Vishnudharmottara Purana · Chapter 3.351.355

3.351
mārkaṇḍeya uvāca //
sa dadarśa tadā viṣṇuṃ viśvarūpadharaṃ harim //
yuktaṃ varṇaiḥ śukaprakhyaiḥ pītaraktasitāsitaiḥ

kvacinmecakasaṃyuktaiḥ kvacinmecakarañjitaiḥ //
cicchaśāṃkasaṃkāśaṃ kvaciddhiṅgulasannibham //

kvacinmarakataprakhyaṃ padmarāganibhaṃ kvacit //
kvacitkanakasaṃkāśaṃ kvacinnīlotpalaprabham

kvacitpāṭalapuṣpābhaṃ kvacidgaganasannibham //
kuṃkumakṣodasaṃkāśaṃ haridrakṣodasannibham

kvacidrajopalaprakhyamindranīlanibhaṃ kvacit //
anirdeśyāni varṇāni tathā bibhratkvacitkvacit

nānāvidhānāṃ sattvānāṃ vadanāni bahūni ca //
brahmaśaṃkaraśakrāṇāṃ yamasya varuṇasya ca

dhanadasya hutāśasya vāyornirṛtinastathā //
grahāṇāmatha ṛkṣāṇāṃ rudrāṇāṃ vasubhiḥ saha

ādityānāṃ samarutāṃ bhṛgūṇāṃ ca tathā dvija //
tathaivāṅgiraso rājansādhyānāmaśvibhiḥ saha

daityānāmatha nānānāṃ gandharvoragarakṣasām //
pitṛpannagayakṣāṇāṃ tathā ca piśitāśinām

manuṣya hayanāgānāṃ gajāśvamṛgapakṣiṇām //
dvīpiśārdūlasiṃhānāṃ sarveṣāṃ prāṇināmatha

kānicittasya saumyāni kānicidbhīṣaṇāni ca //
dadarśa tasya vaktrāṇi śataśo'tha sahasraśaḥ

vaktreṣu tasya raudrasya prāṇisaṃghānyanekaśaḥ //
dadarśa sarvataścāgnīngrasyamānām̐śca viṣṇunā

saumyebhyastasya vaktrebhyo nirgacchaṃtyastathā prajāḥ //
vāhāṃśca vividhām̐stasya sa dadarśātha nāradaḥ

hastām̐śca vividhākārānnānāmudrāsamanvitān //
yuktānnānāvidhairbhāṇḍairāyudhaiśca sahasraśaḥ

sruksruvāvedicamasakuśakṛṣṇājināgnibhiḥ //
kecicca kalaśaṃ ghaṇṭāṃ śaṅkhapadmotpalādibhiḥ

kecitkhaḍgagadācakracarmaśūlaparaśvadhaiḥ //
kecitpāśamahādaṇḍakṛpāṇaśarakārmukaiḥ

kecidbhuśuṇḍīlaguḍaśaktivajrāśmapaṭṭiśaiḥ //
bījapūrṇākṣamālāśca pūrṇapātraistathā paraiḥ

evaṃ nānāvidhairbhāṇḍaiḥ karāṃstasya samanvitān //
asaṃkhyeyānmahātejā dadarśa munisattamaḥ

nṛttaśāstravinirdiṣṭo nṛttakarmaṇi cāpyatha //
śirāṃsi dṛṣṭayo hastāṃstasya devasya dṛṣṭavān

trailokyaṃ ca tathā kāye sakalaṃ munisattamaḥ //
devadānavagandharvasayakṣoragarakṣasām

dvīpāmbhonidhilokaiśca pātālaiścaiva saṃyutam //
jagatsamagraṃ devasya dehasthaṃ dṛṣṭavānmuniḥ

sa dṛṣṭvā paramaṃ rūpaṃ bhīto hṛṣṭaśca vismitaḥ //
papāta pādayostasya śirasā sāśrulocanaḥ

stotreṇa caiva tuṣṭāva pūrvoktena janārdanam //
tamuvāca tato devaḥ prahasannṛṣisattamam

// śrībhagavānuvāca // //
uttiṣṭha mābhairdharmajña varaṃ vṛṇu yathepsitam //
// śrīnārada uvāca // //
nityamekāntike deva bhaktirbhavatu sā tvayi //
nānyaṃ varaṃ kāmayāmi narāṇāmidamuttamam

