108 Buddhist stotras · અધ્યાય 18

જ્ઞાનં યસ્ય સમસ્તવસ્તુવિષયં યસ્યાનવદ્યં વચો યસ્મિન્ રાગલવો ઽપિ નૈવ ન પુનર્દ્વેષો ન મોહસ્તથા ।
યસ્યાહેતુરનન્તસત્ત્વસુખદા ઽનલ્પા કૃપામાધુરી બુદ્ધો વા ગિરિશો ઽથવા સ ભગવાન્ તસ્મૈ નમસ્કુર્મહે ॥

દેવઃ શમ્ભુર્ન વૈરી હરિરપિ ન રિપુઃ કેવલી નો સપત્નો નોદાસીનઃ સ્વયમ્ભુર્ન ચ પુનરપરે તે પરે વાસવાદ્યાઃ ।
શાસ્તા બુદ્ધો ન બન્ધુર્જગતિ ન જનકો નૈકગોત્રૈકજાતિઃ કિન્ત્વેષાં વીતરાગો ભવતિ સકલવિદ્ યઃ સુધીભિઃ સ સેવ્યઃ ॥

બ્રહ્મા વિદ્યાભિભૂતો દુરધિગમમહામાયયાલિઙ્ગિતો ઽસૌ વિષ્ણૂ રાગાતિરેકાન્નિજવપુષિ ધૃતા પાર્વતૌ શઙ્કરેણ ।
વીતાવિદ્યો વિમાયો જગતિ સ ભગવાન્ વીતરાગો મુનીન્દ્રઃ કઃ સેવ્યો બુદ્ધિમદ્ભિર્વદત વદત મે ભ્રાતરસ્તેષુ મુક્ત્યૈ ॥

બ્રાહ્મં વૈષ્ણવમૈશ્વરઞ્ચ બહુધા લબ્ધ્વા પદં હેતુતૈઃ (તઃ) સંસારે વત સંસરન્તિ પુનરપ્યેકાન્તદુઃખાસ્પદે ।
કિન્તૈર્દેહભૃતામપાયબહલૈરાદ્યન્તવદ્ભિઃ પદૈસ્ તસ્માન્નિત્યમનાદિમધ્યનિધનં બૌદ્ધં પદં પ્રાર્થ્યતામ્ ॥

ચિદાકારં સૂક્ષ્મં વિભુવિશદમાકારરહિતં નિરીહં નીરૂપં નિરવધિકૃપાબીજમજરમ્ ।
સમસ્તજ્ઞં સર્વોપધિરહિતમૈશ્યાદમૃતદં જિતાનઙ્ગૈઃ સેવ્યં ભવતુ મમ તદ્વસ્તુ શરણમ્ ॥

અણીયો ઽણોઃ ક્લેશાપ્રતિહતમનન્તં ચ મહતો મહીયો માહાત્મ્યપ્રવિજિતજગદ્ભૂરિકરુણમ્ ।
દ્વિબાહું નિર્બાહું દ્વિપદમપદં સત્રિવદાનમ્ દ્વિનેત્રં નિર્નેત્રં સગુણમગુણં તત્તુ શરણમ્ ॥

સદાનન્દં તથ્યં સરસહૃદયં સૂક્તિસદનં સતાં સેવ્યં સમ્યક્સમધિગતતત્ત્વં સમમનઃ ।
સ્વતઃ સિદ્ધં સાધ્યં સકલફલદં સૌમ્યવદનં સદીયં સર્વીયં ભવતુ મમ તદ્ વસ્તુ શરણમ્ ॥

સ્વયમ્ભૂતાભિજ્ઞં ભવભયહરં ભીતિરહિતં સ્ફુરદ્ભાગ્યો ભોગોજ્ઝિતમહતવીર્યં મદનજિત્ ।
ચતુર્માર્ગં શુદ્ધપ્રકૃતિ ચ તથાકર્તૃકમિદં મુદં લોકોત્કૃષ્ટામતનુ તનુતાં વસ્તુ જગતામ્ ॥

ક્વચિન્નીલં પીતં ક્વચિદપિ ચ રક્તં ક્વચિદપ્ ક્વચિચ્ચન્દ્રચ્છાયં ક્વચિદપિ ચ માઞ્જિષ્ઠરુચિરમ્ ।
ક્વચિત્ પ્રાભાસ્વર્ય્યં યદયતિ ચ વર્ણવ્યતિકરા ચ્છિખાષટ્કં તૈસ્તૈર્દધદુપરિ તદ્વસ્તુ શરણમ્ ॥

પરાભેદ્યં જામ્બૂનદરૂચિરવર્ણં ત્રિશરણં ત્રિયાનં ત્રિપ્રજ્ઞં ત્રિભુવનશરણ્યં ત્રિવચનમ્ ।
કૃપાપાત્રં મન્દસ્મિતમરુણસચ્ચીવરધરં કૃતધ્યાનં સિદ્ધાસનઘટિતપાદ્ વસ્તુ શરણમ્ ॥

પ્રસન્નં ફુલ્લેન્દીવરનયનયુગ્મં ત્રિપિટકં મુહુર્વ્યાકુર્વાણં સુરનરગણેભ્યઃ કરુણયા ।
પરં શાન્તં સ્વર્ણોપલરજતલોષ્ટ્રેષુ ચ સમં દૃશાં નવ્યાતિથ્યં ભવતુ મમ તદ્ વસ્તુ શરણમ્ ॥

