકમૂર્તિં લોકનાથં નમામ્યહમ્ ॥

કનકમૂર્તિં કર્માબ્ધિમકલઙ્કં કલાધરમ્ ।
કાન્તમૂર્તિં દયાપાત્રં કનકાભં નમામ્યહમ્ ॥

મહામતિં મહાવીર્યં મહાવિજ્ઞં મહાબલમ્ ।
મહામહં મહાધૈર્યં મહાબાહું નમામ્યહમ્ ॥

આદ્યં પવિત્રં તદ્બ્રહ્મમપરાજિતમદ્ભુતમ્ ।
આર્યં પરહિતં નાથમમિતાભં નમામ્યહમ્ ॥

દેવદેવં મહાદેવં દિવ્યં વન્દિતમવ્યયમ્ ।
પ્રમાણભૂતં દેવેશં દિવ્યરૂપં નમામ્યહમ્ ॥

પરમાર્થં પરજ્યોતિં પરમં પરમેશ્વરમ્ ।
ભાવાભાવકરં શ્રેષ્ઠં ભગવન્તં નમામ્યહમ્ ॥

ચતુર્મારાદિવિજિતં તત્ત્વજ્ઞં શંકરં શિવમ્ ।
તત્ત્વસારં સદાચારં સાર્થવાહં નમામ્યહમ્ ॥

જિતેન્દ્રિયં જિતક્લેશં જિનેન્દ્રં પુરુષોત્તમમ્ ।
ઉત્તમં સત્પદં બ્રહ્મ પુણ્યક્ષેત્રં નમામ્યહમ્ ॥

એતૈઃ સ્તુત્વા મુનિશ્રેષ્ઠં નરા વિગતકલ્મષાઃ ।
પ્રાપ્નુવન્તિ પદં મોક્ષં દિવ્યં ત્વથ સનાતનમ્ ॥

યસ્ત્વિદં પઠતે નિત્યં પ્રાતરૂત્થાય પણ્ડિતઃ ।
નામ્નામષ્ટોત્તરશતં પવિત્રં પાપનાશનમ્ ॥

લભતે ચેપ્સિતાન્ ભોગાન્ સૌમનસ્યેન વર્ણિતાન્ ।
વ્યાધયો ઽપિ ન બાધ્યન્તે પાતકં ચ વિનશ્યતિ ॥

આયુરારોગ્યમૈશ્વર્યસર્વમોક્ષસમન્વિતઃ ।
મેધાવી ચ તથા વાગ્મી જાયતે જન્મજન્મનિ ॥