Vaikhānasamantrapraśna, 5-8 · Chapter 8.1.145

sám indra ṇo mánasā neṣi góbhiḥ sá(g)ṃ sūríbhir maghavanth[*866] sá(gg)ṃ svastyā́[*867]
sáṃ bráhmaṇā devá-kr̥taṃ[*868] yád ásti sáṃ devā́nā́(g)ṃ sumatyā́ yajñíyānām

ārā́c chátrum ápa bādhasva dūrám úgró yáś śámbaḥ[*869] puruhūta téna
asmé dhehi yávamad gómád índrá kr̥dhī́ dhíyaṃ jaritré vā́ja-ratnām

índra śréṣṭhāni dráviṇāni dhehi cíttiṃ dákṣasya subhagatvám asmé
póṣaṃ rayīṇā́m áriṣṭiṃ tanū́nāṃ svādmā́naṃ vācás sudinatvám áhnām

bhúvas tvám indra bráhmaṇā mahā́n bhúvo víśveṣu sávaneṣu yajñíyaḥ
bhúvo nr̥̄́(g)ṃś cyautnó víśvasmin bháre jyéṣṭhaś ca mántro viśva-carṣaṇe

índraṃ práṇayantaṃ vápur índra(gg)ṃ srávanta(g)ṃ savitā́ram índraṃ dadhātu
śákras sukŕ̥taṣya lokám índraṃ manye pitáraṃ mātā́rañ ca

éndra sānasí(g)ṃ rayí(g)ṃ sajítvāna(g)ṃ sadāsáham[*870]
várṣiṣṭham ūtáye bhara
[*866] RV: harivaḥ
[*867] RV: svasti
[*868] RV: -hitam
[*869] 1984 edition: śámbhuḥ; 1946 edition, RV: śámbaḥ
[*870] RV, TS: sadāsáham; VMP: sadāsaham