Yoga Yajnavalkya · Chapter p1

śrīyogayājñavalkya
// atha prathamo'dhyāyaḥ //
yājñavalkyaṃ muniśreṣṭhaṃ sarvajñaṃ jñānanirmalam /
sarvaśāstrārthatattvajñaṃ sadā dhyānaparāyaṇam

vedavedāṅgatattvajñaṃ yogeṣu pariniṣṭhitam /
jitendriyaṃ jitakrodhaṃ jitāhāraṃ jitāmayam

tapasvinaṃ jitāmitraṃ brahmaṇyaṃ brāhmaṇapriyam /
tapovanagataṃ saumyaṃ sandhyopāsanatatparam

brahmavidbhirmahābhāgairbrāhmaṇaiśca samāvṛtam /
sarvabhūtasamaṃ śāntaṃ satyasandhaṃ gataklamam

guṇajñaṃ sarvabhūteṣu parārthaikaprayojanam /
bruvantaṃ paramātmānamṛṣīṇāmugratejasām

tamevaṃ guṇasampannaṃ nārīṇāmuttamā vadhūḥ /
maitreyī ca mahābhāgā gārgī ca brahmavidvarā

sabhāmadhyagatā ceyamṛṣīṇāmugratejasām /
praṇamya daṇḍavadbhūmau gārgyetadvākyamabravīt

(gargī tad)
gārgyuvāca -
bhagavansarvaśāstrajña sarvabhūtahite rata /
yogatattvaṃ mama brūhi sāṅgopāṅgaṃ vidhānataḥ

evaṃ pṛṣṭaḥ sa bhagavānsabhāmadhye striyā tayā /
ṛṣīnālokya netrābhyāṃ vākyametadabhāṣata

yājñavalkya uvāca -
uttiṣṭhottiṣṭha bhadraṃ te gārgi brahmavidāṃ vare /
vakṣyāmi yogasarvasvaṃ brahmaṇā kīrtitaṃ purā

samāhitamanā gārgi śṝṇu tvaṃ gadato mama /
ityuktvā brahmavicchreṣṭho yājñavalkyastaponidhiḥ

nārāyaṇaṃ jagannāthaṃ sarvabhūtahṛdi sthitam /
vāsudevaṃ jagadyoniṃ yogidhyeyaṃ nirañjanam

ānandamamṛtaṃ nityaṃ paramātmānamīśvaram /
dhyāyanhṛdi hṛṣīkeśaṃ manasā susamāhitaḥ

netrābhyāṃ tāṃ samālokya kṛpayā vākyamabravīt /
ehyehi gārgi sarvajñe sarvaśāstraviśārade

yogaṃ vakṣyāmi vidhivaddhātroktaṃ parameṣṭhinā /
munayaḥ śrūyatāmatra gārgyā saha samāhitāḥ

padmāsane samāsīnaṃ caturānanamavyayam /
carācarāṇāṃ sraṣṭāraṃ brahmāṇaṃ parameṣṭhinam

kadācittatra gatvāhaṃ stutvā stotraiḥ praṇamya ca /
pṛṣṭavānimamevārthaṃ yanmāṃ tvaṃ paripṛcchasi

devadeva jagannātha caturmukha pitāmaha /
yenāhaṃ yāmi nirvāṇaṃ karmaṇā mokṣamavyayam

jñānaṃ ca paramaṃ guhyaṃ yathāvadbrūhi me prabho /
mayaivamukto druhiṇaḥ svayambhūrlokanāyakaḥ

māmālokya prasannātmā jñānakarmāṇyabhāṣata /
jñānasya dvividhau jñeyau panthānau vedacoditau

anuṣṭhitau tau vidvadbhiḥ pravartakanivartakau /
varṇāśramoktaṃ yatkarma kāmasaṅkalpapūrvakam

pravartakaṃ bhavedetatpunarāvṛttihetukam /
kartavyamiti vidhyuktaṃ karma kāmavivarjitam

yena yatkriyate samyak jñānayuktaṃ nivartakam /
nivartakaṃ hi puruṣaṃ nivartayati janmanaḥ

pravartakaṃ hi sarvatra punarāvṛttihetukam /
varṇāśramoktaṃ karmaiva vidhyuktaṃ kāmavarjitam

vidhivatkurvatastasya muktirgārgi kare sthitā /
varṇāśramoktaṃ karmaiva vidhivatkāmapūrvakam

yena yatkriyate tasya garbhavāsaḥ kare sthitaḥ /
saṃsārabhīrubhistasmātvidhyuktaṃ kāmavarjitam

vidhivat karma kartavyaṃ jñānena saha sarvadā /
jātāśca triṣu lokeṣu ānulomyena mānavāḥ

te devānāmṛṣīṇāṃ ca pitṝṇāmṛṇinastathā /
ṛṣibhyo brahmacaryeṇa pitṛbhyaśca sutaistathā

kuryādyajñena devebhyaḥ svāśramaṃ dharmamācaran /
catvāro brāhmaṇasyoktā āśramāḥ śruticoditāḥ

kṣatriyasya trayaḥ proktā dvāvekau vaiśyaśūdrayoḥ /
adhītya vedaṃ vedārthaṃ sāṅgopāṅgaṃ vidhānataḥ

snāyādvidhyuktamārgeṇa brahmacaryavrataṃ caran /
saṃskṛtāyāṃ savarṇāyāṃ putramutpādayettataḥ

yajedagnau tu vidhivatbhāryayā saha vā vinā /
kāntāre vijane deśe phalamūlodakānvite

tapaścaranvasennityaṃ sāgnihotraḥ samāhitaḥ /
ātmanyagnīnsamāropya sannyasedvidhinā tataḥ

saṃnyāsāśramasaṃyukto nityaṃ karma samācaran /
yāvatkṣetrī bhavettāvat yajedātmānamātmani

kṣatriyaśca caredevamāsaṃnyāsāśramātsadā /
vānaprasthāśramādevaṃ caredvaiśyaḥ samāhitaḥ

śūdraḥ śuśrūṣayā nityaṃ gṛhasthāśramaṃ ācaret /
śūdrasya brahmacaryaṃ ca munibhiḥ kaiścidiṣyate

ānulomyaprasūtānāṃ trayāṇāmāśramāstrayaḥ /
śūdravacchūdrajātānaṃ ācāraḥ kīrtito budhaiḥ

caturṇāmāśramasthānāmahanyahani nityaśaḥ /
vidhyuktaṃ karma kartavyaṃ kāmasaṅkalpavarjitam

tasmāttvamapi yogīndra svāśramaṃ dharmācaran /
śraddhayā vidhivatsamyak jñānakarma samācara

iti me karmasarvasvaṃ yogarūpaṃ ca tattvataḥ /
upadiśya tato brahmā yoganiṣṭho'bhavatsvayam

śrutvaitadyājñavalkyoktaṃ vākyaṃ gārgī mudānvitā /
punaḥ prāha muniśreṣṭhamṛṣīmadhye varānanā

gārgyuvāca -
jñānena saha yogīndra vidhyuktaṃ karma kurvataḥ /
tvayoktaṃ muktirastīti tayorjñānaṃ vada prabho

bhāryayā tvevamuktastu yājñavalkyastaponidhiḥ /
tāṃ samālokya kṛpayā jñānarūpamabhāṣata

yājñavalkya uvāca -
jñānaṃ yogātmakaṃ viddhi yogaścāṣṭāṅgasaṃyutaḥ /
saṃyogo yoga ityukto jīvātmaparamatmanoḥ

vakṣyāmyaṅgāni te samyagyathā pūrvaṃ mayā śrutam /
samāhitamanā gārgī ṛṣibhiḥ saha saṃśa‍ṛṇu

yamaśca niyamaścaiva āsanaṃ ca tathaiva ca /
prāṇāyāmastathā gārgi pratyahāraśca dhāraṇā

dhyānaṃ samādhiretāni yogāṅgāni varānane /
yamaśca niyamaścaiva daśadhā samprakīrtitaḥ

āsanānyuttamānyaṣṭau trayaṃ teṣūttamottamam /
praṇāyāmastridhā proktaḥ pratyāhāraśca pañcadhā

dhāraṇā pañcadhā proktā dhyānaṃ ṣoḍhā prakīrtitam /
trayaṃ teṣūttamaṃ proktaṃ samādhistvekarūpakaḥ

bahudhā kecidicchanti vistareṇa pṝthak śa‍ṛṇu /
ahiṃsā satyamasteyaṃ brahmacaryaṃ dayārjavam

kṣamādhṛtirmitāhāraḥ śaucaṃ tvete yamā daśa /
karmaṇā manasā vācā sarvabhūteṣu sarvadā

akleśajananaṃ proktamahiṃsāsātvena yogibhiḥ /
vidhyuktaṃ cedahiṃsā syātkleśajanmaiva jantuṣu

vedenokte'pi hiṃsāsyādabhicārādi karma yat /
satyaṃ bhūtahitaṃ proktaṃ niyatārthābhibhāṣaṇam

karmaṇā manasā vācā paradravyeṣu niḥspṛhā /
asteyamiti sā proktā ṛṣibhistattvadarśibhiḥ

karmaṇā manasā vācā sarvāvasthāsu sarvadā /
sarvatra maithunatyago brahmacaryaṃ pracakṣate

brahmacaryāśramasthānāṃ yatīnāṃ naiṣṭhikasya ca /
brahmacaryaṃ tu tatproktaṃ tathaivā raṇyavāsinām

ṛtāvṛtau svadāreṣu saṅgatiryā vidhānataḥ /
brahmacaryaṃ tu tatproktaṃ gṛhasthāśramavāsinam

rājñaścaiva gṝhasthasya brahmacaryaṃ prakīrtitam /
viśāṃ vṛttavatāṃ caiva kecidicchanti paṇḍitāḥ

śuśrūṣaiva tu śūdrasya brahmacaryaṃ prakīrtitam /
śuśrūṣā vā gurornityaṃ brahmacaryamudāhṛtam

guravaḥ pañca sarveṣāṃ caturṇāṃ śruticoditāḥ /
mātā pitā tathācāryo mātulaḥ śvaśurastathā

eṣu mukhyāstryaḥ proktā ācāryaḥ pitarau tathā /
eṣu mukhyatamastveka ācāryaḥ paramārthavit

tamevaṃ brahmavicchreṣṭhaṃ nityakarmaparāyaṇam /
śuśrūṣayārcayennityaṃ tuṣṭo'bhūdyena vā guruḥ

dayā ca sarvabhūteṣu sarvatrānugrahaḥ smṛtaḥ /
vihiteṣu tadanyeṣu manovākkāyakarmaṇām

pravṛtau vā nivṛtau vā ekarūpatvamārjavam /
priyāpriyeṣu sarveṣu samatvaṃ yaccharīriṇām

kṣamā saiveti vidvadbhirgaditā vedavādibhiḥ /
arthahānau ca bandhūnāṃ viyogeṣvapi sampadām

tayoḥ prāpto ca sarvatra cittasya sthāpanaṃ dhṛtiḥ /
aṣṭau grāsā munerbhakṣyāḥ ṣoḍaśāraṇyavāsinam

dvātriṃśacca gṛhasthānāṃ yatheṣṭaṃ brahmacāriṇām /
eṣāmayaṃ mitāhāro hyanyeṣāmalpabhojanam

