Yogayātrā · Chapter 27
siddhārthakādarśapayoṃjanāni baddhaikapaścāmiṣapūrṇakumbhāḥ/
uṣṇīṣabhṛṅgāranṛvarddhamānapuṃyānavīṇātapavāraṇāni/
dadhimadhughṛtarocanākumāryo dhvajakanakāmbujabhadrapīṭhaśaṃkhāḥ/
sitavṛṣakusumāmbarāṇi mīnā dvijagaṇakāptajanāś ca cāruveṣāḥ//
jvalitaśikhiphalākṣatekṣubhakṣyā dviradamṛdaṅkuśacāmarāyudhāni/
marakatakuruvindapadmarāgasphaṭikamaṇipramukhāś ca ratnabhedāḥ//
svayam atha racitāny ayatnato vā yadi kathitāni bhavanti maṅgalāni/
sa jayati sakalāṃ tato dharitrīṃ grahaṇadṛgālabhanaśrutair upāsya//
kārpāsauṣadhakṛṣṇadhānyalavaṇaklīvāsthitailāvasāḥ
paṅkāṅgāraguḍāhicarmaśakṛtaḥ kleśāya savyādhitāḥ/
vātonmattajaḍendhanaṃ tṛṇatuṣakṣutkṣāmatakrārayo
muṇḍābhyaktavimuktakeśapatitāḥ kāṣāyinaś cāśubhāḥ//
paṭupaṭahamṛdaṅgaśaṃkhabherīpaṇavaravaṃ sapatākatoraṇāgram/
pracurakusumatoyaśāntareṇuṃ surabhisuveṣajanaṃ vrajec ca mārgam//E6
Original text: Yogayātrā · Edition: of Pingree, David (ed.): Brhadyatra, Government of Tamil Nadu, 1972. · Data entry Mizue Sugita · GRETIL (Göttingen) · CC BY-NC-SA 4.0