108 Buddhist stotras · અધ્યાય 100

રવિવિકસ્વરભાસ્વરસુન્દરીપ્રબલકેશરસંવરકર્ણિકાત્ ।
ઉદયમસ્તકશૃઙ્ગસમુલ્લસન્નવસુપૂર્ણશશાઙ્કકરાઙ્કિતામ્ ॥

વિવિધપુષ્પરસાસવવેદ્યપિ દ્રુતવિલમ્બિતમધ્યનદદ્ધ્વનિઃ ।
અલિરુપેત્ય નિશાર્ધમહોત્સવે ધયતિ તદ્ગતધીરિતિ વિસ્મયઃ ॥

ઉદયતે ઽસ્તમુપૈતિ નિશાકરઃ પુનરતો ઽપ્યુદયાચલમૌલિતામ્ ।
ઉભયકોટિકલાપિનિરીક્ષણે ન ચ શશી ન વિભાતિ દિવાકરઃ ॥

રવિરુદેતિ સરોજદલાન્તરે શિખરતો ઽપિ વિધુઃ પ્રવિલીયતે ।
વ્રજતિ ચોર્ધ્વમસૌ વડવાનલો ગિલતિ રાહુરધઃ શશિભાસ્કરૌ ॥

કમલિનીકમલાસનલોચનપ્રકટગોચરગોચરમીલનમ્ ।
પ્રથમમઙ્ગમિદં કુલિશામ્બુજદ્વયનિમીલનમત્ર તતો ઽપરમ્ ॥

સપદિ સાધકબીજનિઘર્ષણાત્ ત્રિતયમમ્બરમેતિ ચતુર્થકમ્ ।
સહજમક્ષયધામકલાવલીકલિતકાલવિલાપનલેલિહમ્ ॥

યદિ સુશિક્ષિતવજ્રવિલાસિનીગુરુમુખાધિગમો ઽધિગતો ભવેત્ ।
ભવતિ યસ્ય તદોત્તમમધ્યમાધમવિનિશ્ચયમેતિ સ તત્ત્વદૃક્ ॥