શ્રીકૃષ્ણકર્ણામૃતમ્ · અધ્યાય 1

પ્રથમાશ્વાસઃ
ચિન્તામણિર્જયતિ સોમગિરિર્ગુરુર્મે
શિક્ષાગુરુશ્ચ ભગવાઞ્શિખિપિઞ્છમૌલિઃ।
યત્પાદકલ્પતરુપલ્લવશેખરેષુ
લીલાસ્વયંવરરસં લભતે જયશ્રીઃ

(વસન્તતિલકા)
અસ્તિ સ્વસ્તરુણીકરાગ્રવિગલત્કલ્પપ્રસૂનાપ્લુતં
વસ્તુ પ્રસ્તુતવેણુનાદલહરીનિર્વાણનિર્વ્યાકુલમ્।
સ્રસ્તસ્રસ્તનિરુદ્ધનીવિવિલસદ્ગોપીસહસ્રાવૃતં
હસ્તન્યસ્તનતાપવર્ગમખિલોદારં કિશોરાકૃતિ

(શાર્દૂલવિક્રીડિતમ્)
ચાતુર્યૈકનિદાનસીમચપલાપાઙ્ગચ્છટામન્થરં
લાવણ્યામૃતવીચિલોલિતદૃશં લક્ષ્મીકટક્ષાદૃતમ્।
કાલિન્દીપુલિનાઙ્ગનપ્રણયિનં કામાવતારાઙ્કુરં
બાલં નીલમમી વયં મધુરિમસ્વારાજ્યમારાધ્નુમઃ

(શાર્દૂલવિક્રીડિતમ્)
બર્હોત્તંસવિલાસિકુન્તલભરં માધુર્યમગ્નાનનં
પ્રોન્મીલન્નવયૌવનં પ્રવિલસદ્વેણુપ્રણાદામૃતમ્।
આપીનસ્તનકુટ્મલાભિરભિતો ગોપીભિરારાધિતં
જ્યોતિશ્ચેતસિ નશ્ચકાસ્તિ જગતામેકાભિરામાદ્ભુતમ્

(શાર્દૂલવિક્રીડિતમ્)
મધુરતરસ્મિતામૃતવિમુગ્ધમુખામ્બુરુહં
મદશિખિપિઞ્છલાઞ્છિતમનોજ્ઞકચપ્રચયમ્।
વિષયવિષામિષગ્રસનગૃધ્નુનિ ચેતસિ મે
વિપુલવિલોચનં કિમપિ ધામ ચકાસ્તિ ચિરમ્

(કોકિલકા)
મુકુલાયમાનનયનામ્બુજં વિભો–
ર્મુરલીનિનાદમકરન્દનિર્ભરમ્।
મુકુરાયમાણમૃદુગણ્ડમણ્ડલં
મુખપઙ્કજં મનસિ મે વિજૃમ્ભતામ્

(મઞ્જુભાષિણી)
કમનીયકિશોરમુગ્ધમૂર્તેઃ
કલવેણુક્વણિતાદૃતાનનેન્દોઃ।
મમ વાચિ વિજૃમ્ભતાં મુરારે–
ર્મધુરિમ્ણઃ કણિકાપિ કાપિ કાપિ

(ઔપચ્છન્દસિકમ્)
મદશિખણ્ડિશિખણ્ડવિભૂષણં
મદનમન્થરમુગ્ધમુખાંબુજમ્।
વ્રજવધૂનયનાઞ્ચલવઞ્ચિતમ્
વિજયતાં મમ વાઙ્મયજીવિતમ્

(દ્રુતવિલમ્બિતમ્)
પલ્લવારુણપાણિપઙ્કજસઙ્ગિવેણુરવાકુલં
ફુલ્લપાટલપાટલીપરિવાદિપાદસરોરુહમ્।
ઉલ્લસન્મધુરાધરદ્યુતિમઞ્જરીસરસાનનં
વલ્લવીકુચકુમ્ભકુઙ્કુમપઙ્કિલં પ્રભુમાશ્રયે

(મત્તકોકિલમ્)
અપાઙ્ગરેખાભિરભઙ્ગુરાભિ–
રનઙ્ગરેખારસરઞ્જિતાભિઃ।
અનુક્ષણં વલ્લવસુન્દરીભિ–
રભ્યર્ચ્યમાનં વિભુમાશ્રયામઃ

(ઉપજાતિ)
હૃદયે મમ હૃદ્યવિભ્રમાણાં
હૃદયં હર્ષવિશાલલોલનેત્રમ્।
તરુણં વ્રજબાલસુન્દરીણાં
તરલં કિઞ્ચન ધામ સંનિધત્તામ્

(ઔપચ્છન્દસિકમ્)
નિખિલભુવનલક્ષ્મીનિત્યલીલાસ્પદાભ્યાં
કમલવિપિનવીથીગર્વસર્વઙ્કષાભ્યામ્।
પ્રણમદભયદાનપ્રૌઢગાઢોદ્ધતાભ્યાં
કિમપિ વહતુ ચેતઃ કૃષ્ણપાદામ્બુજાભ્યામ્

(માલિની)
પ્રણયપરિણતાભ્યાં પ્રાભવાલમ્બનાભ્યાં
પ્રતિપદલલિતાભ્યાં પ્રત્યહં નૂતનાભ્યામ્।
પ્રતિમુહુરધિકાભ્યાં પ્રસ્નુવલ્લોચનાભ્યાં
પ્રભવતુ હૃદયે નઃ પ્રાણનાથઃ કિશોરઃ

(માલિની)
માધુર્યવારિધિમદાન્ધતરઙ્ગભઙ્ગી–
શૃઙ્ગારસંકલિતશીતકિશોરવેષમ્।
આમન્દહાસલલિતાનનચન્દ્રબિમ્બ–
માનન્દસંપ્લવમનુપ્લવતાં મનો મે

(વસન્તતિલકા)
અવ્યાજમઞ્જુલમુખામ્બુજમુગ્ધભાવૈ–
રાસ્વાદ્યમાનનિજવેણુવિનોદનાદમ્।
આક્રીડતામરુણપાદસરોરુહાભ્યા–
માર્દ્રે મદીયહૃદયે ભુવનાર્દ્રમોજઃ

(વસન્તતિલકા)
મણિનૂપુરવાચાલં
વન્દે તચ્ચરણં વિભોઃ।
લલિતાનિ યદીયાનિ
લક્ષ્માણિ વ્રજવીથિષુ

(અનુષ્ટુપ્શ્લોકમ્)
મમ ચેતસિ સ્ફુરતુ વલ્લવીવિભો–
ર્મણિનૂપુરપ્રણયિ મઞ્જુશિઞ્જિતમ્।
કમલાવનેચરકલિન્દકન્યકા–
કલહંસકણ્ઠકલકૂજિતાદૃતમ્

(મઞ્જુભાષિણી)
તરુણારુણકરુણામયવિપુલાયતનયનં
કમલાકુચકલશીભરવિપુલીકૃતપુલકમ્।
મુરલીરવતરલીકૃતમુનિમાનસનલિનં
મમ ખેલતિ મદચેતસિ મધુરાધરમમૃતમ્

(હંસકમ્)
આમુગ્ધમર્ધનયનામ્બુજચુમ્બ્યમાન–
હર્ષાકુલવ્રજવધૂમધુરાનનેન્દોઃ।
આરબ્ધવેણુરવમાદિકિશોરમૂર્તે–
રાવિર્ભવન્તિ મમ ચેતસિ કેઽપિ ભાવાઃ

