śrīkṛṣṇakarṇāmṛtam · Chapter 1

prathamāśvāsaḥ
cintāmaṇirjayati somagirirgururme
śikṣāguruśca bhagavāñśikhipiñchamauliḥ/
yatpādakalpatarupallavaśekhareṣu
līlāsvayaṃvararasaṃ labhate jayaśrīḥ

(vasantatilakā)
asti svastaruṇīkarāgravigalatkalpaprasūnāplutaṃ
vastu prastutaveṇunādalaharīnirvāṇanirvyākulam/
srastasrastaniruddhanīvivilasadgopīsahasrāvṛtaṃ
hastanyastanatāpavargamakhilodāraṃ kiśorākṛti

(śārdūlavikrīḍitam)
cāturyaikanidānasīmacapalāpāṅgacchaṭāmantharaṃ
lāvaṇyāmṛtavīcilolitadṛśaṃ lakṣmīkaṭakṣādṛtam/
kālindīpulināṅganapraṇayinaṃ kāmāvatārāṅkuraṃ
bālaṃ nīlamamī vayaṃ madhurimasvārājyamārādhnumaḥ

(śārdūlavikrīḍitam)
barhottaṃsavilāsikuntalabharaṃ mādhuryamagnānanaṃ
pronmīlannavayauvanaṃ pravilasadveṇupraṇādāmṛtam/
āpīnastanakuṭmalābhirabhito gopībhirārādhitaṃ
jyotiścetasi naścakāsti jagatāmekābhirāmādbhutam

(śārdūlavikrīḍitam)
madhuratarasmitāmṛtavimugdhamukhāmburuhaṃ
madaśikhipiñchalāñchitamanojñakacapracayam/
viṣayaviṣāmiṣagrasanagṛdhnuni cetasi me
vipulavilocanaṃ kimapi dhāma cakāsti ciram

(kokilakā)
mukulāyamānanayanāmbujaṃ vibho–
rmuralīninādamakarandanirbharam/
mukurāyamāṇamṛdugaṇḍamaṇḍalaṃ
mukhapaṅkajaṃ manasi me vijṛmbhatām

(mañjubhāṣiṇī)
kamanīyakiśoramugdhamūrteḥ
kalaveṇukvaṇitādṛtānanendoḥ/
mama vāci vijṛmbhatāṃ murāre–
rmadhurimṇaḥ kaṇikāpi kāpi kāpi

(aupacchandasikam)
madaśikhaṇḍiśikhaṇḍavibhūṣaṇaṃ
madanamantharamugdhamukhāṃbujam/
vrajavadhūnayanāñcalavañcitam
vijayatāṃ mama vāṅmayajīvitam

(drutavilambitam)
pallavāruṇapāṇipaṅkajasaṅgiveṇuravākulaṃ
phullapāṭalapāṭalīparivādipādasaroruham/
ullasanmadhurādharadyutimañjarīsarasānanaṃ
vallavīkucakumbhakuṅkumapaṅkilaṃ prabhumāśraye

(mattakokilam)
apāṅgarekhābhirabhaṅgurābhi–
ranaṅgarekhārasarañjitābhiḥ/
anukṣaṇaṃ vallavasundarībhi–
rabhyarcyamānaṃ vibhumāśrayāmaḥ

(upajāti)
hṛdaye mama hṛdyavibhramāṇāṃ
hṛdayaṃ harṣaviśālalolanetram/
taruṇaṃ vrajabālasundarīṇāṃ
taralaṃ kiñcana dhāma saṃnidhattām

(aupacchandasikam)
nikhilabhuvanalakṣmīnityalīlāspadābhyāṃ
kamalavipinavīthīgarvasarvaṅkaṣābhyām/
praṇamadabhayadānaprauḍhagāḍhoddhatābhyāṃ
kimapi vahatu cetaḥ kṛṣṇapādāmbujābhyām

(mālinī)
praṇayapariṇatābhyāṃ prābhavālambanābhyāṃ
pratipadalalitābhyāṃ pratyahaṃ nūtanābhyām/
pratimuhuradhikābhyāṃ prasnuvallocanābhyāṃ
prabhavatu hṛdaye naḥ prāṇanāthaḥ kiśoraḥ

(mālinī)
mādhuryavāridhimadāndhataraṅgabhaṅgī–
śṛṅgārasaṃkalitaśītakiśoraveṣam/
āmandahāsalalitānanacandrabimba–
mānandasaṃplavamanuplavatāṃ mano me

(vasantatilakā)
avyājamañjulamukhāmbujamugdhabhāvai–
rāsvādyamānanijaveṇuvinodanādam/
ākrīḍatāmaruṇapādasaroruhābhyā–
mārdre madīyahṛdaye bhuvanārdramojaḥ

(vasantatilakā)
maṇinūpuravācālaṃ
vande taccaraṇaṃ vibhoḥ/
lalitāni yadīyāni
lakṣmāṇi vrajavīthiṣu

(anuṣṭupślokam)
mama cetasi sphuratu vallavīvibho–
rmaṇinūpurapraṇayi mañjuśiñjitam/
kamalāvanecarakalindakanyakā–
kalahaṃsakaṇṭhakalakūjitādṛtam

(mañjubhāṣiṇī)
taruṇāruṇakaruṇāmayavipulāyatanayanaṃ
kamalākucakalaśībharavipulīkṛtapulakam/
muralīravataralīkṛtamunimānasanalinaṃ
mama khelati madacetasi madhurādharamamṛtam

(haṃsakam)
āmugdhamardhanayanāmbujacumbyamāna–
harṣākulavrajavadhūmadhurānanendoḥ/
ārabdhaveṇuravamādikiśoramūrte–
rāvirbhavanti mama cetasi ke'pi bhāvāḥ

(vasantatilakā)
kalakvaṇitakaṅkaṇaṃ karaniruddhapītāmbaraṃ
kramaprasṛtakuntalaṃ galitabarhabhūṣaṃ vibhoḥ/
punaḥ prasṛticāpalaṃ praṇayinībhujāyantritaṃ
mama sphuratu mānase madanakeliśayyotthitam

(pṛthvī)
stokastokanirudhyamānamṛdulaprasyandimandasmitaṃ
premodbhedanirargalaprasṛmarapravyaktaromodgamam/
śrotṛśrotramanoharavrajavadhūlīlāmithojalpitaṃ
mithyāsvāpamupāsmahe bhagavataḥ krīḍānimīladdṛśaḥ

(śārdūlavikrīḍitam)
vicitrapatrāṅkuraśālibālā–
stanāntaraṃ maunimano'ntaraṃ vā/
apāsya bṛndāvanapādapāsyam
upāsyamanyanna vilokayāmaḥ

(upendravajrā)
sādhyaṃ samṛddhairamṛtāyamānai–
rādhmāyamānairmuralīninādaiḥ/
mūrdhābhiṣiktaṃ madhurākṛtīnāṃ
bālaṃ kadā nāma vilokayiṣye

(indravajrā)
śiśirīkurute kadā nu naḥ
śikhipiñchābharaṇaḥ śiśurdṛśoḥ/
yugalaṃ vigalanmadhudrava–
smitamudrāmṛdunā mukhendunā

(viyoginī)
kāruṇyakarburakaṭākṣanirīkṣaṇena
tāruṇyasaṃvalitaśaiśavavaibhavena/
āpuṣṇatā bhuvanamadbhutavibhrameṇa
śrīkṛṣṇacandra śiśirīkuru locanaṃ me

(vasantatilakā)
kadā vā kālindīkuvalayadalaśyāmalatarāḥ
kaṭākṣā lakṣyante kimapi karuṇāvīcinicitāḥ/
kadā vā kaṃdarpapratibhaṭajaṭācandraśiśirāḥ
kimapyantastoṣaṃ dadati muralīkelininadāḥ

(śikhariṇī)
adhīramālokitamārdrajalpitaṃ
gataṃ ca gambhīravilāsamantharam/
amandamāliṅgitamākulonmada–
smitaṃ ca te nātha vadanti gopikāḥ

(vaṃśasthavilā)
astokasmitabharamāyatāyatākṣaṃ
niḥśeṣastanamṛditaṃ vrajāṅganābhiḥ/
niḥsīmastabakitanīlakāntidhāraṃ
dṛśyāsaṃ tribhuvanasundaraṃ mahaste

(praharṣiṇī)
mayi prasādaṃ madhuraiḥ kaṭākṣai–
rvaṃśīninādānucarairvidhehi/
tvayi prasanne kimihāparairna–
stvayyaprasanne kimihāparairnaḥ

(upajāti)
nibaddhamugdhāñjalireṣa yāce
nīrandhradainyonnatamuktakaṇṭham/
dayāmbudhe deva bhavatkaṭākṣa–
dākṣiṇyaleśena sakṛnniṣiñca

(upajāti)
piñchāvataṃsaracanocitakeśapāśe
pīnastanīnayanapaṅkajapūjanīye/
candrāravindavijayodyatavaktrabimbe
cāpalyameti nayanaṃ tava śaiśave naḥ

(vasantatilakā)
tvacchaiśavaṃ tribhuvanādbhutamityavaimi
yaccāpalaṃ ca mama vāgavivādagamyam/
tatkiṃ karomi viraṇanmuralīvilāsa–
mugdhaṃ mukhāmbujamudīkṣitumīkṣaṇābhyām

(vasantatilakā)
paryācitāmṛtarasāni padārthabhaṅgī–
phalgūni valgitaviśālavilocanāni/
bālyādhikāni madavallavabhāvitāni
bhāve luṭhanti sudṛśāṃ tava jalpitāni

(vasantatilakā)
punaḥ prasannena mukhendutejasā
puro'vatīrṇasya kṛpāmahāmbudheḥ/
tadeva līlāmuralīravāmṛtaṃ
samādhivighnāya kadā nu me bhavet

(vaṃśasthavilā)
bhāvena mugdhacapalena vilokanena
manmānase kimapi cāpalamudvahantam/
lolena locanarasāyanamīkṣaṇena
līlākiśoramupagūhitumutsukāḥ smaḥ

(vasantatilakā)
adhīrabimbādharavibhrameṇa
harṣārdraveṇusvarasaṃpadā ca/
anena kenāpi manohareṇa
hā hanta hā hanta mano dhunoti

(upajāti)
yāvanna me nikhilamarmadṛḍhābhighāta–
niḥsaṃdhibandhanamudeti navopatāpaḥ/
tāvadvibho bhavatu tāvakavaktracandra–
candrātapadviguṇitā mama cittadhārā

(vasantatilakā)
yāvanna me naradaśā daśamī dṛśo'pi
randhrādudeti timirīkṛtasarvabhāvā/
lāvaṇyakelisadanaṃ tava tāvadetu
lakṣmyā samutkvaṇitaveṇu mukhendubimbam

(vasantatilakā)
ālolalocanavilokitakelidhārā–
nīrājitāgrasaraṇeḥ karuṇāmburāśeḥ/
ārdrāṇi veṇuninadaiḥ pratinādapūrai–
rākarṇayāmi maṇinūpuraśiñjitāni

(vasantatilakā)
he deva he dayita he jagadekabandho
he kṛṣṇa he capala he karuṇaikasindho/
he nātha he ramaṇa he nayanābhirāma
hā hā kadā nu bhavitāsi padaṃ dṛśorme

(vasantatilakā)
amūnyadhanyāni dināntarāṇi
hare tvadālokanamantareṇa/
anāthabandho karuṇaikasindho
hā hanta hā hanta kathaṃ nayāmi

(upajāti)
kimiha śṛṇumaḥ kasya brūmaḥ kathaṃ kṛtamāśayā
kathayata kathaṃ dhanyāmanyāmaho hṛdayeśayam/
madhuramadhurasmerākāre manonayanotsave
kṛpaṇakṛpaṇā tṛṣṇā kṛṣṇe ciraṃ bata lambate

(hariṇī)
ābhyāṃ vilocanābhyā–
mambujadalalalitalocanaṃ bālam/
dvābhyāmapi parirabdhuṃ
dūre mama hanta daivasamāgrī

(gīti)
aśrāntasmitamaruṇāruṇādharoṣṭhaṃ
harṣārdradviguṇamanojñaveṇugītam/
vibhrāmyadvipulavilocanārdhamugdhaṃ
vīkṣiṣye tava vadanāmbujaṃ kadā nu

