Yoga Vasistha · Chapter 6.15

pañcadaśaḥ sargaḥ

bhuśuṇḍa uvāca /
yatrāhaṃtvaṃ jagattatra pūrvamāgatya tiṣṭhati /
parāṇvantarapīndrasya trasareṇūdare yathā

bhramasya jāgatasyāsya jātasyākāśavarṇavat /
ahaṃbhāvo'bhimantātmā mūlamādyamudāhṛtam

vāsanārasasaṃsiktādahaṃbījakaṇādayam /
brahmādrau vyomavipine jāyate trijagaddrumaḥ

tārakāpuṣpanikaro vilīnācalapallavaḥ /
saritsāraśirāpūro vāsanāsāratatphalaḥ

ahaṃtvasalilasyedaṃ jagatspanda udāhṛtaḥ /
ciñcamatkaraṇasvādurvāsanāvisaradravaḥ

tārakāsīkarāsāro nabhonantanikhātavān /
bhāvābhāvamahāvarto nānāgiritaraṅgakaḥ

trilokīvilikhallekho vilolālokaphenilaḥ /
brahmāṇḍabudbudodbhedaḥ kavāṭāpīḍapīvaraḥ

bhūpīṭhadṛḍhaḍiṇḍīrapiṇḍaściddhanamadgumān /
citrājavaṃ javībhāvamajjanonmajjanātmakaḥ

jarāmaraṇamohādivīcīcayacamatkṛtiḥ /
utpannadhvaṃsidehādibinduvṛndaikabandhuraḥ

ahaṃtvapavanaspando jagadityavagamyatām /
ahaṃtvapadmasaugandhyaṃ jagadityavabudhyatām

nāhaṃtvajagatī bhinne pavanaspandavatsadā /
payo dravatvamiva ca vahnirauṣṇyamivāpi ca

jagadastyahamarthe'ntarahamasti jagaddhṛdi /
anyonyabhāvinī tvete ādhārādheyavatsthite

jagadbījamahaṃtvaṃ yo mārṣṭi vodhādavedanāt /
alaṃ citraṃ jaleneva tena dhautaṃ jaganmalam

arhatvaṃ nāma tatkiṃcidvidyādhara na vidyate /
akāraṇamavastutvācchaśaśṛṅgamivoditam

brahmaṇyatitate'nante saṃkalpollekhavarjite /
ahaṃtvakāraṇābhāvānna kadācana sanmayam

avastunyeti sargādau na saṃbhavati kāraṇam /
ato'haṃtvādi nāstvevavandhyāsuta iva kvacit

tadabhāvājjagannāsti cittvaṃ jagadabhāvataḥ /
śiṣṭaṃ nirvāṇamevātaḥ śāntamāssva yathāsukham

abhāvādupapattisthādevaṃ jagadahaṃtvayoḥ /
rūpālokamanaskārāḥ śāntāstava na cetarat

yannāsti tattu nāstyeva śeṣaṃ śāntamasi dhuvam /
saṃprabuddho'si mā bhūyo nirmalāṃ bhrāntimāhara

vyapagatakalanākalaṅkaśuddhaḥ
śivamasi śāntamasīśvaro'si nityaḥ /
svamapi bhavati parvatopamānaṃ
jagadapi vā paramāṇurūpameva

ityārṣe śrīvāsiṣṭhamahārāmāyaṇe vālmīkīye de० mo० nirvāṇaprakaraṇe uttarārdhe vi० vidyādharanirvāṇaṃ nāma pañcadaśaḥ sargaḥ