(વસન્તતિલકા)
કલક્વણિતકઙ્કણં કરનિરુદ્ધપીતામ્બરં
ક્રમપ્રસૃતકુન્તલં ગલિતબર્હભૂષં વિભોઃ।
પુનઃ પ્રસૃતિચાપલં પ્રણયિનીભુજાયન્ત્રિતં
મમ સ્ફુરતુ માનસે મદનકેલિશય્યોત્થિતમ્

(પૃથ્વી)
સ્તોકસ્તોકનિરુધ્યમાનમૃદુલપ્રસ્યન્દિમન્દસ્મિતં
પ્રેમોદ્ભેદનિરર્ગલપ્રસૃમરપ્રવ્યક્તરોમોદ્ગમમ્।
શ્રોતૃશ્રોત્રમનોહરવ્રજવધૂલીલામિથોજલ્પિતં
મિથ્યાસ્વાપમુપાસ્મહે ભગવતઃ ક્રીડાનિમીલદ્દૃશઃ

(શાર્દૂલવિક્રીડિતમ્)
વિચિત્રપત્રાઙ્કુરશાલિબાલા–
સ્તનાન્તરં મૌનિમનોઽન્તરં વા।
અપાસ્ય બૃન્દાવનપાદપાસ્યમ્
ઉપાસ્યમન્યન્ન વિલોકયામઃ

(ઉપેન્દ્રવજ્રા)
સાધ્યં સમૃદ્ધૈરમૃતાયમાનૈ–
રાધ્માયમાનૈર્મુરલીનિનાદૈઃ।
મૂર્ધાભિષિક્તં મધુરાકૃતીનાં
બાલં કદા નામ વિલોકયિષ્યે

(ઇન્દ્રવજ્રા)
શિશિરીકુરુતે કદા નુ નઃ
શિખિપિઞ્છાભરણઃ શિશુર્દૃશોઃ।
યુગલં વિગલન્મધુદ્રવ–
સ્મિતમુદ્રામૃદુના મુખેન્દુના

(વિયોગિની)
કારુણ્યકર્બુરકટાક્ષનિરીક્ષણેન
તારુણ્યસંવલિતશૈશવવૈભવેન।
આપુષ્ણતા ભુવનમદ્ભુતવિભ્રમેણ
શ્રીકૃષ્ણચન્દ્ર શિશિરીકુરુ લોચનં મે

(વસન્તતિલકા)
કદા વા કાલિન્દીકુવલયદલશ્યામલતરાઃ
કટાક્ષા લક્ષ્યન્તે કિમપિ કરુણાવીચિનિચિતાઃ।
કદા વા કંદર્પપ્રતિભટજટાચન્દ્રશિશિરાઃ
કિમપ્યન્તસ્તોષં દદતિ મુરલીકેલિનિનદાઃ

(શિખરિણી)
અધીરમાલોકિતમાર્દ્રજલ્પિતં
ગતં ચ ગમ્ભીરવિલાસમન્થરમ્।
અમન્દમાલિઙ્ગિતમાકુલોન્મદ–
સ્મિતં ચ તે નાથ વદન્તિ ગોપિકાઃ

(વંશસ્થવિલા)
અસ્તોકસ્મિતભરમાયતાયતાક્ષં
નિઃશેષસ્તનમૃદિતં વ્રજાઙ્ગનાભિઃ।
નિઃસીમસ્તબકિતનીલકાન્તિધારં
દૃશ્યાસં ત્રિભુવનસુન્દરં મહસ્તે

(પ્રહર્ષિણી)
મયિ પ્રસાદં મધુરૈઃ કટાક્ષૈ–
ર્વંશીનિનાદાનુચરૈર્વિધેહિ।
ત્વયિ પ્રસન્ને કિમિહાપરૈર્ન–
સ્ત્વય્યપ્રસન્ને કિમિહાપરૈર્નઃ

(ઉપજાતિ)
નિબદ્ધમુગ્ધાઞ્જલિરેષ યાચે
નીરન્ધ્રદૈન્યોન્નતમુક્તકણ્ઠમ્।
દયામ્બુધે દેવ ભવત્કટાક્ષ–
દાક્ષિણ્યલેશેન સકૃન્નિષિઞ્ચ

(ઉપજાતિ)
પિઞ્છાવતંસરચનોચિતકેશપાશે
પીનસ્તનીનયનપઙ્કજપૂજનીયે।
ચન્દ્રારવિન્દવિજયોદ્યતવક્ત્રબિમ્બે
ચાપલ્યમેતિ નયનં તવ શૈશવે નઃ

(વસન્તતિલકા)
ત્વચ્છૈશવં ત્રિભુવનાદ્ભુતમિત્યવૈમિ
યચ્ચાપલં ચ મમ વાગવિવાદગમ્યમ્।
તત્કિં કરોમિ વિરણન્મુરલીવિલાસ–
મુગ્ધં મુખામ્બુજમુદીક્ષિતુમીક્ષણાભ્યામ્

(વસન્તતિલકા)
પર્યાચિતામૃતરસાનિ પદાર્થભઙ્ગી–
ફલ્ગૂનિ વલ્ગિતવિશાલવિલોચનાનિ।
બાલ્યાધિકાનિ મદવલ્લવભાવિતાનિ
ભાવે લુઠન્તિ સુદૃશાં તવ જલ્પિતાનિ

(વસન્તતિલકા)
પુનઃ પ્રસન્નેન મુખેન્દુતેજસા
પુરોઽવતીર્ણસ્ય કૃપામહામ્બુધેઃ।
તદેવ લીલામુરલીરવામૃતં
સમાધિવિઘ્નાય કદા નુ મે ભવેત્

(વંશસ્થવિલા)
ભાવેન મુગ્ધચપલેન વિલોકનેન
મન્માનસે કિમપિ ચાપલમુદ્વહન્તમ્।
લોલેન લોચનરસાયનમીક્ષણેન
લીલાકિશોરમુપગૂહિતુમુત્સુકાઃ સ્મઃ

(વસન્તતિલકા)
અધીરબિમ્બાધરવિભ્રમેણ
હર્ષાર્દ્રવેણુસ્વરસંપદા ચ।
અનેન કેનાપિ મનોહરેણ
હા હન્ત હા હન્ત મનો ધુનોતિ

(ઉપજાતિ)
યાવન્ન મે નિખિલમર્મદૃઢાભિઘાત–
નિઃસંધિબન્ધનમુદેતિ નવોપતાપઃ।
તાવદ્વિભો ભવતુ તાવકવક્ત્રચન્દ્ર–
ચન્દ્રાતપદ્વિગુણિતા મમ ચિત્તધારા

(વસન્તતિલકા)
યાવન્ન મે નરદશા દશમી દૃશોઽપિ
રન્ધ્રાદુદેતિ તિમિરીકૃતસર્વભાવા।
લાવણ્યકેલિસદનં તવ તાવદેતુ
લક્ષ્મ્યા સમુત્ક્વણિતવેણુ મુખેન્દુબિમ્બમ્

(વસન્તતિલકા)
આલોલલોચનવિલોકિતકેલિધારા–
નીરાજિતાગ્રસરણેઃ કરુણામ્બુરાશેઃ।
આર્દ્રાણિ વેણુનિનદૈઃ પ્રતિનાદપૂરૈ–
રાકર્ણયામિ મણિનૂપુરશિઞ્જિતાનિ

