vairāgyapañcakam · Chapter 1

kṣoṇī koṇa śatāṃśa pālana kalā durvāra garvānala-
kṣubhyatkṣudra narendra cāṭu racanā dhanyān na manyāmahe |
devaṃ sevitumeva niścinumahe yo'sau dayāluḥ purā
dhānā muṣṭimuce kucela munaye datte sma vitteśatām

śilaṃ kimanalaṃ bhavedanalamaudaraṃ bādhituṃ
payaḥ prasṛti pūrakaṃ kimu na dhārakaṃ sārasam |
ayatna mala mallakaṃ pathi paṭaccaraṃ kaccaraṃ
bhajanti vibudhā mudhā hyahaha kukṣitaḥ kukṣitaḥ

jvalatu jaladhi kroḍa krīḍatkṛpīḍa bhava prabhā-
pratibhaṭa paṭu jvālā mālākulo jaṭharānalaḥ |
tṛṇamapi vayaṃ sāyaṃ saṃphulla malli matallikā
parimalamucā vācā yācāmahe na mahīśvarān

durīśvara dvāra bahirvitardikā-
durāsikāyai racito'yamañjaliḥ |
yadañjanābhaṃ nirapāyamasti me
dhanañjaya syandana bhūṣaṇaṃ dhanam

śarīra patanāvadhi prabhu niṣevaṇāpādanāt
abindhana dhanañjaya praśamadaṃ dhanaṃ dandhanam |
dhanañjaya vivardhanaṃ dhanamudūḍha govardhanaṃ
susādhanamabādhanaṃ sumanasāṃ samārādhanam

nāsti pitrārjitaṃ kiñcinna mayā kiñcidārjitam |
asti me hasti śailāgre vastu paitāmahaṃ dhanam