Yoga Vasistha · Chapter 6.58

aṣṭapañcāśaḥ sargaḥ

śrīrāma uvāca /
aho nu vitatodārā vimalā vipulācalā /
bhavatā bhagavanbhūtyai bhūyo dṛṣṭirudāhṛtā

sarvathā sarvadā sarvaṃ sarvaṃ sarvatra sarvadā /
sadityeva sthitaṃ satyaṃ samaṃ samanubhūtitaḥ

ayamasti mama brahmansaṃśayastaṃ nivāraya /
kimidaṃ bhagavannāma pāṣāṇākhyānamucyate

śrīvasiṣṭha uvāca /
sarvatra sarvadā sarvamastīti pratipādane /
pāṣāṇākhyānadṛṣṭānto mayāyaṃ tava kathyate

nīrandhraikaghanāṅgasya pāṣāṇasyāpi koṭare /
santi sargasahasrāṇi kathayeti pradarśyate

bhūtākāśe mahatyasminkhaśūnyatvamanujjhati /
santi sargasahasrāṇi kathayeti pradarśyate

antargulmāṅkurādīnāṃ prāṇivāyvambutejasām /
santi sargasahasrāṇi kathayeti pradarśyate

śrīrāma uvāca /
kuḍyādau santi sagauṃghā iti cetkathyate mune /
tatkhe vibhānti sargaughā iti kiṃ na pradṛśyate

śrīvasiṣṭha uvāca /
etatte varṇitaṃ rāma mukhyameva mayākhilam /
yo'yamālakṣyate sargaḥ sa kha eva khamāsthitam

ādāveva hi notpannamadyāpi na ca vidyate /
dṛśyaṃ yaccāvabhātīdaṃ tadbrahma brahmaṇi sthitam

nāsti bhūraṇumātrāpi sargairnirvivarā na yā /
na ca kvacana vidyante sargā brahmakhameva te

na tejaso'ṇurapyasti sagairnirvivaro na yaḥ /
na ca kvacana sargāste santi brahmakhameva tat

na vāyoraṇurapyasti sargairnirvivaro na yaḥ /
na ca kvacana vidyante sargā brahmakhameva tat

khaṃ nāṇumātramapyasti sargairnirvivaraṃ na yat /
na ca kvacana sargāste santi brahmakhameva tat

na sā mahābhūtatāsti sargairnirvivarā na yā /
na ca kvacana vidyante sargā brahmakhameva tat

śailānāṃ nāṇurapyasti sa sargairyo na nirghanaḥ /
na ca kvacana vidyante sargā brahmakhameva tat

brahmaṇo nāṇurapyasti sagairnirvivaro na yaḥ /
na ca kvacana sargāste santi brahmakhameva tat

sargeṣu nāṇurapyasti na brahmātmaiva yaḥ sadā /
brahmasargāstathetyeṣa vāci bhedo na vastuni

sargā eva paraṃbrahma paraṃ brahmaiva sargatā /
manāgapyasti na dvaitamatrāgnyarkauṣṇyayoriva

ime sargā idaṃ brahma te'tyantāvācyadṛṣṭayaḥ /
vidāryadāruravavadbhāntyarthaparivarjitāḥ

dvaitamaikyaṃ ca yatrāsti na manāgapi tatra te /
sargabrahmādiśabdārthāḥ kathaṃ kasyeva bhāntu ke

śāntamekamanādyantamidamacchamanāmayam /
vyavahāravato'pyaṅga jñasya maunaṃ śilāghanam

nirvāṇamevamakhilaṃ nabha eva dṛśyaṃ
tvaṃ cāhamadrinicayāśca surāsurāśca /
tādṛgjagatsamavalokaya yādṛgaṅga
svapne'tha jantumanasi vyavahārajālam

ityārṣe śrīvāsiṣṭhamahārāmāyaṇe vālmī० de० mokṣo ० nirvāṇaprakaraṇe u ० pāṣāṇa० sargabrahmatvapratipādanaṃ nāmāṣṭapañcāśaḥ sargaḥ /०