(વસન્તતિલકા)
હે દેવ હે દયિત હે જગદેકબન્ધો
હે કૃષ્ણ હે ચપલ હે કરુણૈકસિન્ધો।
હે નાથ હે રમણ હે નયનાભિરામ
હા હા કદા નુ ભવિતાસિ પદં દૃશોર્મે

(વસન્તતિલકા)
અમૂન્યધન્યાનિ દિનાન્તરાણિ
હરે ત્વદાલોકનમન્તરેણ।
અનાથબન્ધો કરુણૈકસિન્ધો
હા હન્ત હા હન્ત કથં નયામિ

(ઉપજાતિ)
કિમિહ શૃણુમઃ કસ્ય બ્રૂમઃ કથં કૃતમાશયા
કથયત કથં ધન્યામન્યામહો હૃદયેશયમ્।
મધુરમધુરસ્મેરાકારે મનોનયનોત્સવે
કૃપણકૃપણા તૃષ્ણા કૃષ્ણે ચિરં બત લમ્બતે

(હરિણી)
આભ્યાં વિલોચનાભ્યા–
મમ્બુજદલલલિતલોચનં બાલમ્।
દ્વાભ્યામપિ પરિરબ્ધું
દૂરે મમ હન્ત દૈવસમાગ્રી

(ગીતિ)
અશ્રાન્તસ્મિતમરુણારુણાધરોષ્ઠં
હર્ષાર્દ્રદ્વિગુણમનોજ્ઞવેણુગીતમ્।
વિભ્રામ્યદ્વિપુલવિલોચનાર્ધમુગ્ધં
વીક્ષિષ્યે તવ વદનામ્બુજં કદા નુ

(પ્રહર્ષિણી)
લીલાયતાભ્યાં રસશીતલાભ્યાં
નીલારુણાભ્યાં નયનામ્બુજાભ્યામ્।
આલોકયેદદ્ભુતવિભ્રમાભ્યાં
કાલે કદા કારુણિકઃ કિશોરઃ

(ઇન્દ્રવજ્રા)
બહુલચિકુરભારં બદ્ધપિઞ્છાવતંસં
ચપલચપલનેત્રં ચારુબિમ્બાધરોષ્ઠમ્।
મધુરમૃદુલહાસં મન્દરોદારલીલં
મૃગયતિ નયનં મે મુગ્ધવેષં મુરારેઃ

(માલિની)
બહુલજલદચ્છાયાચોરં વિલાસભરાલસં
મદશિખિશિખાલીલોત્તંસં મનોજ્ઞમુખામ્બુજમ્।
કમપિ કમલાપાઙ્ગોદગ્રપ્રસન્નજગજ્જડં
મધુરિમપરીપાકોદ્રેકં વયં મૃગયામહે

(હરિણી)
પરામૃશ્યં દૂરે પરિષદિ મુનીનાં વ્રજવધૂ–
દૃશાં દૃશ્યં શશ્વત્ત્રિભુવનમનોહારિવપુષમ્।
અનામૃશ્યં વાચામનિદમુદયાનામપિ કદા
દરીદૃશ્યે દેવં દરદલિતનીલોત્પલરુચિમ્

(શિખરિણી)
લીલાનનામ્બુજમધીરમુદીક્ષમાણં
નર્માણિ વેણુવિવરેષુ નિવેશયન્તમ્।
ડોલાયમાનનયનં નયનાભિરામં
વન્દે કદા નુ દયિતં વ્યતિલોકયિષ્યે

(વસન્તતિલકા)
લગ્નં મુહુર્મનસિ લમ્પટસંપ્રદાયિ–
લેખાવલેખિનિ રસજ્ઞમનોજ્ઞવેષમ્।
લજ્જન્મૃદુસ્મિતમધુસ્નપિતાધરાંશુ–
રાકેન્દુલાલિતમુખેન્દુ મુકુન્દબાલ્યમ્

(વસન્તતિલકા)
અહિમકરકરનિકરમૃદુમુદિતલક્ષ્મી–
સરસતરસરસિરુહસરસદૃશિ દેવે।
વ્રજયુવતિરતિકલહવિજયિનિજલીલા–
મદમુદિતવદનશશિમધુરિમણિ લીયે

(શશિકલા)
કરકમલદલદલિતલલિતતરવંશી–
કલનિનદગલદમૃતઘનસરસિ દેવે।
સહજરસભરભરિતદરહસિતવીથી–
સતતવહદધરમણિમધુરિમણિ લીયે

(શશિકલા)
કુસુમશરશરસમરકુપિતમદગોપી–
કુચકલશઘુસૃણરસલસદુરસિ દેવે।
મદલુલિતમૃદુહસિતમુષિતશશિશોભા–
મુહુરધિકમુખકમલમધુરિમણિ લીયે

(શશિકલા)
આનમ્રામસિતભ્રુવોરુપચિતામક્ષીણપક્ષ્માઙ્કુરે–
ષ્વાલોલામનુરાગિણોર્નયનયોરાર્દ્રાં મૃદૌ જલ્પિતે।
આતામ્રામધરામૃતે મદકલામમ્લાનવંશીસ્વને–
ષ્વાશાસ્તે મમ લોચનં વ્રજશિશોર્મૂર્તિં જગન્મોહિનીમ્

(શાર્દૂલવિક્રીડિતમ્)
તત્કૈશોરં તચ્ચ વક્ત્રારવિન્દં
તત્કારુણ્યં તે ચ લીલાકટાક્ષાઃ।
તત્સૌન્દર્યં સા ચ મન્દસ્મિતશ્રીઃ
સત્યં સત્યં દુર્લભં દૈવતેષુ

(શાલિની)
વિશ્વોપપ્લવશમનૈકબદ્ધદીક્ષં
વિશ્વાસસ્તબકિતચેતસાં જનાનામ્।
પશ્યામઃ પ્રતિનવકાન્તિકન્દલાર્દ્રં
પશ્યામઃ પથિ પથિ શૈશવં મુરારેઃ

(પ્રહર્ષિણી)
મૌલિશ્ચન્દ્રકભૂષણો મરકતસ્તમ્ભાભિરામં વપુ–
ર્વક્ત્રં ચિત્રવિમુગ્ધહાસમધુરં બાલે વિલોલે દૃશૌ।
વાચઃ શૈશવશીતલા મદગજશ્લાઘ્યા વિલાસસ્થિતિ–
ર્મન્દંમન્દમયે ક એષ મથુરાવીથીં મિથો ગાહતે॥ *
(શાર્દૂલવિક્રીડિતમ્)
પાદૌ પાદવિનિર્જિતામ્બુજવનૌ પદ્માલયાલઙ્કૃતૌ
પાણી વેણુવિનોદનપ્રણયિનૌ પર્યાપ્તશિલ્પશ્રિયૌ।
બાહૂ દોહદભાજનં મૃગદૃશાં માધુર્યધારા ગિરો
વક્ત્રં વાગ્વિભવાતિલઙ્ઘિતમહો બાલં કિમેતન્મહઃ

(શાર્દૂલવિક્રીડિતમ્)
બર્હં નામ વિભૂષણં બહુમતં વેષાય શેષૈરલં
વક્ત્રં દ્વિત્રિવિશેષકાન્તિલહરીવિન્યાસધન્યાધરમ્।
શીલૈરલ્પધિયામગમ્યવિભવૈઃ શૃઙ્ગારભઙ્ગીમયં
વક્ત્રં ચિત્રમહો વિચિત્રિતમહો ચિત્રં વિચિત્રં મહઃ

