Yoga Vasistha · Chapter 1.14

caturdaśaḥ sargaḥ

śrīrāma uvāca /
āyuḥ pallavakoṇāgralambāmbukaṇabhaṅguram /
unmattamiva saṃtyajya yātyakāṇḍe śarīrakam

viṣayāśīviṣāsaṅgaparijarjaracetasām /
aprauḍhātmavivekānāmāyurāyāsakāraṇam

ye tu vijñātavijñeyā viśrāntā vitate pade /
bhāvābhāvasamāśvāsamāyusteṣāṃ sukhāyate

vayaṃ parimitākārapariniṣṭhitaniścayāḥ /
saṃsārābhrataḍitpuñje mune nāyuṣi nirvṛtāḥ

yujyate veṣṭanaṃ vāyorākāśasya ca khaṇḍanam /
grathanaṃ ca taraṅgāṇāmāsthā nāyuṣi yujyate

pelavaṃ śaradīvābhramasneha iva dīpakaḥ /
taraṅgaka ivālolaṃ gatamevopalakṣyate

taraṅgaṃ pratibimbenduṃ taḍitpuñjaṃ nabhombujam /
grahītumāsthāṃ badhnāmi na tvāyuṣi hatasthitau

aviśrāntamanāḥ śūnyamāyurātatamīhate /
duḥkhāyaiva vimūḍho'ntargarbhamaśvatarī yathā

saṃsārasaṃsṛtāvasyāṃ pheno'sminsargasāgare /
kāyavallayāmbhaso brahmañjīvitaṃ me na rocate

prāpyaṃ saṃprāpyate yena bhūyo yena na śocyate /
parāyā nirvṛteḥ sthānaṃ yattajjīvitamucyate

taravo'pi hi jīvanti jīvanti mṛgapakṣiṇaḥ /
sa jīvati mano yasya mananena na jīvati

jātāsta eva jagati jantavaḥ sādhujīvitāḥ /
ye punarneha jāyante śeṣā jaraṭhagardabhāḥ

bhāro'vivekinaḥ śāstraṃ bhāro jñānaṃ ca rāgiṇaḥ /
aśāntasya mano bhāro bhāro'nātmavido vapuḥ

rūpamāyurmano buddhirahaṃkārastathehitam /
bhāro bhāradharasyeva sarvaṃ duḥkhāya durdhiyaḥ

aviśrāntamanāpūrṇamāpadāṃ paramāspadam /
nīḍaṃ rogavihaṅgānāmāyurāyāsanaṃ dṛḍham

pratyahaṃ khedamutsṛjya śanairalamanāratam /
ākhuneva jaracchubhraṃ kālena vinihanyate

śarīrabilaviśrāntairviṣadāhapradāyibhiḥ /
rogairāpīyate raudrairvyālairiva vanānilaḥ

prasnuvānairavicchedaṃ tucchairantaravāsibhiḥ /
duḥkhairāvṛścyate krūrairghuṇairiva jaraddrumaḥ

nūnaṃ nigaraṇāyāśu ghanagardhamanāratam /
ākhurmārjārakeṇeva maraṇenāvalokyate

gandhādiguṇagarbhiṇyā śūnyayā'śaktiveśyayā /
annaṃ mahāśaneneva jarayā parijīryate

dinaiḥ katipayaireva parijñāya gatādaram /
durjanaḥ sujaneneva yauvanenāvamucyate

vināśasuhṛdā nityaṃ jarāmaraṇabandhunā /
rūpaṃ khiṅgavareṇeva kṛtāntenābhilaṣyate

sthiratayā sukhabhāsitayā tayā
satatamujjñitamuttamaphalgu ca /
jagati nāsti tathā guṇavarjitaṃ
maraṇabhājanamāyuridaṃ yathā

ityārṣe śrīvāsiṣṭhamahārāmāyaṇe vālmīkīye vairāgyaprakaraṇe jīvitagarhā nāma caturdaśaḥ sargaḥ