śrīsadāśivendrastavaḥ · Chapter 1

paratattvalīnamanase
praṇamadbhavabandhamocanāyāśu /
prakaṭitaparatattvāya
praṇatiṃ kurmaḥ sadāśivendrāya

paramaśivendrakarāmbuja-
sambhūtāya praṇamravaradāya /
padadhūtapaṅkajāya
praṇatiṃ kurmaḥ sadāśivendrāya

vijananadīkuñjagṛhe
mañjulapulinaikamañjutaratalpe /
śayanaṃ kurvāṇāya
praṇatiṃ kurmaḥ sadāśivendrāya

kāmāhidvijapataye
śamadamamukhadivyaratnavāridhaye /
śamanāya mohavitateḥ
praṇatiṃ kurmaḥ sadāśivendrāya

namadātmabodhadāyā-
ramate paramātmatattvasaudhāgre /
samabuddhaye'śmahemnoḥ
praṇatiṃ kurmaḥ sadāśivendrāya

gilitāvidyāhālā-
halahatapuryaṣṭakāya bodhena /
mohāndhakāraravaye
praṇatiṃ kurmaḥ sadāśivendrāya

śamamukhaṣaṭkamumukṣā-
vivekavairāgyadānaniratāya /
tarasā natajanatataye
praṇatiṃ kurmaḥ sadāśivendrāya

siddhāntakalpavallī-
mukhakṛtīkartre kapālibhaktikṛte /
karatalamuktiphalāya
praṇatiṃ kurmaḥ sadāśivendrāya

tṛṇapaṅkaliptavapuṣe
tṛṇato'pyadharaṃ jagadvilokayute /
vanamadhyaviharaṇāya
praṇatiṃ kurmaḥ sadāśivendrāya

nigṛhītahṛdayaharaye
pragṛhītātmasvarūparatnāya /
praṇatābdhipūrṇaśaśine
praṇatiṃ kurmaḥ sadāśivendrāya

ajñānatimiraravaye
prajñānāmbhodhipūrṇacandrāya /
praṇatāghavipinaśucaye
praṇatiṃ kurmaḥ sadāśivendrāya

matimalamocanadakṣa-
pratyagbrahmaikyadānaniratāya /
smṛtimātratuṣṭamanase
praṇatiṃ kurmaḥ sadāśivendrāya

nijaguruparamaśivendra-
ślāghitavijñānakāṣṭhāya /
nijatattvaniścalahṛde
praṇatiṃ kurmaḥ sadāśivendrāya

pravilāpya jagadaśeṣaṃ
pariśiṣṭākhaṇḍavastuniratāya /
āsyaprāptānnabhuje
praṇatiṃ kurmaḥ sadāśivendrāya

upadhānīkṛtabāhuḥ
parirabdhaviraktirāmo yaḥ /
vasanīkṛtakhāyāsmai
praṇatiṃ kurmaḥ sadāśivendrāya

sakalāgamāntasāra-
prakaṭanadakṣāya namrapakṣāya /
saccitsukharūpāya
praṇatiṃ kurmaḥ sadāśivendrāya

drākṣāśikṣaṇacatura-
vyāhārāya prabhūtakaruṇālaya /
vīkṣāpāvitajagate
praṇatiṃ kurmaḥ sadāśivendrāya

yo'nutpannavikāro
bāhau mlecchena chinnapatite'pi /
aviditamamatāyāsmai
praṇatiṃ kurmaḥ sadāśivendrāya

nyapatansumāni mūrdhani
yenoccariteṣu nāmasūgrasya /
tasmai siddhavarāya
praṇatiṃ kurmaḥ sadāśivendrāya

yaḥ pāpino'pi lokāṃ-
starasā puṇyaniṣṭhāgryān /
karuṇāmburāśaye'smai
praṇatiṃ kurmaḥ sadāśivendrāya

siddheśvarāya buddheḥ
śuddhipradapādapadmanamanāya /
baddhaughamocakāya
praṇatiṃ kurmaḥ sadāśivendrāya

hṛdyāya lokavitateḥ
padyāvalidāya janmamūkebhyaḥ /
praṇatebhyaḥ padayugale
praṇatiṃ kurmaḥ sadāśivendrāya

jihvopastharatāna-
pyāhvoccāreṇa jātu naijasya /
kurvāṇāya viraktān
praṇatiṃ kurmaḥ sadāśivendrāya

kamanīyakāmānākartre
śamanīyabhayāpahāracaturāya /
tapanīyasadṛśavapuṣe
praṇatiṃ kurmaḥ sadāśivendrāya