(શાર્દૂલવિક્રીડિતમ્)
અગ્રે સમગ્રયતિ કામપિ કેલિલક્ષ્મી–
મન્યાસુ દિક્ષ્વપિ વિલોચનમેવ સાક્ષી।
હા હન્ત હસ્તપથદૂરમહો કિમેત–
દાસીત્ કિશોરમયમમ્બ જગત્ત્રયં મે

(વસન્તતિલકા)
ચિકુરં બહુલં વિરલં ભ્રમરં
મૃદુલં વચનં વિપુલં નયનમ્।
અધરં મધુરં લલિતં વદનં
ચપલં ચરિતં ચ કદાનુભવે

(તોટકમ્)
પરિપાલય નઃ કૃપાલયે–
ત્યસકૃજ્જલ્પિતમાત્મબાન્ધવઃ।
મુરલીમૃદુલસ્વનાન્તરે
વિભુરાકર્ણયિતા કદા નુ નઃ

(વિયોગિની)
કદા નુ કસ્યાં નુ વિપદ્દશાયાં
કૈશોરગન્ધિઃ કરુણામ્બુધિર્નઃ।
વિલોચનાભ્યાં વિપુલાયતાભ્યાં
વ્યાલોકયિષ્યન્વિષયીકરોતિ

(ઉપજાતિ)
મધુરમધરબિમ્બે મઞ્જુલં મન્દહાસે
શિશિરમમૃતનાદે શીતલં દૃષ્ટિપાતે।
વિપુલમરુણનેત્રે વિશ્રુતં વેણુનાદે
મરકતમણિનીલં બાલમાલોકયે નુ

(માલિની)
માધુર્યાદપિ મધુરં
મન્મથતાતસ્ય કિમપિ કૈશોરમ્।
ચાપલ્યાદપિ ચપલં
ચેતો મમ હરતિ કિં કુર્મઃ

(આર્યા)
વક્ષઃસ્થલે ચ વિપુલં નયનોત્પલે ચ
મન્દસ્મિતે ચ મૃદુલં મદજલ્પિતે ચ।
બિમ્બાધરે ચ મધુરં મુરલીરવે ચ
બાલં વિલાસનિધિમાકલયે કદા નુ

(વસન્તતિલકા)
મારઃ સ્વયં નુ મધુરદ્યુતિમણ્ડલં નુ
માધુર્યમેવ નુ મનોનયનામૃતં નુ।
વાણીમૃજા નુ મમ જીવિતવલ્લભો નુ
બાલોઽયમભ્યુદયતે મમ લોચનાય

(વસન્તતિલકા)
આર્દ્રાવલોકિતધરાપરિણદ્ધનેત્ર–
માવિષ્કૃતસ્મિતસુધામધુરાધરોષ્ઠમ્।
આદ્યં પુમાંસમવતંસિતબર્હિબર્હ–
માલોકયન્તિ કૃતિનઃ કૃતપુણ્યપુઞ્જાઃ

(વસન્તતિલકા)
બાલોઽયમાલોલવિલોચનેન
વક્ત્રેણ ચિત્રીકૃતદિઙ્મુખેન।
વેષેણ ઘોષોચિતભૂષણેન
મુગ્ધેન દુગ્ધે નયનોત્સવં નઃ

(ઇન્દ્રવજ્રા)
આન્દોલિતાગ્રભુજમાકુલનેત્રલીલ–
માર્દ્રસ્મિતં ચ વદનામ્બુજચન્દ્રબિમ્બમ્।
શિઞ્જાનભૂષણશતં શિખિપિઞ્છમૌલિં
શીતં વિલોચનરસાયનમભ્યુપૈતિ

(વસન્તતિલકા)
શિશુપાલબાલપરિષદ્વિભૂષણં
શિશુરેષ શીતલવિલોલલોચનમ્।
મૃદુલસ્મિતાર્દ્રવદનેન્દુસંપદા
મદયન્મદીયહૃદયં વિગાહતે

(મઞ્જુભાષિણી)
કિમિદમધરવીથીકૢપ્તવંશીનિનાદં
કિરતિ નયનયોર્નઃ કામપિ પ્રેમધારામ્।
તદિદમમરવીથીદુર્લભં વલ્લભં ન–
સ્ત્રિભુવનકમનીયં દૈવતં જીવિતં ચ

(માલિની)
તદિદમુપનતં તમાલનીલં
તરલવિલોચનતારકાભિરામમ્।
મુદિતમુદિતવક્ત્રચન્દ્રબિમ્બં
મુખરિતવેણુવિલાસજીવિતં મે

(પુષ્પિતાગ્રા)
ચાપલ્યસીમ ચપલાનુભવૈકસીમ
ચાતુર્યસીમ ચતુરાનનશિલ્પસીમ।
સૌરભ્યસીમ સકલાદ્ભુતકેલિસીમ
સૌભાગ્યસીમ તદિદં વ્રજભાગ્યસીમ

(વસન્તતિલકા)
માધુર્યેણ દ્વિગુણશિશિરં વક્ત્રચન્દ્રં વહન્તી
વંશીવીથીવિગલદમૃતસ્રોતસા સેચયન્તી।
મદ્વાણીનાં વિહરણપદં મત્તસૌભાગ્યભાજાં
મત્પુણ્યાનાં પરિણતિરહો નેત્રયોઃ સંનિધત્તે

(મન્દાક્રાન્તા)
તેજસેઽસ્તુ નમો ધેનુ–
પાલિને લોકપાલિને।
રાધાપયોધરોત્સઙ્ગ–
શાયિને શેષશાયિને

(અનુષ્ટુપ્શ્લોકમ્)
ધેનુપાલદયિતાસ્તનસ્થલી–
ધન્યકુઙ્કુમસનાથકાન્તયે।
વેણુગીતગતિમૂલવેધસે
તેજસે તદિદમ્ૐ નમો નમઃ

(રથોદ્ધતા)
મૃદુક્વણન્નૂપુરમન્થરેણ
બાલેન પાદામ્બુજપલ્લવેન।
અનુક્વણન્મઞ્જુલવેણુગીત–
માયાતિ મે જીવિતમાત્તકેલિ

(ઉપજાતિ)
સોઽયં વિલાસમુરલીનિનદામૃતેન
સિઞ્ચન્નુદઞ્ચિતમિદં મમ કર્ણયુગ્મમ્।
આયાતિ મે નયનબન્ધુરનન્યબન્ધુ–
રાનન્દકન્દલિતકેલિકટાક્ષલક્ષઃ

(વસન્તતિલકા)
દૂરાદ્વિલોકયતિ વારણખેલગામી
ધારાકટાક્ષભરિતેન વિલોચનેન।
આરાદુપૈતિ હૃદયંગમવેણુનાદ–
વેણીદુઘેન દશનાવરણેન દેવઃ

(વસન્તતિલકા)
ત્રિભુવનસરસાભ્યાં દીપ્તભૂષાપદાભ્યાં
દૃશિ દૃશિ શિશિરાભ્યાં દિવ્યલીલાકુલાભ્યામ્।
અશરણશરણાભ્યામદ્ભુતાભ્યાં પદાભ્યા–
મયમયમનુકૂજદ્વેણુરાયાતિ દેવઃ

(માલિની)
સોઽયં મુનીન્દ્રજનમાનસતાપહારી
સોઽયં મદવ્રજવધૂવસનાપહારી।
સોઽયં તૃતીયભુવનેશ્વરદર્પહારી
સોઽયં મદીયહૃદયામ્બુજતાપહારી

