Varaha Purana · Chapter 91

śrīvarāha uvāca /
yā mandaragatā devī tapastaptuṃ tu vaiṣṇavī /
rājasī paramā śaktiḥ kaumāravratadhāriṇī

saikākinī tapastepe viśālāyāṃ tu śobhane /
tasyāstapantyāḥ kālena mahatā kṣubhitaṃ manaḥ

tasmāt kṣobhāt samuttasthuḥ kumāryaḥ saumyalocanāḥ /
nīlakuñcitakeśāntā bimboṣṭhāyatalocanāḥ /
nitambaraśanoddāmā nūpurāḍhyāḥ suvarcasaḥ

evaṃvidhāḥ striyo devyā kṣobhite manasi drutam /
uttasthuḥ śatasāhastrāḥ koṭiśo vividhānanāḥ

dṛṣṭvā kumāryaḥ sā devī tasminneva girau śubhā /
tapasā nirmame devī puraṃ harmyaśatākulam

viśālarathyaṃ sauvarṇaprāsādairupaśobhitam /
antarjalāni veśmāni maṇisopānavanti ca /
ratnajālagavākṣāṇi āsannopavanāni ca

asaṃkhyātāni harmyāṇi tathā kanyā dharādhare /
prādhānyena pravakṣyāmi kanyānāmāni śobhane

vidyutprabhā candrakāntiḥ sūryakāntistathā'parā /
gambhīrā cārukeśī ca sujātā muñjakeśinī

ghṛtācī corvaśī cānyā śaśinī śīlamaṇḍitā /
cārukanyā viśālākṣī dhanyā pīnapayodharā

candraprabhā girisutā tathā sūryaprabhā'mṛtā /
svayaṃprabhā cārumukhī śivadūtī vibhāvarī

jayā ca vijayā caiva jayantī cāparājitā /
etāścānyāśca śataśaḥ kanyāstasmin purottame

devyā anucarāḥ sarvāḥ pāśāṅkuśadharāḥ śubhāḥ /
tābhiḥ parivṛtā devī siṃhāsanagatā śubhā

susitaiścāmaraiḥ strībhirvījyamānā vilāsinī /
kaumāraṃ vratamāsthāya tapaḥ kartuṃ samudyatā

yauvanasthā mahābhāgā pīnavṛttapayodharā /
campakāśokapunnāganāgakesaradāmabhiḥ

sarvāṅgeṣvarcitā devī ṛṣidevanamaskṛtā /
pūjyamānā varastrībhiḥ kumārībhiḥ samantataḥ

sarvāṅgabhoginī devī yāvadāste tapo'nvitā /
tāvadāgatavāṃstatra nārado brahmaṇaḥ sutaḥ

taṃ dṛṣṭvā sahasā devī brahmaputraṃ tapodhanam /
vidyutprabhāmuvācedamāsanaṃ dīyatāmiti /
pādyamācamanīyaṃ ca kṣipramasmai pradīyatām

evamuktā tadā devyā kanyā vidyuprabhā śubhā /
āsanaṃ pādyamarghyaṃ ca nāradāya nyavedayat

tataḥ kṛtāsanaṃ dṛṣṭvā praṇataṃ nāradaṃ munim /
uvāca vacanaṃ devī harṣeṇa mahatā'nvitā

svāgataṃ bho muniśreṣṭha kasmāllokādihāgataḥ /
kiṃ kāryaṃ vada te kṛtyaṃ mā te kālātyayo bhavet

evamuktastadā devyā nāradaḥ prāha lokavit /
brahmalokādindralokaṃ tasmād raudramathācalam

tatastvāmiha deveśi draṣṭumabhyāgataḥ śubhe /
evamuktvā muniḥ śrīmāṃstāṃ devīmanvavekṣata

dṛṣṭvā muhūrtaṃ deveśi vismito nārado'bhavat /
aho rūpamaho kāntiraho dhairyamaho vayaḥ

aho niṣkāmatā devyā iti khedamupāyayau /
devagandharvasiddhānāṃ yakṣakinnararakṣasām

na rūpamīdṛśaṃ kvāpi strīṣvanyāsu pradṛśyate /
evaṃ saṃcintya manasā nārado vismayānvitaḥ

praṇamya devīṃ varadāmutpapāta nabhastalam /
gataśca ttvarayā yuktaḥ purīṃ daityendrapālitām

mahiṣākhyena bhūteśi samudrāntaḥsthitāṃ purīm /
tatrāsasāda bhagavānasuraṃ mahiṣākṛtim

dṛṣṭvā labdhavaraṃ vīraṃ devasainyāntakaṃ mahat /
sa tena pūjito bhaktyā tadā lokacaro muniḥ

prītātmā nāradastasmai devyā rūpamanuttamam /
ācacakṣe yathānyāyaṃ yad dṛṣṭaṃ devatāpure

nārada uvāca /
asurendra śrṛṇuṣvekaṃ kanyāratnaṃ samāhitaḥ /
yena labdhaṃ tu trailokyaṃ varadānāccarācaram

brahmalokādahaṃ daitya mandarādrimupāgataḥ /
tatra devīpuraṃ dṛṣṭaṃ kumārīśatasaṅkulam

tatra pradhānā yā kanyā tāpasī vratadhāriṇī /
sā devadaityayakṣāṇāṃ madhye kācinna dṛśyate

yādṛśī sā śubhā daitya tādṛśyekāṇḍamadhyataḥ /
bhramatā tādṛśī dṛṣṭvā na kadācinmayā satī

tasyāśca devagandharvā ṛṣayaḥ siddhacāraṇāḥ /
upāsāṃcakrire sarve ye'pyanye daityanāyakāḥ

tāṃ dṛṣṭvā varadāṃ devīmahaṃ tūrṇamihāgataḥ /
ajitvā devagandharvān na tāṃ jayati kaścana

evamuktvā kṣaṇaṃ sthitvā tamanujñāpya nāradaḥ /
yathāgataṃ yayau dhīmānantardhānena tatkṣaṇāt

// iti śrīvarāhapurāṇe bhagavacchāstre ekanavatitamo'dhyāyaḥ