108 Buddhist stotras · અધ્યાય 99

દેવાસુરનરવન્દિતચરણે ભવમગ્નોદ્ધરણાર્પિતચરણે ।
ત્વયિ રોદિમિ નુતિસવ્યપદેશઃ કિં પશ્યસિ પુનરનિશમશેષમ્ ॥

માતર્દેવિ કિરસિ કણમુષ્ટિં જનયદ્ યજ્ઞસુતઃ કિમતુષ્ટિમ્ ।
વજ્રવારાહિ નરાહિસુરાણાં ત્વં શરણં તવ નામપરાણામ્ ॥

હરિકર(રિ)શિખિફણિતસ્કરભીતિસ્ત્વત્પરચિત્તે નૈવ સમેતિ ।
માતર્દેવિ નિભાલય મહ્યં કિં સહસે મમ દુઃખમસહ્યમ્ ॥

તર્જનવજ્રકરોટ(વિ)ધારિણિ દુષ્ટં તુષ્ટય મારનિવારિણિ ।
અભિનવકોમલકરચરણાઙ્ગિ ત્રિવલિસમુચ્છદસપ્તવિભઙ્ગિ ॥

ગ્રાહ્યગ્રાહકભાવવિશુદ્ધે પાદકરાઙ્ગુલિજાલપિનદ્ધે ।
આયતપાર્શ્વાઙ્ગુલિકરચરણે ધ્વસ્તવ્યાધિજરાજનિમરણે ॥

ઉદ્ગતરેણુરૂર્ધ્વગતરોમા વજ્રયોગવિવૃતામૃતધામા ।
બાલમરીચિવિલોકનરક્તે જગતાં દુઃખનિરાકૃતિશક્તે ॥

સુભ્રુ તનૂદરિ મધ્યકૃશાઙ્ગિ કર્ણાન્તાયતલોચનભૃઙ્ગિ(ભઙ્ગિ) ।
ડાકિન્યે (વ હિ) વિશ્વમશેષં લોકો વેત્તિ ન તે બહુવેષમ્ ॥

યત્નમૃતે જગદર્થસમૃદ્ધિશ્ચિન્તિતમાત્રજનેપ્સિતસિદ્ધિઃ ।
મૂઢો વેત્તિ ન દુષ્કૃતકર્મ પ્રાવૃષીવ ન શિલાઙ્કુરજન્મ ॥

અન્ધ ઇવાર્કશશાઙ્કાદર્શી પાપજનો હ્યનુભાવસ્પર્શી ।
ચિન્તામણિમજ્ઞા ન વિદન્તિ પ્રજ્ઞે ત્વસ્ય ફલાનિ ફલન્તિ ॥

ચક્રાઙ્કિતકરપાદમનોજ્ઞે જ્ઞાનાનલભસ્મીકૃતસઙ્ગે ।
કાયવચનમનસા કૃતદુરિતં રાગદ્વેષમોહપરિકરિ(લિ)તમ્ ॥

તદ્દિશામિ તવ દેવિ સમક્ષં યાવદ્યામિ ન દુર્ગતિપક્ષમ્ ।
મનઃ પરમાર્થં તનુસ્તવ વેદી સ ભવતિ નૈવ દુરિતપરિખેદી ॥

લક્ષણનિખિલાલક્ષિતગાત્રે સકલાનુવ્યઞ્જનગતપાત્રે ।
નવયૌવનમદમન્થરપિણ્ડે ચલકુણ્ડલયુગમણ્ડિતગણ્ડે ॥

તુઙ્ગનિતમ્બઘનસ્તનભારે ગલકાલમ્બિનિરંશુક(ઙ્કુશ)હારે ।
સંવરમધુપવિચુમ્બિમુખાબ્જે તદ્ભુજયુગપરિરબ્ધહૃદબ્જે ॥

નિર્ભરસુરતસુખાવિકલાક્ષિ મુક્તશિરોરુહવસનનિરપેક્ષે ।
હેરુકરાહુદષ્ટમુખચન્દ્રે સસ્મિતરચિત હૂં હૂં કૃતમન્ત્રે ॥

પતિમૌલિસ્થિતવિધુમમૃષન્તી કિમુ ચન્દ્રાર્કૌ વપુ(ર)મુષન્તી ।
માતસ્તે જગદનુપમરૂપં તદ્વિચારય પરમાર્થ સ(સ્વ)રૂપમ્ ॥

ક્લેશદાહિં(હ)શમનામૃતવચનં તદ્વિનેયજનશુદ્ધિવિરચનમ્ ।
પદ્મિનીતિ નલિનામલગન્ધઃ કરુણાપરજગદર્થનિબન્ધઃ ॥

દિવ્યસુધાધર(ગત)રસપાનં તજ્જગદદ્વયબોધિનિધાનમ્ ।
પ્રત્યઙ્ગસ્પર્શો ઽપ્યનિમિત્તં સહજામ્બુધિવિપ્લાવિતચિત્તમ્ ॥

કિં ત્વં માતઃ કરિષ્યસિ તાભિઃ ષટ્ત્રિંશચ્છતકોટ્યબલાભિઃ ।
યદ્યન્યાં મનુતે બહુતાતસ્તદ્વિહાય ઝગિતિ દેહિ નુ માતઃ ॥

નાડીચક્રનિરોધ મહાસુખસંવર ।
દેવિ ત્વં શતભાવવિકલ્પા શૂન્યસમાધિરપાકૃતતુલ્યા (તલ્પા) ॥

શૂન્યકૃપે સહજાદ્વયમુક્તં વજ્રાય(જ્રયા)નમિદમવધિ(વિ)ભક્તમ્ ।
ભાવાભાવસમસ્તાકાશવ્યાપી ભવતિ સ તત્ત્વવિકાશઃ ॥

ઉદ્ભવન્તિ તત એવ વિમોક્ષા બોધિપક્ષનિખિલપ્રતિપક્ષાઃ ।
બુદ્ધાનામાવેણિકધર્મઃ સત્ત્વરાશિપરિપાચિતકર્મઃ ॥

યદ્વા યાનત્રયનિર્યાણં ધૂમાદિકમપિ ચાપરિમાણમ્ ।
ત્વદ્ભક્ત્યા યદલમ્ભિ શુભં મે ભવતુ મનો ભવતીપરમં મે ।
સકલકલુષરહિતં ગુણસિન્ધુસ્ત્વત્પરમં હ્યત એવ ન બન્ધુઃ ॥