શરણમિતિ સદગ્રં સાધુ ગચ્છામિ બુદ્ધં શરણમિતિ વિરાગાગ્રીયમન્વેમિ ધર્મમ્ ।
શરણમિતિ ગણાનામગ્રિયં યામિ સંઘં શરણમિતિ પુનસ્ત્રિં દ્વિત્રિવારં વ્રજામિ ॥

પુનરપિ શરણં વ્રજામિ બુદ્ધં પુનરપિ લોકગુરું ગુરું કરોમિ ।
પુનરપિ કથયામિ નૌમિ વન્દે, ત્વયિ મમ ગૌતમ નૈવ તૃપ્તિરાસ્તે ॥

ત્રિભુવનમસકૃન્નિરૂપ્ય યુષ્મત્પદસરસીરુહરેણુમાશ્રિતો ઽહમ્ ।
શરણમયમયઞ્ચ દૈવતમ્મે ગતિરપરા મમ નાસ્તિ નાસ્તિ નાસ્તિ ॥

અનિત્યમખિલં દુઃખમનાત્મેતિ પ્રવાદિને ।
નમો બુદ્ધાય ધર્માય સઙ્ઘાય ચ નમો નમઃ ॥

ભો વીતરાગ ભગવંસ્તવ પાદમેવ વન્દે મુનીન્દ્ર મુહુરેવમિમં પ્રવન્દે ।
ભૂયઃ પુનઃ પુનરિમં પરતઃ પરસ્તાત્ પાર્શ્વદ્વયોરુપરિ દિક્ષુ વિદિક્ષુ વન્દે ॥

ગતમિહ ભવતા પથા ચ યેન સ્થિતમપિ યત્ર ચ યત્ર વા નિષણ્ણમ્ ।
શયિતમપિ મુનીન્દ્ર યત્ર યોગાત્ તદપિ શતં પ્રણમામિ પુણ્યતીર્થમ્ ॥

સમજનિ ભગવાન્ સ્વયં સ્મ યસ્મિન્ સકલમબોધિ ચ યત્ર ધર્મચક્રમ્ ।
વિશદતરમદીપિ યત્ર યસ્મિન્નમૃતમપૂરિ તદપ્યહં નમામિ ॥

સર્વજ્ઞચક્રસરસીરુહરાજહંસ કુન્દેન્દુસુન્દરરુચિં સુરવૃન્દવન્દ્યમ્ ।
સદ્ધર્મચક્રસહજં જનપારિજાતં શ્રીદન્તધાતુમમલં પ્રણમામિ ભક્ત્યા ॥

નાગાલયોપરિ ધરાલયચક્રવાલમૂર્ધ્નિ ત્રિકૂટગતકાઞ્ચનશૈલશૃઙ્ગે ।
બોધિદ્રુમૂલનિહિતાક્ષયધાતુબિમ્બં વિભ્રન્નમામિ શિરસા જિનચૈત્યમગ્રમ્ ॥

હૈમાલવાલવલયાન્તરત્નવેધી વજ્રાસનોલ્લસિતમૂલમગેન્દ્રબોધમ્ ।
યં પ્રાપ્ય મારવિજયાનુપદં પ્રપેદે સર્વજ્ઞતાં સ ભગવાન્ તમહં નમામિ ॥

મૂર્દ્ધન્ બુદ્ધં નમ ત્વં શ્રવણ શૃણુ સદા ધર્મમદ્વૈધવાદિ પ્રોક્તં સર્વત્ર રૂપં નયન નિરુપમં પશ્ય જિઘ્રાઙઘ્રિપદ્મમ્ ।
ઘ્રાણ ત્વં ચાર્કબન્ધોઃ સ્તુહિ સખિ રસને શ્રીઘનં પૂજયેથાઃ સિદ્ધં પાણે વ્રજાઙ્ઘ્રે જિનસદનમદસ્મદ્ગુણં ચિત્ત ચિન્ત્ય ॥

બુદ્ધો ધર્મશ્ચ સંઘસ્ત્રિતયમિતિ મહાનર્ઘરત્નં મુમુક્ષો રદ્યારભ્યાહમસ્મૈ ત્રિભવભયભિદે સન્દદામ્યાત્મભાજમ્ ।
એષો ઽહં તત્પરઃ સ્યામ્પરમયનમિતો નાસ્તિ મે સત્યમેતત્ સ્યામસ્યાહન્તુ શિષ્યસ્ત્રિદશનુતમિદં કોટિકૃત્વો નમામિ ॥

નાહં લાભાર્ચનાર્થી ન ચ ભયચકિતો નાપિ સત્કીર્તિકામો ન ત્વં ધર્માંશુવંશપ્રભવ ઇતિ મુને નાપિ વિદ્યાશયા તે ।
પારમ્પર્યાન્નચ ત્વાં શરણમુપગતઃ કિન્તુ તે સાર્વજન્યં સમ્યગ્જ્ઞાનં સમીક્ષ્ય ત્વયિ ભવજલધિં સન્તરીતું પ્રવૃત્તઃ ॥