// mārkaṇḍeya uvāca // //
tamuvāca tato devaḥ praṇatārtiharo hariḥ //
etannisargasiddhaṃ te yena tvaṃ dṛṣṭavānmama

viśvarūpamidaṃ brahmannavajñeyaṃ tathā tvayā //
tapastaptaṃ yato vipra mamāpi ca tatastava

rūpametatsamāsthāya rūpaṃ svaṃ dvija darśitam //
icchārūpāṇyahaṃ kuryāṃ śataśo'tha sahasraśaḥ

trailokye yāni rūpāṇi devādīnāṃ dvijottama //
mamaiva tāni jānīhi matto'nyannāsti kiñcana

ahaṃ bhūtaṃ ca bhavyaṃ ca vartamānamahaṃ tathā //
sthāvaraṃ jaṅgamaṃ caiva sarvamevāsmi nārada

saccā'saccāhamevātra tattvametadbravīmi te //
aśabdamarasaṃ sparśagandharūpavivarjitam

sarvagaṃ māṃ vijānīhi paramārthena nārada //
yaḥ kariṣyati me stotraṃ stotreṇa tvatkṛtena tu

tasya kāmānvidhāsyāmi ye divyā ye ca mānuṣāḥ //
śvetadvīpe gatistasya mṛtasya ca bhaviṣyati

śvetadvīpamavāpyāpi naraḥ svastho bhaviṣyasi //
varāhasyāsya kalpasya yāvatkālo'vaśiṣyate // ३३
vārāhe tu gate kalpe tato mātsyo bhaviṣyati //
devakāryāṇi kāryāṇi subahūni yatastvayā

prādurbhāvagataścāhamanuśāsyastathā tvayā //
prādurbhāvāṇi me brahmanvyatītāni sahasraśaḥ

bhaviṣyanti tathānyāni tatra me śṛṇu kānicit //
ahamekārṇave loke śeṣaparyaṃkaśāyikaḥ

lakṣmīsahāyastiṣṭhāmi yadā suptaḥ pitāmahaḥ //
ahaṃ matsyastathā kūrmo haṃsohmapi nārada

strīrūpeṇa mayā vipra vañcitā daityadānavāḥ //
mayāśvaśirasā vedā dānavebhyastathā hṛtāḥ

vārāheṇa mayā bhūtvā vasudheyaṃ samuddhṛtā //
vārāheṇa mayā daityāḥ pātālatalagā hatāḥ

nṛvarāheṇa nihato hiraṇyākṣo balotkaṭaḥ //
dānavāśca hatā yuddhe naranārāyaṇātmanā

lokottare tathā mārge hariḥ kṛṣṇastathāpyaham //
nārasiṃhena rūpeṇa hiraṇyakaśipurhataḥ

vāmanena mayā bhūtvā balestribhuvanaṃ hṛtam //
tribhiḥ kramaiḥ purā brahmandevānāṃ hitakāmyayā

vāḍavo'haṃ samudrasthaḥ pibāmi salilaṃ sadā //
pṛthvī vasumatī brahmanpṛthunā ca mayā kṛtā

kāpilena mayā duṣṭā dagdhavyāḥ sagarātmajāḥ //
dattātreyeṇa vasudhā devā dvijagaṇāḥ punaḥ

jāmadagnyena rāmeṇa laghvī vasumatī kṛtā //
trisapta kṛtvaḥ kartavyā kṣatrabhāraprapīḍitā

dattvā caturdhā putrām̐śca mayā daśarathasya ca //
rāmeṇa rāvaṇavadhaḥ kartavyo janatāsukham

kāryaṃ gandharvanidhanaṃ tathaiva bharatātmanā //
meghanādavadhaḥ kāryo lakṣmaṇena tathā mayā

śatrughnena ca karttavyo lavaṇasya vadhastathā//
mayā vālmīkinā kāryaṃ kāvyaṃ rāmāyaṇaṃ tathā

vyāsen vedā vaktavyā ākhyānaṃ bhārataṃ mahat //
mayā brāhmaṇaśārdūla tathā dvaipāyanātmanā

pāṇḍoḥ putratvamāsādya pañcadhā ca tathā mayā //
dvidhā ca vasudevasya laghvī kāryā vasundharā

naraloke nihantavyā daityā mānuṣarūpiṇaḥ //
balabhadreṇa ca mayā hantavyā mauṣṭikādayaḥ

mayā kṛṣṇena hantavyāḥ kaṃsapūrvā mahābalāḥ //
pradyumnena nihantavyaḥ śambaraśca mahābalaḥ

