subrahmaṇyabhujaṅgam · Chapter 1

sadā bālarūpāpi vighnādrihantrī
mahādantivaktrāpi pañcāsyamānyā /
vidhīndrādimṛgyā gaṇeśābhidhā me
vidhattāṃ śriyaṃ kāpi kalyāṇamūrtiḥ

na jānāmi śabdaṃ na jānāmicārthaṃ
na jānāmi padyaṃ na jānāmi gadyam /
cidekā ṣaḍāsyā hṛdi dyotate me
mukhānniḥsarante giraścāpi citram

mayūrādhirūḍhaṃ mahāvākyagūḍhaṃ
manohāridehaṃ mahaccittageham /
mahīdevadevaṃ mahāvedabhāvaṃ
mahādevabālaṃ bhaje lokapālam

yadā sannidhānaṃ gatā mānavā me
bhavāmbhodhipāraṃ gatāste tadaiva /
iti vyañjayansindhutīre ya āste
tamīḍe pavitraṃ parāśakti putram

yathābdhestaraṅgā layaṃ yānti tuṅgā-
sthaivāpadaḥ sannidhau sevatāṃ me /
itīvormipaṅgaktīrnṛṇāṃ darśayantaṃ
sadā bhāvaye hṛtsaroje guhaṃ tam

girau mannivāse narā ye'dhirūḍhā-
stadā parvate rājate te'dhirūḍhāḥ /
itīva bruvan gandhaśailādhirūḍhaḥ
sa devo mude me sadā ṣaṇmukho'stu

mahāmbhodhitīre mahāpāpacore
munīndrānukūle sugandhākhyaśaile /
guhāyāṃ vasantaṃ svabhāsā lasantaṃ
janārtiṃ harantaṃ śrayāmo guhaṃ tam

lasatvarṇagehe nṛṇāṃ kāmadohe
sumastomasaṃchannamāṇikyamañce /
samudyatsahasrārkatulyaprakāśaṃ
sadā bhāvaye kārtikeyaṃ sureśam

raṇaddhaṃsake mañjule'tyantaśoṇe
manohārilāvaṇyapīyūṣapūrṇe /
manaḥṣaṭpado me bhavatkleśataptaḥ
sadā modatāṃ skanda te pādapadme

suvarṇābhadivyāmbarairbhāsamānāṃ
kvaṇatkiṅkiṇīmekhalāśobhamānām /
lasaddhemapaṭṭena vidyotamānāṃ
kaṭiṃ bhāvaye skanda te dīpyamānām

pulindeśakanyāghanābhogatuṅg-
stanāliṅganāsaktakāśamīrarāgam /
namasyāmahaṃ tārakare tavoraḥ
svabhaktāvane sarvadā sānurāgam

vidhaukḷptadaṇḍānsvalīlādhṛtāṇḍā-
nnirastebhaśuṇḍāndviṣatkāladaṇḍān /
hatendrāriṣaṇḍāñjagatrāṇaśauṇḍān
sadā te pracaṇḍāñśraye bāhudaṇḍān

sadā śāradāḥ ṣaṇmṛgāṅkā yadi syuḥ
samudyanta eva sthitāścetsamantāt /
sadā pūrṇabimbāḥ kalaṅkaiśca hīnā-
stadā tvanmukhānāṃ bruve skanda sāmyam

sphuranmandahāsaiḥ sahaṃsāni cañca-
tkaṭākṣāvalībhṛṅgasaṃghojjvalāni /
sudhāsyāndibimbādharāṇīśasūno
tavālokaye ṣaṇmukhāmbhoruhāṇi

viśāleṣu karṇāntadīrgheṣvajastraṃ
dayāsyandiṣu dvādaśasvīkṣaṇeṣu /
mayīṣatkaṭākṣaḥ sakṛtpātitaśce-
dbhavete dayāśīla kā nāma hāniḥ

sutāṅgodbhavo me'si jīveti ṣaḍdhā
japanmantramīśo mudā cighrate yān /
jagadbhārabhṛdbhyo jagannātha tebhyaḥ
kirīṭojjvalebhyo namo mastakebhyaḥ