ત્વદ્વૈરાગ્યસમસ્તભૂતકરુણા પ્રજ્ઞાદિનાનાગુણ સ્ફૂર્જ્જચ્ચન્દનપઙ્કસિન્ધુપતિતો ગન્તું ક્ષમો નાન્યતઃ ।
ભૂપા વા યદિ દણ્ડયન્તિ વિબુધા નિન્દન્તિ વા બાન્ધવા મુઞ્ચન્તિ ક્ષણમપ્યહં જિન પિતર્જીવામિ ન ત્વાં વિના ॥

સ્વર્ગે વા વસતિર્મમાસ્તુ નિરયે તિર્યક્ષુ કિં વાસુરે પ્રેતાનાં નગરે ઽથવા નરપુરે ક્વાપ્યન્યતઃ કર્મણા ।
ભો સર્વજ્ઞ તતસ્તતસ્તવ ગુણાન્ કર્ણામૃતસ્યન્દિનો નિષ્પાપાનવલમ્બતાં મમ મનો નાન્યા સુખપ્રાર્થના ॥

તવૈવાહં દાસો ગુણપણગૃહીતો ઽસ્મિ ભવતા તવૈવાહં શિષ્યઃ સ્વવચનવિનીતો ઽસ્મિ ભવતા ।
તવૈવાહં પુત્રઃ સ્મૃતિકૃતસુખસ્તદ્ગતિગતો ગુરો બુદ્ધસ્વામિન્ મમ જનક માં પાહિ ભવતઃ ॥

પિતા માતા ભ્રાતા ત્વમસિ ભગિની ત્વં ચ વિપદિ સ્થિરં મિત્રં બન્ધુઃ પ્રભુરમૃતદીક્ષાગુરુતમઃ ।
ત્વમૈશ્વર્ય્યં ભોગો ત્વમસિ ધનધાન્યં ચ મહિમા યશો વિદ્યા પ્રાણસ્ત્વમસિ મમ સર્વજ્ઞ સકલમ્ ॥

વીતરાજ મુનીન્દ્ર દયામ્બુધે સુગત ભગ્નબૃહદ્ભવપઞ્જર ।
અધિગતામૃત બુદ્ધ મનો ઽમ્બુજં મમ તવાનઘ ગન્ધકુટીયતામ્ ॥

અનાત્મન્યનિત્યે ઽશુભે દુઃખદુઃખે દુરન્તે ઽત્ર સંસારચક્રે ભ્રમન્તમ્ ।
ત્વમેકોસિ માં ત્રાતુમીશો દયાબ્ધે પ્રભો ઽતઃ પ્રસીદ પ્રસીદ પ્રસીદ ॥

પ્રસીદેશ દેવેશ લોકેશ જિષ્ણો જગદ્વન્દ્ય મદ્વન્દ્ય સદ્વન્દ્ય બુદ્ધ ।
અઘોરે ભવારે સ્મરારે તમોરે તવૈવાસ્મિ ભક્તો વપુર્વાઙ્મનોભિઃ ॥

સ તવ કુલસુતઃ સ એવ ભક્તઃ સ ભવતિ શાસનધૂર્વહઃ સ શિષ્યઃ ।
સ ચ શરણગતઃ સ એવ દાસઃ કથમપિ યો ન વિલઙ્ઘયેત્ તવાજ્ઞામ્ ॥

જગદુપકૃતિરેવ બુદ્ધ! પૂજા તદપકૃતિસ્તવ લોકનાથ! પીડા ।
જિન જગદપકૃત્ કથં ન લજ્જે ગદિતુમહં તવ પાદપદ્મભક્તઃ ॥

ધનજનવિભવાસુદેહરાજ્યં યદુપકૃતે શતધા ત્વયા પ્રદત્તમ્ ।
તમહિતમપકર્ત્તુરસ્ય લોકં ક્વ મમ કૃપા મુદિતા ક્વ વા ચ મૈત્રી ॥

ઉપપતિમસતીવ ચિત્તવૃત્તિર્વ્રજતિ ભવન્તમપાસ્ય પઞ્ચકામમ્ ।
અપિ ચ વિષયિણો ન મોક્ષસિદ્ધિઃ કિમુ કરવાણિ મુનીન્દ્ર દેહિ દાસ્યમ્ ॥

પ્રિયતમ પુરુષોત્તમાગ્રબુદ્ધ શ્રમહર સિદ્ધ જગત્પ્રસિદ્ધકીર્તે ।
ભવ શરણમનુત્તરપ્રસાદિન્ પ્રતિપદમસ્મિ તવૈવ દાસદાસઃ ॥

દશબલ કલિકાલદુર્બલો ઽહં ચિરદુરિતાર્ણવતુઙ્ગભઙ્ગમગ્નઃ ।
તવ કથમનુયામિ ધર્મનાવં જિન મમ દેહિ કૃપાકરાવલમ્બમ્ ॥

પ્રણતિરિયમનેકશસ્તવાહં બહુ ભવદુઃખમવેક્ષ્ય ભીતિભીતઃ ।
ધર ગુરુતરતૃષ્ણયા પતન્તં જિન મમ દેહિ કૃપાકરાવલમ્બમ્ ॥