/
hantavyāścāniruddhena daityāḥ śatasahasraśaḥ //
sāṃbena yuyudhānena mayā bhūtvā tathaiva ca

mayā buddhena vaktavyā dharmāḥ kaliyuge punaḥ //
hantavyā mleccharājānastathā viṣṇuvaśātmanā

mamāṃśena vijānīhi pṛthivyāṃ cakravartinaḥ //
ṛṣayaśca tathā jñeyā mamaivāṃśasamudbhavāḥ

yadyadvibhūtimatsattvaṃ śrīmadūrjitameva ca //
tattadevāvagacchestvaṃ mama tejoṃśasambhavam

atha vā bahunaitena kiṃ jñānena tavānagha //
viṣṭabhyāhamidaṃ kṛtsnamekāṃśenāsthito jagat

tadgaccha mānasī siddhiḥ sadā te'stu dvijottama //
kalpāvasānamāsādya maccharīraṃ pravekṣyasi

etāvaduktvā vacanaṃ tatraivāntaradhīyata //
bhagavānnāradaścakre pūjāṃ taddeśavāsinām

taiśca saṃpūjito viprastānpraṇamya yatavrataḥ //
ājagāma tataḥ śīghraṃ naranārāyaṇāśramam

pādayornyapatattatra sa tayormunipūjyayoḥ //
tābhyāṃ saṃpūjito viprastatrovāsa tadāśrame

tataḥ kadācittaṃ vipramūcatustau tapodhanau //
āvābhyāṃ tvaṃ tathā dṛṣṭaḥ śvetadvīpagate'cyutaḥ

samīpaṃ devadevasya taddehasthairyathāsukham //
loke'sminmuniśārdūla nāsti dhanyatarastvayā

dṛṣṭavānasi yadbrahmanviśvarūpadharaṃ harim //
trailokyasāraṃ viśveśaṃ praṇatārtivināśanam

yataste'nugrahastena kṛto devena viṣṇunā //
tato guhyaṃ nibodhemaṃ tatpūjāvidhimuttamam

sarvakarmakaraṃ divyaṃ sakalārthapradaṃ śivam //
nābhaktāya ca taddeyaṃ tvayā brāhmaṇasattama

ekāntabhāvopagataṃ janārdanaṃ narastu sampūjya tathā vidhānataḥ //
prayāti taddvīpamanuttamaṃ śivaṃ na yatra gatvā vinivartate punaḥ

iti śrīviṣṇudharmottare tṛtīyakhaṇḍe mārkaṇḍeya vajrasaṃvāde viśvarūpākhyānaṃ nāmaikapañcāśaduttaratriśatatamo'dhyāyaḥ