(praharṣiṇī)
līlāyatābhyāṃ rasaśītalābhyāṃ
nīlāruṇābhyāṃ nayanāmbujābhyām/
ālokayedadbhutavibhramābhyāṃ
kāle kadā kāruṇikaḥ kiśoraḥ

(indravajrā)
bahulacikurabhāraṃ baddhapiñchāvataṃsaṃ
capalacapalanetraṃ cārubimbādharoṣṭham/
madhuramṛdulahāsaṃ mandarodāralīlaṃ
mṛgayati nayanaṃ me mugdhaveṣaṃ murāreḥ

(mālinī)
bahulajaladacchāyācoraṃ vilāsabharālasaṃ
madaśikhiśikhālīlottaṃsaṃ manojñamukhāmbujam/
kamapi kamalāpāṅgodagraprasannajagajjaḍaṃ
madhurimaparīpākodrekaṃ vayaṃ mṛgayāmahe

(hariṇī)
parāmṛśyaṃ dūre pariṣadi munīnāṃ vrajavadhū–
dṛśāṃ dṛśyaṃ śaśvattribhuvanamanohārivapuṣam/
anāmṛśyaṃ vācāmanidamudayānāmapi kadā
darīdṛśye devaṃ daradalitanīlotpalarucim

(śikhariṇī)
līlānanāmbujamadhīramudīkṣamāṇaṃ
narmāṇi veṇuvivareṣu niveśayantam/
ḍolāyamānanayanaṃ nayanābhirāmaṃ
vande kadā nu dayitaṃ vyatilokayiṣye

(vasantatilakā)
lagnaṃ muhurmanasi lampaṭasaṃpradāyi–
lekhāvalekhini rasajñamanojñaveṣam/
lajjanmṛdusmitamadhusnapitādharāṃśu–
rākendulālitamukhendu mukundabālyam

(vasantatilakā)
ahimakarakaranikaramṛdumuditalakṣmī–
sarasatarasarasiruhasarasadṛśi deve/
vrajayuvatiratikalahavijayinijalīlā–
madamuditavadanaśaśimadhurimaṇi līye

(śaśikalā)
karakamaladaladalitalalitataravaṃśī–
kalaninadagaladamṛtaghanasarasi deve/
sahajarasabharabharitadarahasitavīthī–
satatavahadadharamaṇimadhurimaṇi līye

(śaśikalā)
kusumaśaraśarasamarakupitamadagopī–
kucakalaśaghusṛṇarasalasadurasi deve/
madalulitamṛduhasitamuṣitaśaśiśobhā–
muhuradhikamukhakamalamadhurimaṇi līye

(śaśikalā)
ānamrāmasitabhruvorupacitāmakṣīṇapakṣmāṅkure–
ṣvālolāmanurāgiṇornayanayorārdrāṃ mṛdau jalpite/
ātāmrāmadharāmṛte madakalāmamlānavaṃśīsvane–
ṣvāśāste mama locanaṃ vrajaśiśormūrtiṃ jaganmohinīm

(śārdūlavikrīḍitam)
tatkaiśoraṃ tacca vaktrāravindaṃ
tatkāruṇyaṃ te ca līlākaṭākṣāḥ/
tatsaundaryaṃ sā ca mandasmitaśrīḥ
satyaṃ satyaṃ durlabhaṃ daivateṣu

(śālinī)
viśvopaplavaśamanaikabaddhadīkṣaṃ
viśvāsastabakitacetasāṃ janānām/
paśyāmaḥ pratinavakāntikandalārdraṃ
paśyāmaḥ pathi pathi śaiśavaṃ murāreḥ

(praharṣiṇī)
mauliścandrakabhūṣaṇo marakatastambhābhirāmaṃ vapu–
rvaktraṃ citravimugdhahāsamadhuraṃ bāle vilole dṛśau/
vācaḥ śaiśavaśītalā madagajaślāghyā vilāsasthiti–
rmandaṃmandamaye ka eṣa mathurāvīthīṃ mitho gāhate// *
(śārdūlavikrīḍitam)
pādau pādavinirjitāmbujavanau padmālayālaṅkṛtau
pāṇī veṇuvinodanapraṇayinau paryāptaśilpaśriyau/
bāhū dohadabhājanaṃ mṛgadṛśāṃ mādhuryadhārā giro
vaktraṃ vāgvibhavātilaṅghitamaho bālaṃ kimetanmahaḥ

(śārdūlavikrīḍitam)
barhaṃ nāma vibhūṣaṇaṃ bahumataṃ veṣāya śeṣairalaṃ
vaktraṃ dvitriviśeṣakāntilaharīvinyāsadhanyādharam/
śīlairalpadhiyāmagamyavibhavaiḥ śṛṅgārabhaṅgīmayaṃ
vaktraṃ citramaho vicitritamaho citraṃ vicitraṃ mahaḥ

(śārdūlavikrīḍitam)
agre samagrayati kāmapi kelilakṣmī–
manyāsu dikṣvapi vilocanameva sākṣī/
hā hanta hastapathadūramaho kimeta–
dāsīt kiśoramayamamba jagattrayaṃ me

(vasantatilakā)
cikuraṃ bahulaṃ viralaṃ bhramaraṃ
mṛdulaṃ vacanaṃ vipulaṃ nayanam/
adharaṃ madhuraṃ lalitaṃ vadanaṃ
capalaṃ caritaṃ ca kadānubhave

(toṭakam)
paripālaya naḥ kṛpālaye–
tyasakṛjjalpitamātmabāndhavaḥ/
muralīmṛdulasvanāntare
vibhurākarṇayitā kadā nu naḥ

(viyoginī)
kadā nu kasyāṃ nu vipaddaśāyāṃ
kaiśoragandhiḥ karuṇāmbudhirnaḥ/
vilocanābhyāṃ vipulāyatābhyāṃ
vyālokayiṣyanviṣayīkaroti

(upajāti)
madhuramadharabimbe mañjulaṃ mandahāse
śiśiramamṛtanāde śītalaṃ dṛṣṭipāte/
vipulamaruṇanetre viśrutaṃ veṇunāde
marakatamaṇinīlaṃ bālamālokaye nu

(mālinī)
mādhuryādapi madhuraṃ
manmathatātasya kimapi kaiśoram/
cāpalyādapi capalaṃ
ceto mama harati kiṃ kurmaḥ

(āryā)
vakṣaḥsthale ca vipulaṃ nayanotpale ca
mandasmite ca mṛdulaṃ madajalpite ca/
bimbādhare ca madhuraṃ muralīrave ca
bālaṃ vilāsanidhimākalaye kadā nu

(vasantatilakā)
māraḥ svayaṃ nu madhuradyutimaṇḍalaṃ nu
mādhuryameva nu manonayanāmṛtaṃ nu/
vāṇīmṛjā nu mama jīvitavallabho nu
bālo'yamabhyudayate mama locanāya

(vasantatilakā)
ārdrāvalokitadharāpariṇaddhanetra–
māviṣkṛtasmitasudhāmadhurādharoṣṭham/
ādyaṃ pumāṃsamavataṃsitabarhibarha–
mālokayanti kṛtinaḥ kṛtapuṇyapuñjāḥ

(vasantatilakā)
bālo'yamālolavilocanena
vaktreṇa citrīkṛtadiṅmukhena/
veṣeṇa ghoṣocitabhūṣaṇena
mugdhena dugdhe nayanotsavaṃ naḥ

(indravajrā)
āndolitāgrabhujamākulanetralīla–
mārdrasmitaṃ ca vadanāmbujacandrabimbam/
śiñjānabhūṣaṇaśataṃ śikhipiñchamauliṃ
śītaṃ vilocanarasāyanamabhyupaiti

(vasantatilakā)
śiśupālabālapariṣadvibhūṣaṇaṃ
śiśureṣa śītalavilolalocanam/
mṛdulasmitārdravadanendusaṃpadā
madayanmadīyahṛdayaṃ vigāhate

(mañjubhāṣiṇī)
kimidamadharavīthīkḷptavaṃśīninādaṃ
kirati nayanayornaḥ kāmapi premadhārām/
tadidamamaravīthīdurlabhaṃ vallabhaṃ na–
stribhuvanakamanīyaṃ daivataṃ jīvitaṃ ca

(mālinī)
tadidamupanataṃ tamālanīlaṃ
taralavilocanatārakābhirāmam/
muditamuditavaktracandrabimbaṃ
mukharitaveṇuvilāsajīvitaṃ me

(puṣpitāgrā)
cāpalyasīma capalānubhavaikasīma
cāturyasīma caturānanaśilpasīma/
saurabhyasīma sakalādbhutakelisīma
saubhāgyasīma tadidaṃ vrajabhāgyasīma

(vasantatilakā)
mādhuryeṇa dviguṇaśiśiraṃ vaktracandraṃ vahantī
vaṃśīvīthīvigaladamṛtasrotasā secayantī/
madvāṇīnāṃ viharaṇapadaṃ mattasaubhāgyabhājāṃ
matpuṇyānāṃ pariṇatiraho netrayoḥ saṃnidhatte

(mandākrāntā)
tejase'stu namo dhenu–
pāline lokapāline/
rādhāpayodharotsaṅga–
śāyine śeṣaśāyine

(anuṣṭupślokam)
dhenupāladayitāstanasthalī–
dhanyakuṅkumasanāthakāntaye/
veṇugītagatimūlavedhase
tejase tadidamॐ namo namaḥ

(rathoddhatā)
mṛdukvaṇannūpuramanthareṇa
bālena pādāmbujapallavena/
anukvaṇanmañjulaveṇugīta–
māyāti me jīvitamāttakeli

(upajāti)
so'yaṃ vilāsamuralīninadāmṛtena
siñcannudañcitamidaṃ mama karṇayugmam/
āyāti me nayanabandhurananyabandhu–
rānandakandalitakelikaṭākṣalakṣaḥ

(vasantatilakā)
dūrādvilokayati vāraṇakhelagāmī
dhārākaṭākṣabharitena vilocanena/
ārādupaiti hṛdayaṃgamaveṇunāda–
veṇīdughena daśanāvaraṇena devaḥ

(vasantatilakā)
tribhuvanasarasābhyāṃ dīptabhūṣāpadābhyāṃ
dṛśi dṛśi śiśirābhyāṃ divyalīlākulābhyām/
aśaraṇaśaraṇābhyāmadbhutābhyāṃ padābhyā–
mayamayamanukūjadveṇurāyāti devaḥ

(mālinī)
so'yaṃ munīndrajanamānasatāpahārī
so'yaṃ madavrajavadhūvasanāpahārī/
so'yaṃ tṛtīyabhuvaneśvaradarpahārī
so'yaṃ madīyahṛdayāmbujatāpahārī

(vasantatilakā)
sarvajñatve ca maugdhye ca
sārvabhaumamidaṃ mahaḥ/
nirviśannayanaṃ hanta
nirvāṇapadamaśnute

(anuṣṭupślokam)
puṣṇānametatpunaruktaśobha–
muṣṇetarāṃśorudayanmukhendoḥ/
tṛṣṇāmburāśiṃ triguṇīkaroti
kṛṣṇāhvayaṃ kiṃcana jīvitaṃ me

(indravajrā)
tadetadātāmravilocanaśrī–
saṃbhāvitāśeṣavinamravargam/
muhurmurārermadhurādharoṣṭhaṃ
mukhāmbujaṃ cumbati mānasaṃ me

(upajāti)
karau śaradudañcitāmbujavilāsaśikṣāgurū
padau vibudhapādapaprathamapallavollaṅghinau/
dṛśau dalitadurmadatribhuvanopamānaśriyau
vilokaya vilocanāmṛtamaho mahacchaiśavam

(pṛthvī)
ācinvānamahanyahanyahani sākārānvihārakramā–
nārundhānamarundhatīhṛdayamapyārdrasmitāsyaśriyā/
ātanvānamananyajanmanayanaślāghyāmanarghyāṃ daśā–
mānandaṃ vrajasundarīstanataṭīsāmrājyamujjṛmbhate

(śārdūlavikrīḍitam)
tamucchvasitayauvanaṃ taralaśaiśavālaṃkṛtaṃ
madacchuritalocanaṃ madavimugdhahāsāmṛtam/
pratikṣaṇavilobhanaṃ praṇayapītavaṃśīmukhaṃ
jagattrayavimohanaṃ jayati māmakaṃ jīvitam