śaucaṃ tu dvividhaṃ proktaṃ bāhyamābhyantaraṃ tathā /
mṛjjalābhyāṃ smṛtaṃ bāhyaṃ manaḥśuddhistathāntaram

manaḥśuddhiśca vijñeyā dharmeṇādhyātmavidhyayā /
ātmavidyā ca dharmaśca pitrācāryeṇa vānaghe

tasmātsarveṣu kāleṣu sarvairniḥśreyasārthibhiḥ /
guravaḥ śrutasampannā mānyā vāṅgmanasādibhiḥ

// iti śrīyogayājñavalkye prathamo'dhyāyaḥ //
// atha dvitīyo'dhyāyaḥ //
yājñavalkya uvāca -
tapaḥ santoṣa āstikyaṃ dānamīśvarapūjanam /
siddhāntaśravaṇaṃ caiva hrīrmatiśca japo vratam

ete tu niyamāḥ proktāstāṃśca sarvānpṛthak śa‍ṛṇu /
vidhinoktena mārgeṇa kṛcchracāndrāyaṇādibhiḥ

śarīraśoṣaṇaṃ prāhustāpasāstapa uttamam /
yadṛcchā lābhato nityamalaṃ puṃso bhavediti

yā dhīstāmṛṣayaḥ prāhuḥ santoṣaṃ sukhalakṣaṇam /
dharmādharmeṣu viśvāso yastadāstikyamucyate

nyāyārjitaṃ dhanaṃ cānnamanyadvā yatpradīyate /
arthibhyaḥ śraddhayā yuktaṃ dānametadudāhṛtam

yatprasannatvabhāvena viṣṇuṃ vā'pyanyameva vā /
yathāśaktyarcanaṃ bhaktyā hyetadīśvarapūjanam

rāgādyapetaṃ hṛdayaṃ vāgaduṣṭānṛtādinā /
hiṃsādirahitaḥ kāya etadīśvarapūjanam

siddhāntaśravaṇaṃ proktaṃ vedāntaśravaṇaṃ budhaiḥ /
dvijavatkṣatriyasyoktaṃ siddhāntaśravaṇaṃ budhaiḥ

viśāṃ ca kecidicchanti śīlavṛttavatāṃ satām /
śūdrāṇāṃ ca striyaiścaiva svadharmasthatapasvinām

siddhāntaśravaṇaṃ proktaṃ purāṇaśravaṇaṃ budhaiḥ /
vedalaukikamārgeṣu kutsitaṃ karma yadbhavet

tasminbhavati yā lajjā hrīstu saiveti kīrtitā /
vihiteṣu ca sarveṣu śraddhā yā sā matirbhavet

guruṇā copadiṣṭo'pi vedabāhyavivarjitaḥ /
vidhinoktena mārgeṇa mantrābhyāso japaḥ smṛtaḥ

adhītya vedaṃ sūtraṃ vā purāṇaṃ setihāsikam /
eteṣvabhyasanaṃ yacca tadabhyāso japaḥ smṛtaḥ

japaśca dvividhaḥ prokto vāciko mānasastathā /
vācika upāṃśuruccaiśca dvividhaḥ parikīrtitaḥ

mānaso mananadhyānabhedād dvaividhyamāsthitaḥ /
uccairjapādupāṃśuśca sahasraguṇa ucyate

mānasastu tathopāṃśoḥ sahasraguṇa ucyate /
mānasācca tathā dhyānaṃ sahasraguṇamucyate

uccairjapastu sarveṣāṃ yathoktaphalado bhavet /
nīcaiḥ śruto na cetso'pi śrutaścenniṣphalo bhavet

ṛṣiṃ chando'dhidaivaṃ dhyāyanmantraṃ ca sarvadā /
yastu mantrajapo gārgi sa eva hi phalapradaḥ

prasannaguruṇā pūrvamupadiṣṭaṃ tvanujñayā /
dharmārthamātmasiddhyarthamupāyagrahaṇaṃ vratam

// iti śrīyogayājñavalkye dvitīyo'dhyāyaḥ //
// atha tṛtīyo'dhyāyaḥ //
yājñavalkya uvāca -
āsanānyadhunā vakṣye śa‍ṛṇu gārgi tapodhane /
svastikaṃ gomukhaṃ padmaṃ vīraṃ siṃhāsanaṃ tathā

bhadraṃ muktāsanaṃ caiva mayūrāsanameva ca /
tathaiteṣāṃ varārohe pṛthagvakṣyāmi lakṣaṇam

jānorvorantare samyakkṛtvā pādatale ubhe /
ṛjukāyaḥ sukhāsīnaḥ svastikaṃ tatpracakṣate

sīvanyāstvātmanaḥ pārśve gulphau nikṣipya pādayoḥ /
savye dakṣiṇagulphaṃ tu dakṣiṇe dakṣiṇetaram

etacca svastikaṃ proktaṃ sarvapāpapraṇāśanam /
savye dakṣiṇagulphaṃ tu pṛṣṭhapārśve niveśayet

dakṣiṇe'pi tathā savyaṃ gomukhaṃ gomukhaṃ yathā /
aṅguṣṭhau ca nibadhnīyāddhastābhyāṃ vyutkrameṇa tu

ūrvorupari viprendre kṛtvā pādatale ubhe /
padmāsanaṃ bhavedetatsarveṣāmapi pūjitam

ekaṃ pādamathaikasminvinyasyoruṇi saṃsthitam /
itarasmiṃstathā coruṃ vīrāsanamudāhṛtam

gulphau ca vṛṣaṇasyādhaḥ sīvanyāḥ pārśvayoḥ kṣipet /
dakṣiṇaṃ savyagulphena dakṣiṇena tathetaram

hastau ca jānvoḥ saṃsthāpya svāṅgulīśca prasārya ca /
vyāttavaktro nirīkṣeta nāsāgraṃ susamāhitaḥ

siṃhāsanaṃ bhavedetatpūjitaṃ yogibhiḥ sadā /
gulphau ca vṛṣaṇasyādhaḥ sīvanyāḥ pārśvayoḥ kṣipet

pārśvapādau ca pāṇibhyāṃ dṛḍhaṃ baddhvā suniścalam /
bhadrāsanaṃ bhavedetatsarvavyādhiviṣāpaham

sampīḍya sīvanīṃ sūkṣmāṃ gulphenaiva tu savyataḥ /
savyaṃ dakṣiṇagulphena muktāsanamitīritam

meḍhrādupari nikṣipya savyaṃ gulphaṃ tathopari /
gulphāntaraṃ ca nikṣipya muktāsanamidaṃ tu vā

avaṣṭabhya dharāṃ samyak talābhyāṃ tu karadvayoḥ /
hastayoḥ kūrparau cāpi sthāpayannābhipārśvayoḥ

samunnataśiraḥpādo daṇḍavadvyomnisaṃsthitaḥ /
mayūrāsanametattu sarvapāpapraṇāśanam

sarve cābhyantarā rogā vinaśyanti viṣāṇi ca /
yamaiśca niyamaiścaiva āsanaiśca susaṃyutā

nāḍīśuddhiṃ ca kṛtvā tu prāṇāyāmaṃ tataḥ kuru

// iti śrīyogayājñavalkye tṛtīyo'dhyāyaḥ //
// atha caturtho'dhyāyaḥ //
śrutvaitadbhāṣitaṃ vākyaṃ yājñavalkyasya dhīmataḥ /
punaḥ prāha mahābhāgā sabhāmadhye tapasvinī

gārgyuvāca -
bhagavanbrūhi me svāminnāḍīśuddhiṃ vidhānataḥ /
kenopāyena śuddhāḥ syurnāḍayaḥ sarvadehinām

utpattiṃ cāpi nāḍīnāṃ cāraṇaṃ ca yathāvidhi /
kandaṃ ca kīdṛśaṃ proktaṃ kati tiṣṭhanti vāyavaḥ

sthānāni caiva vāyūnāṃ karmāṇi ca pṛthakpṛthak /
vijñātavyāni yānyasmindehe dehabhṛtāṃ vara

vaktumarhasi tatsarvaṃ tvatto vettā na vidyate /
ityukto bhāryayā tatra samyak tadgatamānasaḥ

gārgīṃ tāṃ susamālokya tatsarvaṃ samabhāṣata /
yājñavalkya uvāca -
śarīraṃ tāvadevaṃ hi ṣaṇṇavatyaṅgulātmakam

vidhyetatsarvajantūnāṃ svāṅgulībhiriti priye /
śarīrādadhikaḥ prāṇo dvādaśāṅgulamānataḥ

caturdaśāṅgulaṃ kecidvadanti munisattamāḥ /
dvādaśāṅgula eveti vadanti jñānino narāḥ

ātmasthamanilaṃ vidvānātmasthenaiva vahninā /
yogābhyāsena yaḥ kuryātsamaṃ vā nyūnameva vā

sa eva brahmavicchreṣṭhaḥ sa sampūjyo narottamaḥ /
ātmasthavahninaiva tvaṃ yogajena dvijottame