(વસન્તતિલકા)
સર્વજ્ઞત્વે ચ મૌગ્ધ્યે ચ
સાર્વભૌમમિદં મહઃ।
નિર્વિશન્નયનં હન્ત
નિર્વાણપદમશ્નુતે

(અનુષ્ટુપ્શ્લોકમ્)
પુષ્ણાનમેતત્પુનરુક્તશોભ–
મુષ્ણેતરાંશોરુદયન્મુખેન્દોઃ।
તૃષ્ણામ્બુરાશિં ત્રિગુણીકરોતિ
કૃષ્ણાહ્વયં કિંચન જીવિતં મે

(ઇન્દ્રવજ્રા)
તદેતદાતામ્રવિલોચનશ્રી–
સંભાવિતાશેષવિનમ્રવર્ગમ્।
મુહુર્મુરારેર્મધુરાધરોષ્ઠં
મુખામ્બુજં ચુમ્બતિ માનસં મે

(ઉપજાતિ)
કરૌ શરદુદઞ્ચિતામ્બુજવિલાસશિક્ષાગુરૂ
પદૌ વિબુધપાદપપ્રથમપલ્લવોલ્લઙ્ઘિનૌ।
દૃશૌ દલિતદુર્મદત્રિભુવનોપમાનશ્રિયૌ
વિલોકય વિલોચનામૃતમહો મહચ્છૈશવમ્

(પૃથ્વી)
આચિન્વાનમહન્યહન્યહનિ સાકારાન્વિહારક્રમા–
નારુન્ધાનમરુન્ધતીહૃદયમપ્યાર્દ્રસ્મિતાસ્યશ્રિયા।
આતન્વાનમનન્યજન્મનયનશ્લાઘ્યામનર્ઘ્યાં દશા–
માનન્દં વ્રજસુન્દરીસ્તનતટીસામ્રાજ્યમુજ્જૃમ્ભતે

(શાર્દૂલવિક્રીડિતમ્)
તમુચ્છ્વસિતયૌવનં તરલશૈશવાલંકૃતં
મદચ્છુરિતલોચનં મદવિમુગ્ધહાસામૃતમ્।
પ્રતિક્ષણવિલોભનં પ્રણયપીતવંશીમુખં
જગત્ત્રયવિમોહનં જયતિ મામકં જીવિતમ્

(પૃથ્વી)
ચિત્રં તદેતચ્ચરણારવિન્દં
ચિત્રં તદેતન્નયનારવિન્દમ્।
ચિત્રં તદેતદ્વદનારવિન્દં
ચિત્રં તદેતત્પુનરમ્બ ચિત્રમ્

(ઇન્દ્રવજ્રા)
અખિલભુવનૈકભૂષણ–
મધિભૂષિતજલધિદુહિતૃકુચકુમ્ભમ્।
વ્રજયુવતીહારવલ્લી–
મરકતનાયકમહામણિં વન્દે

(ગીતિ)
કાન્તાકચગ્રહણવિગ્રહલબ્ધલક્ષ્મી–
ખણ્ડાઙ્ગરાગલવરઞ્જિતમઞ્જુલશ્રીઃ।
ગણ્ડસ્થલીમુકુરમણ્ડલખેલમાન–
ઘર્માઙ્કુરઃ કિમપિ ખેલતિ કૃષ્ણદેવઃ॥ *
(વસન્તતિલકા)
મધુરં મધુરં વપુરસ્ય વિભો–
ર્મધુરં મધુરં વદનં મધુરમ્।
મધુગન્ધિમૃદુસ્મિતમેતદહો
મધુરં મધુરં મધુરં મધુરમ્

(તોટકમ્)
શૃઙ્ગારરસસર્વસ્વં
શિખિપિઞ્છવિભૂષણમ્।
અઙ્ગીકૃતનરાકાર–
માશ્રયે ભુવનાશ્રયમ્

(અનુષ્ટુપ્શ્લોકમ્)
નાદ્યાપિ પશ્યતિ કદાચન દર્શનેન
ચિત્તે નવોપનિષદા સુદૃશાં સહસ્રમ્।
સ ત્વં ચિરં નયનયોરનયોઃ પદવ્યાં
સ્વામિન્કયા નુ કૃપયા મમ સંનિધત્સે

(વસન્તતિલકા)
કેયં કાન્તિઃ કેશવ ત્વન્મુખેન્દોઃ
કોઽયં વેષઃ કાપિ વાચામભૂમિઃ।
સેયં સેયં સ્વાદુતા મઞ્જુલશ્રીર્
ભૂયો ભૂયો ભૂયસસ્તન્નમામિ

(શાલિની)
વદનેન્દુવિનિર્જિતઃ શશી
દશધા દેવ પદં પ્રપદ્ય તે।
અધિકાં શ્રિયમશ્નુતેતરાં
તવ તારુણ્યવિજૃમ્ભિતં કિયત્

(વિયોગિની)
તત્ત્વન્મુખં કથમિવાબ્જસમાનકક્ષ્યં
વાઙ્માધુરીબહુલપર્વકલાસમૃદ્ધમ્।
તત્કિં બ્રુવે કિમપરં ભુવનૈકકાન્તં
યસ્ય ત્વદાનનસમા સુષમા સદા સ્યાત્

(વસન્તતિલકા)
શુશ્રૂષસે શૃણુ યદિ પ્રણિધાનપૂર્વં
પૂર્વૈરપૂર્વકવિભિર્ન કટાક્ષિતં યત્।
નીરાજનક્રમધુરાં ભવદાનનેન્દો–
ર્નિર્વ્યાજમર્હતિ ચિરાય શશિપ્રદીપઃ॥ *
(વસન્તતિલકા)
અખણ્ડનિર્વાણરસપ્રવાહ–
વિખણ્ડિતાશેષરસાન્તરાણિ।
અયન્ત્રિતોદ્વાન્તસુધાર્ણવાનિ
જયન્તિ શીતાનિ તવ સ્મિતાનિ

(ઉપેન્દ્રવજ્રા)
કામં સન્તુ સહસ્રશઃ કતિપયે સારસ્યધૌરેયકાઃ
કામં વા કમનીયતાપરિણતિસ્વારાજ્યબદ્ધવ્રતાઃ।
નૈવૈતૈર્વિવદામહે ન ચ વયં દેવ પ્રિયં બ્રૂમહે
યત્સત્યં રમણીયતાપરિણતિસ્ત્વય્યેવ પારં ગતા

(શાર્દૂલવિક્રીડિતમ્)
ગલદ્વ્રીડા લોલા મદનવનિતા ગોપવનિતા
મધુસ્ફીતં ગીતં કિમપિ મધુરા ચાપલધુરા।
સમુજ્જૃમ્ભો ગુમ્ભો મધુરિમકિરાં માદૃશગિરાં
ત્વયિ સ્થાને જાતે દધતિ ચપલં જન્મ સફલમ્

(શિખરિણી)
ભુવનં ભવનં વિલાસિની શ્રી–
સ્તનયસ્તામરસાસનઃ સ્મરશ્ચ।
પરિચારપરમ્પરાઃ સુરેન્દ્રા–
સ્તદપિ ત્વચ્ચરિતં વિભો વિચિત્રમ્॥ *
(ઔપચ્છન્દસિકમ્)
દેવસ્ત્રિલોકીસૌભાગ્ય–
કસ્તૂરીમકરાઙ્કુરઃ।
જીયાદ્વ્રજાઙ્ગનાનઙ્ગ–
કેલિલાલિતવિભ્રમઃ॥ *
(અનુષ્ટુપ્શ્લોકમ્)
પ્રેમદં ચ મે કામદં ચ મે
વેદનં ચ મે વૈભવં ચ મે।
જીવનં ચ મે જીવિતં ચ મે
દૈવતં ચ મે દેવ નાપરમ્