(pṛthvī)
citraṃ tadetaccaraṇāravindaṃ
citraṃ tadetannayanāravindam/
citraṃ tadetadvadanāravindaṃ
citraṃ tadetatpunaramba citram

(indravajrā)
akhilabhuvanaikabhūṣaṇa–
madhibhūṣitajaladhiduhitṛkucakumbham/
vrajayuvatīhāravallī–
marakatanāyakamahāmaṇiṃ vande

(gīti)
kāntākacagrahaṇavigrahalabdhalakṣmī–
khaṇḍāṅgarāgalavarañjitamañjulaśrīḥ/
gaṇḍasthalīmukuramaṇḍalakhelamāna–
gharmāṅkuraḥ kimapi khelati kṛṣṇadevaḥ// *
(vasantatilakā)
madhuraṃ madhuraṃ vapurasya vibho–
rmadhuraṃ madhuraṃ vadanaṃ madhuram/
madhugandhimṛdusmitametadaho
madhuraṃ madhuraṃ madhuraṃ madhuram

(toṭakam)
śṛṅgārarasasarvasvaṃ
śikhipiñchavibhūṣaṇam/
aṅgīkṛtanarākāra–
māśraye bhuvanāśrayam

(anuṣṭupślokam)
nādyāpi paśyati kadācana darśanena
citte navopaniṣadā sudṛśāṃ sahasram/
sa tvaṃ ciraṃ nayanayoranayoḥ padavyāṃ
svāminkayā nu kṛpayā mama saṃnidhatse

(vasantatilakā)
keyaṃ kāntiḥ keśava tvanmukhendoḥ
ko'yaṃ veṣaḥ kāpi vācāmabhūmiḥ/
seyaṃ seyaṃ svādutā mañjulaśrīr
bhūyo bhūyo bhūyasastannamāmi

(śālinī)
vadanenduvinirjitaḥ śaśī
daśadhā deva padaṃ prapadya te/
adhikāṃ śriyamaśnutetarāṃ
tava tāruṇyavijṛmbhitaṃ kiyat

(viyoginī)
tattvanmukhaṃ kathamivābjasamānakakṣyaṃ
vāṅmādhurībahulaparvakalāsamṛddham/
tatkiṃ bruve kimaparaṃ bhuvanaikakāntaṃ
yasya tvadānanasamā suṣamā sadā syāt

(vasantatilakā)
śuśrūṣase śṛṇu yadi praṇidhānapūrvaṃ
pūrvairapūrvakavibhirna kaṭākṣitaṃ yat/
nīrājanakramadhurāṃ bhavadānanendo–
rnirvyājamarhati cirāya śaśipradīpaḥ// *
(vasantatilakā)
akhaṇḍanirvāṇarasapravāha–
vikhaṇḍitāśeṣarasāntarāṇi/
ayantritodvāntasudhārṇavāni
jayanti śītāni tava smitāni

(upendravajrā)
kāmaṃ santu sahasraśaḥ katipaye sārasyadhaureyakāḥ
kāmaṃ vā kamanīyatāpariṇatisvārājyabaddhavratāḥ/
naivaitairvivadāmahe na ca vayaṃ deva priyaṃ brūmahe
yatsatyaṃ ramaṇīyatāpariṇatistvayyeva pāraṃ gatā

(śārdūlavikrīḍitam)
galadvrīḍā lolā madanavanitā gopavanitā
madhusphītaṃ gītaṃ kimapi madhurā cāpaladhurā/
samujjṛmbho gumbho madhurimakirāṃ mādṛśagirāṃ
tvayi sthāne jāte dadhati capalaṃ janma saphalam

(śikhariṇī)
bhuvanaṃ bhavanaṃ vilāsinī śrī–
stanayastāmarasāsanaḥ smaraśca/
paricāraparamparāḥ surendrā–
stadapi tvaccaritaṃ vibho vicitram// *
(aupacchandasikam)
devastrilokīsaubhāgya–
kastūrīmakarāṅkuraḥ/
jīyādvrajāṅganānaṅga–
kelilālitavibhramaḥ// *
(anuṣṭupślokam)
premadaṃ ca me kāmadaṃ ca me
vedanaṃ ca me vaibhavaṃ ca me/
jīvanaṃ ca me jīvitaṃ ca me
daivataṃ ca me deva nāparam

(acyutam)
mādhuryeṇa vijṛmbhantāṃ
vāco nastava vaibhave/
cāpalyena vivardhantāṃ
cintā nastava śaiśave

(anuṣṭupślokam)
yāni tvaccaritāmṛtāni rasanālehyāni dhanyātmanāṃ
ye vā śaiśavacāpalavyatikarā rādhāparādhonmukhāḥ/
yā vā bhāvitaveṇugītagatayo līlāmukhāmbhoruhe
dhārāvāhikayā vahantu hṛdaye tānyeva tānyeva me

(śārdūlavikrīḍitam)
bhaktistvayi sthiratayā bhagavanyadi syā–
ddaivena naḥ phalitadivyakiśoraveṣe/
muktiḥ svayaṃ mukulitāñjali sevate'smā–
ndharmārthakāmagatayaḥ samayapratīkṣāḥ

(vasantatilakā)
jaya jaya jaya deva deva deva
śravaṇamanonayanāmṛtāvatāra/
jaya jaya jaya deva deva deva
tribhuvanamaṅgaladivyanāmadheya

(puṣpitāgrā)
tubhyaṃ nirbharaharṣavarṣavivaśāveśasphuṭāvirbhava–
dbhūyaścāpalabhūṣiteṣu sukṛtāṃ bhāveṣu nirbhāsate/
śrīmadgokulamaṇḍanāya mahate vācāṃ vidūrāyate
mādhuryaikarasārṇavāya mahase kasmaicidasmai namaḥ

(śārdūlavikrīḍitam)
īśānadevacaraṇābharaṇena nīvī–
dāmodarasthirayaśaḥstabakodgamena/
līlāśukena racitaṃ tava deva kṛṣṇa–
karṇāmṛtaṃ vahatu kalpaśatāntare'pi

(vasantatilakā)
dhanyānāṃ sarasānulāpasaraṇīsaubhāgyamabhyasyatāṃ
karṇānāṃ vivareṣu kāmapi sudhāvṛṣṭiṃ duhānaṃ muhuḥ/
vaśyānāṃ sudṛśāṃ manonayanayormagnasya devasya naḥ
karṇānāṃ vacasāṃ vijṛmbhitamaho kṛṣṇasya karṇāmṛtam

(śārdūlavikrīḍitam)
anugrahadviguṇaviśālalocanai–
ranusvanadveṇugaladravāmṛtaiḥ/
yato yataḥ prasarati me vilocanaṃ
tatastataḥ sphuratu tavaiva vaibhavam

(rucirā)
iti śrīkṛṣṇakarṇāmṛte prathamāśvāsaḥ samāptaḥ//
dvitīyāśvāsaḥ
abhinavanavanītasnigdhamāpītadugdhaṃ
dadhikaṇaparidigdhaṃ mugdhamaṅgaṃ murāreḥ/
diśatu bhuvanakṛcchracchedi tāpiñchaguccha‍–
cchavi navaśikhipiñchālāñchitaṃ vāñchitaṃ naḥ

(mālinī)
yāṃ dṛṣṭvā yamunāṃ pipāsuraniśaṃ vyūho gavāṃ gāhate
vidyutvāniti nīlakaṇṭhanivaho yāṃ draṣṭumutkaṇṭhate/
uttaṃsāya tamālapallavamiti cchindanti yāṃ gopikāḥ
kāntiḥ kāliyaśāsanasya vapuṣaḥ sā pāvanī pātu naḥ

(śārdūlavikrīḍitam)
devaḥ pāyātpayasi vimale yāmune majjatīnāṃ
yācantīnāmanunayapadairvañcitānyaṃśukāni/
lajjālolairalasavilasairunmiṣatpañcabāṇai‍–
rgopastrīṇāṃ nayanakusumairarcitaḥ keśavo naḥ

(mandākrāntā)
mātarnātaḥparamanucitaṃ yatkhalānāṃ purastā‍–
dastāśaṅkaṃ jaṭharapiṭharīpūrtaye nartitāsi/
tatkṣantavyaṃ sahajasarale vatsale vāṇi kuryāṃ
prāyaścittaṃ guṇagaṇanayā gopaveṣasya viṣṇoḥ

(mandākrāntā)
aṅgulyagrairaruṇakiraṇairmuktasaṃruddharandhraṃ
vāraṃ vāraṃ vadanamarutā veṇumāpūrayantam/
vyatyastāṅghriṃ vikacakamalacchāyavistāranetraṃ
vande bṛndāvanasucaritaṃ nandagopālasūnum

(mandākrāntā)
mandaṃ mandaṃ madhuraninadairveṇumāpūrayantaṃ
bṛndaṃ bṛndāvanabhuvi gavāṃ cārayantaṃ carantam/
chandobhāge śatamakhamukhadhvaṃsināṃ dānavānāṃ
hantāraṃ taṃ kathaya rasane gopakanyābhujaṅgam

(mandākrāntā)
veṇīmūle viracitaghanaśyāmapiñchāvacūḍo
vidyullekhāvalayita iva snigdhapītāmbareṇa/
māmāliṅganmarakatamaṇistambhagambhīrabāhuḥ
svapne dṛṣṭastaruṇatulasībhūṣaṇo nīlameghaḥ

(mandākrāntā)
kṛṣṇe hṛtvā sicayanicayaṃ kūlakuñjādhirūḍhe
mugdhā kācinmuhuranunayaiḥ kiṃ nviti vyāharantī/
sabhrūbhaṅgaṃ sadarahasitaṃ satrapaṃ sānurāgaṃ
chāyāśaureḥ karatalagatānyambarāṇyācakarṣa

(mandākrāntā)
api januṣi parasminnāttapuṇyo bhaveyaṃ
taṭabhuvi yamunāyāstādṛśo vaṃśanālaḥ/
anubhavati yadeṣa śrīmadābhīrasūno–
রradharamaṇisamīpanyāsadhanyāmavasthām

(mālinī)
ayi paricinu cetaḥ prātaraambhojanetraṃ
kabarakalitacañcatpiñchadāmābhirāmam/
balabhidupalanīlaṃ vallavībhāgadheyaṃ
nikhilanigamavallīmūlakandaṃ mukundam

(mālinī)
ayi murali mukundasmeravaktrāravinda‍–
śvasanamadhurasajñe tvāṃ praṇamyādya yāce/
adharamaṇisamīpaṃ prāptavatyāṃ bhavatyāṃ
kathaya rahasi karṇe maddaśāṃ nandasūnoḥ

(mālinī)
sajalajaladanīlaṃ vallavīkelilolaṃ
śritasuratarumūlaṃ vidyudullāsicelam/
natasuramunijālaṃ sanmanobimbalīlaṃ
suraripukulakālaṃ naumi gopālabālam

(mālinī)
adharabimbaviḍambitavidrumaṃ
madhuraveṇuninādavinodinam/
kamalakomalakamramukhāmbujaṃ
kamapi gopakumāramupāsmahe

(drutavilambitam)
adhare viniveśya vaṃśanālaṃ
vivarāṇyasya salīlamaṅgulībhiḥ/
muhurantarayanmuhurvivṛṇva‍–
nmadhuraṃ gāyati mādhavo vanānte

(aupacchandasikam)
vadane navanītagandhavāhaṃ
vacane taskaracāturīdhurīṇam/
nayane kuhanāśrumāśrayethā‍–
ścaraṇe komalatāṇḍavaṃ kumāram

(aupacchandasikam)
amunā kila gopagopanārthaṃ
yamunārodhasi nandanandanena/
damunā vanasambhavaḥ pape naḥ
kimu nāsau śaraṇārthināṃ śaraṇyaḥ

(aupacchandasikam)
jagadādaraṇīyajārabhāvaṃ
jalajāpatyavacovicāragamyam/
tanutāṃ tanutāṃ śivetarāṇāṃ
suranāthopalasundaraṃ maho naḥ

(aupacchandasikam)
sā kāpi sarvajagatāmabhirāmasīmā
kāmāya no bhavatu gopakiśoramūrtiḥ/
yā śekhare śrutigirāṃ hṛdi yogabhājāṃ
pādāmbuje ca sulabhā vrajasundarīṇām