ātmasthaṃ mātariśvānaṃ yogābhyāsena nirjaya /
dehamadhye śikhisthānaṃ taptajāmbūnadaprabham

trikoṇaṃ manujānāṃ ca caturasraṃ catuṣpadām /
maṇḍalaṃ tatpataṅgānāṃ satyametadbravīmi te

tanmadhye tu śikhā tanvī sadā tiṣṭhati pāvakī /
dehamadhyaṃ ca kutreti śrotumicchasi cecchṛṇu

gudāttu dvyaṅgulādūrdhvamadho meḍhrācca dvyaṅgulāt /
dehamadhyaṃ tayormadhyaṃ manuṣyāṇāmitīritam

catuṣpadāṃ tu hṛnmadhyaṃ tiraścāṃ tundamadhyamam /
dvijānāṃ tu varārohe tundamadhyamitīritam

kandasthānaṃ manuṣyāṇāṃ dehamadhyānnavāṅgulam
caturaṅgulamutsedhamāyāmaśca tathāvidhaḥ

aṇḍākṛtivadākāraṃ bhūṣitaṃ tattvagādibhiḥ /
catuṣpadāṃ tiraścāṃ ca dvijānāṃ tundamadhyame

tanmadhyaṃ nābhirityuktaṃ nābhau cakrasamudbhavaḥ /
dvādaśārayutaṃ tacca tena dehaḥ pratiṣṭhitaḥ

cakre'sminbhramate jīvaḥ pāpapuṇyapracoditaḥ /
tantupañjaramadhyasthā yathā bhramati lūtikā

jīvasya mūlacakre'sminnadhaḥ prāṇaścaratyasau /
prāṇārūḍho bhavejjīvaḥ sarvabhūteṣu sarvadā

tasyordhvaṃ kuṇḍalīsthānaṃ nābhestiryagathordhvataḥ /
aṣṭaprakṛtirūpā sā aṣṭadhā kuṇḍalīkṛtā

yathāvadvāyusañcāraṃ jalānnādīni nityaśaḥ /
paritaḥ kandapārśveṣu niruddhyaiva sadā sthitā

mukhenaiva samāveṣṭya brahmarandhramukhaṃ tathā /
yogakāle tvapānena prabodhaṃ yāti sāgninā

sphurantī hṛdayākāśe nāgarūpā mahojjvalā /
vāyurvāyusakhenaiva tato yāti suṣumṇayā

kandamadhye sthitā nāḍī suṣumṇeti prakīrtitā /
tiṣṭhanti paritaḥ sarvāścakre'sminnāḍīsañjñakāḥ

nāḍīnāmapi sarvāsāṃ mukhyāstvetāścaturdaśa /
iḍā ca piṅgalā caiva suṣumṇā ca sarasvatī

vāruṇī caiva pūṣā ca hastijihvā yaśasvinī /
viśvodarā kuhūścaiva śaṅkhinī ca payasvinī

alambuṣā ca gāndhārī mukhyāścaitāścaturdaśa /
āsāṃ mukhyatamāstistrastisṛṣvekottamottamā

muktimārgeti sā proktā viśvadhāriṇī /
kandasya madhyame gārgi suṣumṇā supratiṣṭhitā

pṛṣṭhamadhye sthitā nāḍī sā hi mūrdhni vyavasthitā//
muktimārgaṃ suṣumṇā sā brahmarandhreti kīrtitā

avyaktā saiva vijñeyā sūkṣmā vaiṣṇavī smṛtā /
iḍā ca piṅgalā caiva tasyāḥ savye ca dakṣiṇe

iḍā tasyāḥ sthitā savye dakṣiṇe piṅgalā sthitā /
iḍāyāṃ piṅgalāyāṃ ca carataścandrabhāskarau

iḍāyāṃ candramā jñeyaḥ piṅgalāyāṃ raviḥ smṛtaḥ /
candrastāmasa ityuktaḥ sūryo rājasa ucyate

viṣabhāgo raverbhāgaḥ somabhāgo'mṛtaṃ smṛtam /
tāveva dhattaḥ sakalaṃ kālaṃ rātridivātmakam

bhoktrī suṣumṇā kālasya guhyametadudāhṛtam /
sarasvatī kuhūścaiva suṣumṇāpārśvayoḥ sthite

gāndhārī hastijihvā ca iḍāyāḥ pṛṣṭhapārśvayoḥ /
kuhośca hastijihvāyā madhye viśvodarā sthitā

yaśasvinyāḥ kuhormadhye vāruṇī ca pratiṣṭhitā /
pūṣāyāśca sarasvatyāḥ sthitā madhye payasvinī

gāndhāryāśca sarasvatyāḥsthitā madhye ca śaṅkhinī /
alambuṣā ca viprendre kandamadhyādadhaḥ sthitā

pūrvabhāge suṣumṇāyā āmeḍhrānte kuhūḥ sthitā /
adhaścordhvaṃ ca kuṇḍalyā vāruṇī sarvagāminī

yaśasvinī ca yāmyasthā pādāṅkhaṣṭhāntamiṣyate /
piṅgalā cordhvagā yāmye nāsāntaṃ viddhi me priye

yāmye pūṣā ca netrāntaṃ piṅgalāyāstu pṛṣṭhataḥ /
payasvinī tathā gārgi yāmyakarṇāntamiṣyate

sarasvatī tathā cordhvamājihvāyāḥ pratiṣṭhitā /
āsavyakarṇādviprendre śaṅkhinī cordhvagā matā

gāndhārī savyanetrāntamiḍāyāḥ pṛṣṭhataḥ sthitā /
iḍā ca savyanāsāntaṃ savyabhāge vyavasthitā

hastijihvā tathā savyapādāṅguṣṭhāntamiṣyate /
viṣvodarā tu yā nāḍī tundamadhye vyavasthitā

alambuṣā mahābhāge pāyumūlādadhogatā /
etāstvanyāḥ samutpannāḥ śirāścānyāśca tāsvapi

yathāśvatthadale tadvadabjapatreṣu vā śirāḥ /
nāḍīṣvetāsu sarvāsu vijñātavyāstapodhane

prāṇo'pānaḥ samānaśca udāno vyāna eva ca /
nāgaḥ krūrmo'tha kṛkaro devadatto dhanañjayaḥ

ete nāḍīṣu sarvāsu caranti daśa vāyavaḥ /
eteṣu vāyavaḥ pañca mukhyāḥ prāṇādayaḥ smṛtāḥ

teṣu mukhyatamāvetau prāṇāpānau narottame /
prāṇa evaitayormukhyaḥ sarvaprāṇabhṛtāṃ sadā

āsyanāsikayormadhye hṛnmadhye nābhimadhyame /
prāṇālaya iti prāhuḥ pādāṅguṣṭe'pi kecana

adhaścordhvaṃ ca kuṇḍalyāḥ parītaḥ prāṇasañjñakaḥ /
tiṣṭhanneteṣu sarveṣu prakāśayati dīpavat

apānanilayaṃ kecid gudameḍhrorujānuṣu /
udare vṛṣaṇe kaṭyāṃ jaṅghe nābhau vadanti hi

gudāgnyāgārayostiṣṭhanmadhye'pānaḥ prabhañjanaḥ /
adhaścordhvaṃ ca kuṇḍalyāḥ prakāśayati dīpavat

vyānaḥ śrotrākṣimadhye ca kṛkaṭyāṃ gulphayorapi /
ghrāṇe gale sphijordeśe tiṣṭhatyatra na saṃśayaḥ

udānaḥ sarvasandhisthaḥ pādayorhastayorapi /
samānaḥ sarvagātreṣu sarvaṃ vyāpya vyavasthitaḥ

bhuktaṃ sarvarasaṃ gātre vyāpayanvahninā saha /
dvisaptatisahasreṣu nāḍīmārgeṣu sañcaret

samānavāyurevaikaḥ sāgnirvyāpya vyavasthitaḥ /
agnibhiḥ saha sarvatra sāṅgopāṅgakalevare

nāgādivāyavaḥ pañca tvagasthyādiṣu saṃsthitāḥ /
tundasthe jalamannaṃ ca rasāni ca samīkṛtam

tundamadhyagataḥ prāṇastāni kuryātpṛthakpṛthak /
punaragnau jalaṃ sthāpya tvannādīni jalopari

svayaṃ hyapānaṃ samprāpya tenaiva saha mārutaḥ /
pravāti jvalanaṃ tatra dehamadhyagataṃ punaḥ

vāyunā vātito vahnirapānena śanaiḥ śanaiḥ /
tadā jvalati viprendre svakule dehamadhyame

jvālābhirjvalanastatra prāṇena preritastataḥ /
jalamatyuṣṇamakarotkoṣṭamadhyagataṃ tadā

annaṃ vyañjanasaṃyuktaṃ jalopari samarpitam
tataḥ supakvamakarodvahniḥ santaptavāriṇā

svedamūtre jalaṃ syātāṃ vīryarūpaṃ raso bhavet /
pūrīṣamannaṃ syādgārgi prāṇaḥ kuryātpṛthakpṛthak

samānavāyunā sārdhaṃ rasaṃ sarvāsu nāḍīṣu /
vyāpayañcachvāsarūpeṇa dehe carati mārutaḥ

vyomarandhraiśca navabhiḥ viṇmūtrādivisarjanam
kurvanti vāyavaḥ sarve śarīreṣu nirantaram

niḥśvāsocchvāsakāsāśca prāṇakarmeti kīrtyate /
apānavāyoḥ karmaitadviṇmūtrādivisarjanam

hānopādānaceṣṭādi vyānakarmeti ceṣyate /
udānakarma tatproktaṃ dehasyonnayanādi yat

poṣaṇādi samānasya śarīre karma kīrtitam /
udgārādi guṇo yastu nāgakarmeti kīrtyate

nimīlanādi kūrmasya kṣutaṃ vai kṛkarasya ca /
devadattasya viprendre tandrīkarmeti kīrtitam

dhanañjayasya śophādi sarvaṃ karma prakīrtitam
jñātvaivaṃ nāḍīsaṃsthānaṃ vāyūnāṃ sthānakarmaṇī

vidhinoktena mārgeṇa nāḍīsaṃśodhanaṃ kuru

// iti śrīyogayājñavalkye caturtho'dhyāyaḥ //
// atha pañcamo'dhyāyaḥ //
gārgyuvāca -
bhagavanbrahmavicchreṣṭha sarvaśāstraviśārada /
kenopāyena śuddhāḥ syurnāḍyo me tvaṃ vada prabho

ityukto brahmavādinyā brahmavidbrāhmaṇastadā /
tāṃ samālokya kṛpayā nāḍīśuddhimabhāṣata

yājñavalkya uvāca -
vidhyuktakarmasaṃyuktaḥ kāmasaṅkalpavarjitaḥ /
yamaiśca niyamairyuktaḥ sarvasaṅgavivarjitaḥ

kṛtavidyo jitakrodhaḥ satyadharmaparāyaṇaḥ /
guruśuśrūṣaṇarataḥ pitṛmātṛparāyaṇaḥ

svāśramasthaḥ sadācāraḥ vidvadbhiśca suśikṣitaḥ /
tapovanaṃ susamprāpya phalamūlodakānvitam

tatra ramye śucau deśe brahmaghoṣasamanvite /
svadharmanirataiḥ śāntairbrahmavidbhiḥ samāvṛte

vāribhiśca susampūrṇe puṣpairnānāvidhairyute /
phalamūlaiśca sampūrṇe sarvakāmaphalaprade

devālaye vā nadyāṃ vā grāme vā nagare'thavā /
suśobhanaṃ maṭhaṃ kṛtvā sarvarakṣāsamanvitam

trikālasnānasaṃyuktaḥ svadharmanirataḥ sadā /
vedāntaśravaṇaṃ kurvaṃstasminyogaṃ samabhyaset

kecidvadanti munayastapaḥsvādhyāyasaṃyutāḥ /
svadharmaniratāḥ śāntāstantreṣu ca sadā ratāḥ