3.352
naranārāyaṇāvūcatuḥ //
ādāveva saraḥsaritprasravaṇasamīpagṛhopavanaparvatamastakānāmanyatame hṛdye deśe susamaṃ manoharaṃ hastamātraṃ maṇḍalakamupakalpayet //
tatra madhye'ṣṭapatraṃ padmamālikhet tatastūdāhṛtacaturasrayā caturdvāralekhayā vibhajet /
tataḥ padmakarṇikāmadhye śvetaṃ śatapatraṃ padmaṃ dhyāyet /
tatkarṇikoparyarkamaṇḍalam tadupari candramaṇḍalam tadupari agnimaṇḍalamtanmadhye paramaṃ puruṣam aśarīram agandham arasam arūpam asparśam aśabdaṃ sarvagaṃ plutāntam ॐkāraṃ vinyaset /
kamalapūrvadale akāraṃ vāsudevaṃ nyaset śvetavarṇaṃ dhyāyet dakṣiṇe ākāraṃ saṃkarṣaṇaṃ vinyaset padmapatrābhaṃ taṃ ca dhyāyet/
paścime dale oṅkāre pradyumnaṃ vinyaset pītavarṇaṃ ca dhyāyet //
uttare dale akāramaniruddhaṃ vinyasetkṛṣṇavarṇañca dhyāyet //
aiśāne dale taditi brahmāṇaṃ vinyaset padmapatrābhaṃ dhyāyet //
sūryakoṭisamaṃ dhyāyet //
vāyavyadale varāhaṃ vinyaset/
bhinnāñjanasamaṃ dhyāyet//
prapūrvadrāre ॐ keṃ ṭeṃ yeṃ etānyakṣarāṇi vainateyaṃ vinyaset//
hemavarṇaṃ ca dhyāyet//
dakṣiṇe dvāre tejoratharatṛcakraṃ sudarśanaṃ vinyaset /
vajranābhaṃ sahasrāraṃ sūryakoṭisamaprabhaṃ dhyāyet //
paścimadvāre śārṅgaṃ vinyaset /
indracāpanibhaṃ dhyāyet //
sveṃ vai ṭheṃ heṃ theṃ uttare dvāre aniruddhaṃ nyasyet /
sarvavarṇaṃ dhyāyet /
veṃ ṇeṃ kṣeṃ kṣeṃ vidikṣu pāñcajanyaṃ śaṃkhaṃ nyaset /
śaśāṅkavarṇaṃ dhyāyet //
gheṃ heṃ bheṃ heṃ śriyaṃ padmaṃ dakṣiṇato nyaset /
śuklāṃ dhyāyet //
geṃ ḍeṃ veṃ śeṃ padmāntarataḥ puṣṭiṃ nyaset /
śvetāṃ dhyāyet /
heṃ seṃ purato vanamālāṃ nyaset /
heṃ seṃ bahuvarṇāṃ dhyāyet //
ॐ cityaiśānyāṃ nandakaṃ nyaset /
ākāśavarṇaṃ dhyāyet //
ॐmityāgneyyāṃ varma nyaset /
bahuvarṇaṃ dhyāyet //
ॐ kṣeṃ leṃ śrīvatsaṃ nyaset /
śuklāṃ dhyāyet//
ॐ cheṃ ṭheṃ vāyavye kaustubhaṃ nyaset ādityaṃ dīptaṃ dhyāyet//
tato maṃḍale bāhyasthāṃ yathāsvadiśamokāraukārau dikpatī śakrāgnī yamanairṛtavāruṇapavanakuberānaiśānyāṃ nyaset /
yathoktarūpaṃ dhyāyet //
ॐ namo bhagavate vāsudevāyetyantena dvādaśākṣareṇa karṇikāmadhye puruṣāyārghyapādyācamanīyānulepanapuṣpadīpadhūpamadhuparkanaivedyaphalabhakṣyāṇi nivedayet / ॐnamo nārāyaṇāyetyatha vāṣṭākṣareṇa mantreṇa /
ॐ jitante puṇḍarīkākṣa namaste viśvabhāvana //
namastestu hṛṣīkeśa mahāpuruṣa pūrvaja //
ityanena maṃtreṇa puruṣasūktena vā /
athānyāndalaniviṣṭāndevānyathābhihitairmantraiḥ pṛthakpṛthagarcayed /
anena vidhinā yastu viṣṇumabhyarcayennaraḥ /
sarvānsaṃsādhayedarthānkṛtakṛtyo hi jāyate

kṛtvā vyādhiṃ vyādhitaṃ bhakṣayati na karoti na tadāpnoti idaṃ tvanyat /
dhanyaṃ yaśasyaṃ puṇyaṃ ca pavitraṃ pāpanāśanam //
ārogyaṃ dhanadhānyavarddhanaṃ śatrughnaṃ vaśīkaraṇaṃ yaḥ puruṣo'nena vidhinā satataṃ devamabhyarcayati sampattiṃ janayati atha vā tasya na rocate tadā śvetadvīpamavāpya arkamaṇḍalaṃ bhittvā niruṇaddhi pradyumnasaṃkarṣaṇānprāpnoti sudevatvamavāpya niṣkalatvamāpnoti //
iti śrīviṣṇudharmottare tṛ० khaṃ० mā० va० saṃ० nārāyaṇapūjanaprakāravarṇano nāma dvipa ñcāśaduttaratriśatatamo'dhyāyaḥ