જગતિ તવ કૃપા હિ નિર્વિશેષા પ્રપવતયા જિન માં ચ દોષદુષ્ટમ્ ।
અલમહમિઅહ નો સુખી ભવેન્દુર્ન સમકરશ્ચરતીવ સાધ્વસાધ્વે(ધ્વોઃ) ॥

ઉપચિતબહુમોહજાતમન્ધં વિગતદયં વિગતાત્મબન્ધુગન્ધમ્ ।
અપગતગુણવિદ્યમુદ્ગતાઘં જનમવિવેકમવાશુ દીનબન્ધો ॥

અકરવમુરુદુષ્કૃતં પુરા યદ્ મમ વપુષા મનસા ચ ચેતસા ચ ।
અનુકલમખિલં પ્રલીયતાં તત્ તવ ચરણસ્મરણેન સર્વવેદિન્ ॥

સુગત તવ પુરઃ પુરઃ પૃથિવ્યાં મધુરમતે પતિતો ઽસ્મિ દણ્ડનત્યા ।
અકુશલમખિલં તવાનુભાવાત્ પ્રપતતુ નોત્પતતાત્ પુનઃ સહૈવ ॥

તવ ચરણસરોજમેવ વન્દે તવ પદપઙ્કજમેવ પૂજયામિ ।
તવ પદયુગમેવ ભાવયે ઽહં તવ પદમેવ સદૈવ દૈવતં મે ॥

કમપિ ન કથયામિ નાર્ચયામિ કમપિ ન નૌમિ ન ચિન્તયામિ નેહે ।
કમપિ ન શરણં વ્રજામિ હિત્વા તવ ચરણં પિતરસ્મિ કિઙ્કરસ્તે ॥

સદસિ સદસિ વાચિ સિદ્ધં પથિ પથિ સદ્મનિ સદ્મનીહ બુદ્ધમ્ ।
ભુવિ ભુવિ મમ વારિ વારિ ચેતઃ કલયતુ નિત્યમિમં હિ લોકનાથમ્ ॥

અવિરતમવલોકયામિ બુદ્ધં ગતરજસા મનસાપિ ચક્ષુષેવ ।
સ્વપિમિ નિશિ નિધાય યદ્ધૃદિ ત્વાં ન મમ સમં વિરહસ્ત્વયા ત એવ ॥

મમ તદિહ દિનં હિ દુર્દિનં સ્યાદ્ અશિતઘનસ્થગિતં ન દુર્દિનં મે ।
યદમૃતસમબુદ્ધરત્નનામ સ્મૃતિરહિતં દિનમસ્ય મા તદસ્તુ ॥

અમૃતદ ષડભિજ્ઞ ધર્મરાજ ત્રિભુવનવન્દ્ય મુનીન્દ્ર ગોતમેતિ ।
અહરહરનુકીર્ત્ત્યતે નૃભિર્યૈરહમહિતાનપિ તાન્નમામિ ધન્યાન્ ॥

દશબલ જિન સિદ્ધ વજ્રબુદ્ધે સુગત તથાગત બુદ્ધ શાક્યસિંહ ।
ઇતિ નિગદતિ યઃ ક્વચિત્ કદાચિત્ તમભિનમામ્યપિ દાસવંશજાતમ્ ॥

મદનજિત પરાજિતેભ્ય શાસ્તર્વિભવ વિનાયક વિશ્વવિદ્વરેણ્ય ।
કવિવર વદતાંવરેશ શુદ્ધોદનસુત શાક્યમુને મુને પ્રસીદ ॥

અમૃતમપિ નિપીય નિર્જરેન્દ્ર પુનરપિ તે ઽપિ શુનીસ્તનં ધયન્તિ ।
સકૃદપિ તવ વાક્સુધારસજ્ઞો ન વિશતિ જાતુ સ માતુરેવ ગર્ભમ્ ॥

અહમિહ ભગવન્નલં ન સોઢું જનનજરામરણા(મ)યાદિબાધામ્ ।
કુરુ મમ કરુણં દિશો ન જાને ગુરુ તદવેક્ષ્ય ચ તિર્યગાદિદુઃખમ્ ॥

તદુપરિ પરિચિન્ત્ય વૃદ્ધકાલે કરચરણાદિદૃગાદિપારવશ્યમ્ ।
અગતિકમતિવેપતે મનો મે જિન કિમહં કરવૈ પ્રભો પ્રસીદ ॥

શ્રવણપથગતે ઽપ્યદૃષ્ટપૂર્વે સુખકૃતિ વસ્તુનિ યત્તનોમિ તૃષ્ણામ્ ।
અવિરતમત એવ શાન્તિબીજે ત્વયિ વલતે રમતે મમાત્ર ચેતઃ ॥

સવિપદિ રમતે ન મે મનો ઽતઃ સુરનરશર્મણિ પૂર્વપૂર્વભુક્તે ।
અનુદિનમનુભૂય શર્કરાયામપિ વિરતિં કુરુતે હિ દૃષ્ટદોષઃ ॥

કરતલગતમપ્યમૂલ્યચિન્તામણિમવધીરયતીઙ્ગિતેન મૂર્ખઃ ।
કથમહમપહાય બુદ્ધરત્નં જગતિ ધની ગુણવાંશ્ચ પણ્ડિતશ્ચ ॥