nirjane nilaye ramye vātātapavivarjite /
vidhyuktakarmasaṃyuktaḥ śucirbhūtvā samāhitaḥ

mantrairnyastatanurdhīraḥ sitabhasmadharaḥ sadā /
mṛdvāsanopari kuśānsamāstīrya tato'jinam

vināyakaṃ susampūjya phalamūlodakādibhiḥ /
iṣṭadevaṃ guruṃ natvā tata āruhya cāsanam

prāṅmukhodaṅmukho vāpi jitāsanagataḥ svayam /
samagrīvaśiraḥkāyaḥ saṃvṛtāsyaḥ suniścalaḥ

nāsāgradṛk sadā samyak savye nyasyetaraṃ karam /
nāsāgre śaśabhṛdbimbaṃ jyotsnājālavitānitam

saptamasya tu vargasya caturthaṃ bindusaṃyutam /
sravantamamṛtaṃ paśyannetrābhyāṃ susamāhitaḥ

iḍayā vāyumāropya pūrayitvodarasthitam /
tato'gniṃ dehamadhyasthaṃ dhyāyañjvālāvalīyutam

rephaṃ ca bindusaṃyuktamagnimaṇḍalasaṃsthitam /
dhyāyanvirecayetpaścānmandaṃ piṅgalayā punaḥ

punaḥ piṅgalayāpūrya prāṇaṃ dakṣiṇataḥ sudhīḥ /
punarvirecayeddhīmāniḍayā tu śanaiḥ śanaiḥ

tricaturvatsaraṃ vātha tricaturmāsameva vā /
ṣaṭkṛtva ācarennityaṃ rahasyevaṃ trisandhiṣu

nāḍīśuddhimavāpnoti pṛthak cihnopalakṣitām /
śarīralaghutā dīptirvahnerjaṭharavartinaḥ

nādābhivyaktirityete cihnaṃ tatsiddhisūcakam /
yāvadetāni sampaśyettāvadeva samācaret

// iti śrīyogayājñavalkye pañcamo'dhyāyaḥ //
// atha ṣaṣṭho'dhyāyaḥ //
yājñavalkya uvāca -
prāṇāyāmamathādīnāṃ pravakṣyāmi vidhānataḥ /
samāhitamanāstvaṃ ca śa‍ṛṇu gārgi varānane

prāṇāpānasamāyogaḥ ``prāṇāyāmaḥ
itīritaḥ /
``prāṇāyāmaḥ
iti prokto recakapūrakakumbhakaiḥ

varṇatrayātmakā hyete recakapūrakakumbhakāḥ /
sa eṣa praṇavaḥ proktaḥ prāṇāyāmaśca tanmayaḥ

iḍayā vāyumāropya pūrayitvodarasthitam /
śanaiḥ ṣoḍaśabhirmātrairkāraṃ tatra saṃsmaret

dhārayetpūritaṃ paścāccatuḥṣaṣṭhyā tu mātrayā /
ukāramūrtimatrāpi saṃsmaranpraṇavaṃ japet

yāvadvā śakyate tāvaddhāraṇaṃ japasaṃyutam /
pūritaṃ recayet paścātprāṇaṃ bāhyānilānvitam

śanaiḥ piṅgalayā gārgi dvātriṃśanmātrayā punaḥ /
makāramūrtimatrāpi saṃsmaranpraṇavaṃ japet

prāṇāyāmo bhavedeṣaḥ punaścaivaṃ samabhyaset /
tataḥ piṅgalayāpūrya mātraiḥ ṣoḍaśabhistathā

ukāramūrtimatrāpi saṃsmaransusamāhitaḥ /
pūritaṃ dhārayetprāṇaṃ praṇavaṃ viṃśatidvayam

japedatra smaranmūrtiṃ makārākhyaṃ maheśvaram /
yāvadvā śakyate paścādrecayetiḍayānilam

evameva punaḥ kuryādiḍayāpūrya pūrvavat /
nāḍyā prāṇaṃ samāropya pūrayitvodarasthitam

praṇavena susaṃyuktāṃ vyāhṛtībhiśca saṃyutām /
gāyatrīṃ ca japedvipraḥ prāṇasamyamane trayaḥ

punaścaivaṃ tribhiḥ kuryātpunaścaiva trisandhiṣu /
yadvā samabhyasennityaṃ vaidikaṃ laukikaṃ tu vā

prāṇasaṃyamane vidvānjapettadviṃśatidvayam /
brāhmaṇaḥ śrutasampannaḥ svadharmanirataḥ sadā

sa vaidikaṃ japenmantraṃ laukikaṃ na kadācana /
kecidbhūtahitārthāya japamicchanti laukikam

dvijavatkṣātrasyoktaśca prāṇasaṃyamane japaḥ /
vaiśyānāṃ dharmayuktānāṃ strīśūdrāṇāṃ tapasvinām

prāṇasaṃyamane gārgi mantraṃ praṇavavarjitam /
namontaṃ śivamantraṃ vā vaiṣṇavaṃ veṣyate budhaiḥ

yadvā samabhyasecchūdro laukikaṃ vidhipūrvakam /
prāṇasaṃyamane strī ca japettadviṃśatidvayam

na vaidikaṃ japecchūdraḥ striyaśca na kadācana /
svāśramasthasya vaiśyasya kecidicchanti vaidikam

sandhyayorubhayornityaṃ gāyatryā praṇavena vā /
prāṇasaṃyamanaṃ kuryāt brāhmaṇo vedapāragaḥ

nityameva prakurvīta prāṇāyāmāṃstu ṣoḍaśa /
api bhrūṇahanaṃ māsātpunantyaharahaḥ kṛtāḥ

ṛtutrayātpunantyenaṃ janmāntarakṛtādaghāt /
vatsarādbrahmahā śuddhyettasmānnityaṃ samabhyaset

yogābhyāsaratāstvevaṃ svadharmaniratāśca ye /
prāṇasaṃyamanenaiva sarve muktā bhavanti hi

bāhyādāpūraṇaṃ vāyorudare pūrako hi saḥ /
sampūrṇakumbhavadvāyordhāraṇaṃ kumbhako bhavet

bahiryadrecanaṃ vāyorudarādrecakaḥ smṛtaḥ /
prasvedajanako yastu prāṇāyāmeṣu so'dhamaḥ

kampako madhyamaḥ prokta utthānaścottamo bhavet /
pūrvaṃ pūrvaṃ prakurvīta yāvaduttamasambhavaḥ

sambhavatyuttame gārgi prāṇāyāme sukhī bhavet /
prāṇo layati tenaiva dehasyāntastato'dhikaḥ

dehaścottiṣṭhate tena kṛtāsanaparigrahā /
niḥrśvāsocchvāsakau tasya na vidyete kathañcana

dehe yadyapi tau syātāṃ svābhāvikaguṇāvubhau//
tathāpi naśyatastena prāṇāyāmottamena hi

tayornāśe samarthaḥ syātkartuṃ kevalakumbhakam /
recakaṃ pūrakaṃ mukttvā sukhaṃ yadvāyudhāraṇam

prāṇāyāmo'yamityuktaḥ sa vai kevalakumbhakaḥ /
recya cāpūrya yaḥ kuryātsa vai sahitakumbhakaḥ

sahitaṃ kevalaṃ cātha kumbhakaṃ nityamabhyaset /
yāvankevalasiddhiḥ syāttāvatsahitamabhyaset

kevale kumbhake siddhe recapūraṇavarjite /
na tasya durlabhaṃ kiñcittriṣu lokeṣu vidyate

manojavatvaṃ labhate palitādi ca naśyati /
mukterayaṃ mahāmārgo makarākhyāntarātmanaḥ

nādaṃ cotpādayatyeṣaḥ kumbhakaḥ prāṇasaṃyamaḥ /
prāṇasaṃyamanaṃ nāma dehe prāṇasya dhāraṇam

eṣaḥ prāṇajayopāyaḥ sarvamṛtyūpaghātakaḥ /
kiñcitprāṇajayopāyaṃ tava vakṣyāmi tattvataḥ

bāhyātprāṇaṃ samākṛṣya pūrayitvodarasthitam /
nābhimadhye ca nāsāgre pādāṅguṣṭhe ca yatnataḥ

dhārayenmanasā prāṇaṃ sandhyākāleṣu sarvadā /
sarvarogavinirmukto jīvedyogī gataklamaḥ

nāsāgre dhāraṇaṃ gārgi vāyorvijayakāraṇam /
sarvarogavināśaḥ syānnābhimadhye ca dhāraṇāt

śarīraṃ laghutāṃ yāti pādāṅguṣṭhe ca dhāraṇāt /
rasanāvāyumākṛṣya yaḥpibetsatataṃ naraḥ

śramadāhau na tasyāstāṃ naśyanti vyādhayastathā//
sandhyayorbrāhmakāle vā vāyumākṛṣya yaḥ pibet

trimāsāttasya kalyāṇi jagyate vāksarasvatī /
ṣaṇmāsābhyāsayogena mahārogaiḥ prabhucyate

ātmanyātmānamāropya kuṇḍalyāṃ yastu dhārayet /
kṣayarogādayastasya naśyantītyapare viduḥ

jihvayā vāyumānīya jihvāmūle nirodhayan /
yaḥ pibedamṛtaṃ vidvānsakalaṃ bhadramaśnute

ātmanyātmānamiḍayā samānīya bhruvo'ntare / (bhruvo'ntarāt)
pibedyastridaśāhāraṃ vyādhibhiḥ sa vimucyate

nāḍībhyāṃ vāyumāropya nābhau vā tundapārśvayoḥ /
ghaṭikaikāṃ vahedyastu vyādhibhiḥ so'bhimucyate

māsamekaṃ trisandhyāyāṃ jihvayāropya mārutam /
pibedyastridaśāhāraṃ dhārayettundamadhyame

gulmāṣṭhīlā plīhā cānye tridroṣajanitāstathā /
tundamadhyagatā rogāḥ sarve naśyanti tasya vai

jvarāḥ sarve vinaśyanti viṣāṇi vividhāni ca /
bahunoktena kiṃ gārgi palitādi ca naśyati

evaṃ vāyujayopāyaḥ prāṇasya tu varānane /
śakyamāsanamāsthāya samāhitamanāstathā

karaṇāni vaśīkṛtya viṣayebhyo balātsudhīḥ / (viṣayebhyaḥ)
apānamūrdhvamākṛṣya praṇavena samāhitaḥ

hastābhyāṃ bandhayetsamyakkarṇādi karaṇāni ca /
aṅguṣṭābhyāmume śrotre tarjanībhyāṃ ca cakṣuṣī

nāsāpuṭau madhyamābhyāṃ pracchādya karaṇāni vai /
ānandānubhavaṃ yāvattāvanmūrddhani dhārayet

prāṇaḥ prayātyanenaiva tatastvāyurvighātakṛt /
brahmarandhre suṣumṇāyāṃ mṛṇālāntarasūtravat

nādotpattistvanenaiva śuddhasphaṭikasannibhā /
āmūrdhno vartate nādo vīṇādaṇḍavadutthitaḥ