sphuradratnakeyūrahārābhirāma-
ścalatkuṇḍalaśrīlasadgaṇḍabhāgaḥ /
kaṭau pītavāsāḥ kare cāru śaktiḥ
purastānmamāstāṃ purārestanūjaḥ

ihāyāhi vatseti hastānprasāryā-
hvayatyādarācchaṃkare māturaṅkāt /
samutpatya tātaṃ śrayantaṃ kumāraṃ
harāśliṣṭagātraṃ bhaje bālamūrtim

kumāreśasūno guha skanda senā-
pate śaktipāṇe mayūrādhirūḍha /
pulindātmajākānta bhaktārtihārin
prabho tārakare sadā rakṣa māṃ tvam

praśāntendriye naṣṭasaṃjñe viceṣṭe
kaphodgārivaktre bhayotkampigātre /
prayāṇonmukhe mayyanāthe tadānīṃ
drutaṃ me dayālo bhavāgre guhaṃ tvam

kṛtāntasya dūteṣu caṇḍeṣu kopā-
ddaha cchinddhi bhinddhīti māṃ tarjayatsu /
mayūraṃ samāruhya mā bhairiti tvaṃ
puraḥ śaktipāṇirmamāyāhi śīghram

praṇamyāsakṛtapādayoste patitvā
prasādya prabho pārthaye'nekavāram /
na vaktuṃ kṣamohaṃ tadānīṃ kṛpābdhe
na kāryāntakāle manāgapyupekṣā

sahasrāṇḍabhoktā tvayā śūranāmā
hatastārakaḥ siṃhavaktraśca daityaḥ /
mamāntarhṛdisthaṃ manaḥkleśamekaṃ
na haṃsi prabho kiṃ karomi kva yāmi

ahaṃ sarvadā duḥkhabhārāvasanno
bhavān dīnabandhustvadanyaṃ na yāce /
bhavadbhaktirodhaṃ sadā klṛptabādhaṃ
mamādhiṃ dutaṃ nāśayomāsuta tvam

apasmārakuṣṭakṣayārśaḥprameha-
jvaranmādigulmādirogā mahāntaḥ /
piśācāśca sarve bhavatpatrabhūtiṃ
vilokyakṣaṇāttarakāre dravante

dṛśi skandamūrtiḥ śrutau skandakīrti-
rmukhe me pavitraṃ sadā taccaritram /
kare tasya kṛtyaṃ vapustasya bhṛtyaṃ
guhe santu līnā mamāśeṣabhāvāḥ

munīnāmutaho nṛṇāṃ bhaktibhājā-
mabhīṣṭapradāḥ santi sarvatra devāḥ /
nṛṇāmantyajānāmapi svārthadāne
guhāddevamanyaṃ na jāne na jāne

kalatraṃ sutā bandhuvargaḥ paśurvā
naro vātha nārī gṛhe ye madīyāḥ /
yajanto namantaḥ stuvanto bhavantaṃ
smarantaśca te santu sarve kumāra

mṛgāḥ pakṣiṇo daṃśakā ye ca duṣṭā-
stathā vyādhayo bādhakā ye madaṅge /
bhavacchaktitīkṣṇāgrabhinnāḥ sudūre
vinaśyantu te cūrṇitakrauñcaśaile

janitrī pitā ca svaputrāparādhaṃ
sahete ca kiṃ devasenādhinātha /
ahaṃ cātibālo bhavān lokatātaḥ
kṣamasvāparādhaṃ samastaṃ maheśa

namaḥ kekine śaktaye cāpi tubhyaṃ
namaścāga tubhyaṃ namaḥ kukkuṭāya /
namaḥ sindhave sindhudeśāya tubhyaṃ
punaḥ skandamūrte namaste namo'stu

jayānandabhūmañjayāpāradhāma-
ñjayāmoghakīrte jayānandamūrte /
jayānanda sindho jayāśeṣabandho
jaya tvaṃ pitā muktidāneśasūno

bhujaṅgākhyavṛttena klṛptaṃ stavaṃ yaḥ
paṭhetbhaktiyukto guhaṃ saṃpraṇamya /
sa putrānkalatraṃ dhanaṃ dīrghamāyu-
rlabhetskandasāyujyamante naraḥ saḥ