(vasantatilakā)
atyantabālamatasīkusumaprakāśaṃ
digvāsasaṃ kanakabhūṣaṇabhūṣitāṅgam/
visrastakeśamaruṇādharamāyatākṣaṃ
kṛṣṇaṃ namāmi śirasā vasudevasūnum

(vasantatilakā)
hastāṅghrinikvaṇitakaṅkaṇakiṅkiṇīkaṃ
madhyenitambamavalambitahemasūtram/
muktākalāpamukulīkṛtakākapakṣaṃ
vandāmahe vrajavaraṃ vasudevabhāgyam

(vasantatilakā)
bṛndāvanadrumataleṣu gavāṃ gaṇeṣu
vedāvasānasamayeṣu ca dṛśyate yat/
tadveṇunādanaparaṃ śikhipiñchacūḍaṃ
brahma smarāmi kamalekṣaṇamabhranīlam

(vasantatilakā)
vyatyastapādamavataṃsitabarhibarhaṃ
sācīkṛtānananiveśitaveṇurandhram/
tejaḥ paraṃ paramakāruṇikaṃ purastā‍–
tprāṇaprayāṇasamaye mama sannidhattām

(vasantatilakā)
ghoṣapraghoṣaśamanāya mathoguṇena
madhye babandha jananī navanītacoram/
tadbandhanaṃ trijagatāmudarāśrayāṇā‍–
mākrośakāraṇamaho nitarāṃ babhūva

(vasantatilakā)
śaivā vayaṃ na khalu tatra vicāraṇīyaṃ
pañcākṣarījapaparā nitarāṃ tathāpi/
ceto madīyamatasīkusumāvabhāsaṃ
smerānanaṃ smarati gopavadhūkiśoram

(vasantatilakā)
rādhā punātu jagadacyutadattacittā
manthānamākalayatī dadhiriktapātre/
tasyāḥ stanastabakacañcalaloladṛṣṭi‍–
rdevo'pi dohanadhiyā vṛṣabhaṃ nirundhan

(vasantatilakā)
godhūlidhūsaritakomalakuntalāgraṃ
govardhanoddharaṇakelikṛtaprayāsam/
gopījanasya kucakuṅkumamudritāṅgaṃ
govindaminduvadanaṃ śaraṇaṃ bhajāmaḥ

(vasantatilakā)
yadromarandhraparipūrtividhāvadakṣā
vārāhajanmani babhū vuramī samudrāḥ/
taṃ nāma nāthamaravindadṛśaṃ yaśodā
pāṇidvayāntarajale snapayāmbabhūva

(vasantatilakā)
paramimamupadeśamādriyadhvaṃ
nigamavaneṣu nitāntacārakhinnāḥ/
vicinuta bhavaneṣu vallavīnā‍–
mupaniṣadarthamulūkhale nibaddham

(puṣpitāgrā)
devakītanayapūjanapūtaḥ
pūtanāricaraṇodakadhautaḥ/
yadyahaṃ smṛtadhanañjayasūtaḥ
kiṃ kariṣyati sa me yamadūtaḥ

(svāgatā)
bhāsatāṃ bhavabhayaikabheṣajaṃ
mānase mama muhurmuhurmuhuḥ/
gopaveṣamupaseduṣaḥ svayaṃ
yāpi kāpi ramaṇīyatā vibhoḥ

(rathoddhatā)
karṇalambitakadambamañjarī‍–
kesarāruṇakapolamaṇḍalam/
nirmalaṃ nigamavāgagocaraṃ
nīlimānamavalokayāmahe

(rathoddhatā)
sācisañcalitalocanāntaraṃ
sāmikuṭmalitakomalādharam/
vegavalgitakarāṅgulīmukhaṃ
veṇunādarasikaṃ bhajāmahe

(rathoddhatā)
syandane garuḍamaṇḍitadhvaje
kuṇḍineśatanayādhiropitā/
kenacinnavatamālapallava‍–
śyāmalena puruṣeṇa nīyate

(rathoddhatā)
mā yāta pānthāḥ pathi bhīmarathyā
digambaraḥ ko'pi tamālanīlaḥ/
vinyastahasto'pi nitambabimbe
dhūrtassamākarṣati cittavittam

(upajāti)
aṅganāmaṅganāmantare mādhavo
mādhavaṃ mādhavaṃ cāntareṇāṅganā/
itthamākalpite maṇḍale madhyagaḥ
sañjagau veṇunā devakīnandanaḥ

(sragviṇī)
kekikekādṛtānekapaṅkeruhā‍–
līnahaṃsāvalīhṛdyatāhṛdyatā/
kaṃsavaṃśāṭavīdāhadāvānalaḥ
sañjagau veṇunā devakīnandanaḥ

(sragviṇī)
kvāpi vīṇābhirārāviṇā kampitaḥ
kvāpi vīṇābhirākiṅkiṇīnartitaḥ/
kvāpi vīṇābhirāmantaraṃ gāpitaḥ
sañjagau veṇunā devakīnandanaḥ

(sragviṇī)
cārucandrāvalīlocanaiścumbito
gopagobṛndagopālikāvallabhaḥ/
vallavībṛndabṛndārakaḥ kāmukaḥ
sañjagau veṇunā devakīnandanaḥ

(sragviṇī)
maulimālālasanmattabhṛṅgīlatā‍–
bhītabhītapriyāvibhramāliṅgitaḥ/
srastagopīkucābhogasammelitaḥ
sañjagau veṇunā devakīnandanaḥ

(sragviṇī)
cārucāmīkarābhāsabhāmāvibhu‍–
rvaijayantīlatābhāsitoraḥsthalaḥ/
nandabṛndāvane vāsitāmadhyagaḥ
sañjagau veṇunā devakīnandanaḥ

(sragviṇī)
bālikātālikātālalīlālayā‍–
saṅgasandarśitabhrūlatāvibhramaḥ/
gopikāgītadattāvadhānaḥ svayaṃ
sañjagau veṇunā devakīnandanaḥ

(sragviṇī)
pārijātaṃ samuddhṛtya rādhāvayo‍–
rūpayā māsabhāsā guṇairaṅgaṇe/
śītaśīte vaṭe yāmunīye taṭe
sañjagau veṇunā devakīnandanaḥ

(sragviṇī)
agre dīrghataro'yamarjunatarustasyāgrato vartanī
sā ghoṣaṃ samupaiti tatparisare deśe kalindātmajā/
tasyāstīratamālakānanatale cakraṃ gavāṃ cāraya‍–
ngopaḥ krīḍati darśayiṣyati sakhe panthānamavyāhatam

(śārdūlavikrīḍitam)
godhūlidhūsaritakomalagopaveṣaṃ
gopālabālakaśatairanugamyamānam/
sāyantane pratigṛhaṃ paśubandhanārthaṃ
gacchantamacyutaśiśuṃ praṇato'smi nityam

(vasantatilakā)
nidhiṃ lāvaṇyānāṃ nikhilajagadāścaryanilayaṃ
nijāvāsaṃ bhāsāṃ niravadhikaniḥśreyasarasam/
sudhādhārāsāraṃ sukṛtaparipākaṃ mṛgadṛśāṃ
prapadye māṅgalyaṃ prathamamadhidaivaṃ kṛtadhiyām

(śikhariṇī)
ātāmrapāṇikamalapraṇayapratoda‍–
mālolahāramaṇikuṇḍalahemasūtram/
āviḥśramāmbukaṇamambudanīlamavyā‍–
dādyaṃ dhanañjayarathābharaṇaṃ maho naḥ

(vasantatilakā)
nakhaniyamitakaṇḍūnpāṇḍavasyandanāśvā‍–
nanudinamabhiṣiñcannañjalisthaiḥ payobhiḥ/
avatu vitatagātrastotrasaṃsyūtamaulir
daśanavidhṛtaraśmirdevakīpuṇyarāśiḥ

(mālinī)
vrajayuvatisahāye yauvanollāsikāye
sakalaśubhavilāse kundamandārahāse/
nivasatu mama cittaṃ tatpadāyattavṛttaṃ
munisarasijabhānau nandagopālasūnau

(mālinī)
araṇyānīmārdrasmitamadhurabimbādharasudhā
saraṇyā saṃkrāntaissapadi madayanveṇuninadaiḥ/
dharaṇyā sānandotpulakamupagūḍhāṅghrikamalaḥ
śaraṇyānāmādyassa jayatu śarīrī madhurimā

(śikhariṇī)
mugdhaṃ snigdhaṃ madhuramuralīmādhurīdhīranādaiḥ
kāraṃ kāraṃ karaṇavivaśaṃ gokulaṃ vyākulatvam/
śyāmaṃ kāmaṃ yuvajanamanomohanaṃ mohanatvaṃ
citte nityaṃ nivasatu maho vallavīvallabhaṃ naḥ

(mandākrāntā)
vidagdhagopālavilāsinīnāṃ
sambhogacihnāṅkitasarvagātram/
pavitramāmnāyagirāmagamyaṃ
brahma prapadye navanītacoram

(upajāti)
ānandena yaśodayā samadanaṃ gopāṅganābhiściraṃ
sāśaṅkaṃ balavidviṣā sakusumaiḥ siddhaiḥ pathi vyākulam/
serṣyaṃ gopakumārakaissakaruṇaṃ paurairjanaiḥ sasmitaṃ
yo dṛṣṭaḥ sa punātu no muraripuḥ protkṣiptagovardhanaḥ

(śārdūlavikrīḍitam)
antargṛhe kṛṣṇamavekṣya coraṃ
badhvā kavāṭaṃ jananīṃ gataikā/
ulūkhale dāmanibaddhamenaṃ
tatrāpi dṛṣṭvā stimitā babhūva

(upajāti)
ratnasthale jānucaraḥ kumāraḥ
saṃkrāntamātmīyamukhāravindam/
ādātukāmastadalābhakhedād
vilokya dhātrīvadanaṃ ruroda

(upajāti)
upāsatāmātmavidaḥ purāṇāḥ
paraṃ parastānnihitaṃ guhāyām/
vayaṃ yaśodāśiśubālalīlā‍–
kathāsudhāsindhuṣu līlayāmaḥ

(upendravajrā)
vikretukāmā kila gopakanyā
murāripādārpitacittavṛttiḥ/
dadhyādikaṃ mohavaśādavoca‍–
dgovinda dāmodara mādhaveti

(upajāti)
ulūkhalaṃ vā yamināṃ mano vā
gopāṅganānāṃ kucakuṭmalaṃ vā/
murārināmnaḥ kalabhasya nūna‍–
mālānamāsīttrayameva bhūmau

(upajāti)
karāravindena padāravindaṃ
mukhāravinde viniveśayantam/
vaṭasya patrasya puṭe śayānaṃ
bālaṃ mukundaṃ manasā smarāmi

(upajāti)
śambho svāgatamāsyatāmita ito vāmena padmāsana
krauñcāre kuśalaṃ sukhaṃ surapate vitteśa no dṛśyase/
itthaṃ svapnagatasya kaiṭabhajitaśśrutvā yaśodā giraḥ
kiṃ kiṃ bālaka jalpasīti racitaṃ dhūdhūkṛtaṃ pātu naḥ

(śārdūlavikrīḍitam)
mātaḥ kiṃ yadunātha dehi caṣakaṃ kiṃ tena pātuṃ paya‍–
stannāstyadya kadāsti vā niśi niśā kā vāndhakārodaye/
āmīlyākṣiyugaṃ niśāpyupagatā dehīti māturmuhu‍–
rvakṣojāṃśukakarṣaṇodyatakaraḥ kṛṣṇassa puṣṇātu naḥ

(śārdūlavikrīḍitam)
kālindīpulinodareṣu musalī yāvadgataḥ khelituṃ
tāvatkarburikāpayaḥ piba hare vardhiṣyate te śikhā/
itthaṃ bālatayā pratāraṇaparāḥ śrutvā yaśodāgiraḥ
pāyānnassvaśikhāṃ spṛśanpramuditaḥ kṣīre'rdhapīte hariḥ

(śārdūlavikrīḍitam)
kailāse navanītati kṣititale prāgjagdhamṛlloṣṭati
kṣīrode'pi nipītadugdhati lasatsmerapraphulle mukhe/
mātrājīrṇadhiyā dṛḍhaṃ cakitayā naṣṭāsmi dṛṣṭaḥ kayā
dhūdhū vatsaka jīva jīva ciramityukto'vatādvo hariḥ

