Varaha Purana · Chapter 49

durvāsā uvāca /
tadvadāśvayuje māsi dvādaśīṃ śuklapakṣataḥ /
saṃkalpyābhyarcayed devaṃ padmanābhaṃ sanātanam

padmanābhāya pādau tu kaṭiṃ vai padmayonaye /
udaraṃ sarvadevāya puṣkarākṣāya vai uraḥ /
avyayāya tathā pāṇiṃ prāgvadastrāṇi pūjayet

prabhavāya śiraḥ pūjya prāgvadagre ghaṭaṃ nyaset /
tasmin sauvarṇakaṃ devaṃ padmanābhaṃ tu vinyaset

tameva devaṃ saṃpūjya gandhapuṣpādibhiḥ kramāt /
prabhātāyāṃ tu śarvaryāṃ brāhmaṇāya nivedayet /
evaṃ kṛte tu yat puṇyaṃ tannibodha mahāmune

āsīt kṛtayuge rājā bhadrāśvo nāma vīryavān /
yasya nāmnā'bhavad varṣaṃ bhadrāśvaṃ nāma nāmataḥ

tasyāgastyaḥ kadācit tu gṛhamāgatya sattama /
uvāca saptarātraṃ tu vasāmi bhavato gṛhe

taṃ rājā śirasā bhūtvā sthīyatāmityabhāṣata /
tasya kāntimatī nāma bhāryā paramaśobhanā

tasyāstejaḥ samabhavad dvādaśādityasaṃnibham /
śatāni pañca tasyāsan sapatnīnāṃ yatavrata

tā dāsya iva karmāṇi kurvantyaharahaḥ śubhāḥ /
kāntimatyā mahābhāga bhayāt trastā vicetasaḥ

tāmagastyastathā dṛṣṭvā rūpatejo'nvitāṃ śubhām /
sapatnyaśca bhayāt tasyāḥ kurvantyaḥ karma śobhanam /
rājā tu tasyā muditaṃ mukhamevāvalokayan

evaṃbhūtāmatho dṛṣṭvā rājñīṃ paramaśobhanām /
sādhu sādhu jagannāthetyagastyaḥ prāha harṣitaḥ

dvitīye divase'pyevaṃ rājñīṃ dṛṣṭvā mahāprabhām /
aho muṣṭamaho muṣṭaṃ jagadetaccarācaram /
ityagastyo dvitīye'hni rājñīṃ dṛṣṭvā'bhyuvāca ha

tṛtīye'hani tāṃ dṛṣṭvā punarevamuvāca ha /
aho mūḍhā na jānanti govindaṃ parameśvaram /
ya eke'hni phalaṃ caitad rājñe tuṣṭaḥ pradattavān

caturthe divase hastāvutkṣipya punarabravīt /
sādhu sādhu jagannātha strī śūdrāḥ sādhu sādhviti /
dvijāḥ sādhu nṛpāḥ sādhu vaiśyāḥ sādhu punaḥ punaḥ

sādhu bhadrāśva sādhu tvaṃ bho'gastya sādhu sādhu te /
sādhu prahlāda te sādhu dhruva sādho mahāvrata /
evamuktvā nanartoccairagastyo rājasaṃnidhau

evaṃbhūtaṃ ca taṃ dṛṣṭvā sapatnīko nṛpottamaḥ /
kiṃ harṣakāraṇaṃ brahman yenetthaṃ nṛtyate bhavān

agastya uvāca /
aho mūrkhaḥ kurājā tvamaho mūrkhā'nugāstvamī /
aho purohitā mūrkhā ye na jānanti me matam

evamukte tato rājā kṛtāñjalirabhāṣata /
na jānīmo vayaṃ brahman praśnametat tvayeritam /
kathayasva mahābhāga yadyanugrahakṛd bhavān

agastya uvāca /
iyaṃ rājñī tvayā yā'bhūd dāsī vaiśyasya vaidiśe /
nagare haridattasya tvamasyāḥ patireva ca /
tasyaiva karmakāro'bhūcchūdraḥ sevanatatparaḥ

