śrīmahāgaṇeśapañcaratnam · Chapter 1

mudā karātta modakaṃ sadā vimukti sādhakaṃ
kalādharāvataṃsakaṃ vilāsi loka rakṣakam .
anāyakaika nāyakaṃ vināśitebha daityakaṃ
natāśubhāśu nāśakaṃ namāmi taṃ vināyakam .. १..
natetarāti bhīkaraṃ navoditārka bhāsvaraṃ
namat surāri nirjaraṃ natādhikāpaduddharam .
sureśvaraṃ nidhīśvaraṃ gajeśvaraṃ gaṇeśvaraṃ
maheśvaraṃ tamāśraye parātparaṃ nirantaram .. २..
samasta loka śaṃkaraṃ nirāsta daitya kunjaraṃ
daretarodaraṃ varaṃ varebhavaktraṃ akṣaram .
kṛpākaraṃ kṣamākaraṃ mudākaraṃ yaśaskaraṃ
manaskaraṃ namaskṛtāṃ namaskaromi bhāsvaram .. ३..
akiṃcanārti marjanaṃ cirantanokti bhājanaṃ
purāripūrvanandanaṃ surāri garva carvaṇam .
prapañcanāśa bhīṣaṇaṃ dhanaṃjayādi bhūṣaṇaṃ
kapoladānavāraṇaṃ bhaje purāṇavāraṇam .. ४..
nitānta kānta dantakāntimantakāntakātmajaṃ
acintyarūpamantahīnamantarāya kṛntanam .
hṛdantare nirantaraṃ vasantameva yogināṃ
tamekadantamekameva cintayāmi santatam .. ५..
.. phala śrutī ..
mahāgaṇeśa pañcaratnaṃ ādareṇa yon'vahaṃ
prajalpati prabhātake hṛdi smaranṃ gaṇeśvaram .
arogatāṃ adoṣatāṃ susāhitīṃ suputratāṃ
samāhitāyuraṣṭa bhūtimabhyupaiti so'cirat ..
.. iti śrī śaṃkarācārya viracitaṃ śrī mahāgaṇeśa pañcaratnaṃ saṃpūrṇam ..