Vaikhānasamantrapraśna, 5-8 · Chapter 8.1.154

úd uttamáṃ varuṇa pā́śam asmád ávādhamáṃ ví madhyamá(gg)ṃ śrathāya
áthā vayám āditya vraté távā́nāgaso áditaye syāma

imáṃ me varuṇa śrudhī hávam adyā́ ca mr̥ḍaya
tvā́m avasyúr ā́ cake

tát[*885] tvā yāmi bráhmaṇā vándamānas tád ā́ śāste yájamāno havírbhiḥ
áheḍamāno varuṇehá bodhy úruśa(g)ṃsa mā́ na ā́yuḥ prá moṣīḥ

tváṃ no agne váruṇasya vidvā́n devásya héḍó 'va yāsisīṣṭhāḥ
yájiṣṭho váhnitamaś śóśucāno víśvā dvéṣā́(g)ṃsi prá mumugdhy asmát

sá tváṃ no agne 'vamó bhavotī́ nédiṣṭho asyā́ uṣáso vyuṣṭau
áva yakṣva no váruṇa(g)ṃ rárāṇo vīhí[*886] mr̥ḍīká(g)ṃ suhávo na edhi

tvám agne ayā́sy ayā́ sán mánasā hitáḥ
ayā́ sán havyám ūhiṣe áyā́ no dhehi bheṣajám

yé te śatáṃ varuṇa yé sahásraṃ yajñíyāḥ pā́śā vítatāḥ purutrā́
tébhyo na índras savitótá víṣṇur víśvedevā́ muñcantu marútas svastyā́
[*885] Text: tá
[*886] Text: vīhá