(અચ્યુતમ્)
માધુર્યેણ વિજૃમ્ભન્તાં
વાચો નસ્તવ વૈભવે।
ચાપલ્યેન વિવર્ધન્તાં
ચિન્તા નસ્તવ શૈશવે

(અનુષ્ટુપ્શ્લોકમ્)
યાનિ ત્વચ્ચરિતામૃતાનિ રસનાલેહ્યાનિ ધન્યાત્મનાં
યે વા શૈશવચાપલવ્યતિકરા રાધાપરાધોન્મુખાઃ।
યા વા ભાવિતવેણુગીતગતયો લીલામુખામ્ભોરુહે
ધારાવાહિકયા વહન્તુ હૃદયે તાન્યેવ તાન્યેવ મે

(શાર્દૂલવિક્રીડિતમ્)
ભક્તિસ્ત્વયિ સ્થિરતયા ભગવન્યદિ સ્યા–
દ્દૈવેન નઃ ફલિતદિવ્યકિશોરવેષે।
મુક્તિઃ સ્વયં મુકુલિતાઞ્જલિ સેવતેઽસ્મા–
ન્ધર્માર્થકામગતયઃ સમયપ્રતીક્ષાઃ

(વસન્તતિલકા)
જય જય જય દેવ દેવ દેવ
શ્રવણમનોનયનામૃતાવતાર।
જય જય જય દેવ દેવ દેવ
ત્રિભુવનમઙ્ગલદિવ્યનામધેય

(પુષ્પિતાગ્રા)
તુભ્યં નિર્ભરહર્ષવર્ષવિવશાવેશસ્ફુટાવિર્ભવ–
દ્ભૂયશ્ચાપલભૂષિતેષુ સુકૃતાં ભાવેષુ નિર્ભાસતે।
શ્રીમદ્ગોકુલમણ્ડનાય મહતે વાચાં વિદૂરાયતે
માધુર્યૈકરસાર્ણવાય મહસે કસ્મૈચિદસ્મૈ નમઃ

(શાર્દૂલવિક્રીડિતમ્)
ઈશાનદેવચરણાભરણેન નીવી–
દામોદરસ્થિરયશઃસ્તબકોદ્ગમેન।
લીલાશુકેન રચિતં તવ દેવ કૃષ્ણ–
કર્ણામૃતં વહતુ કલ્પશતાન્તરેઽપિ

(વસન્તતિલકા)
ધન્યાનાં સરસાનુલાપસરણીસૌભાગ્યમભ્યસ્યતાં
કર્ણાનાં વિવરેષુ કામપિ સુધાવૃષ્ટિં દુહાનં મુહુઃ।
વશ્યાનાં સુદૃશાં મનોનયનયોર્મગ્નસ્ય દેવસ્ય નઃ
કર્ણાનાં વચસાં વિજૃમ્ભિતમહો કૃષ્ણસ્ય કર્ણામૃતમ્

(શાર્દૂલવિક્રીડિતમ્)
અનુગ્રહદ્વિગુણવિશાલલોચનૈ–
રનુસ્વનદ્વેણુગલદ્રવામૃતૈઃ।
યતો યતઃ પ્રસરતિ મે વિલોચનં
તતસ્તતઃ સ્ફુરતુ તવૈવ વૈભવમ્

(રુચિરા)
ઇતિ શ્રીકૃષ્ણકર્ણામૃતે પ્રથમાશ્વાસઃ સમાપ્તઃ॥
દ્વિતીયાશ્વાસઃ
અભિનવનવનીતસ્નિગ્ધમાપીતદુગ્ધં
દધિકણપરિદિગ્ધં મુગ્ધમઙ્ગં મુરારેઃ।
દિશતુ ભુવનકૃચ્છ્રચ્છેદિ તાપિઞ્છગુચ્છ‍–
ચ્છવિ નવશિખિપિઞ્છાલાઞ્છિતં વાઞ્છિતં નઃ

(માલિની)
યાં દૃષ્ટ્વા યમુનાં પિપાસુરનિશં વ્યૂહો ગવાં ગાહતે
વિદ્યુત્વાનિતિ નીલકણ્ઠનિવહો યાં દ્રષ્ટુમુત્કણ્ઠતે।
ઉત્તંસાય તમાલપલ્લવમિતિ ચ્છિન્દન્તિ યાં ગોપિકાઃ
કાન્તિઃ કાલિયશાસનસ્ય વપુષઃ સા પાવની પાતુ નઃ

(શાર્દૂલવિક્રીડિતમ્)
દેવઃ પાયાત્પયસિ વિમલે યામુને મજ્જતીનાં
યાચન્તીનામનુનયપદૈર્વઞ્ચિતાન્યંશુકાનિ।
લજ્જાલોલૈરલસવિલસૈરુન્મિષત્પઞ્ચબાણૈ‍–
ર્ગોપસ્ત્રીણાં નયનકુસુમૈરર્ચિતઃ કેશવો નઃ

(મન્દાક્રાન્તા)
માતર્નાતઃપરમનુચિતં યત્ખલાનાં પુરસ્તા‍–
દસ્તાશઙ્કં જઠરપિઠરીપૂર્તયે નર્તિતાસિ।
તત્ક્ષન્તવ્યં સહજસરલે વત્સલે વાણિ કુર્યાં
પ્રાયશ્ચિત્તં ગુણગણનયા ગોપવેષસ્ય વિષ્ણોઃ

(મન્દાક્રાન્તા)
અઙ્ગુલ્યગ્રૈરરુણકિરણૈર્મુક્તસંરુદ્ધરન્ધ્રં
વારં વારં વદનમરુતા વેણુમાપૂરયન્તમ્।
વ્યત્યસ્તાઙ્ઘ્રિં વિકચકમલચ્છાયવિસ્તારનેત્રં
વન્દે બૃન્દાવનસુચરિતં નન્દગોપાલસૂનુમ્

(મન્દાક્રાન્તા)
મન્દં મન્દં મધુરનિનદૈર્વેણુમાપૂરયન્તં
બૃન્દં બૃન્દાવનભુવિ ગવાં ચારયન્તં ચરન્તમ્।
છન્દોભાગે શતમખમુખધ્વંસિનાં દાનવાનાં
હન્તારં તં કથય રસને ગોપકન્યાભુજઙ્ગમ્

(મન્દાક્રાન્તા)
વેણીમૂલે વિરચિતઘનશ્યામપિઞ્છાવચૂડો
વિદ્યુલ્લેખાવલયિત ઇવ સ્નિગ્ધપીતામ્બરેણ।
મામાલિઙ્ગન્મરકતમણિસ્તમ્ભગમ્ભીરબાહુઃ
સ્વપ્ને દૃષ્ટસ્તરુણતુલસીભૂષણો નીલમેઘઃ

(મન્દાક્રાન્તા)
કૃષ્ણે હૃત્વા સિચયનિચયં કૂલકુઞ્જાધિરૂઢે
મુગ્ધા કાચિન્મુહુરનુનયૈઃ કિં ન્વિતિ વ્યાહરન્તી।
સભ્રૂભઙ્ગં સદરહસિતં સત્રપં સાનુરાગં
છાયાશૌરેઃ કરતલગતાન્યમ્બરાણ્યાચકર્ષ