સ ભવતિ મતિમાન્ સ નાકુલીનઃ સ ચ ગુણવાન્ સ ચ કીર્તિમાન્ સ શૂરઃ ।
સ જગતિ મહિતઃ સુખી સ એવ ત્વયિ જિન યસ્ય સુનિશ્ચલાસ્તિ ભક્તિઃ ॥

અપિ સકલમધીતમત્ર તેન શ્રુતમપિ સર્વમનુષ્ઠિતં ચ તેન ।
અપિ જિતમજિતેન તેન વિશ્વં ત્વયિ જિન યસ્ય સુનિશ્ચલાસ્તિ ભક્તિઃ ॥

ત્યજતિ નિજપરમ્પરાદરેણેતરસમયસ્ય જનો ન દૃષ્ટ દૃષ્ટિમ્ ।
અસુહરમપિ ગૌરવેણ માતુર્ન ખલુ શિશુર્વિષમોદકં તુ મુઞ્ચેત્ ॥

કવિવરમહમસ્મિ પણ્ડિતસ્તે જિન ન જહામિ કથન્નુ કુર્ગૃહીતમ્ ।
નુદતિ હિ તમસન્તતિં પ્રવૃત્તાં મિહિરમરીચિસહાયિની સુદૃષ્ટિઃ ॥

સુગતપદપરાઙ્મુખસ્ય પુંસઃ કિમુ તપસા યશસા ચ કિં કિમન્યૈઃ ।
સુગતપદપરાઙ્નુખસ્ય પુંસઃ કિમુ તપસા યશસા ચ કિં કિમન્યૈઃ ॥

સુગતપદિ ન ભક્તિરસ્તિ યેષામજનનિરેવ મહીતલે ઽસ્તુ તેષામ્ ।
કથિતમિહ કૃતાગસાં નરાણાં નિરયગતિર્નિયતં ન ચાન્યતો યત્ ॥

વિદિતસકલશાસ્ત્રમુન્નતાનાં કુલભવમુત્તમરુપયૌવનાદ્યમ્ ।
જિન ભવદનુપાસકં નૃપાસં ત્યજતુ મનો મલ નીચવત્તુ જાત્યા ॥

પરિહૃતમદમાનમત્સરાદિઃ સકરુણશીલસમાધિમાન્ વિવેકી ।
તવ પદદૃઢભક્તિરન્ત્યજો ઽપિ પ્રતિભવમસ્તુ નરોત્તમઃ સખા મે ॥

વિહિતજિનપદાર્ચનસ્ય ભક્તુર્દશદિવસાનપિ જીવિતં પ્રશસ્તમ્ ।
ન તુ નિયુતસહસ્રકલ્પકોટીરકૃતમુનીન્દ્રપદાબ્જપૂજનસ્ય ॥

સ ભવતિ સુરસુન્દરીસખો ઽન્યૈઃ કૃતમભિનન્દતિ વાર્ચનં ચ ભક્ત્યા ।
ત્રિદશનરગુરો ત્વદીયપૂજામગતિતયા યદિ કર્તુમક્ષમઃ સ્યાત્ ॥

સુરુચિરમતિચિત્રચિત્રરૂપં નયનપથં નયતીહ યસ્તવાર્ચામ્ ।
રહયતિ પુરુષં તમપ્યુદારં ચિરતરસઞ્ચિતદુષ્કૃતં કવીન્દ્ર ॥

મણિકનકશિલાદિનિર્મિતાં યઃ પ્રણમતિ તે પ્રતિમાં તયોશ્ચ તુલ્યમ્ ।
ફલમિહ મનસશ્ચ સમ્પ્રસાદાદનુપરતં જિન યો ઽગ્રતો નમેત્ ત્વામ્ ॥

સકૃદપિ તવ પાદપદ્મપૂજા વનકુસુમૈરપિ યઃ કરોતિ ધીમાન્ ।
અવનતસુરસંઘમૌલિમાલોજ્જ્વલમમલં શ્રયતે તમાધિપત્યમ્ ॥

યદિ ભવતિ સરૂપમેકચિત્તક્ષણશરણોદ્ભવપુણ્યવૃન્દમુચ્ચૈઃ ।
ગણશરણ સમન્તભદ્રસાધો ઽખિલનભસો ઽપ્યતિરિચ્યતે તદા તત્ ॥

તવ ગુણકથને તુ યઃ પ્રસન્નસ્તમનુવિશન્તિ મુને ગુણાસ્ત્વદીયાઃ ।
ઉદયતિ શશિનિ પ્રસન્નમિન્દૂપલમિવ તત્કિરણાવલીતુષારઃ ॥

સકૃદપિ સમદાયિ દેવ કિઞ્ચિદ્ ભવરતિમુત્સૃજતા જનેન તુભ્યમ્ ।
સુગત તદખિલાન્ લુનાતિ ધારા વદસિરિવ દ્રુમમાશ્રવાદિદોષાન્ ॥

કૃતમિહ સુકૃતં મૃષાદૃશા યજ્જનયતિ તત્ કિલ તસ્ય દુર્વિપાકમ્ ।
ક્ષિતિસલિલરસં સ્વતિક્તભાવં નયતિ યથા પિચુમર્દબીજમુપ્તમ્ ॥