3.353
// mārkaṇḍeya uvāca // //
etaddhi nāradaḥ śrutvā naranārāyaṇeritam //
anenaiva vidhāsatataṃ madhusūdanam

pūjayāmāsa dharmātmā tadgatenāntarātmanā //
tataḥ puṃsavano bhagavān nāradasya mahātmanaḥ

pratyakṣataḥ punarbhūtaṃ nāradaṃ vākyamabravīt //
gaccha nārada bhadra tvaṃ lokāṃścara yathepsitān

darśanaṃ tava dāsyāmi kālekāle yathepsite//
anugrahamidaṃ prāpya deveśātpuruṣottamāt

cacāra nārado lokānnityaṃ saṃpūjayanharim //
viśvarūpamidaṃ dṛṣṭaṃ nāradena mahātmanā

prahlādena punastena narakesarirūpiṇaḥ //
tathā cāmṛtakādehe tenaiva ca mahātmanā

brahmaṇā ca purā dṛṣṭaṃ trailokyākramaṇe punaḥ //
paścime sāgare dṛṣṭaṃ daśagrīveṇa rakṣasā

kṛṣṇāvatāre dūtyena gatasya madhuvidviṣaḥ //
dhārtarāṣṭrasabhāmadhye ṛṣibhiśca parīkṣitaḥ

mahābhāratasaṃgrāme dṛṣṭavānarjunastathā //
bandhunāśabhayodvigno yatra tena prabodhitaḥ

nivṛtte bhārate yuddhe gacchanto dvārakāṃ punaḥ //
mārgāgatena taddṛṣṭamuttaṃkena mahātmanā

trailokyanātho govindaḥ satataṃ bhaktavatsalaḥ//
tasya karmāṇi yo nityaṃ puruṣaḥ parikīrtayet

śṛṇuyādvā mahīpāla śucistadgatamānasaḥ //
sarvapāpavinirmuktaḥ sa yāti paramāṃ gatim

evaṃ sa rājandvijavaryamukhyaḥ saṃprāptavāndevavarātprasādam //
bhaktikramakraiyanṛpaprasādāttasmāddhikāmānpuruṣā labhaṃte

iti śrīviṣṇudharmottare tṛ० kha० mārkaṇḍeyavajrasaṃvāde nāradaprasādo nāma tripañcāśaduttaratriśatatamo'dhyāyaḥ

3.354
// vajra uvāca // //
māhātmyaṃ devadevasya viṣṇoramitatejasaḥ //
tṛptirna vidyate tasmānmāhātmyamaparaṃ vada

tasyaiva devadevasya viṣṇoramitatejasaḥ //
rakṣāyuktaṃ pavitraṃ ca lokeṣvāścaryamuttamam

// mārkaṇḍeya uvāca // //
ekāntabhāvopagataḥ kaścidāsīddvijottamaḥ

sāttvato gautamaśreṣṭho viṣvaksena iti śrutaḥ //
pañcakālavidhānajñaḥ pāñcarātravidhānavit

satataṃ pūjayāmāsa devadevaṃ janārdanam//
kṛṣṇāyatanapūjārthaṃ sa babhrāma vasundharām

āsasāda kadācittu parvataṃ gahvaraṃ mahat//
yatra māheśvaraḥ sarvo jano yadbalajo bahu

sa tatra nirjhare snātvā pūjayāmāsa keśavam//
vedyāṃ prakalpitāyāṃ tu bhogaiḥ sannihitaiḥ prabhum

tasmāttu gahvārātkaścidviniṣkramya yadṛcchayā/
nibaddhakhaḍgairbahubhiḥ puruṣaiścāpapāṇibhiḥ

sahitastaṃ dadarśātha pūjayanvai janārdanam//
tasya gatvā samīpe tu grāmasvāmikumārakaḥ

tamuvāca tvamabhyehi devakarma kuruṣva me //
śirorugarditastāta snātuṃ śaknomi nādya vai

devakarmaṇyaśaktirme tāta pūjaya śaṅkaram //
devatāyatanaṃ gatvā yatra tāta pratiṣṭhitam

liṅgamasti sureśasya mahādevasya nirmitam //
etaduktaṃ pratyuvāca vayamekārcinaḥ śrutāḥ

caturātmā hariḥ pūjyaḥ prādurbhāvagato'tha vā //
pūjayāmyadya naivānyaṃ tasmāttvaṃ gaccha mā ciram

evamuktaḥ kumārastu khaḍgamākṛṣya sattvaram //
tamuvāca tadā vipraṃ tvāṃ vadhiṣye na saṃśayaḥ

yadi liṅgārcanaṃ gatvā na karoṣi hi durmate //
śastrādadhiko devo na hyekosti narādhama