śaṅkhadhvaninibhastvādau madhye meghadhvaniryathā /
vyomarandhragate nāde giriprasravaṇaṃ yathā

vyomarandhragate vāyau citte cātmani saṃsthite /
tadānandī bhaveddehī vāyustena jito bhavet

yoginastvapare hyatra vadanti samacetasaḥ /
prāṇāyāmaparāḥ pūtā recapūraṇavarjitāḥ

dakṣiṇetaragulphena sīvanīṃ pīḍayetśirām
adhastāddaṇḍayo sūkṣmāṃ savyopari ca dakṣiṇam

(daṇḍavatsūkṣmāṃ)
jaṅghorvorantaraṃ gārgi niśchidraṃ bandhayetdṛḍham /
samagrīvaśiraskandhaḥ samapṛṣṭhaḥ samodaraḥ

netrābhyāṃ dakṣiṇaṃ gulphaṃ lokayannuparisthitam /
dhārayanmanasā sārdhaṃ vyāharanpraṇavākṣaram

āsane nānyadhīrāste dvijo rahasi nityaśaḥ /
kṣatriyaśca varārohe vyāharanpraṇavākṣaram

āsane nānyadhīraste rahasyeva jitendriyaḥ /
vaiśyāḥ śūdrāḥ striyaścānye yogābhyāsaratāḥ narāḥ

śaivaṃ vā vaiṣṇavaṃ vātha vyāharannanyameva vā /
āsane nānyadhīraste dīpaṃ haste vilokayan

āyurvighātakṛtprāṇastvanenāgnikulaṃ gataḥ /
dhūmadhvajajayaṃ yāvannānyadhīrevamabhyaset

dhāraṇaṃ kurvatastasya śaktiṃ syādiṣṭabhojane /
dehaśca laghutāṃ yāti jaṭharāgniśca vardhate

dṛṣṭacihnastatastasmānmanasāropya mārutam /
mantramuccārayandīrghaṃ nābhimadhye nirodhayet

yāvanmanolayatyasminnābhau savitṛmaṇḍale /
tāvatsamabhyasedvidvānniyato niyatāsanaḥ

etena nābhimadhyasthadhāraṇenaiva mārutaḥ /
kuṇḍalīṃ yāti vahniśca dahatyatra na saṃśayaḥ

santaptā vahninā tatra vāyunā cālitā svayam /
prasārya phaṇabhṛdbhogaṃ prabodhaṃ yāti sā tadā

prabuddhe saṃsaratyasminnābhimūle tu cakriṇi /
brahmarandhrī suṣumṇāyāṃ prayāti prāṇasañjñakaḥ

samprāpte mārute tasminsuṣumṇāyāṃ varānane /
mantramuccārya manasā hṛnmadhye dhārayetpunaḥ

hṛdayātkaṇṭhakūpe ca bhruvormadhye ca dhārayet /
tasmādāropya manasā sāgniṃ prāṇamananyadhīḥ

dhārayedvyomni viprendre vyāharanpraṇavākṣaram /
vāyunā pūrite vyomni sāṅgopāṅge kalevare

tadātmā rājate tatra yathā vyomni vikartanaḥ / (bhajate)
śarīraṃ visisṛkṣuścedevaṃ samyak samācaran

ekākṣaraṃ paraṃ brahma dhyāyanpraṇavamīśvaram /
sambhidya manasā mūrdhni brahmarandhraṃ savāyunā

prāṇamunmocayetpaścānmahāprāṇe khamadhyame//
dehātīte jagatprāṇe śūnye nitye dhruve pade

ākāśe paramānande svātmānaṃ yojayeddhiyā /
brahmaivāsau bhavedgārgi na punarjanmabhāgbhavet

tasmāttvaṃ ca varārohe nityaṃ karma samācāra /
sandhyākāleṣu vā nityaṃ prāṇasaṃyamanaṃ kuru

prāṇāyāmaparāḥ sarve prāṇāyāmaparāyaṇāḥ /
prāṇāyāmaviśuddhā ye te yānti paramāṃ gatim

prāṇāyāmādṛte nānyattārakaṃ narakādami /
saṃsārārṇavamagnānāṃ tārakaḥ prāṇasaṃyamaḥ

tasmāt tvaṃ vidhimārgeṇa nityaṃ karma samācara /
vidhinoktena mārgeṇa prāṇasaṃyamanaṃ kuru

nāsāgre dṛk sadā samyak savye nyasyetaraṃ karam /
nāsāgre śaśabhṛdbimbe jyotsnājālavitānake

ambomā sahitaṃ śubhraṃ somasūryāgnilocanam /
pañcavakraṃ mahādevaṃ candraśekharamīśvaram

nandivāhanasaṃyuktaṃ sarvadevasamanvitam /
prasannaṃ sarvavaradaṃ dhyāyetsarvāyudhaṃ śivam

yo vedādau svaraḥ prokto vedānte ca pratiṣṭhitaḥ /
akāramūrtireteṣāṃ raktāṅgī haṃsavāhinī

daṇḍahastā satī vālā gāyatrītyavadhāryatām /
ukāramūrtireteṣāṃ kṛṣṇāṅgī vṛṣavāhanī

cakrahastā satī caiva sāvitrītyavadhāryatām /
makāramūrtireteṣāṃ śvetāṅgī tārkṣyavāhinī

śūlānandamayī vṛddhā sarasvatyavadhāryatām /
māheśvarīti sā prājñaiḥ paścimā parikīrtitā

sṛṣṭisthityantakālādyā makāro'pyantakātmakaḥ /
akṣaratrayamevaitatkāraṇatrayamiṣyate

trayāṇāṃ kāraṇaṃ brahma sadrūpaṃ sarvakāraṇam /
ekākṣaraṃ paraṃ jyotistamāhuḥ praṇavaṃ budhāḥ

evaṃ jñātvā vidhānena praṇavena samanvitam /
prāṇāyāmaṃ tataḥ kuryādrecapūrakakumbhakaiḥ

// iti śrīyogayājñavalkye ṣaṣṭho'dhyāyaḥ //
// atha saptamo'dhyāyaḥ //
yājñavalkya uvāca -
uktānyetāni catvāri yogāṅgāni dvijottame /
pratyāhārādi catvāri śa‍ṛṇuṣvābhyantarāṇi ca

indriyāṇāṃ vicaratāṃ viṣayeṣu svabhāvataḥ /
balādāharaṇaṃ teṣāṃ pratyāhāraḥ sa ucyate

yadyatpaśyasi tatsarvaṃ paśyedātmavadātmani /
pratyāhāraḥ sa ca prokto yogavidbhirmahātmabhiḥ

karmāṇi yāni nityāni vihitāni śarīriṇām /
teṣāmātmanyanuṣṭhānaṃ manasā yadbahirvinā

pratyāhāro bhavetso'pi yogasādhanamuttamam /
pratyāhāraḥ praśasto'yaṃ sevito yogibhiḥ sadā

aṣṭādaśasu yadvāyormarmasthāneṣu dhāraṇam /
sthānātsthānātsamākṛṣya pratyāhāro nigadyate

aśvinau ca tathā brūtāṃ gārgi devabhiṣagvarau /
marmasthānāni siddhyarthaṃ śarīre yogamokṣayoḥ

tāni sarvāṇi vakṣyāmi yathāvacchuṇu suvrate /
pādāṅguṣṭhau ca gulphau ca jaṅghāmadhye tathaiva ca

cityormūlaṃ ca jānvośca madhye corudvayasya ca /
pāyumūlaṃ tataḥ paścāddehamadhyaṃ ca meḍhrakam

nābhiśca hṛdayaṃ gārgi kaṇṭhakūpastathaiva ca /
tālumūlaṃ ca nāsāyā mūlaṃ cākṣṇośca maṇḍale

bhruvormadhyaṃ lalāṭaṃ ca mūrdhā ca munisattame /
marmasthānāni caitāni mānaṃ teṣāṃ pṛthak śa‍ṛṇu

pādānmānaṃ tu gulphasya sārdhāṅgulacatuṣṭayam /
gulphājjaṅghasya madhyaṃ tu vijñeyaṃ taddaśāṅgulam

jaṅghamadhyāccityormūlaṃ yattadekādaśāṅgulam
cityormūlādvarārohe jānuḥ syādaṅgulidvayam

jānvornavāṅgulaṃ prāhurūrumadhyaṃ munīśvarāḥ /
ūrumadhyāttathā gārgi pāyumūlaṃ navāṅgulam

dehamadhyaṃ tathā pāyormūlādardhāṅguladvayam /
dehamadhyāttathā meḍhra tadvatsārdhāṅguladvayam

meḍhrānnabhiśca vijñeyā gārgi sārdhadaśāṅgulam /
caturdaśāṅgulaṃ nābherhṛnmadhyaṃ ca varānane

ṣaḍaṅgulaṃ tu hṛnmadhyātkaṇṭhakūpaṃ tathaiva ca /
kaṇṭhakūpācca jihvāyā mūlaṃ syāccaturaṅgulam

nāsāmūlaṃ tu jihvāyā mūlācca caturaṅgulam /
netrasthānaṃ tu tanmūlādardhāṅgulamitīṣyate

tasmādardhāṅgulaṃ viddhi bhruvorantaramātmanaḥ /
lalāṭākhyaṃ bhruvormadhyādūrdhvaṃ syādaṅguladvayam

lalāṭādvyomasañjñaṃ syādaṅgulitrayameva hi /
sthāneṣu eteṣu manasā vāyumāropya dhārayet

sthānātsthānātsamākṛṣya pratyāhāraṃ prakurvataḥ /
sarve rogā vinaśyanti yogāḥ sidhyanti tasya vai

vadanti yoginaḥ kecidyogeṣu kuśalā narāḥ /
pratyāhāraṃ varārohe śa‍ṛṇu tvaṃ tadvadāmyaham

sampūrṇakumbhavadvāyumaṅguṣṭhānmūrdhamadhyataḥ /
dhārayedanilaṃ buddhyā prāṇāyāmapracoditaḥ

vyomarandhrātsamākṛṣya lalāṭe dhārayetpunaḥ /
lalāṭādvāumākṛṣya bhruvormadhye nirodhayet

bhruvormadhyātsamākṛṣya netramadhye nirodhayet /
netrātprāṇaṃ samākṛṣya nāsāmūle nirodhayet