(śārdūlavikrīḍitam)
kiñcitkuñcitalocanasya pibataḥ paryāyapītastanaṃ
sadyaḥ prasnutadugdhabindumaparaṃ hastena sammārjataḥ/
mātraikāṅgulilālitasya cubuke smerānanasyādhare
śaureḥ kṣīrakaṇānvitā nipatitā dantadyutiḥ pātu naḥ

(śārdūlavikrīḍitam)
uttuṅgastanamaṇḍaloparilasatprālambamuktāmaṇe‍–
rantarbimbitamindranīlanikaracchāyānukāridyuti/
lajjāvyājamupetya namravadanā spaṣṭaṃ murārervapuḥ
paśyantī muditā mudo'stu bhavatāṃ lakṣmīrvivāhotsave

(śārdūlavikrīḍitam)
kṛṣṇenāmba gatena rantumadhunā mṛdbhakṣitā svecchayā
tathyaṃ kṛṣṇa ka evamāha musalī mithyāmba paśyānanam/
vyādehīti vidārite ca vadane dṛṣṭvā samastaṃ jaga‍–
nmātā yasya jagāma vismayapadaṃ pāyāt sa naḥ keśavaḥ

(śārdūlavikrīḍitam)
svātī sapatnī kila tārakāṇāṃ
muktāphalānāṃ jananīti roṣāt/
sā rohiṇī nīlamasūta ratnaṃ
kṛtāspadaṃ gopavadhūkuceṣu

(upajāti)
nṛtyantamatyantavilokanīyaṃ
kṛṣṇaṃ maṇistambhagataṃ mṛgākṣī/
nirīkṣya sākṣādiva kṛṣṇamagre
dvidhā vitene navanītamekam

(upajāti)
vatsa jāgṛhi vibhātamāgataṃ
jīva kṛṣṇa śaradāṃ śataṃ śatam/
ityudīrya suciraṃ yaśodayā
dṛśyamānavadanaṃ bhajāmahe

(rathoddhatā)
oṣṭhaṃ jighrañśiśuriti dhiyā cumbito vallavībhiḥ
kaṇṭhaṃ gṛhṇannaruṇitapadaṃ gāḍhamāliṅgitāṅgaḥ/
doṣṇā lajjāpadamabhimṛśannaṅkamāropitātmā
dhūrtasvāmī haratu duritaṃ dūrato bālakṛṣṇaḥ

(mandākrāntā)
ete lakṣmaṇa jānakīvirahitaṃ māṃ khedayantyambudā
marmāṇīva ca ghaṭṭayantyalamamī krūrāḥ kadambānilāḥ/
itthaṃ vyāhṛtapūrvajanmacarito yo rādhayā vīkṣitaḥ
serṣyaṃ śaṅkitayā sa nassukhayatu svapnāyamāno hariḥ

(śārdūlavikrīḍitam)
oṣṭhaṃ muñca hare bibhemi bhavatā pānairhatā pūtanā
kaṇṭhāśleṣamamuṃ jahīhi dalitāvāliṅganenārjunau/
mā dehi cchuritaṃ hiraṇyakaśipurnīto nakhaiḥ pañcatā‍–
mitthaṃ vāritarātrikeliravatāllakṣmyāpahāsāddhariḥ

(śārdūlavikrīḍitam)
rāmo nāma babhūva huṃ tadabalā sīteti huṃ tau pitu‍–
rvācā pañcavaṭīvane viharatastāmāharadrāvaṇaḥ/
nidrārthaṃ jananīkathāmiti harerhuṃkārataḥ śṛṇvataḥ
saumitre kva dhanurdhanurdhanuriti vyagrā giraḥ pāntu naḥ

(śārdūlavikrīḍitam)
bālo'pi śailoddharaṇāgrapāṇi‍–
rnīlo'pi nīrandhratamaḥ pradīpaḥ/
dhīro'pi rādhānayanāvabaddho
jāro'pi saṃsāraharaḥ kutastvam

(indravajrā)
bālāya nīlavapuṣe navakiṅkiṇīka‍–
jālābhirāmajaghanāya digambarāya/
śārdūladivyanakhabhūṣaṇabhūṣitāya
nandātmajāya navanītamuṣe namaste

(vasantatilakā)
savye pāyasabhaktamāhitarasaṃ bibhranmudā dakṣiṇe
pāṇau śāradacandramaṇḍalanibhaṃ haiyaṅgavīnaṃ vahan/
kaṇṭhe kalpitapuṇḍarīkanakhamapyuddāmadīptiṃ dadha‍–
ddevo divyadigambaro diśatu nassaukhyaṃ yaśodāśiśuḥ

(śārdūlavikrīḍitam)
kiṅkiṇikiṇikiṇirabhasai‍–
raṅgaṇabhuvi riṅgaṇaiḥ sadāṭantam/
kuṅkuṇukuṇupadayugalaṃ
kaṅkaṇakarabhūṣaṇaṃ hariṃ vande

(gīti)
sambādhe surabhīṇā‍–
mambāmāyāsayantamanuyāntīm/
lambālakamavalambe
taṃ bālaṃ tanuvilagnajambālam

(gīti)
añcitapiñchācūḍaṃ
sañcitasaujanyavallavīvalayam/
adharamaṇinihitaveṇuṃ
bālaṃ gopālamaniśamavalambe

(gīti)
prahlādabhāgadheyaṃ
nigamāntamahāguhāntarādheyam/
naraharipadābhidheyaṃ
vibudhavidheyaṃ mamānusaṃdheyam

(āryāgīti)
saṃsāre kiṃ sāraṃ
kaṃsāreścaraṇayugalaparivasanam/
jyotiḥ kimandhakāre
yadandhakāreranusmaraṇam

(āryā)
kalaśanavanītacore
kamalādṛkkumudacandrikāpūre/
viharatu nandakumāre
ceto mama gopasundarījāre

(gīti)
kastvaṃ bāla balānujaḥ kimiha te manmandirāśaṅkayā
yuktaṃ tannavanītapātravivare hastaṃ kimarthaṃ nyaseḥ/
mātaḥ kañcana vatsakaṃ mṛgayituṃ mā gā viṣādaṃ kṣaṇā‍–
dityevaṃ varavallavīprativacaḥ kṛṣṇasya puṣṇātu naḥ

(śārdūlavikrīḍitam)
gopālājirakardame viharase viprādhvare lajjase
brūṣe godhanahuṅkṛtaiḥ stutiśatairmaunaṃ vidhatse vidām/
dāsyaṃ gokulapuṃścalīṣu kuruṣe svāmyaṃ na dāntātmasu
jñātaṃ kṛṣṇa tavāṅghripaṅkajayugaṃ premṇācalaṃ mañjulam

(śārdūlavikrīḍitam)
namastasmai yaśodāyā
dāyādāyāstu tejase/
yaddhi rādhāmukhāmbhojaṃ
bhojaṃ bhojaṃ vyavardhata

(anuṣṭupślokam)
avatārāḥ santvanye
sarasijanayanasya sarvatobhadrāḥ/
kṛṣṇādanyaḥ ko vā
prabhavati gogopagopikāmuktyai

(gīti)
madhyegokulamaṇḍalaṃ pratidiśaṃ cāmbhāraverjṛmbhite
prātardohamahotsave navaghanaśyāmaṃ raṇannūpuram/
phālebālavibhūṣaṇaṃ kaṭiraṇatsatkiṅkiṇīmekhalaṃ
kaṇṭhevyāghranakhaṃ ca śaiśavakalākalyāṇakārtsnyaṃ bhaje

(śārdūlavikrīḍitam)
sajalajaladanīlaṃ darśitodāralīlaṃ
karataladhṛtaśailaṃ veṇuvādyai rasālam/
vrajajanakulapālaṃ kāminīkelilolaṃ
kalitalalitamālaṃ naumi gopālabālam

(mālinī)
smitalalitakapolaṃ snigdhasaṃgītalolaṃ
lalitacikurajālaṃ cauryacāturyalīlam/
śatamakharipukālaṃ śātakumbhābhacelaṃ
kuvalayadalanīlaṃ naumi gopālabālam

(mālinī)
muralininadalolaṃ mugdhamāyūravālaṃ
dalitadanujajālaṃ dhanyasaujanyalīlam/
parahitanavahelaṃ padmasadmānukūlaṃ
navajaladharanīlaṃ naumi gopālabālam

(mālinī)
sarasaguṇanikāyaṃ saccidānandakāyaṃ
śamitasakalamāyaṃ satyalakṣmīsahāyam/
śamadamasamudāyaṃ śāntasarvāntarāyaṃ
suhṛdayajanadāyaṃ naumi gopālabālam

(mālinī)
lakṣmīkalatraṃ lalitābjanetraṃ
pūrṇenduvaktraṃ puruhūtamitram/
kāruṇyapātraṃ kamanīyagātraṃ
vande pavitraṃ vasudevaputram

(indravajrā)
madamayamadamayaduragaṃ
yamunāmavatīrya vīryaśālī yaḥ/
mama ratimamaratiraskṛti‍–
śamanaparassa kriyātkṛṣṇaḥ

(āryā)
maulau māyūrabarhaṃ mṛgamadatilakaṃ cārulālāṭapaṭṭe
karṇadvandve ca tālīdalamatimṛdulaṃ mauktikaṃ nāsikāyām/
hāro mandāramālāparimalabharite kaustubhasyopakaṇṭhe
pāṇau veṇuśca yasya vrajayuvatiyutaḥ pātu pītāmbaro naḥ

(sragdharā)
murāriṇā vārivihārakāle
mṛgekṣaṇānāṃ muṣitāṃśukānām/
karadvayaṃ vā kacasaṃhatirvā
pramīlanaṃ vā paridhānamāsīt

(upendravajrā)
yāsāṃ gopāṅganānāṃ lasadasitatarā lolalīlākaṭākṣā
yannāsācārumuktāmaṇirucinikaravyomagaṅgāpravāhe/
mīnāyante'pi tāsāmatirabhasacalaccārunīlālakāntā
bhṛṅgāyante yadaṅghridvayasarasiruhe pātu pītāmbaro naḥ

(sragdharā)
yadveṇuśreṇirūpasthitasuṣiramukhodgīrṇanādaprabhinnā
eṇākṣyastatkṣaṇena truṭitanijapatipremabandhā babhūvuḥ/
astavyastālakāntāḥ sphuradadharakucadvandvanābhipradeśāḥ
kāmāveśaprakalpaprakaṭitapulakāḥ pātu pītāmbaro naḥ

(sragdharā)
devakyā jaṭharākare samuditaḥ krīto gavāṃ pālinā
nandenānakadundubhernijasutāpaṇyena puṇyātmanā/
gopālāvalimugdhahārataralo gopījanālaṅkṛtiḥ
stheyādvo hṛdi santataṃ sa madhuraḥ ko'pīndranīlo maṇiḥ

(śārdūlavikrīḍitam)
pīṭhe pīṭhaniṣaṇṇabālakagale tiṣṭhansa gopālako
yantrāntaḥ sthitadugdhabhāṇḍamapakṛṣyācchādya ghaṇṭāravam/
vaktropāntakṛtāñjaliḥ kṛtaśiraḥ kampaṃ pibanyaḥ payaḥ
pāyādāgatagopikānayanayorgaṇḍūṣaphūtkārakṛt

(śārdūlavikrīḍitam)
yajñairījimahe dhanaṃ dadimahe pātreṣu nūnaṃ vayaṃ
vṛddhānbhejimahe tapaścakṛmahe janmāntare duścaram/
yenāsmākamabhūdananyasulabhā bhaktirbhavadveṣiṇī
cāṇūradviṣi bhaktakalmaṣamuṣi śreyaḥpuṣi śrījuṣi

(śārdūlavikrīḍitam)
tvayi prasanne mama kiṃ guṇena
tvayyaprasanne mama kiṃ guṇena/
rakte virakte ca vare vadhūnāṃ
nirarthakaḥ kuṅkumapatrabhaṅgaḥ

(upajāti)
gāyanti kṣaṇadāvasānasamaye sānandaminduprabhā
rundhantyo nijadantakāntinivahairgopāṅganā gokule/
mathnatyo dadhi pāṇikaṅkaṇajhaṇatkārānukāraṃ javā‍–
dvyāvalgadvasanāñjalā yamaniśaṃ pītāmbaro'vyātsa naḥ