khaḍgena pātayiṣyāmi bhavacchīrṣamasaṃśayam //
evamukteḥ sa tenātha prāṇarakṣā parāyaṇaḥ

bahirgacchāmi tatreti tena sārdhaṃ tadā yayau //
dṛṣṭvā ca liṅgaṃ devasya cintayāmāsa dharmavit

viṣṇuḥ sarvagato devaḥ sarvātmā madhusūdanaḥ //
tasya raudreṇa bhāvena mahādevaḥ pratiṣṭhitaḥ

tasya vai raudrabhāvena narasiṃhastathā prabhuḥ //
liṅgesminpūjayiṣyāmi narasiṃhavapurdharam //
devadevaṃ mahātmānaṃ tena nityaṃ surārcanāt

pratyapāyo na bhavitā prāṇatrāṇamabhīpsitaḥ //
tataḥ sa devadeveśaṃ narasiṃhavapurdharam

manasā tu tadā dhyātvā pūjayāmāsa liṅgagam //
namostu te nṛsiṃhāya vadanneva kṛtāñjaliḥ

namostu narasiṃhāya śrutvā tasmātsubhāṣitam //
grāmeśanandanaḥ kruddhaḥ khaḍgamākṛṣya sattvaram

prahāramudyato dātuṃ tasya viprasya dhīmataḥ //
liṅgaṃ bhittvā tato devo narasiṃhavapurdharaḥ

samutthāya tataḥ krodhād grāmasvāmikumārakam //
dadāha bhagavāñchīghraṃ sānugaṃ netravahninā

tasya sāttvatamukhyasya divyaṃ cakṣurdadau tataḥ //
dadarśa yena veśena narasiṃhavapurdharam

dṛṣṭvā stotreṇa tuṣṭāva tadā tasya janārdanaḥ //
stotrasya tu varaṃ prādāttanme nigadataḥ śṛṇu

rakṣoghnaṃ pāpaśamanaṃ bhūtavetālanāśanam //
yo japettatsadaivāstu maṅgalyaṃ śrīvivardhanam

nārasiṃheṣu lokeṣu modaṃte sahito mayā //
yāvatkalpāvaśeṣaṃ tu tato māntvamupeṣyasi

etāvaduktvā sahasā tu tena tatraiva devapravaro mahātmā //
apaśyatāṃ yādavavaṃśamukhya jagāma śīghraṃ narasiṃhamūrtiḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde liṅgasphoṭananarasiṃhadarśanavarṇano nāma catuṣpañcāśadadhikatriśatatamo'dhyāyaḥ

3.355
vajra uvāca //
sāttvatena stuto yena stotreṇa madhusūdanaḥ //
tanme stotraṃ samācakṣva sarvakalmaṣanāśanam

mārkaṇḍeya uvāca //
śṛṇu stotramidaṃ vajra liṅgāsphoṭamiti śrutam //
sarvapāpapraśamanaṃ māṅgalyaṃ śrīvivardhanam