nāsāmūlāttu jihvāyā mūle prāṇaṃ nirodhayet /
jihvāmūlātsamākṛṣya kaṇṭhamūle nirodhayet

kaṇṭhamūlāttu hṛnmadhye hṛdayāt nābhimadhyame /
nābhimadhyātpunarmeḍhre meḍhrādvahnyālaye tataḥ

dehamadhyādgude gārgi gudādevorumūlake /
ūrumūlāttayormadhye tasmājjānvornirodhayet

citimūle tatastasmājjaṅghayormadhyame tathā /
jaṅghāmadhyātsamākṛṣya vāyuṃ gulphe nirodhayet

gulphādaṅguṣṭhayorgārgi pādayostannirodhayet//
sthānātsthānātsamākṛṣya yastvevaṃ dhārayet sudhīḥ

sarvapāpaviśuddhātmā jīvedācandratārakam /
etattu yogasiddhyarthamagastyenāpi kīrtitam

pratyāhāreṣu sarveṣu praśastamiti yogibhiḥ /
nāḍībhyāṃ vāyumāpūrya kuṇḍalyāḥ pārśvayoḥ kṣipet

dhārayedyugapatso'pi bhavarogādvimucyate /
pūrvavadvāyumāropya hṛdayavyomni dhārayet

so'pi yāti varārohe paramātmapadaṃ naraḥ /
vyādhayaḥ kiṃ punastasya bāhyābhyantaravartinaḥ

nāsābhyāṃ vāyumāropya pūrayitvodarasthitam /
bhruvormadhyādṛśoḥ paścātsamāropya samāhitaḥ

dhārayetkṣaṇamātraṃ vā so'pi yāti parāṃ gatim /
kiṃ punarbahunoktena nityaṃ karma samācaran

ātmanaḥ prāṇamāropya bhruvormadhye suṣumṇayā /
yāvanmanolayatyasminstāvatsaṃyamanaṃ kuru

// iti śrīyogayājñavalkye saptamo'dhyāyaḥ //
// atha aṣṭamo'dhyāyaḥ //
yājñavalkya uvāca -
athedānīṃ pravakṣyāmi dhāraṇā pañca tattvataḥ /
samāhitamanāstvaṃ ca śa‍ṛṇu gārgi tapodhane

yamādiguṇayuktasya manasaḥ sthitirātmani /
dhāraṇetyucyate sadbhiḥ śāstratātparyavedibhiḥ

asminbrahmapure gārgi yadidaṃ hṛdayāmbujam /
tasminnevāntarākāśe yadbāhyākāśadhāraṇam

eṣā ca dhāraṇetyuktā yogaśāstraviśāradaiḥ /
tāntrikairyogaśāstrajñairvidvadbhiśca suśikṣitaiḥ

dhāraṇāḥ pañcadhā proktāstāśca sarvāḥ pṛthak śa‍ṛṇu//
bhūmirāpastathā tejo vāyurākāśameva ca

eteṣu pañcadevānāṃ dhāraṇaṃ pañcadhocyate /
pādādijānuparyantaṃ pṛthivīsthānamucyate

ājānoḥ pāyuparyantamapāṃ sthānaṃ prakīrtitam /
āpāyorhṛdayāntaṃ yadvahnisthānaṃ taducyate

āhṛnmadhyādbhruvormadhyaṃ yāvadvāyukulaṃ smṛtam /
ābhrūmadhyāttu mūrdhāntamākāśamiti cocyate

atra kecidvadantyanye yogapaṇḍitamāninaḥ /
ājānornābhiparyantamapāṃsthānamiti dvijāḥ

nābhimadhyādgalāntaṃ yadvahnisthānaṃ taducyate /
āgalāttu lalāṭāntaṃ vāyusthānamitīritam

lalāṭādrandhraparyantamākāśasthānamucyate//
ayuktametadityuktaṃ śāstratātparyavedibhiḥ

yadi syājjvalanasthānaṃ dehamadhye varānane /
ayuktā kāraṇe vahnau kāryarūpasya saṃsthitiḥ

kāryakāraṇasaṃyoge kāryahāniḥ kathaṃ bhavet /
dṛṣṭaṃ tatkāryarūpeṣu mṛdātmakaghaṭādiṣu

pṛthivyāṃ dhārayedgārgi brahmāṇaṃ parameṣṭhinam /
viṣṇumapsvanale rudramīśvaraṃ vāyumaṇḍale

sadāśivaṃ tathā vyomni dhārayetsusamāhitaḥ /
pṛthivyāṃ vāyumāsthāya lakāreṇa samanvitam

dhyāyan caturbhujākāraṃ brahmāṇaṃ sṛṣṭikāraṇam /
dhārayetpañca ghaṭikāḥ pṛthivījayamāpnuyāt

vāruṇe vāyumāropya vakāreṇa samanvitam /
smarannārāyaṇaṃ saumyaṃ caturbāhuṃ kirīṭinam

śuddhasphaṭikasaṅkāśaṃ pītavāsasamacyutam /
dhārayetpañca ghaṭikāḥ sarvarogaiḥ pramucyate

vahau cānilamāropya rephākṣarasamanvitam /
tryakṣaṃ varapradaṃ rudraṃ taruṇādityasannibham

bhasmoddhūlitasarvāṅgaṃ suprasannamanusmaran /
dhārayetpañca ghaṭikāḥ vahnināsau na dahyate

mārutaṃ mārutasthāne yakāreṇa samanvitam /
dhārayetpañca ghaṭikāḥ vāyuvadvyomago bhavet

ākāśe vāyumāropya hakāropari śakaram /
bindurūpaṃ mahādevaṃ vyomākāraṃ sadāśivam

śuddhasphaṭikasaṅkāśaṃ bālendughṛtamaulinam /
pañcavaktrayutaṃ saumyaṃ daśabāhuṃ trilocanam

sarvāyudhodyatakaraṃ sarvābharaṇabhūṣitam /
umārdhadehaṃ varadaṃ sarvakāraṇakāraṇam

manasā cintayanattu muhūrtamapi dhārayet /
sa eva mukta ityuktastāntrikeṣu suśikṣitaiḥ

etaduktaṃ bhavatyatra gārgi brahmavidāṃ vare /
brahmādikāryarūpāṇi sve sve samhṛtya kāraṇe

tasminsadāśive prāṇaṃ cittaṃ cānīya kāraṇe /
yuktacittastadātmānaṃ yojayetparameśvare

asminnarthe vadantyanye yogino vrahmavidvarāḥ /
praṇavenaiva kāryāṇi sve sve saṃhṛtya kāraṇe

praṇavasya tu nādānte paramānandavigraham /
ṛtaṃ satyaṃ paraṃ brahma puruṣaṃ kṛṣṇapiṅgalam

cetasā samprapaśyanti santaḥ saṃsārabheṣajaṃ
tvaṃ tasmāt praṇavenaiva prāṇāyāmaistribhistribhiḥ

brahmādi kāryarūpāṇi sve sve samhṛtya kāraṇe /
viśuddhacetasā paśya nādānte parameśvaram

asminnarthe vadantyanye yogino brahmavidvarāḥ /
bhiṣagvarā varārohe yogeṣu pariniṣṭhitāḥ

śarīraṃ tāvadevaṃ tu pañcabhūtātmakaṃ khalu /
tadetattu varārohe vātapittakaphātmakam

vātātmakānāṃ sarveṣāṃ yogeṣvabhiratātmanām /
prāṇasaṃyamanenaiva śoṣaṃ yāti kalevaram

pittātmakānāṃ tvacirānna śuṣyati kalevaram /
kaphātmakānāṃ kāyaśca sampūrṇastvacirādbhavet

dhāraṇaṃ kurvatastvāgnau sarve naśyanti vātajāḥ /
pārthivāṃśe jalāṃśe ca dhāraṇaṃ kurvataḥ sadā

naśyanti śleṣmajā rogā vātajāścācirāttathā /
vyomāṃśe mārutāṃśe ca dhāraṇaṃ kurvataḥ sadā

tridoṣajanitā rogā vinaśyanti na saṃśayaḥ /
asminnarthe tathā brūtāmaśvinau ca bhiṣagvarau

prāṇasaṃyamanenaiva tridoṣaśamanaṃ nṛṇām /
tasmāttvaṃ ca varārohe nityaṃ karma samācara

yamādibhiśca samyuktā vidhivaddhāraṇāṃ kuru

// iti śrīyogayājñavalkye aṣṭamo'dhyāyaḥ //
// atha navamo'dhyāyaḥ //
yājñavalkya uvāca -
atha dhyānaṃ pravakṣyāmi śa‍ṛṇu gārgi varānane /
dhyānameva hi jantūnāṃ kāraṇaṃ bandhamokṣayoḥ

dhyānamātmasvarūpasya vedanaṃ manasā khalu /
saguṇaṃ nirguṇaṃ tacca saguṇaṃ bahuśaḥ smṛtam

pañcottamāni teṣvāhurvaidikāni dvijottamāḥ /
trīṇi mukhyatamānyeṣāmekameva hi nirguṇam

marmasthānāni nāḍīnāṃ saṃsthānaṃ ca pṛthakpṛthak /
vāyūnāṃ sthānakarmāṇi jñātvā kurvātmavedanam

ekaṃ jyotirmayaṃ śuddhaṃ sarvagaṃ vyomavaludam /
avyaktamacalaṃ nityamādimadhyāntavarjitam

sthūlaṃ sūkṣmamanākāramasaṃspṛśyamacākṣuṣam /
na rasaṃ na ca gandhākhyamaprameyamanaupamam

ānandamajaraṃ nityaṃ sadasatsarvakāraṇam /
sarvādhāraṃ jagadrūpamamūrtamajamavyayam

adṛśyaṃ dṛśyamantaḥsthaṃ bahirsthaṃ sarvatomukham /
sarvadṛksarvataḥpādaṃ sarvaspṛk sarvataḥśiraḥ

brahma brahmamayo'haṃ syāmiti yadvedanaṃ bhavet//
tadetannirguṇaṃ dhyānamiti brahmavido viduḥ

athavā paramātmānaṃ paramānandavigraham /
gurūpadeśādvijñāya puruṣaṃ kṛṣṇapiṅgalam

brahma brahmapure cāsmindaharāmbujamadhyame//
abhyāsātsamprapaśyanti santaṃ saṃsārabheṣajam

hrṛtpadme'ṣṭadalopete kandamadhyātsamutthite /
dvādaśāṅgulanāle'smiścaturaṅgulamunmukhe

prāṇāyāmairvikāsite kesarānvitakarṇike /
vāsudevaṃ jagannāthaṃ nārāyaṇamajaṃ harim

caturbhujamudārāṅgaṃ śaṅkhacakragadādharam /
kirīṭakeyūradharaṃ padmapatranibhekṣaṇam