(śārdūlavikrīḍitam)
aṃsālambitavāmakuṇḍalabharaṃ mandonnatabhrūlataṃ
kiñcitkuñcitakomalādharapuṭaṃ sāciprasārekṣaṇam/
ālolāṅgulipallavairmuralikāmāpūrayantaṃ mudā
mūle kalpatarostribhaṅgilalitaṃ jāne jaganmohanam

(śārdūlavikrīḍitam)
mallaiḥ śailendrakalpaḥ śiśuritarajanaiḥ puṣpacāpo'ṅganābhi‍–
rgopaistu prākṛtātmā divi kuliśabhṛtā viśvakāyo'prameyaḥ/
kruddhaḥ kaṃsena kālo bhayacakitadṛśā yogibhirdhyeyamūrti‍–
rdṛṣṭo raṅgāvatāre hariramaragaṇānandakṛtpātu yuṣmān

(sragdharā)
saṃviṣṭo maṇiviṣṭare'ṅkatalamadhyāsīnalakṣmīmukhe
kastūrītilakaṃ mudā viracayanharṣātkucau saṃspṛśan/
anyonyasmitacandrikākisalayairārādhayanmanmathaṃ
gopīgopaparīvṛto yadupatiḥ pāyājjaganmohanaḥ

(śārdūlavikrīḍitam)
ākṛṣṭe vasanāñcale kuvalayaśyāmā trapādhaḥkṛtā
dṛṣṭiḥ saṃvalitā rucā kucayuge svarṇaprabhe śrīmati/
bālaḥ kaścana cūtapallava iti prāntasmitāsyaśriyaṃ
śliṣyaṃstāmatha rukmiṇīṃ natamukhīṃ kṛṣṇassa puṣṇātu naḥ

(śārdūlavikrīḍitam)
urvyāṃ ko'pi mahīdharo laghutaro dorbhyāṃ dhṛto līlayā
tena tvaṃ divi bhūtale ca satataṃ govardhanoddhārakaḥ/
tvāṃ trailokyadharaṃ vahāmi kucayoragre na tadgaṇyate
kiṃ vā keśava bhāṣaṇena bahunā puṇyairyaśo labhyate

(śārdūlavikrīḍitam)
sandhyāvandana bhadramastu bhavato bhoḥ snāna tubhyaṃ namo
bho devāḥ pitaraśca tarpaṇavidhau nāhaṃ kṣamaḥ kṣamyatām/
yatra kvāpi niṣadya yādavakulottaṃsasya kaṃsadviṣaḥ
smāraṃ smāramaghaṃ harāmi tadalaṃ manye kimanyena me

(śārdūlavikrīḍitam)
he gopālaka he kṛpājalanidhe he sindhukanyāpate
he kaṃsāntaka he gajendrakaruṇāpārīṇa he mādhava/
he rāmānuja he jagattrayaguro he puṇḍarīkākṣa māṃ
he gopījananātha pālaya paraṃ jānāmi na tvāṃ vinā

(śārdūlavikrīḍitam)
kastūrītilakaṃ lalāṭaphalake vakṣasthale kaustubhaṃ
nāsāgre navamauktikaṃ karatale veṇuṃ kare kaṅkaṇam/
sarvāṅge haricandanaṃ ca kalayankaṇṭhe ca muktāvaliṃ
gopastrīpariveṣṭito vijayate gopālacūḍāmaṇiḥ

(śārdūlavikrīḍitam)
kālindībahulapravāharabhasaṃ saṃstambhayaṃstatkṣaṇāt
śailānvidravayanmṛgānvivaśayangobṛndamānandayan/
gopānsaṃbhramayanmunīnmukulayansaptasvarān jṛmbhaya‍–
nnoṃkārārthamudīrayanvijayate vaṃśīninādaḥ śiśoḥ

(śārdūlavikrīḍitam)
iti śrīkṛṣṇakarṇāmṛte dvitīyāśvāsaḥ samāptaḥ//
tṛtīyāśvāsaḥ
asti svastyayanaṃ samastajagatāmabhyastalakṣmīstanaṃ
vastu dhvastarajastamobhiraniśaṃ nyastaṃ purastādiva/
hastodastagirīndramastakataruprastāravistārita–
srastasvastarusūnasaṃstaralasatprastāvirādhāstutam

(śārdūlavikrīḍitam)
rādhārādhitavibhramādbhutarasaṃ lālityaratnākaraṃ
sādhāraṇyapadavyatītasahajasmerānanāmbhoruham/
ālambe harinīlagarvagurutāṃ sarvasvanirvāpaṇaṃ
bālaṃ vaiṇavikaṃ vimugdhamadhuraṃ mūrdhābhiṣiktaṃ mahaḥ

(śārdūlavikrīḍitam)
kariṇāmalaṅghyagativaibhavaṃ bhaje
karuṇāvalambitakiśoravigraham/
yamināmanāratavihāri mānase
yamunāvanāntarasikaṃ paraṃ mahaḥ

(mañjubhāṣiṇī)
atantritatrijagadapi vrajāṅganā–
niyantritaṃ vipulavilocanājñayā/
samantataḥ sarasataraṃ vijṛmbhatāṃ
nirantaraṃ mama hṛdaye paraṃ mahaḥ

(rucirā)
kaṃdarpapratimallakāntivibhavaṃ kādambinībāndhavaṃ
vṛndāraṇyavilāsinīvyasaninaṃ veṣeṇa bhūṣāmayam/
mandasmeramukhāmbujaṃ madhurimavyāmṛṣṭabimbādharaṃ
vande kaṃdalitārdrayauvanavanaṃ kaiśorakaṃ śārṅgiṇaḥ

(śārdūlavikrīḍitam)
āmuktamānuṣamamuktanijānubhāva–
mārūḍhavigrahamagūḍhavidagdhalīlam/
āmṛṣṭayauvanamamṛṣṭakiśorabhāva–
mādyaṃ mahaḥ kimapi mādyati mānase me

(vasantatilakā)
te te bhāvāḥ sakalajagatīlobhanīyaprabhāvā
nānātṛṣṇāsuhṛdi hṛdi me kāmamāvirbhavantu/
līlāveṇukvaṇitalasitasmeravaktrāravindā–
nnāhaṃ jāne madhuramaparaṃ nandapuṇyāmbupūrāt

(mandākrāntā)
sukṛtibhirādṛte sarasaveṇuninādasudhā–
rasalaharīvihāraniravagrahakarṇapuṭe/
vrajavarasundarīmukhasaroruhasārasike
mahasi kadā nu majjati madīyamidaṃ hṛdayam

(kokilakā)
tṛṣṇāture cetasi jṛmbhamāṇe
muṣṇanmuhurmohamahāndhakāram/
puṣṇātu naḥ puṇyadayaikasindhoḥ
kṛṣṇasya kāruṇyakaṭākṣakeliḥ

(indravajrā)
nikhilanigamamaulilālitaṃ
padakamalaṃ paramasya tejasaḥ/
vrajabhuvi bahumanmahetarāṃ
sarasakarīṣaviśeṣarūṣitam

(aparavatram)
udāramṛdulasmitavyatikarābhirāmānanaṃ
mudā muhurudīrṇayā munimano'mbujāmreḍitam/
madālasavilocanavrajavadhūmukhāsvāditaṃ
kadā nu kamalekṣaṇaṃ kamapi bālamālokaye

(pṛthvī)
vrajajanamadayoṣillocanocchiṣṭaśeṣī–
kṛtamapi capalābhyāṃ locanābhyāmubhābhyām/
sakṛdapi paripātuṃ te vayaṃ pārayāmaḥ
kuvalayadalanīlaṃ kāntipūraṃ kadā nu

(mālinī)
ghoṣayoṣidanugītayauvanaṃ
komalastanitaveṇunisvanam/
sārabhūtamabhirāmasaṃpadāṃ
dhāma tāmarasalocanaṃ bhaje

(rathoddhatā)
līlayā lalitayāvalambitaṃ
mūlagehamiva mūrtisaṃpadām/
nīlanīradavikāsavibhramaṃ
bālameva vayamādriyāmahe

(rathoddhatā)
vande murāreścaraṇāravinda–
dvandvaṃ dayādarśitaśaiśavasya/
vandārubṛndārakabṛndamauli–
mandāramālāvinimardabhīru

(indravajrā)
yasminnṛtyati yasya śekharabharaiḥ krauñcadviṣaścandrakī
yasmindṛpyati yasya ghoṣasurabhiṃ jighranvṛṣo dhūrjaṭeḥ/
yasminsajjati yasya vibhramagatiṃ vāñchanhareḥ sindhura–
stadbṛndāvanakalpakadrumavanaṃ taṃ vā kiśoraṃ bhaje

(śārdūlavikrīḍitam)
aruṇādharāmṛtaviśeṣitasmitaṃ
varuṇālayānugatavarṇavaibhavam/
taruṇāravindadaladīrghalocanaṃ
karuṇāmayaṃ kamapi bālamāśraye

(mañjubhāṣiṇī)
lāvaṇyavīcīracitāṅgabhūṣāṃ
bhūṣāpadāropitapuṇyabarhām/
kāruṇyadhārālakaṭākṣamālāṃ
bālāṃ bhaje vallavavaṃśalakṣmīm

(indravajrā)
madhuraikarasaṃ vapurvibhosta–
nmathurāvīthicaraṃ bhajāmahe/
nagarīmṛgaśābalocanānāṃ
nayanendīvaravarṣavarṣitam

(triṣṭup)
paryākulena nayanāntavijṛmbhitena
vaktreṇa komalamadasmitavibhrameṇa/
mandreṇa mañjulatareṇa ca jalpitena
nandasya hanta tanayo hṛdayaṃ dhunoti

(vasantatilakā)
kaṃdarpakaṇḍūlakaṭākṣabandī–
rindīvarākṣīrabhilaṣyamāṇān/
mandasmitādhāramukhāravindān
vandāmahe vallavadhūrtapādān

(indravajrā)
līlāṭopakaṭākṣanirbharapariṣvaṅgaprasaṅgādhika–
prīte gītivibhāgasaṅgaralasadveṇupraṇādāmṛte/
rādhālocanalālitasya lalitasmere murārermudā
mādhuryaikarase mukhendukamale magnaṃ madīyaṃ manaḥ

(śārdūlavikrīḍitam)
śaraṇāgatavajrapañjare
śaraṇe śārṅgadharasya vaibhave/
kṛpayā dhṛtagopavigrahe
kiyadanyanmṛgayāmahe vayam

(viyoginī)
jagattrayaikāntamanojñabhūmi–
ścetasyajasraṃ mama saṃnidhattām/
rāmāsamāsvāditasaukumāryaṃ
rādhāstanābhogarasajñamojaḥ

(upajāti)
vayamete viśvasimaḥ
karuṇākarakīrtikiṃvadantyāṅge/
api ca vibho tava lalite
capalatarā matiriyaṃ bālye

(āryā)
vatsapālacaraḥ ko'pi
vatsaḥ śrīvatsalāñchanaḥ/
utsavāya kadā bhāvī–
tyutsuke mama locane// *
(anuṣṭupślokam)
madhurimabharite manobhirāme
mṛdulatarasmitamudritānanendau/
tribhuvananayanaikalobhanīye
mahasi vayaṃ vrajabhāji lālasāḥ smaḥ

(puṣpitāgrā)
mukhāravinde makarandabindu–
niṣyandalīlāmuralīnināde/
vrajāṅganāpāṅgataraṅgabhṛṅga–
saṃgrāmabhūmau tava lālasāḥ smaḥ

(upajāti)
ātāmrāyatalocanāṃśulaharīlīlāsudhāpyāyitai–
rgītāmreḍitadivyakelibharitaiḥ sphītaṃ vrajastrījanaiḥ/
svedāmbhaḥkaṇabhūṣitena kimapi smereṇa vaktrendunā
pādāmbhojamṛdupracārasubhagaṃ paśyāmi dṛśyaṃ mahaḥ

(śārdūlavikrīḍitam)
pāṇau veṇuḥ prakṛtisukumārākṛtau bālyalakṣmīḥ
pārśve bālāḥ praṇayasarasālokitāpāṅgalīlāḥ/
maulau barhaṃ madhuravadanāmbhoruhe maugdhyamudre–
tyārdrākāraṃ kimapi kitavaṃ jyotiranveṣayāmaḥ

