Vaiśeṣikasūtra (another edition) · Chapter 3.2

ātmendriyārthasannikarṣajñānasya bhāvo 'bhāvaśca manaso liṅgam

tasya dravyatva nityatve vāyunā vyākhyāte

prayatnāyaugapadyājjñānāyaugapadyāccaikam

prāṇāpānanimeṣonmeṣajīvanamanogatīndriyāntara vikārāḥ sukhaduḥkhecchādveṣa prayatnāścātmano liṅgāni

tasya dravyatvanityatve vāyunā vyākhyāte

yajñadatta iti sannikarṣe pratyakṣābhāvāt dṛṣṭaṃ liṅgaṃ na vidyate

sāmānyato dṛṣṭāccāviśeṣaḥ

tasmādāgamikaḥ

ahamiti śabdasya vyatirekānnāgamikam

yadi dṛṣṭamanvakṣamahaṃ devadatto 'haṃ yajñadatta iti

dṛṣṭyātmani liṅge eka eva dṛḍhatvāt pratyakṣavat pratyayaḥ

devadatto gacchati yajñadatto gacchatītyupacārāccharīre pratyayaḥ

sandigdhāstūpacārāḥ

ahamiti pratyagātmani bhāvāt paratrābhāvādarthāntara pratyakṣaḥ

devadatto gacchatītyupacārādabhimānāttāvaccharīrapratyakṣo 'haṅkāraḥ

sandigdhastūpacāraḥ

na tu śarīraviśeṣādyajñadatta viṣṇumitrayorjñānaviṣayaḥ

ahamiti mukhyayogyābhyāṃ śabdavadvyatirekāvyabhicārādviśeṣa siddhernāgamikaḥ

sukhaduḥkha jñānaniṣpattyaviśeṣādaikātmyam

vyavasthāto nānā

śāstrasāmarthyācca