śrīvatsavakṣasaṃ viṣṇuṃ pūrṇacandranibhānanam /
padmodaradalābhoṣṭhaṃ suprasannaṃ śucismitam

śuddhasphaṭikasaṅakāśaṃ pītavāsasamacyutam /
padmacchavipadadvandvaṃ paramātmānamavyayam

prabhābhirbhāsayadrūpaṃ paritaḥ puruṣottamam /
manasālokya deveśaṃ sarvabhūtahṛdi sthitam

so'hamātmeti vijñānaṃ saguṇaṃ dhyānamucyate /
hṛtsaroruhamadhye'sminprakṛtyātmakakarṇike

aṣṭaiśvaryadalopete vidyākesarasaṃyute /
jñānanāle bṛhatkande prāṇāyāmaprabodhite

viśvārciṣaṃ mahāvahniṃ jvalantaṃ viśvatomukham /
vaiśvānaraṃ jagadyoniṃ śikhātanvinamīśvaram

tāpayantaṃ svakaṃ dehamāpādatalamastakam /
nirvātadīpavattasmindīpitaṃ havyavāhanam

dṛṣṭvā tasya śikhāmadhye paramātmānamakṣaram /
nīlatoyadamadhyasthavidyullekheva bhāsvaram

nīvāraśūkavadrūpaṃ pītābhaṃ sarvakāraṇam /
jñātvā vaiśvānaraṃ devaṃ so'hamātmeti yā matiḥ

saguṇeṣūttamaṃ hyetaddhyānaṃ yogavido viduḥ /
vaiśvānaratvaṃ samprāpya muktiṃ tenaiva gacchati

athavā maṇḍale paśyedādityasya mahādyuteḥ /
ātmānaṃ sarvajagataḥ puruṣaṃ hemarūpiṇam

hiraṇyaśmaśrukeśaṃ ca hiraṇyamayanakhaṃ harim /
kanakāmbujavadvaktraṃ sṛṣṭhisthityantakāraṇam

padmāsanasthitaṃ saumyaṃ prabuddhābjanibhānanam /
padmodaradalābhākṣaṃ sarvalokābhayapradam

jānantaṃ sarvadā sarvamunnayantaṃ ca dhārmikān /
bhāsayantaṃ jagatsarvaṃ dṛṣṭvā lokaikasākṣiṇam

so'hamasmīti yā buddhiḥ sa ca dhyāneṣu śasyate /
eṣa eva tu mokṣasya mahāmārgastapodhane

dhyānenānena saureṇa muktiṃ yāsyanti sūrayaḥ /
bhrūvormadhye'ntarātmānaṃ bhārūpaṃ sarvakāraṇam

sthāṇuvanmūrdhaparyantaṃ madhyadehātmasamutthitam /
jagatkāraṇamavyaktaṃ jvalantamamitaujasam

manasālokya so'haṃ syāmityetadhyānamuttamam /
athavā baddhaparyaṅke śitilīkṛtavigrahe

śiva eva svayaṃ bhūtvā nāsāgrāropitekṣaṇaḥ /
nirvikāraṃ paraṃ śāntaṃ paramātmānamīśvaram

bhārūpamamṛtaṃ dhyāyedbhruvormadhye varānane /
so'hameveti yā buddhiḥ sā ca dhyāneṣu śasyate

athavāṣṭadalopete karṇikākesarānvite /
unnidrahṛdayāmbhoje somamaṇḍalamadhyame

svātmānamarbhakākaraṃ bhoktṛrūpiṇamavyayam /
sudhārasaṃ vimuñcadbhiḥ śaśiraśmibhirāvṛtam

ṣoḍaśacchadasaṃyuktāśiraḥ padmādadhomukhāt /
nirgatāmṛtadhārābhiḥ sahasrābhiḥ samantataḥ

plāvitaṃ puruṣaṃ tatra cintayitvā samāhitaḥ /
tenāmṛtarasenaiva sāṅgopāṅgakalevare

ahameva paraṃ brahma paramātmāhamavyayaḥ /
evaṃ yadvedanaṃ tacca saguṇaṃ dhyānamucyate

evaṃ dhyānāmṛtaṃ kurvan ṣaṇmāsānmṛtyujidbhavet /
vatsarānmukta eva syājjīvanneva na saṃśayaḥ

jīvanmuktasya na kvāpi duḥkhāvāptiḥ kathañcana /
kiṃ punarnityamuktasya muktireva hi durlabhā

tasmāttvaṃ ca varārohe phalaṃ tyaktveva nityaśaḥ /
vidhivatkarma kurvāṇā dhyānameva sadā kuru

anyānapi bahūnyāhurdhyānāni munisattamāḥ /
mukhyānyuktāni caitebhyo jaghanyānītarāṇi tu

saguṇaṃ guṇahīnaṃ vā vijñāyātmānamātmani /
santaḥ samādhiṃ kurvanti tvamapyevaṃ sadā kuru

// iti śrīyogayājñavalkye navamo'dhyāyaḥ //
// atha daśamo'dhyāyaḥ //
yājñavalkya uvāca -
samādhimadhunā vakṣye bhavapāśavināśanam /
bhavapāśanibaddhasya yathāvacchrotumarhasi

samādhiḥ samatāvasthā jīvātmaparamātmanoḥ /
brahmaṇyeva sthitiryā sā samādhiḥ pratyagātmanaḥ

dhyāyedyathā yathātmānaṃ tatsamādhistathā tathā /
dhyāyaivātmani saṃsthāpyo nānyathātmā yathā bhavet

evameva tu sarvatra yatprapannastu yo naraḥ /
tadātmā so'pi tatraiva samādhiṃ samavāpnuyāt

sāritpatau niviṣṭāmbu yathābhinnatayānviyāt /
tathātmābhinna evātra samādhiṃ samavāpnuyāt

etaduktaṃ bhavatyatra gārgi brahmavidāṃ vare /
karmaiva vidhivatkurvankāmasaṅkalpavarjitam

vedānteṣvarthaśāstreṣu suśikṣitamanāḥ sadā /
guruṇā tūpadiṣṭārthaṃ yuktyupetaṃ varānane

vidvadbhirdharmaśāstrajñairvicārya ca punaḥ punaḥ /
tasmin suniścitārtheṣu suśikṣitamanāḥ sadā

yogamevābhyasennityaṃ jīvātmaparamātmanoḥ /
tatastvābhyantaraiscihnairbāhyairvā kālasūcakaiḥ

viniścityātmanaḥ kālamanyairvā paramārthavit /
nirbhayaḥ suprasannātmā martyastu vijitendriyaḥ

svakarmanirataḥ śāntaḥ sarvabhūtahite rataḥ /
pradāya vidyāṃ putrasya mantraṃ ca vidhipūrvakam

saṃskāramātmanaḥ sarvamupadiśya tadānaghe /
puṇyakṣetre śucau deśe vidvadbhiśca samāvṛte

bhūmau kuśānsamāstīrya kṛṣṇājinamathāpi vā /
tasminsubaddhaparyaṅko mantrairbaddhakalevaraḥ

āsane nānyadhīrāste prāṅmukho vāpyudaṅmukhaḥ /
navadvārāṇi saṃyamya gārgyasminbrahmaṇaḥ pure

unnidrahṛdayāmbhoje prāṇāyāmaiḥ prabodhite /
vyomni tasminprabhārūpe svarūpe sarvakāraṇe

manovṛttiṃ susaṃyamya paramātmani paṇḍitaḥ /
mūrdhnyādhāyātmanaḥ prāṇaṃ bhruvormadhye'thavānadhe

kāraṇe paramānande āsthito yogadhāraṇām /
omityekākṣaraṃ buddhyā vyāharansusamāhitaḥ

śarīraṃ santyajedvidvānātmaivābhūnnarottamaḥ /
yasminsamabhyasedvidvānyogenaivātmadarśanam

tadeva saṃsmarañcidvāṃstyajedante kalevaram /
yaṃ yaṃ samyaksmaranbhāvaṃ tyajatyante kalevaram

taṃ tamevaityasau bhāvamiti yogavido viduḥ /
tvaṃ caivaṃ yogamāsthāya dhyāyansvātmānamātmani

svadharmaniratā śāntā tyajānte dehamātmanaḥ /
jñānenaiva sahaitena nityakarmāṇi kurvataḥ

nivṛttaphalasaṅgasya muktirgārgi kare sthitā /
yaduktaṃ brahmaṇā pūrvaṃ karmayogasamuccayam

tadetatkīrtitaṃ sarvaṃ sāṅgopāṅgaṃ vidhānataḥ /
tvaṃ caiva yogamabhyasya yamādyaṣṭāṅgasaṃyutam

nirvāṇaṃ padamāsādya prapañcaṃ samparityaja /
// iti śrīyogayājñavalkye daśamo'dhyāyaḥ //
// atha ekādaśo'dhyāyaḥ //
ityevamuktā muninā yājñavalkyena dhīmatā /
ṛṣimadhye varārohā vākyametadabhāṣata

gārgyuvāca -
yogayukto naraḥ svāminsandhyayorvāthavā sadā /
vaidhaṃ karma kathaṃ kuryānniṣkṛtiḥ kā tvakurvataḥ

ityukto brahmavādinyā brahmavidbrāhmaṇastadā /
tāṃ samālokya bhagavānidamāha narottamaḥ

yājñavalkya uvāca -
yogayuktamanuṣyasya sandhyayorvāthavā niśi /
yatkartavyaṃ varārohe yogena khalu tatkṛtam

ātmāgnihotravahnau tu prāṇāyāmairvivardhite /
viśuddhacittahaviṣā vidhyuktaṃ karma juhvataḥ

niṣkṛtistasya kiṃ bāle kṛtakṛtyastadā khalu /
viyoge sati samprāpte jīvātmaparamātmanoḥ

vidhyuktaṃ karma kartavyaṃ brahmavidbhiśca nityaśaḥ /
viyogakāle yogī ca duḥkhamityeva yastyajet

karmāṇi tasya nilayaḥ nirayaḥ parikīrtitaḥ /
na dehināṃ yataḥ śakyaṃ tyaktuṃ karmāṇyaśeṣataḥ

tasmādāmaraṇādvaidhaṃ kartavyaṃ yogibhiḥ sadā /
tvaṃ caiva mātyayā gārgi vaidhaṃ karma samācara

yogena paramātmānaṃ yajaṃstyaja kalevaram /
ityevamuktvā bhagavān yājñavalkyastaponidhiḥ