(મન્દાક્રાન્તા)
અપિ જનુષિ પરસ્મિન્નાત્તપુણ્યો ભવેયં
તટભુવિ યમુનાયાસ્તાદૃશો વંશનાલઃ।
અનુભવતિ યદેષ શ્રીમદાભીરસૂનો–
রરધરમણિસમીપન્યાસધન્યામવસ્થામ્

(માલિની)
અયિ પરિચિનુ ચેતઃ પ્રાતરઅમ્ભોજનેત્રં
કબરકલિતચઞ્ચત્પિઞ્છદામાભિરામમ્।
બલભિદુપલનીલં વલ્લવીભાગધેયં
નિખિલનિગમવલ્લીમૂલકન્દં મુકુન્દમ્

(માલિની)
અયિ મુરલિ મુકુન્દસ્મેરવક્ત્રારવિન્દ‍–
શ્વસનમધુરસજ્ઞે ત્વાં પ્રણમ્યાદ્ય યાચે।
અધરમણિસમીપં પ્રાપ્તવત્યાં ભવત્યાં
કથય રહસિ કર્ણે મદ્દશાં નન્દસૂનોઃ

(માલિની)
સજલજલદનીલં વલ્લવીકેલિલોલં
શ્રિતસુરતરુમૂલં વિદ્યુદુલ્લાસિચેલમ્।
નતસુરમુનિજાલં સન્મનોબિમ્બલીલં
સુરરિપુકુલકાલં નૌમિ ગોપાલબાલમ્

(માલિની)
અધરબિમ્બવિડમ્બિતવિદ્રુમં
મધુરવેણુનિનાદવિનોદિનમ્।
કમલકોમલકમ્રમુખામ્બુજં
કમપિ ગોપકુમારમુપાસ્મહે

(દ્રુતવિલમ્બિતમ્)
અધરે વિનિવેશ્ય વંશનાલં
વિવરાણ્યસ્ય સલીલમઙ્ગુલીભિઃ।
મુહુરન્તરયન્મુહુર્વિવૃણ્વ‍–
ન્મધુરં ગાયતિ માધવો વનાન્તે

(ઔપચ્છન્દસિકમ્)
વદને નવનીતગન્ધવાહં
વચને તસ્કરચાતુરીધુરીણમ્।
નયને કુહનાશ્રુમાશ્રયેથા‍–
શ્ચરણે કોમલતાણ્ડવં કુમારમ્

(ઔપચ્છન્દસિકમ્)
અમુના કિલ ગોપગોપનાર્થં
યમુનારોધસિ નન્દનન્દનેન।
દમુના વનસમ્ભવઃ પપે નઃ
કિમુ નાસૌ શરણાર્થિનાં શરણ્યઃ

(ઔપચ્છન્દસિકમ્)
જગદાદરણીયજારભાવં
જલજાપત્યવચોવિચારગમ્યમ્।
તનુતાં તનુતાં શિવેતરાણાં
સુરનાથોપલસુન્દરં મહો નઃ

(ઔપચ્છન્દસિકમ્)
સા કાપિ સર્વજગતામભિરામસીમા
કામાય નો ભવતુ ગોપકિશોરમૂર્તિઃ।
યા શેખરે શ્રુતિગિરાં હૃદિ યોગભાજાં
પાદામ્બુજે ચ સુલભા વ્રજસુન્દરીણામ્

(વસન્તતિલકા)
અત્યન્તબાલમતસીકુસુમપ્રકાશં
દિગ્વાસસં કનકભૂષણભૂષિતાઙ્ગમ્।
વિસ્રસ્તકેશમરુણાધરમાયતાક્ષં
કૃષ્ણં નમામિ શિરસા વસુદેવસૂનુમ્

(વસન્તતિલકા)
હસ્તાઙ્ઘ્રિનિક્વણિતકઙ્કણકિઙ્કિણીકં
મધ્યેનિતમ્બમવલમ્બિતહેમસૂત્રમ્।
મુક્તાકલાપમુકુલીકૃતકાકપક્ષં
વન્દામહે વ્રજવરં વસુદેવભાગ્યમ્

(વસન્તતિલકા)
બૃન્દાવનદ્રુમતલેષુ ગવાં ગણેષુ
વેદાવસાનસમયેષુ ચ દૃશ્યતે યત્।
તદ્વેણુનાદનપરં શિખિપિઞ્છચૂડં
બ્રહ્મ સ્મરામિ કમલેક્ષણમભ્રનીલમ્

(વસન્તતિલકા)
વ્યત્યસ્તપાદમવતંસિતબર્હિબર્હં
સાચીકૃતાનનનિવેશિતવેણુરન્ધ્રમ્।
તેજઃ પરં પરમકારુણિકં પુરસ્તા‍–
ત્પ્રાણપ્રયાણસમયે મમ સન્નિધત્તામ્

(વસન્તતિલકા)
ઘોષપ્રઘોષશમનાય મથોગુણેન
મધ્યે બબન્ધ જનની નવનીતચોરમ્।
તદ્બન્ધનં ત્રિજગતામુદરાશ્રયાણા‍–
માક્રોશકારણમહો નિતરાં બભૂવ

(વસન્તતિલકા)
શૈવા વયં ન ખલુ તત્ર વિચારણીયં
પઞ્ચાક્ષરીજપપરા નિતરાં તથાપિ।
ચેતો મદીયમતસીકુસુમાવભાસં
સ્મેરાનનં સ્મરતિ ગોપવધૂકિશોરમ્

(વસન્તતિલકા)
રાધા પુનાતુ જગદચ્યુતદત્તચિત્તા
મન્થાનમાકલયતી દધિરિક્તપાત્રે।
તસ્યાઃ સ્તનસ્તબકચઞ્ચલલોલદૃષ્ટિ‍–
ર્દેવોઽપિ દોહનધિયા વૃષભં નિરુન્ધન્

(વસન્તતિલકા)
ગોધૂલિધૂસરિતકોમલકુન્તલાગ્રં
ગોવર્ધનોદ્ધરણકેલિકૃતપ્રયાસમ્।
ગોપીજનસ્ય કુચકુઙ્કુમમુદ્રિતાઙ્ગં
ગોવિન્દમિન્દુવદનં શરણં ભજામઃ

(વસન્તતિલકા)
યદ્રોમરન્ધ્રપરિપૂર્તિવિધાવદક્ષા
વારાહજન્મનિ બભૂ વુરમી સમુદ્રાઃ।
તં નામ નાથમરવિન્દદૃશં યશોદા
પાણિદ્વયાન્તરજલે સ્નપયામ્બભૂવ

(વસન્તતિલકા)
પરમિમમુપદેશમાદ્રિયધ્વં
નિગમવનેષુ નિતાન્તચારખિન્નાઃ।
વિચિનુત ભવનેષુ વલ્લવીના‍–
મુપનિષદર્થમુલૂખલે નિબદ્ધમ્

(પુષ્પિતાગ્રા)
દેવકીતનયપૂજનપૂતઃ
પૂતનારિચરણોદકધૌતઃ।
યદ્યહં સ્મૃતધનઞ્જયસૂતઃ
કિં કરિષ્યતિ સ મે યમદૂતઃ

(સ્વાગતા)
ભાસતાં ભવભયૈકભેષજં
માનસે મમ મુહુર્મુહુર્મુહુઃ।
ગોપવેષમુપસેદુષઃ સ્વયં
યાપિ કાપિ રમણીયતા વિભોઃ