ॐ namo bhagavate vāsudevāya namo narasiṃhāyādidevāya sarvalokaparamāya nārāyaṇāya nityasannihitasaṃprāpyaśaktibalavīryatejovibhavāya mahārajataparvataprakāśavapuṣe bṛhatkesarasaṭāya śivapradeśābhyu nnatatāmrarucitavisphūrjitaprabhāhemavarṇāya prapannajanabādhāpanayananimittotpannabhrukuṭikuṭilalalāṭāya śatahradāvartadīptavikṣipyamāṇeṣugalāya jvaladanalalolapiṅgavṛttadīptākṣāya sphuṭacipiṭadhamanīsahapuravibhīṣaṇaprāṇavaśāya sphuratpūrṇobhayakapoladeśapārśvāya vālacandrākāroṣṭhapuṭa vinirgatabhrājamānātitīkṣṇasitamahogradaṃṣṭrasarvāsyāvasamāgamakṣobhāśanisahasrāvapātāṃbudavrātagarjitātibhīmaninādāya muhumuhurvyāptabhīmārdhavada nadeśadṛśyamānaśuddhiśikharadaśanapaṃktitārāvibhāsvarasandhyānurañjitanabhasthalaprakāśavapuṣe tālulolajihvālatāgrasthirasamāyuktacittabhavāṃsakū-
ṭaskandamadhyadeśasupratiṣṭhitapīnavṛttacārukambugrīvāya śrīvatsāṃkitālaṅkṛtamahāvakṣasthalāya vividharuciraparamasugandhimuktakapuṣpagrathitapralambamālādharāya marutādityapracārabalānuvijayonnatābhyunnatabāhuprakoṣṭhakaratalakarajograghorapraharaṇāya hiraṇyakaśipurudhirapānasutīkṣṇavajrāyudhāya parama pītakauśeyavastrabaddhakakṣyāparikarāya vajrasaṃhatonnatasucirasuśliṣṭasandhikaṭyūrujānumahāpuruṣanarasiṃhādidevāya sthirasāyuṃktebhaktocitaprasṛtatanvākāragūḍhagulphasandhimahābāhuvegamahājavāya caraṇavikramaprabhāvaprakaṃpyamānapṛthivītalāya śrīvṛkṣaśaṃkhacakragadāsanaṃdyāvartadhvajāṃkuśadharātapattrādarśaka matsyakūrmavīcīyūpacandrārkavṛṣabhāśvagajarathaparamapuruṣaparamamaṅgalyaromakūṭacchāyāya tanumahendravasurudrādityasādhyāśvimarudgaṇasaṃstutācintyārcitābhimu khaprasannacaraṇāya bhagavannamaste tvamāgacchāgaccha bhagavannātmabalavīryatejoguṇātmavikramasāṃkhyayogādhyātmapavitraśaucadharmamāhātmyānvitāvirmāvitotti ṣṭha paramadeva sarvagātrāṇyabhidhunvansarvapāpānyapamṛjya vipranāśāviṣṭānāṃ vipranāśāya vidyānāṃ paramapuruṣa paramamāṅgalya bhaktavatsala bhaktānugrahāyābhayaṃpradāya tadbrahmasatyamanādyamanuttamaṃ niḥśreyasaṃ tadbhagavānācaṣṭāṃ tadbhagavānvidatāṃ nirasya pāpmānaṃ nirasya kalmaṣaṃ śaśvacchāntimupanaya śreya upanaya svastimupanaya āśiṣamupanaya brahma prapadye tvāṃ viṣṇo bhagavanpuṇḍarīkākṣa jñānaiśvaryaśaktibalatejoguṇātmaka paramapuruṣa paramamaṅgalya padmanābha hayaśiraḥ ādivarāha narasiṃha vāmana trivikrama rāma rāma vāsudeva saṅkarṣaṇa pradyumnāniruddha puruṣa satyāśruta vāsudeva ādimadhyanidhanakaceṣṭita ceṣṭātmamāyāhorātrayatimāñjiṣṭhaśuklavāsaḥ suparṇa tālamakaradhvajaparamavidyākarmakālanābha svastyasmabhyaṃ svasti prajābhyaḥ //
tvameva maṃtraṃ tvaṃ rakṣā tvamauṣadhamanuttamam //
trividhādapi duḥkhānmā pracodaya jagatpate

brahmanprapadye tvāṃ viṣṇo śaraṇāgatavatsala //
tadā śuddho mahāmatirbhavaduḥkhavinirgataḥ

ityuktaḥ sa ca rājendra ṛṣiṇā divyacakṣuṣā //
namaskṛtya ṛṣeḥ pādau sagaṇaḥ saha rājabhiḥ //
pradakṣiṇamupākṛtya praviveśa puraṃ svakam

ṛṣayaste'pyanujñātā mārkaṇḍeyena dhīmatā //
namaskṛtya hariṃ devaṃ svāśramaṃ jagmire tadā

rājāpi vajro dharmātmā mārkaṇḍeyena bhāṣitam //
purāṇaṃ cintayannityaṃ nārāyaṇaparāyaṇaḥ //
rājyaṃ ca prāśiṣannityaṃ prajā dharmeṇa pālayan

iti śrīviṣṇumahāpurāṇe dvitīyabhāge śrīviṣṇudharmottare tṛtīyakhaṇḍe mārkaṇḍeyavajrasaṃvāde śrīnarasiṃhastotravarṇanaṃ nāma pañcapañcāśaduttaratriśatatamo'dhyāyaḥ

iti śrīviṣṇudharmottaraṃ samāptam // //
samāptaṃ cedaṃ viṣṇumahāpurāṇama //