tārakavidyādātre
tārāpatigarvavārakāsyāya /
tārajapapravaṇāya
praṇatiṃ kurmaḥ sadāśivendrāya

mūko'pi yatkṛpā
cellokottarakīrtirāśu jāyeta /
adbhutacaritāyāsmai
praṇatiṃ kurmaḥ sadāśivendrāya

durjanadūrāyatarāṃ
sajjanasulabhāya pātrahastāya /
tarutalaniketanāya
praṇatiṃ kurmaḥ sadāśivendrāya

bhavasindhutārayitre
bhavabhaktāya praṇamravaśyāya /
bhavabandhavirahitāya
praṇatiṃ kurmaḥ sadāśivendrāya

trividhasyāpi tyāgaṃ
vapuṣaḥ kartuṃ sthalatraye ya iva /
akarotsamādhimasmai
praṇatiṃ kurmaḥ sadāśivendrāya

kāminapi jitahṛdayaṃ
krūraṃ śāntaṃ jaḍaṃ sudhiyam /
kurute yatkaruṇāsmai
praṇatiṃ kurmaḥ sadāśivendrāya

vedasmṛtisthavidva-
llakṣaṇalakṣyeṣu sandihānānām /
niścayakṛte vihartre
praṇatiṃ kurmaḥ sadāśivendrāya

bālāruṇanibhavapuṣe
līlānirdhūtakāmagarvāya /
lolāya citi parasyāṃ
praṇatiṃ kurmaḥ sadāśivendrāya

śaraṇīkṛtāya suguṇai-
ścaraṇīkṛtaraktapaṅkajāya /
dharaṇīsadṛkkṣamāya
praṇatiṃ kurmaḥ sadāśivendrāya

praṇatāya yativareṇyair-
gaṇanāthenāpyahāryavighnahṛte /
guṇadāsīkṛtajagate
praṇatiṃ kurmaḥ sadāśivendrāya

sahamānāya sahasrāṇya-
parādhān praṇamrajanaracitān /
sahasyaiva mokṣadātre
praṇatiṃ kurmaḥ sadāśivendrāya

dhṛtadehāya natāvali-
tūrṇaprajñāpradānavāñchataḥ /
śrīdakṣiṇavaktrāya
praṇatiṃ kurmaḥ sadāśivendrāya

tāpatrayārtahṛdaya-
stāpatrayahāradakṣanamanamaham /
guruvarabodhitamahimā
praṇatiṃ kurmaḥ sadāśivendrāya

sadātmani vilīnahṛtsakalavedaśāstrārthavit
sarittaṭavihārakṛtsakalalokahṛttāpahṛt /
sadāśivapadāmbujapraṇatalokalabhye prabho
sadāśivayateṭ sadā mayi kṛpāmapārāṃ kuru

purā yavanakartanasravadamandarakto'pi yaḥ
punaḥ padasaroruhapraṇatamenamenonidhim /
kṛpāparavaśaḥ padaṃ patanavarjitaṃ prāpayat
sadāśivayatīṭ sa mayyanavadhiṃ kṛpāṃ siñcatu

hṛṣīkahṛtacetasi prahṛtadehake rogakai-
ranekavṛjinālaye śamadamādigandhoijjhate /
tavāṅghripatite yatau yatipate mahāyogirāṭ
sadāśiva kṛpāṃ mayi prakuru hetuśūnyāṃ drutam

na cāhamaticāturīracitaśabdasaṅghaiḥ stutiṃ
vidhātumapi ca kṣamo na ca japādike'pyasti me /
balaṃ balavatāṃ vara prakuru hetuśūnyāṃ vibho
sadāśiva kṛpāṃ mayi pravara yogināṃ satvaram

śabdārthavijñānayutā hi loke
vasanti lokā bahavaḥ prakāmam /
niṣṭhāyutā na śrutadṛṣṭapūrvā
vinā bhavantaṃ yatirāja nūnam

stokārcanaprītahṛdambujāya
pākābjacūḍāpararūpadhartre /
śokāpahartre tarasā natānāṃ
pākāya puṇyasya namo yatīśe

nāhaṃ hṛṣīkāṇi vijetumīśo
nāhaṃ saparyābhajanādi kartum /
nisargayā tvaṃ dayayaiva pāhi
sadāśivemaṃ karuṇāpayodhe

kṛtayānayā natāvali-
koṭigatenātimandabodhena /
mudamehi nityatṛpta-
pravara stutyā sadāśivāśvāśu

// iti śṛṅgagirijagadguru śrīśrī saccidānandaśivābhinavanṛsiṃhabhāratīmahāsvāmibhiḥ viracitaḥ śrīsadāśivendrastavaḥ //