(mandākrāntā)
ārūḍhaveṇutaruṇādharavibhrameṇa
mādhuryaśālivadanāmbujamudvahantī/
kaiśorake vayasi kāpi ca kāntiyaṣṭi–
rālokyatāṃ kimanayā vanadevatā vaḥ

(vasantatilakā)
ananyasādhāraṇakāntikānta–
mākrāntagopīnayanāravindam/
puṃsaḥ purāṇasya navaṃ vilāsaṃ
puṇyena pūrṇena vilokayiṣye

(upajāti)
sāṣṭāṅgapātamabhivandya samastabhāvaiḥ
sarvānsurendranikarānidameva yāce/
mandasmitārdramadhurānanacandrabimbe
nandasya puṇyanicaye mama bhaktirastu

(vasantatilakā)
eṣu pravāheṣu sa eva manye
kṣaṇo'pi gaṇyaḥ puruṣāyuṣeṣu/
āsvādyate yatra kayāpi vṛttyā
nīlasya bālasya nijaṃ caritram

(upajāti)
nisargasarasādharaṃ nijadayārdradivyekṣaṇaṃ
manojñamukhapaṅkajaṃ madhurasārdramandasmitam/
rasajñahṛdayāspadaṃ ramitavallavīlocanaṃ
punaḥ punarupāsmahe bhuvanalobhanīyaṃ mahaḥ

(pṛthvī)
sa ko'pi bālaḥ sarasīruhākṣaḥ
sā ca vrajastrījanapādadhūliḥ/
muhustadetadyugalaṃ madīye
momuhyamāno'pi manasyudetu

(upajāti)
mayi prayāṇābhimukhe ca vallavī–
stanadvayīdurlalita: sa bālakaḥ/
śanaiḥ śanaiḥ śrāvitaveṇunisvano
vilāsaveṣeṇa puraḥ pratīyatām

(vaṃśasthavilā)
atibhūmimabhūmimeva vā
vacasāṃ vāsitavallavīstanam/
manasāmaparaṃ rasāyanaṃ
madhurādvaitamupāsmahe mahaḥ

(viyoginī)
jananāntare'pi jagadekamaṇḍane
kamanīyadhāmni kamalāyatekṣaṇe/
vrajasundarījanavilocanāmṛte
capalāni santu sakalendriyāṇi me

(kalahaṃsa)
muniśreṇīvandyaṃ madabharalasadvallavavadhū–
stanaśroṇībimbastimitanayanāmbhojasubhagam/
punaḥ ślāghābhūmiṃ pulakitagirāṃ naigamagirāṃ
ghanaśyāmaṃ vande kimapi mahanīyākṛti mahaḥ

(śikhariṇī)
anucumbatāmapi calena cetasā
manujākṛtermadhurimāśriyaṃ vibhoḥ/
ayi deva kṛṣṇa dayiteti jalpatā–
mapi no bhaveyurapi nāma tādṛśaḥ

(mañjubhāṣiṇī)
kiśoraveṣeṇa kṛśodarīdṛśāṃ
viśeṣadṛśyena viśālalocanam/
yaśodayā labdhayaśonavāmbudhe–
rniśāmaye nīlaniśākaraṃ kadā

(vaṃśasthavilā)
prakṛtiravatu no vilāsalakṣmyāḥ
prakṛtijaḍaṃ praṇatāparādhavīthyām/
sukṛtikṛtapadaṃ kiśorabhāve
sukṛtikṛtapraṇidhānapātramojaḥ

(puṣpitāgrā)
apahasitasudhāmadāvalepai–
radhikamanoharamārdramandahāsaiḥ/
vrajayuvativilocanāvalehyaṃ
ramayatu dhāma ramāvarodhanaṃ naḥ

(puṣpitāgrā)
aṅkūritasmeradaśāviśeṣai–
raśrāntaharṣāmṛtavarṣamakṣṇām/
saṃkrīḍatāṃ cetasi gopakanyā–
dhanyastanasvastyayanaṃ maho naḥ

(indravajrā)
mṛgamadapaṅkasaṅkaraviśeṣitavanyamahā–
giritaṭagaṇḍagairikaghanadravavidrumitam/
ajitabhujāntaraṃ bhajata gopavadhūpṛthula–
stanakalaśasthalīghusṛṇamardanakardamitam

(kokilakā)
āmūlapallavitalīlamapāṅgajālai–
rāsiñcatī bhuvanamādṛtagopaveṣā/
bālyākṛtirmṛdulamugdhamukhendubimbā
mādhuryasiddhiravatānmadhuvidviṣo naḥ

(vasantatilakā)
viraṇanmaṇinūpuraṃ vraje
caraṇāmbhojamupāsva śārṅgiṇaḥ/
sarase sarasi śriyāśritaṃ
kamalaṃ vā kalahaṃsanāditam

(viyoginī)
śaraṇamaśaraṇānāṃ śāradāmbhojanetraṃ
niravadhimadhurimṇā nīlaveṣeṇa ramyam/
smaraśaraparatantrasmeranetrāmbujābhi–
rvrajayuvatibhiravyādbrahma saṃveṣṭitaṃ naḥ

(mālinī)
suvyaktakāntibharasaurabhadivyagātra–
mavyaktayauvanaparītakiśorabhāvam/
gavyānupālanavidhāvanuśiṣṭamavyā–
davyājaramyamakhileśvaravaibhavaṃ naḥ

(vasantatilakā)
anugatamamarīṇāmambarālambinīnāṃ
nayanamadhurimaśrīnarmanirmāṇasīmnām/
vrajayuvativilāsavyāpṛtāpāṅgamavyāt
tribhuvanasukumāraṃ devakaiśorakaṃ naḥ

(mālinī)
āpādamācūḍamatiprasaktai–
rāpīyamānā yamināṃ manobhiḥ/
gopījanajñātarasāvatādvo
gopālabhūpālakumāramūrtiḥ

(indravajrā)
diṣṭyā vṛndāvanamṛgadṛśāṃ viprayogākulānāṃ
pratyāsannaṃ praṇayacapalāpāṅgavīcītaraṅgaiḥ/
lakṣmīlīlākuvalayadalaśyāmalaṃ dhāmakāmā–
npuṣṇīyādvaḥ pulakamukulābhogabhūṣāviśeṣam

(mandrākrāntā)
jayati guhaśikhīndrapiñchamauliḥ
suragirigairikakalpitāṅgarāgaḥ/
surayuvativikīrṇasūnavarṣa–
snapitavibhūṣitakuntalaḥ kumāraḥ

(puṣpitāgrā)
madhuramandaśucismitamañjulaṃ
vadanamaṅgajamaṅgajavellitam/
vijayatāṃ vrajabālavadhūjana–
stanataṭīviluṭhannayanaṃ vibhoḥ

(kalahaṃsa)
alasavilasanmugdhasnigdhasmitaṃ vrajasundarī–
madanakadanasvinnaṃ dhanyaṃ mahadvadanāmbujam/
taruṇamaruṇajyotsnākārtsnyasmitasnapitādharaṃ
jayati vijayaśreṇīmeṇīdṛśāṃ madayanmahaḥ

(hariṇī)
rādhākelikaṭākṣavīkṣitamahāvakṣaḥsthalīmaṇḍanā
jīyāsuḥ pulakāṅkurāstribhuvanāsvādīyasastejasaḥ/
krīḍāntapratisuptadugdhatanayāmugdhāvabodhakṣaṇa–
trāsārūḍhadṛḍhopagūhagahanā: sāmrājyasāndraśriyaḥ

(śārdūlavikrīḍitam)
smitasnutasudhādharā madaśikhaṇḍibarhāṅkitā
viśālanayanāmbujā vrajavilāsinīvāsitāḥ/
manojñamukhapaṅkajā madhuraveṇunādadravā
jayanti mama cetasaściramupāsitā vāsanāḥ

(pṛthvī)
jīyādasau śikhiśikhaṇḍakṛtāvataṃsā
sāṃsiddhikī sarasakāntisudhāsamṛddhiḥ/
yadbinduleśakaṇīkāpariṇāmabhāgyāt
saubhāgyasīmapadamañcati pañcabāṇaḥ

(vasantatilakā)
āyāmena dṛśorviśālatarayorakṣayyamārdrasmita–
cchāyādharṣitaśāradendulalitaṃ cāpalyamātraṃ śiśoḥ/
āyāsānaparānvidhūya rasikairāsvādyamānaṃ muhu–
rjīyādunmadavallavīkucabharādhāraṃ kiśoraṃ mahaḥ

(śārdūlavikrīḍitam)
skandhāvārapadaṃ vrajaḥ katipaye gopāssahāyādayaḥ
skandhālambini vatsadāmni dhanadā gopāṅganāssvāṅganāḥ/
śṛṅgārā girigairikaṃ śiva śiva śrīmanti barhāṇi vā
śṛṅgagrāhikayā tathāpi tadidaṃ prāhustrilokeśvaram

(śārdūlavikrīḍitam)
śrīmadbarhiśikhaṇḍamaṇḍanajuṣe śyāmābhirāmatviṣe
lāvaṇyaikarasāvasiktavapuṣe lakṣmīsaraḥprāvṛṣe/
līlākṛṣṭarasajñadharmamanase līlāmṛtasrotase
ke vā na spṛhayanti hanta mahase gopījanapreyase

(śārdūlavikrīḍitam)
āpāṭalādharamadhīravilolanetra–
māmodanirbharitamadbhutakāntipūram/
āvismitāmṛtamanusmṛtilobhanīya–
māmudritānanamaho madhuraṃ murāreḥ

(vasantatilakā)
jāgṛhi jāgṛhi ceto
na cirāya kṛtārthatā bhavataḥ/
anubhūyatāmidamidaṃ
puraḥ sthitaṃ pūrṇanirvāṇam

(āryā)
caraṇayoraruṇaṃ karuṇārdrayoḥ
kacabhare bahulaṃ vipulaṃ dṛśoḥ/
vapuṣi mañjulamañjanamecake
vayasi bālamaho madhuraṃ mahaḥ

(drutavilambitam)
mālābarhamanojñakuntalabharāṃ vanyaprasūnokṣitāṃ
śaileyadravakḷptacitratilakāṃ śaśvanmanohāriṇīm
līlāveṇuravāmṛtaikarasikāṃ lāvaṇyalakṣmīmayīṃ
bālāṃ bālatamālanīlavapuṣaṃ vande parāṃ devatām

(śārdūlavikrīḍitam)
guru mṛdupade gūḍhaṃ gulphe ghanaṃ jaghanasthale
nalinamudare vīraṃ bāhvorviśālamuraḥsthale/
madhuramadhare mugdhaṃ vaktre viśālavilocane
bahu kacabhare vanyaṃ veṣe manojñamaho mahaḥ

(hariṇī)
jihānaṃ jihānaṃ nu jānena maugdhyaṃ
duhānaṃ duhānaṃ sudhāṃ veṇunādaiḥ/
lihānaṃ lihānaṃ sudīrghairapāṅgai–
rmahānandasarvasvamekaṃ namettam

(bhujaṅgaprayātam)
lasadbarhāpīḍaṃ lalitalalitasmeravadanaṃ
bhramatkrīḍāpāṅgaṃ praṇatajanatānirvṛtipadam/
navāmbhodaśyāmaṃ nijamadhurimābhogabharitaṃ
paraṃ devaṃ vande parimilitakaiśorakarasam

(śikhariṇī)
sārasyasāmagryamivānanena
mādhuryacāturyamiva smitena/
tāruṇyakāruṇyamivekṣaṇena
cāpalyasāphalyamidaṃ dṛśorme

(indravajrā)
yatra vā tatra vā deva
yadi viśvasimastvayi/
nirvāṇamapi durvāram–
arvācīnāni kiṃ punaḥ// *
(anuṣṭupślokam)
rāgāndhagopījanavanditābhyāṃ
yogīndrabhṛṅgendraniṣevitābhyām/
ātāmrapaṅkeruhavibhramābhyāṃ
svāmin padābhyāmayamañjaliste

(indravajrā)
ardhānulāpānvrajasundarīṇā–
makṛtrimāṇāṃ ca sarasvatīnām/
ārdrāśayena śravaṇāñcalena
saṃbhāvayantaṃ taruṇaṃ gṛṇīmaḥ