તવ પદનલિને નિપત્ય ભૂયો નિપતતિ નૈવ ચતુર્ષ્વપાયકેષુ ।
નહિ કુશલકરો નરઃ કદાપિ ક્વચિદપિ દુર્ગતિમેતિ નાથ કશ્ચિત્ ॥

ઇતિ ભવદુપદેશતો વિદિત્વા તવ પદપઙ્કજપૂજને રતો ઽસ્મિ ।
દૃઢયતુ ભગવાન્ યુગે યુગે મે કુમતિમુદસ્ય ભવે ભવે ઽર્યભક્તિમ્ ॥

સ્થિરમપિ ભગવન્ ક્ષણં તવોક્તૌ કરચરણાનિ દૃગાદિ વૈરિવર્ગઃ ।
વ્યથયતિ હૃદયં બલાદ્વિચાલ્ય ત્વમિદમનાથમનીશ પાહિ પાહિ ॥

યદિ નયનમયં વશે વિધાતું યતતિ તદા દ્રવતિ શ્રવો યદા તત્ ।
તદનુ રસન-નાસિકાશરીરાણ્યહહ પરસ્પરદુર્ગ્રહાણિ ચૈવમ્ ॥

ગતિરતિચપલસ્ય ચેતસઃ સ્યાદિહ નભસીવ નભસ્વતો ઽસુરોધા ।
કભમપિ ભજતે ક્રમેણ ધૈર્યં ચિઅરમિદમભ્યસનેન સંવિરક્ત્યા ॥

વિશદમપિ મનઃ સ્વભાવતો મે ચિરકૃતકિલ્વિષકાલિમાહૃતં સ્યાત્ ।
કુશલજલલવૈઃ કથન્નુ ધૌતં ભવતિ મયેદૃશચેતસાર્જિતૈસ્તૈઃ ॥

શુચિતરવચનામૃતપ્રવાહૈઃ રઘમલિનીકૃતચિત્તસન્તતિં મામ્ ।
અનધિવર નિતાન્તમાધિતપ્તં સપદિ વિશોધય દણ્ડવન્નમામિ ॥

સતિ સકલગુરો મુને પ્રસન્ને કિમિહ દુરાપમમુત્ર કિં દુરાપમ્ ।
યદમલમનસસ્ત્વદીયદાસાઃ સુરપતિતાં મનસાપિ નાદ્રિયન્તે ॥

વિદધતિ ભયમિન્દ્રિયાણિ ભૂમ્ના વિષયવિષગ્રહણેષુ દોષદૃષ્ટ્યા ।
નહિ સુવિદિતભાવિદાહદોષઃ શિશુરપિ દીપશિખાગ્રસઙ્ગૃહી સ્યાત્ ॥

ન ભવતિ જિન યાવદેષ જીર્ણો વિષયપિશાચનિષેવણેન તાવત્ ।
ઝટિતિ સુકૃતકર્મણિ પ્રયોજ્ય સ્વવ શરણાગતવત્સલાગતં મામ્ ॥

ઇઅદમપિ યદિ વેદ્મિ પુત્રદારસ્વતનુગૃહાદિ મરીચિકામ્બુતુલ્યમ્ ।
સ્થગયતિ મમતા ચ મામહન્તા તદપિ હિ મોહવિજૃમ્ભિતં ગરીયઃ ॥

અજનિ ચ નિજકારણેન સર્વં નિરસતિ જીર્યતિ નશ્યતિ સ્વહેતોઃ ।
અહમપિ હિ તથૈવ ધાતુપુઞ્જઃ કથમહમસ્ય કથં મુને મમેદમ્ ॥

આત્મબુદ્ધિરિહ યસ્ય જાયતે સા ચ તસ્ય જનયેદહઙ્કૃતિમ્ ।
સા તનોતિ સુતરાં ભવસ્પૃહાં સૈવ મોહજનની મુહુર્મુહુઃ ॥

તેન કર્મ કુરુતે શુભાશુભં તદ્ધિ દુઃખજનકં ભવત્રયે ।
દુઃખમૂલમત એવ સાત્મધીઃ તાં લુનીહિ જિન મે વચો ઽસિના ॥

અથ સકલવિદં દયાસમુદ્રં ત્રિભુવનકારણકારણં કુલીનમ્ ।
નિખિલગતમનન્તમસ્તિશાન્તિં મુનિજનમાનસહંસમીશમીડે ॥

સ્નાને કર્મણિ ભોજને વિતરણે ઘ્રાણે તથાકર્ણને ધ્યાનસ્પર્શનદર્શનાદિષુ તથા સમ્ભાષણાદાવપિ ।
પ્રાતઃ સાયમથો દિવા ચ નિશિ ચ ત્વત્પાદપદ્મે વિભો ચિત્તં મે રમતાં મુનીન્દ્ર સતતં યૂનાં યુવત્યામિવ ॥

મત્સ્વામિન્ મદભીષ્ટકલ્પવિટપિન્ મદ્દેવતે મદ્ગુરો મન્માતર્મદુપાસ્ય મત્પ્રિયસખે મત્સદ્ગતે મત્પિતઃ ।
મદ્વિદ્યે મદશેષદુઃખશમકૃદ્ મદ્ભાવને મન્નિધે મન્મુક્તે મદુદારભાગ્ય મદસો મદ્બુદ્ધ માં પાલય ॥