ṛṣīnālokya netrābhyāṃ vākyametadabhāṣata /
sandhyāmupāsya vidhivatpaścimāṃ susamāhitāḥ

gacchantu sāmprataṃ sarve ṛṣayaḥ svāśramaṃ prati /
ityevamuktā muninā munayaḥ saṃśritavratāḥ

viśvāmitro vasiṣṭhaśca gautamaścāṅgirāstathā /
agastyo nāradaścaiva vālmīkirbādarāyaṇaḥ

paiṅgirdīrghatamā vyāsaḥ śaunakaśca tapodhanaḥ /
bhārgavaḥ kāśyapaścaiva bharadvājastathaiva ca

tapasvinastathā cānye vedavedāṅgavedinaḥ /
yājñavalkyaṃ susampūjya gīrbhirāśīrmiṃruttamaiḥ

te yānti munayaḥ sarve svāśrameṣu yathāgatam /
gateṣu svāśrameṣveṣu tāpaseṣu tapodhanā

praṇamya daṇḍavadbhūmau vākyametadabhāṣata /
gārgyuvāca -
bhagavansarvaśāstrajña sarvabhūtahite rata

bhavamokṣāya yogīndra bhavadbhirbhāṣitaṃ tu yat /
yamādyaṣṭāṅgasahito yogo muktestu sādhanam

tadetadvismṛtaṃ sarvaṃ sarvajña tava sannidhau /
yogaṃ mamopadiśyādya sāṅgaṃ saṅkṣeparūpataḥ

trātumarhasi sarvajña janmasaṃsārasāgarāt /
ityukto brahmavādinyā brahmavidbrāhmaṇastadā

ālokya kṛpayā dīnāṃ smitapṛrvamabhāṣata /
uttiṣṭhottiṣṭha kiṃ śeṣe bhūmau gārgi varānane

vakṣyāmi te samāsena yogaṃ samprati taṃ śa‍ṛṇu//
// iti śrīyogayājñavalkye ekādaśo'dhyāyaḥ //
// atha dvādaśo'dhyāyaḥ //
savyena gulphena gudaṃ nipīḍya savyetareṇaiva nipīḍya sandhim /
savyetaraṃ nyasya karetare'smiṃśikhāṃ samālokya pāvakasya

āyurvighātakṛtprāṇo niruddhastvāsanena vai /
yāti gārgi tadāpānātkulaṃ vahneḥ śanaiḥ śanaiḥ

vāyunā vātito vahnirapānena śanaiḥ śanaiḥ
tato jvalati sarveṣāṃ svakule dehamadhyame

prātaḥkāle pradoṣe ca niśīthe ca samāhitaḥ
muhūrtamabhyasedevaṃ yāvat pañcadinadvayam

tatasvātmani viprende pratyayāśca pṛthakpṛthak /
sambhavanti tadā tasya jito yena samīraṇaḥ

śarīralaghutā dīptirvahnerjaṭharavartinaḥ /
nādābhivyaktirityete cihnānyādau bhavanti hi

alpamūtrapurīṣaḥ syātṣaṇmāse vatsare'pi vā /
āsane vāhane paścānna bhetavyaṃ trivatsarāt

tato'nilaṃ vāyusakhena sārdhaṃ dhiyā samāropya nirodhayettam /
dhyāyansadā cakriṇamaprabuddhaṃ nābhau sadā kuṇḍalinīniviṣṭam

śirāṃ samāveṣṭya mukhena madhyāmanyāśca bhogena śirāstathaiva /
svapucchamāsyena nigṛhya samyakpathaśca saṃyamya marudgaṇānām

prasuptanāgendravaducchvasantī sadā prabuddhā prabhayā jvalantī /
nābhau sadā tiṣṭhati kuṇḍalī sā tiryakṣu deheṣu tathetareṣu

vāyunā vihṛtavahniśikhābhiḥ kandamadhyagatanāḍīṣu saṃsthām /
kuṇḍalīṃ dahati yastvahirūpāṃ saṃsmarannaravarastu sa eva

santaptā vahninā tatra vāyunā ca pracālitā /
prasārya phaṇabhṛdbhogaṃ prabodhaṃ yāti sā tadā

bodhaṃ gate cakriṇi nābhimadhye prāṇāḥ susambhūya kalevare'smin /
caranti sarve saha vahninaiva yathā paṭe tantugatistathaiva

jitvaivaṃ cakriṇaḥ sthānaṃ sadā dhyānaparāyaṇaḥ /
tato nayedapānaṃ tu nābherūrdhvamidaṃ smaran

vāyuryathā vāyusakhena sārdhaṃ nābhiṃ tvatikramya gataḥ śarīre /
rogāśca naśyanti balābhivṛddhiḥ kāntistadānīmabhavatprabuddhe

brahmarandhramukhamatra vāyavaḥ pāvakena saha yānti samūhya /
kenacidiha vadāmi tavāhaṃ vīkṣaṇād hṛdi sudīpaśikhāyāḥ

nirodhitaḥ syād hṛdi tena vāyuḥ madhye yadā vāyusakhena sārdham /
sahasrapatrasya mukhaṃ praviśya kuryātpunastūrdhvamukhaṃ dvijendre

prabuddhahṛdayāmbhoje gārgyasminbrahmaṇaḥ pure /
bālākāśreṇivadvyomni virarāja samīraṇaḥ

hṛnmadhyāttu suṣumnāyāṃ saṃsthito hutabhuktadā /
sajalāmbudamālāsu vidyullekheva rājate

prabuddhahṛtpadmani saṃsthite'gnau prāṇe ca tasminviniveśite ca /
cihnāni bāhyāni tathāntarāṇi dīpādi dṛśyāṇi bhavanti tasya

vāyumunnaya tatastu savahniṃ vyāharanpraṇavamatra sabindum /
bālacandrasadṛśe tu lalāṭe bālacandramavalokaya buddhyā

savahniṃ bāyumāropya bhruvormadhye dhiyā tadā /
dhyāyedananyadhīḥ paścādantarātmānamantare

madhyame'pi hṛdaye ca lalāṭe sthāṇuvajvalati liṅgamadṛśyam /
asti gārgi paramārthamidaṃ tvaṃ paśya paśya manasā rucirūpam

lalāṭamadhye hṛdayāmbuje ca yaḥ paśyati jñāmayīṃ prabhāṃ tu /
śaktiṃ sadā dīpavadujjvalantīṃ sa paśyati brahmavidekadṛṣṭyā

manolayaṃ yadā yāti bhrūmadhye yogināṃ nṛṇām /
jihvāmūle'mṛtasrāvo bhrūmadhye cātmadarśanam

kampanaṃ ca tathā mūrdhnaḥ manasaivātmadarśanam /
devodyānāni ramyāṇi nakṣatrāṇi ca candramāḥ /
ṛṣayaḥ siddhagandharvāḥ prakāśaṃ yānti yoginām

bhruvo'ntare viṣṇupade ṛcau tu manolayaṃ yāvadiyātprabuddhe /
tāvatsamabhyaspa punaḥ khamadhye sukhaṃ sadā saṃsmara pūrṇarūpam

samīraṇe viṣṇupade niviṣṭe jīve ca tasminnamṛte ca saṃsthe /
tasminstadā yāti manolayaṃ cenmukteḥ samīpaṃ taditi bruvanti

samīraṇe viṣṇupade niviṣṭe viśuddhabuddhau ca tadātmaniṣṭhe /
ānandamatyadbhutamasti satyaṃ tvaṃ gārgi paśyādya viśuddhabuddhyā

evaṃ samabhyasya sūdīrghakālaṃ yamādibhiryuktatanurmitāśī /
ātmānamāsādya guhāṃ praviṣṭāṃ muktiṃ vraja brahmapure punastvam

bhūtāni yasmātprabhavanti gārgi yenaiva jīvanti carācarāṇi /
jātāni yasmin vilayaṃ prayānti tadbrahma viddhīti vadanti sarve

hṛtpaṅkaje vyomni yadekarūpaṃ satyaṃ sadānandamayaṃ susūkṣmam /
tadbrahma nirbhāsamayaṃ guhāyāmiti śrutiśceti samāmananti

aṇoraṇīyānmahato mahīyānātmā guhāyāṃ nihito'sya jantoḥ /
tamakratuṃ paśya viśuddhabuddhyā prayāṇakāle ca vihīnaśokāḥ

prabhañjanaṃ mūrdhnigataṃ savahniṃ dhiyā samāsādya gurūpadeśāt /
mūrdhānamudbhidya punaḥ khamadhye prāṇāstyajoṅkāramanusmaraṃstvam

īpsayā yadi śarīravisargaṃ jñātumicchasi sakhe tava vakṣye /
vyāharanpraṇavamunnaya mūrdhni bhidya yojaya tamātmani kāyam

etatpavitraṃ paramaṃ yogamaṣṭāṅgasaṃyutam /
jñānaṃ guhyatamaṃ puṇyaṃ kīrtitaṃ te varānane

ya idaṃ śraṇuyānnityaṃ yogākhyānaṃ narottamaḥ /
sarvapāpavinirmuktaḥ samyagjñānī bhaviṣyati

yastvetacchrāvayedvidvānnityaṃ bhaktisamanvitaḥ /
ekajanmakṛtaṃ pāpaṃ dinenaikena naśyati

śa‍ṛṇuyādyaḥ sakṛdvāpi yogākhyānamidaṃ naraḥ /
ajñānajanitaṃ pāpaṃ sarvaṃ tasya praṇaśyati

anutiṣṭhanti ye nityamātmajñānasamanvitam /
nityakarmāṇi tāndṛṣṭvā devāśca praṇamanti hi

tasmājjñānena dehāntaṃ nityaṃ karma yathāvidhi /
kartavyaṃ dehibhirgārgi yogaśca bhavabhīrubhiḥ

ityevamuktvā bhagavānrahasye rahasyajaṃ muktikaraṃ tu tasyāḥ /
yogāmṛtaṃ bandhavināśahetuṃ samādhimāste rahasi dvijendraḥ

sā taṃ tu sampūjya muniṃ bruvantaṃ vidyānidhiṃ brahmavidāṃ vāṃreṣṭham /
gīrbhīḥ praṇāmaiśca satāṃ variṣṭhaṃ sadā mudaṃ prāpa varāṃ viśuddhām

yogaṃ susaṅgrṛhya tadā rahasye rahasyajaṃ muktikaraṃ ca jantoḥ /
saṃsāramutsṛjya sadā mudānvitā vane rahasyāvasathe viveśa

yena prapañcaṃ paripūrṇametadyenaiva viśvaṃ pratibhāti sarvam /
taṃ vāsudevaṃ śrutimūrdhni jātaṃ paśyansadāste hṛdi mūrdhni cānvaham

yadekamavyaktamanantamacyutaṃ prapañcajanmādikṛdaprameyam /
taṃ vāsudevaṃ śrutimūrdhnijātaṃ paśyansadāste hṛdi mūrdhni cānvaham

// iti śrīyogayājñavalkye dvādaśo'dhyāyaḥ //
// samāptamidaṃ yogaśāstram //