(upajāti)
manasi mama saṃnidhattāṃ
madhuramukhā mantharāpāṅgā/
karakalitalalitavaṃśā
kāpi kiśorī kṛpālaharī

(upagīti)
rakṣantu naḥ śikṣitapāśupālyā
bālāvṛtā barhiśikhāvataṃsāḥ/
prāṇapriyaprastutaveṇugītāḥ
śītā dṛśoḥ śītalagopakanyāḥ

(indravajrā)
smitastabakitādharaṃ śiśiraveṇunādāmṛtaṃ
muhustaralalocanaṃ madakaṭākṣamālākulam/
urastaṭavilīnayā kamalayā samāliṅgitaṃ
bhuva:sthalamupāgataṃ bhuvanadaivataṃ pātu naḥ

(pṛthvī)
nayanāmbuje bhajata kāmadughaṃ
hṛdayāmbuje kimapi kāruṇikam/
caraṇāmbuje munikulaikadhanaṃ
vadanāmbuje vrajavadhūvibhavam

(pramitākṣarā)
nirvāsanaṃ hanta rasāntarāṇāṃ
nirvāṇasāmrājyamivāvatīrṇam/
avyājamādhuryamahānidhāna–
mavyādvrajānāmadhidaivataṃ naḥ

(indravajrā)
khelatāṃ manasi khecarāṅganā–
mānanīyamṛduveṇuni:svanaiḥ/
kālameghakalahodvahaṃ mahaḥ
kānane kimapi naḥ kṛpāspadaṃ

(rathoddhatā)
gopīnāmabhimatagītaveṣaharṣā–
dāpīnastanabharanirbharopagūḍham/
kelīnāmavatu rasairupāsyamānaṃ
kālindīpulinacaraṃ paraṃ maho naḥ

(praharṣiṇī)
eṇīśābavilocanābhiralasaśroṇībharaprauḍhibhi–
rveṇībhūtarasakramābhirabhita: śreṇīkṛtābhirvṛtāḥ/
pāṇī nāma vinodayanratipatestūṇīśayaiḥ sāyakai–
rvāṇīnāmapadaṃ paraṃ vrajajanakṣoṇīpatiḥ pātu naḥ

(śārdūlavikrīḍitam)
kālindīpuline tamālanibiḍacchāye puraḥsaṃcara–
ttoye toyajapatrapātranihitaṃ dadhyannamaśnāti yaḥ/
vāme pāṇitale nidhāya madhuraṃ veṇuṃ viṣāṇaṃ kaṭi–
prānte gāśca vilokayanpratikalaṃ taṃ bālamālokaye

(śārdūlavikrīḍitam)
yadgopīvadanendumaṇḍanamabhūtkastūrikāpatrakaṃ
yallakṣmīkucaśātakuṃbhakalaśe vyākocamindīvaram/
yannirvāṇanidhānasādhanavidhau siddhāñjanaṃ yogināṃ
tannaḥ śyāmalamāvirastu hṛdaye kṛṣṇābhidhānaṃ mahaḥ

(śārdūlavikrīḍitam)
phullendīvarakāntiminduvadanaṃ barhāvataṃsapriyaṃ
śrīvatsāṅkamudārakaustubhadharaṃ pītāmbaraṃ sundaram/
gopīnāṃ nayanotpalārcitatanuṃ gogopasaṅghāvṛtaṃ
govindaṃ kalaveṇunādanirataṃ divyāṅgabhūṣaṃ bhaje

(śārdūlavikrīḍitam)
yannābhīsarasīruhāntarapuṭe bhṛṅgāyamāno vidhi–
ryadvakṣaḥ kamalāvilāsasadanaṃ yaccakṣuṣī cendvinau/
yatpādābjaviniḥsṛtā suranadī śambhoḥ śirobhūṣaṇaṃ
yannāmasmaraṇaṃ dhunoti duritaṃ pāyāt sa naḥ keśavaḥ// *
(śārdūlavikrīḍitam)
rakṣantu tvāmasitajalajairañjaliḥ pādamūle
mīnā nābhīsarasi hṛdaye mārabāṇā murāreḥ/
hārāḥ kaṇṭhe harimaṇimayā vaktrapadme dvirephāḥ
piñchācūḍāscikuranicaye ghoṣayoṣitkaṭākṣāḥ

(mandākrāntā)
dadhimathananinādaistyaktanidraḥ prabhāte
nibhṛtapadamagāraṃ vallavīnāṃ praviṣṭaḥ/
mukhakamalasamīrairāśu nirvāpya dīpān
kabalitanavanītaḥ pātu gopālabālaḥ

(mālinī)
prātaḥ smarāmi dadhighoṣavidhūtanidraṃ
nidrāvasānaramaṇīyamukhāravindam/
hṛdyānavadyavapuṣaṃ nayanābhirāma–
munnidrapadmanayanaṃ navanītacoram

(vasantatilakā)
phullahallakavataṃsakojjvala–
dgallamāgamagavīgaveṣitam/
vallavīcikuravāsitāṅgulī–
pallavaṃ kamapi vallavaṃ bhaje

(rathoddhatā)
steyaṃ harerharati yannavanītacauryaṃ
jāratvamasya gurutalpakṛtāparādham/
hatyāṃ daśānanahatirmadhupānagoṣṭhīṃ
yatpūtanāstanapayaḥ sa punātu kṛṣṇaḥ

(vasantatilakā)
māra mārama madīyamānase
mādhavaikanilaye yadṛcchayā/
he ramāramaṇa vāryatāmasau
kaḥ saheta nijaveśmalaṅghanam

(rathoddhatā)
ākuñcitaṃ jānu karaṃ ca vāmaṃ
nyasyāvanau dakṣiṇahastapadme/
ālokayantaṃ navanītakhaṇḍaṃ
bālaṃ bhaje kṛṣṇamupānatāṅgam

(indravajrā)
mandāramūle madanābhirāmaṃ
bimbādharāpūritaveṇunādam/
gogopagopījanamadhyasaṃsthaṃ
gopaṃ bhaje gokulapūrṇacandram

(indravajrā)
jānubhyāmabhidhāvantaṃ
bāhubhyāmapi sundaram/
sakuṇḍalālakaṃ bālaṃ
gopālaṃ cintayeduṣaḥ

(anuṣṭupślokam)
vihāya kodaṇḍaśarau muhūrtaṃ
gṛhāṇa pāṇau maṇicāruveṇum/
mayūrabarhaṃ ca nijottamāṅge
sītāpate rāghava rāmacandra

(upajāti)
ayaṃ kṣīrāmbhodheḥ patiriti gavāṃ pālaka iti
śrito'smābhiḥ kṣīropanayanadhiyā gopatanayaḥ/
anena pratyūho vyaraci satataṃ yena jananī–
stanādapyasmākaṃ sakṛdapi payo durlabhamabhūt

(śikhariṇī)
hastamākṣipya yāto'si
balātkṛṣṇa kimadbhutam/
hṛdayādyadi niryāsi
pauruṣaṃ gaṇayāmi te

(anuṣṭupślokam)
tamasi ravirivodyanmajjatāmamburāśau
plava iva tṛṣitānāṃ svāduvarṣīva meghaḥ/
nidhiriva nidhanānāṃ dīrghatīvrāmayānāṃ
bhiṣagiva kuśalaṃ no dātumāyātu śauriḥ

(mālinī)
kodaṇḍaṃ masṛṇaṃ sugandhi viśikhaṃ cakrābjapāśāṅkuśaṃ
haimīṃ veṇulatāṃ karaiśca dadhataṃ sindūrapuñjāruṇam/
kaṃdarpādhikasundaraṃ smitamukhaṃ gopāṅganāveṣṭitaṃ
gopālaṃ madanādhipaṃ tamabhajaṃ trailokyarakṣāmaṇim

(śārdūlavikrīḍitam)
sāyaṅkāle vanānte kusumitasamaye saikate candrikāyāṃ
trailokyākarṣaṇāṅgaṃ suranaragaṇikāmohanāpāṅgamūrtim/
sevyaṃ śṛṅgārabhāvairnavarasabharitairgopakanyāsahasrai–
rvande'haṃ rāsakelīratamatisubhagaṃ vaśyagopālakṛṣṇam

(sragdharā)
kadambamūle krīḍantaṃ
vṛndāvananiveśitam/
padmāsanasthitaṃ vande
veṇuṃ gāyantamacyutam// *
(anuṣṭupślokam)
bālaṃ nīlāmbudābhaṃ navamaṇivilasatkiṅkiṇījālabaddha–
śroṇījaṅghāntayugmaṃ vipularurunakhaprollasatkaṇṭhabhūṣam/
phullāmbhojābhavaktraṃ hataśakaṭamarutpūtanādyaṃ prasannaṃ
govindaṃ vanditendrādyamaravaramajaṃ pūjayedvāsarādau

(sragdharā)
vandyaṃ devairmukundaṃ vikasitakuruvindābhamindīvarākṣaṃ
gopīgobṛndavītaṃ jitaripunivahaṃ kundamandārahāsam/
nīlagrīvāgryapiñchākalanasuvilasatkuntalaṃ bhānumantaṃ
devaṃ pītāmbarāḍhyaṃ yaja yaja dinaśastaṃ ramāyai mukundam

(sragdharā)
cakrāntadhvastavairivrajamajitamapāstāvanībhāramādyai–
rāvītaṃ nāradādyairmunibhirabhinutaṃ tatvanirṇītihetoḥ/
mantrī taṃ nirmalāṅgaṃ nirupamaruciraṃ cintayennīlabhāsaṃ
sāyaṃ viśvodayasthityapaharaṇapadaṃ muktidaṃ vāsudevam

(sragdharā)
kodaṇḍamaikṣavamakhaṇḍamiṣuṃ ca pauṣpaṃ
cakrābjapāśasṛṇikāñcanavaṃśanālam/
vibhrāṇamaṣṭavidhabāhubhirarkavarṇaṃ
dhyāyeddhariṃ madanagopavilāsaveṣam

(vasantatilakā)
aṅgulyā kaḥ kavāṭaṃ praharati kuṭile mādhavaḥ kiṃ vasanto
no cakrī kiṃ kulālo na hi dharaṇidharaḥ kiṃ dvijihvaḥ phaṇīndraḥ/
nāhaṃ ghorāhimardī kimasi khagapatirno hariḥ kiṃ kapīndraḥ
ityevaṃ gopakanyāprativacanajitaḥ pātu vaścakrapāṇiḥ// *
(sragdharā)
rādhāmohanamandirādupagataścandrāvalīmūcivān
rādhe kṣemamihesti tasya vacanaṃ śrutvā'ha candrāvalī/
kaṃsa kṣemamaye vimugdhahṛdaye kaṃsaḥ kva dṛṣṭastvayā
rādhā kveti vilajjito natamukhaḥ smero hariḥ pātu vaḥ// *
(śārdūlavikrīḍitam)
yā prītirvidurārpite muraripo kuntyarpite yādṛśī
yā govardhanamūrdhni yā ca pṛthuke stanye yaśodārpite/
bhāradvājasamarpite śabarikādatte'dhare yoṣitāṃ
yā prītirmunipatnibhaktiracite'pyatrāpi tāṃ tāṃ kuru

(śārdūlavikrīḍitam)
kṛṣṇānusmaraṇādeva
pāpasaṅghātapañcaraḥ/
śatadhā moghamāyāti
girirvajrahato yathā// *
(anuṣṭupślokam)
yasyātmabhūtasya guroḥ prasādā–
dahaṃ vimukto'smi śarīrabandhāt/
sarvopadeṣṭuḥ puruṣottamasya
tasyāṃghripadmaṃ praṇato'smi nityam// *
(upajāti)
iti śrīkṛṣṇakarṇāmṛte tṛtīyāśvāsaḥ samāptaḥ//
iti śrīkṛṣṇakarṇāmṛtaṃ samāptam//
sambaddhānubandhāḥ
śrīveṅkaṭeśasuprabhātam
śrīveṅkaṭeśastotram
śrīveṅkaṭeśaprapattiḥ
śrīveṅkaṭeśamaṅgalāśāsanam
śrīkāmākṣīsuprabhātam
śrīkāśīviśvanāthasuprabhātam
śrīviṣṇusahasranāmastotram‌