sa vaiśyo'śvayuje māsi dvādaśyāṃ niyataḥ sthitaḥ /
svayaṃ viṣṇvālayaṃ gatvā puṣpadhūpādibhirharim

abhyarcya svagṛhaṃ prāyād bhavantau rakṣapālakau /
sthāpya dvāvapi dīpānāṃ jvalanārthaṃ mahāmate

gate vaiśye bhavantautha dīpān prajvālya saṃsthitau /
yāvat prabhātā rajanī niśāmekāṃ narottama

tataḥ kāle mṛtau tau tu ubhau dvāvapi dampatī /
tena puṇyena te janma priyavratagṛhe'bhavat

iyaṃ tu patnī te jātā purā vaiśyasya dāsikā /
pārakyasyāpi dīpasya jvālitasya harergṛhe

yaḥ punaḥ svena vittena viṣṇoragre pradīpakam /
jvālayet tasya yat puṇyaṃ tat saṃkhyātuṃ na śakyate /
tena sādho hare sādhu ityuktaṃ vacanaṃ mayā

kṛte saṃvatsare bhaktiṃ hareḥ kṛtvā vicakṣaṇaḥ /
saṃvatsarārdhaṃ tretāyāṃ samametanna saṃśayaḥ

trimāse dvāpare bhaktyā pūjayam̐llabhate phalam /
namo nārāyaṇāyetyuktvā kalau tu labhate phalam /
tena muṣṭaṃ jagad viṣṇorbhaktimātraṃ mayeritam

pārakyadīpasyotkarṣād vai devāgre phalamīdṛśam /
prāptaṃ phalaṃ tvayā rājan phalametan mayeritam /
aho mūḍhā na jānanti harerdīpakriyāphalam

evaṃ vidhaṃ dvijā ye ca rājāno ye ca bhaktitaḥ /
yajante vividhairyajñaistena te sādhavaḥ smṛtāḥ

ahaṃ tameva muktvā'nyaṃ na paśyāmi mahītale /
tena sādho agastyeti mayā cātmā praśaṃsitaḥ /
harṣeṇa mahatā rājan vyākṣiptena mayeritam

sā strī dhanyā sa śūdrastu tathā dhanyataro mataḥ /
bhartuḥ suśrūṣaṇaṃ kṛtvā tatparokṣe hareriti

sā strī dhanyā tathā śūdro dvijasuśrūṣaṇe rataḥ /
tadanujñayā harerbhaktiḥ strī śūdro tena sādhviti

āsuraṃ bhāvamāsthāya prahlādaḥ puruṣottamam /
muktvā cānyaṃ na jānāti tenāsau sādhurucyate

prajāpatikule bhūtvā bāla eva vanaṃ gataḥ /
ārādhya viṣṇuṃ prāptaṃ tat sthānaṃ paramaśobhanam /
tena sādho dhruvetyevaṃ mayoktaṃ rājasattama

iti rājā vacaḥ śrutvā agastyasya mahātmanaḥ /
alpopadeśarājā'sau papraccha munipuṃgavam

agastyaśca mahābhāgaḥ kārtikyāṃ puṣkaraṃ vrajan /
gate'gastye pragacchan vai bhadrāśvasya niveśanam

pṛṣṭaśca rājñā tāmeva dvādaśīṃ munisattamaḥ /
durvāsā uvāca /
idameva mayā tubhyaṃ kathitaṃ te tapodhana

kathayitvā punarvākyamagastyo nṛpasattamam /
uvāca puṣkaraṃ yāmi punareṣyāmi te gṛham /
evamuktvā jagāmāśu sadyo'darśanatāṃ muniḥ

rājā'pi tena vidhinā padmanābhasya dvādaśīm /.
upoṣya paramaṃ kāmamiha janmani cāptavān

sapatnīko nṛpavaro dvādaśīṃ samupoṣya ca /
iha janmani rājā'sau putrapautrāṃstathā''ptavān

// iti śrīvarāhapurāṇe bhagavacchāstre ekonapañcāśo'dhyāyaḥ