વૈરાગ્યપઞ્ચકમ્ · અધ્યાય 1

ક્ષોણી કોણ શતાંશ પાલન કલા દુર્વાર ગર્વાનલ-
ક્ષુભ્યત્ક્ષુદ્ર નરેન્દ્ર ચાટુ રચના ધન્યાન્ ન મન્યામહે ।
દેવં સેવિતુમેવ નિશ્ચિનુમહે યોઽસૌ દયાલુઃ પુરા
ધાના મુષ્ટિમુચે કુચેલ મુનયે દત્તે સ્મ વિત્તેશતામ્

શિલં કિમનલં ભવેદનલમૌદરં બાધિતું
પયઃ પ્રસૃતિ પૂરકં કિમુ ન ધારકં સારસમ્ ।
અયત્ન મલ મલ્લકં પથિ પટચ્ચરં કચ્ચરં
ભજન્તિ વિબુધા મુધા હ્યહહ કુક્ષિતઃ કુક્ષિતઃ

જ્વલતુ જલધિ ક્રોડ ક્રીડત્કૃપીડ ભવ પ્રભા-
પ્રતિભટ પટુ જ્વાલા માલાકુલો જઠરાનલઃ ।
તૃણમપિ વયં સાયં સંફુલ્લ મલ્લિ મતલ્લિકા
પરિમલમુચા વાચા યાચામહે ન મહીશ્વરાન્

દુરીશ્વર દ્વાર બહિર્વિતર્દિકા-
દુરાસિકાયૈ રચિતોઽયમઞ્જલિઃ ।
યદઞ્જનાભં નિરપાયમસ્તિ મે
ધનઞ્જય સ્યન્દન ભૂષણં ધનમ્

શરીર પતનાવધિ પ્રભુ નિષેવણાપાદનાત્
અબિન્ધન ધનઞ્જય પ્રશમદં ધનં દન્ધનમ્ ।
ધનઞ્જય વિવર્ધનં ધનમુદૂઢ ગોવર્ધનં
સુસાધનમબાધનં સુમનસાં સમારાધનમ્

નાસ્તિ પિત્રાર્જિતં કિઞ્ચિન્ન મયા કિઞ્ચિદાર્જિતમ્ ।
અસ્તિ મે હસ્તિ શૈલાગ્રે વસ્તુ પૈતામહં ધનમ્