બ્રહ્મા જિહ્માનનો ઽભૂદ્ ગુરુરગુરુરહર્ણાયકો ઽનાયકો ઽસૌ વિષ્ણુસ્તૃષ્ણાં પ્રપેદે કવિરકવિરભૂદીશ્વરો ઽનીશ્વરો ઽપિ ।
શેષઃ શેષાનુભાવસ્તવ સુગત નુતૌ ખણ્ડિતાખણ્ડલોક્તિઃ કો ઽહં મૂઢો વરાકસ્ત્રિદશનરપતે કીર્ત્તને તે ગુણાનામ્ ॥

દશદ્વયધિકવિંશતિસ્ફુરદશીત્યનુવ્યઞ્જનૈઃ મહાપુરુષલક્ષણં વપુષિ યસ્ય દેદીપ્યતે ।
કલામપિ ન ષોડશીં ભજતિ તસ્ય પુણ્યાત્મનશ્ ચતુર્મુખમુખો ગણો દિવિષદાં નૃણાં કા કથા ॥

મહેન્દ્રનવચાપવત્ કનકપર્વતે સર્વતઃ સદા તવ મનોહરં સ્ફુરતિ સુપ્રભામણ્ડલમ્ ।
દૃશો ભવતિ ગોચરં તદિહ યસ્ય તસ્ય ત્વરાન્ તમસ્તતિમનુત્તમાં હરતિ દૂરમન્તર્બહિઃ ॥

રૂપં લોચનલોભનં શ્રવણયોરાનન્દસન્દોહદા વાણી વિશ્વવિમોહકૃત્ તવ કૃપાવેશો ઽતિશાન્તસ્તવ ।
પાણ્ડિત્યં પ્રથિતં જગત્સુ ભગવન્ સર્વજ્ઞનામ્નૈવ તે સામ્રાજ્યસ્ય ચ યૌવને નિરસનં વૈરાગ્યસીમા સ્ફુટમ્ ॥

શૌર્યં ત્વદ્વિષમેષુ દર્પદલનાદઙ્ગીકૃતં દૈવતૈઃ યદ્વાણૈઃ સ સુરાસુરઃ પ્રવિજિતો લોકો ઽયમોશત્કરમ્ ।
વીર્યં તે પ્રકટીચકાર નિતરાં નિર્વાણસાક્ષાત્કૃતિઃ કિં બ્રૂમો બલવૈભવં ભગવતસ્તત્તે જગદ્દુર્વહમ્ ॥

યત્ર ચ્છાગતુરઙ્ગમારણવિધિર્વેદે ઽપિ તં નિન્દસિ પ્રેમ્ણા પ્રાણભૃતામતઃ સકરુણસ્ત્વત્તો મહાન્નાપરઃ ।
એવં તે ગુણસમ્પદો ન વિષયા બુદ્ધેરસૂયાત્મનાં તે મૂઢાઃ પ્રલપન્તિ હન્ત સુગતો મદ્વેદનિન્દીત્યયમ્ ॥

નિર્મજ્જત્સુરસુન્દરીકુચચલન્નિર્મન્દમન્દાકિની ફેણક્ષીરસમુદ્રકૈરવસખી સત્કીર્તિલક્ષ્મીસ્તવ ।
યન્નાલિઙ્ગતિ મન્દભાગ્યમધુના ભૂયાન્ન તેનાપિ મે સઙ્ગઃ સઙ્ગગદાદિવૈદ્ય ભગવન્નેષાપિ મે પ્રાર્થના ॥

યે ત્વાં ગચ્છન્તિ બુદ્ધં શરણમિતિ ન તે દુર્ગતિં યાન્તિ સન્તસ્ ત્યક્ત્વા કાયાન્મનુષ્યાન્નિરતિશયસુખાન્ તે લભન્તે ઽથ દિવ્યાન્ ।
દુઃસ્વપ્નો દુર્નિમિત્તં દુરહિદુરહિતા દુર્ગ્રહા દુષ્ટસત્ત્વા દુઃખં દુર્વ્યાધયો ઽપિ ક્વચિદિહ કુશલાન્ નોપસર્પન્તિ ચૈવમ્ ॥

છત્રં બ્રહ્મા વ્યધાત્તે મણિમયમમલં ચામરં ચક્રપાણિ સ્તોતારો ગદ્યપદ્યૈર્હરગુરુફણિનઃ શાઙ્ખિકો ઽભૂન્મહેન્દ્રઃ ।
અન્યે દીપોદકુમ્ભધ્વજકુસુમલસત્પાણયો ભક્તિનમ્રાસ્ તસ્થુર્વ્યાખ્યાય ધર્મં ભુવમવરુહતઃ સ્વર્ગતસ્તે મુનીન્દ્ર ॥

માતેવાસીત્ પરસ્ત્રી ભવતિ પરધને ન સ્પૃહા યસ્ય પુંસો મિથ્યાવાદી ન યઃ સ્યાન્ન પિબતિ મદિરાં પ્રાણિનો યો ન હન્યાત્ ।
મર્યાદાભઙ્ગભીરુઃ સકરુણહૃદયસ્ત્યક્તસર્વાભિમાનો ધર્માત્મા તે સ એવ પ્રભવતિ ભગવન્ પાદપૂજાં વિધાતુમ્ ॥

સર્વપ્રાણાતિપાતાત્ પરધનહરણાત્ સઙ્ગમાદઙ્ગનાયા મિથ્યાવાદાચ્ચ મદ્યાદ્ભવતિ જગતિ યો ઽકાલભુત્ક્તેર્નિવૃત્તઃ ।
સઙ્ગીતસ્રક્સુગન્ધાભરણવિલસિતાદુચ્ચશય્યાસનાદ્ અપ્યાસીદ્ધીમાન્ સ એવ ત્રિદશનરગુરો ત્વત્સુતો નાત્ર શઙ્કા ॥

શ્રોતાપત્ત્યાદિમાર્ગાઃ સદવયવયુતા ઘ્નન્તિ રાગાદિદોષાન્ દોષાસ્તે છિન્નમૂલા હતભવગતયસ્તત્ફલૈર્યાન્તિ શાન્તિમ્ ।
માર્ગાણાં ક્લેશહાનિઃ સદમૃતમજરં કારણં સ્યાન્નવાનાં ધર્માણાં હેતુરેષાં તવ જિન વચનં તસ્ય હેતુસ્ત્વમેવ ॥

વિંશત્સત્કાયદૃષ્ટિક્ષિતિધરમમલજ્ઞાનવજ્રેણ ભિત્ત્વા રાગદ્વેષાદિપાપાન્તદુદિતમખિલં કર્મ ચોન્મૂલયન્તઃ ।
ચત્વારો લબ્ધમાર્ગાસ્તદનુગુણફલાસ્તે ઽપિ ચત્વાર એવં ત્વતશ્ચાષ્ટાર્યસઙ્ઘઃ પૃથગિતિ ન પુનશ્ચિન્તયામો મુનીન્દ્ર ॥

અપિ ગગણમનન્તં સર્વસત્ત્વો ઽપ્યનન્તઃ સકલમિદમનન્તં ચક્રવાલં વિશાલમ્ ।
વદસિ જિન વિદિત્વાનન્તયા જ્ઞાનગત્યા તવ ચ ગુણમનન્તં વેદસી બુદ્ધ ચૈવમ્ ॥

ભગવતિ ભવતીતિ ધ્વંસકારિણ્યમોઘે ભવતુ ભવતુ ભક્તિર્જન્મજન્માન્તરે ઽપિ ।
ભવતુ ભવતુ ધર્મઃ સર્વથા મે ઽનુશાસ્તા ભવતુ ભવતુ સંઘો ઽનુત્તરા પુણ્યભૂમિઃ ॥

ત્રિભુવનમહનીયં ત્વામભિષ્ટુત્ય બુદ્ધં વિશદતરમદભ્રં પુણ્યમત્રાર્જિતં યત્ ।
જગતિ સકલસત્ત્વાસ્તેન સમ્બુદ્ધબોધિં વિધુતવિવિધપાપા ભાવનાભિર્વ્રજન્તુ ॥

ભાસ્વદ્ભાનુકુલામ્બુજન્મમિહિરે રાજાધિરાજેશ્વરે શ્રીલઙ્કાધિપતૌ પરાક્રમભુજે નીત્યા મહીં શાસતિ ।
સદ્ગૌડઃ કવિભારતિક્ષિતિસુરઃ શ્રીરામચન્દ્રઃ સુધીઃ શ્રીતૃણામકરોત્ સ ભક્તિશતકં ધર્માર્થમોક્ષપ્રદમ્ ॥

નૃપઃ પરાક્રાન્તિભુજો મહીભુજો શિરોમણિઃ પણ્ડિતમણ્ડલીસખઃ ।
સ રામચન્દ્રં કવિભારતિદ્વિજં ચકાર બૌદ્ધાગમચક્રવર્તિનમ્ ॥

બુદ્ધો મે જયતાં જિનઃ સ ભગવાન્ તદ્દેશના નિર્મલા સ્થેયાત્ સત્ત્વહિતાય ભાતુ ભણિતા સઙ્ઘસ્તદાધારકઃ ।
લઙ્કેશપ્રમુખાશ્ચિઅરં વસુમતીં રક્ષન્તુ નિત્યં નૃપા વર્ષન્તુ સ્તનયિત્નવશ્ચ સમયે મૈત્રીં લભન્તાં પ્રજાઃ ॥

તીર્થગ્રામપતેર્યતેસ્ત્રિપિટકાચાર્યસ્ય ભૂપાન્વયા ચાર્યશ્રેષ્ઠમુનીશ્વરસ્ય સુગિરઃ શ્રીરાહુલસ્વામિનઃ ।
શિષ્યો યો ઽવરજઃ સુમઙ્ગલમુનિર્ધીમાન્ સ્વયા ભાષયા કારુણ્યેન મુનીન્દ્રભક્તિશતકવ્યાખ્યાનમાખ્યાતવાન્ ॥

નમો બુદ્ધાય ગુરવે નમો ધર્માય શાસિને ।
નમઃ સઙ્ઘાય મહતે ત્રિભ્યો ઽપિ સતતં નમઃ ॥