(રથોદ્ધતા)
કર્ણલમ્બિતકદમ્બમઞ્જરી‍–
કેસરારુણકપોલમણ્ડલમ્।
નિર્મલં નિગમવાગગોચરં
નીલિમાનમવલોકયામહે

(રથોદ્ધતા)
સાચિસઞ્ચલિતલોચનાન્તરં
સામિકુટ્મલિતકોમલાધરમ્।
વેગવલ્ગિતકરાઙ્ગુલીમુખં
વેણુનાદરસિકં ભજામહે

(રથોદ્ધતા)
સ્યન્દને ગરુડમણ્ડિતધ્વજે
કુણ્ડિનેશતનયાધિરોપિતા।
કેનચિન્નવતમાલપલ્લવ‍–
શ્યામલેન પુરુષેણ નીયતે

(રથોદ્ધતા)
મા યાત પાન્થાઃ પથિ ભીમરથ્યા
દિગમ્બરઃ કોઽપિ તમાલનીલઃ।
વિન્યસ્તહસ્તોઽપિ નિતમ્બબિમ્બે
ધૂર્તસ્સમાકર્ષતિ ચિત્તવિત્તમ્

(ઉપજાતિ)
અઙ્ગનામઙ્ગનામન્તરે માધવો
માધવં માધવં ચાન્તરેણાઙ્ગના।
ઇત્થમાકલ્પિતે મણ્ડલે મધ્યગઃ
સઞ્જગૌ વેણુના દેવકીનન્દનઃ

(સ્રગ્વિણી)
કેકિકેકાદૃતાનેકપઙ્કેરુહા‍–
લીનહંસાવલીહૃદ્યતાહૃદ્યતા।
કંસવંશાટવીદાહદાવાનલઃ
સઞ્જગૌ વેણુના દેવકીનન્દનઃ

(સ્રગ્વિણી)
ક્વાપિ વીણાભિરારાવિણા કમ્પિતઃ
ક્વાપિ વીણાભિરાકિઙ્કિણીનર્તિતઃ।
ક્વાપિ વીણાભિરામન્તરં ગાપિતઃ
સઞ્જગૌ વેણુના દેવકીનન્દનઃ

(સ્રગ્વિણી)
ચારુચન્દ્રાવલીલોચનૈશ્ચુમ્બિતો
ગોપગોબૃન્દગોપાલિકાવલ્લભઃ।
વલ્લવીબૃન્દબૃન્દારકઃ કામુકઃ
સઞ્જગૌ વેણુના દેવકીનન્દનઃ

(સ્રગ્વિણી)
મૌલિમાલાલસન્મત્તભૃઙ્ગીલતા‍–
ભીતભીતપ્રિયાવિભ્રમાલિઙ્ગિતઃ।
સ્રસ્તગોપીકુચાભોગસમ્મેલિતઃ
સઞ્જગૌ વેણુના દેવકીનન્દનઃ

(સ્રગ્વિણી)
ચારુચામીકરાભાસભામાવિભુ‍–
ર્વૈજયન્તીલતાભાસિતોરઃસ્થલઃ।
નન્દબૃન્દાવને વાસિતામધ્યગઃ
સઞ્જગૌ વેણુના દેવકીનન્દનઃ

(સ્રગ્વિણી)
બાલિકાતાલિકાતાલલીલાલયા‍–
સઙ્ગસન્દર્શિતભ્રૂલતાવિભ્રમઃ।
ગોપિકાગીતદત્તાવધાનઃ સ્વયં
સઞ્જગૌ વેણુના દેવકીનન્દનઃ

(સ્રગ્વિણી)
પારિજાતં સમુદ્ધૃત્ય રાધાવયો‍–
રૂપયા માસભાસા ગુણૈરઙ્ગણે।
શીતશીતે વટે યામુનીયે તટે
સઞ્જગૌ વેણુના દેવકીનન્દનઃ

(સ્રગ્વિણી)
અગ્રે દીર્ઘતરોઽયમર્જુનતરુસ્તસ્યાગ્રતો વર્તની
સા ઘોષં સમુપૈતિ તત્પરિસરે દેશે કલિન્દાત્મજા।
તસ્યાસ્તીરતમાલકાનનતલે ચક્રં ગવાં ચારય‍–
ન્ગોપઃ ક્રીડતિ દર્શયિષ્યતિ સખે પન્થાનમવ્યાહતમ્

(શાર્દૂલવિક્રીડિતમ્)
ગોધૂલિધૂસરિતકોમલગોપવેષં
ગોપાલબાલકશતૈરનુગમ્યમાનમ્।
સાયન્તને પ્રતિગૃહં પશુબન્ધનાર્થં
ગચ્છન્તમચ્યુતશિશું પ્રણતોઽસ્મિ નિત્યમ્

(વસન્તતિલકા)
નિધિં લાવણ્યાનાં નિખિલજગદાશ્ચર્યનિલયં
નિજાવાસં ભાસાં નિરવધિકનિઃશ્રેયસરસમ્।
સુધાધારાસારં સુકૃતપરિપાકં મૃગદૃશાં
પ્રપદ્યે માઙ્ગલ્યં પ્રથમમધિદૈવં કૃતધિયામ્

(શિખરિણી)
આતામ્રપાણિકમલપ્રણયપ્રતોદ‍–
માલોલહારમણિકુણ્ડલહેમસૂત્રમ્।
આવિઃશ્રમામ્બુકણમમ્બુદનીલમવ્યા‍–
દાદ્યં ધનઞ્જયરથાભરણં મહો નઃ

(વસન્તતિલકા)
નખનિયમિતકણ્ડૂન્પાણ્ડવસ્યન્દનાશ્વા‍–
નનુદિનમભિષિઞ્ચન્નઞ્જલિસ્થૈઃ પયોભિઃ।
અવતુ વિતતગાત્રસ્તોત્રસંસ્યૂતમૌલિર્
દશનવિધૃતરશ્મિર્દેવકીપુણ્યરાશિઃ

(માલિની)
વ્રજયુવતિસહાયે યૌવનોલ્લાસિકાયે
સકલશુભવિલાસે કુન્દમન્દારહાસે।
નિવસતુ મમ ચિત્તં તત્પદાયત્તવૃત્તં
મુનિસરસિજભાનૌ નન્દગોપાલસૂનૌ

(માલિની)
અરણ્યાનીમાર્દ્રસ્મિતમધુરબિમ્બાધરસુધા
સરણ્યા સંક્રાન્તૈસ્સપદિ મદયન્વેણુનિનદૈઃ।
ધરણ્યા સાનન્દોત્પુલકમુપગૂઢાઙ્ઘ્રિકમલઃ
શરણ્યાનામાદ્યસ્સ જયતુ શરીરી મધુરિમા

(શિખરિણી)
મુગ્ધં સ્નિગ્ધં મધુરમુરલીમાધુરીધીરનાદૈઃ
કારં કારં કરણવિવશં ગોકુલં વ્યાકુલત્વમ્।
શ્યામં કામં યુવજનમનોમોહનં મોહનત્વં
ચિત્તે નિત્યં નિવસતુ મહો વલ્લવીવલ્લભં નઃ

(મન્દાક્રાન્તા)
વિદગ્ધગોપાલવિલાસિનીનાં
સમ્ભોગચિહ્નાઙ્કિતસર્વગાત્રમ્।
પવિત્રમામ્નાયગિરામગમ્યં
બ્રહ્મ પ્રપદ્યે નવનીતચોરમ્

(ઉપજાતિ)
આનન્દેન યશોદયા સમદનં ગોપાઙ્ગનાભિશ્ચિરં
સાશઙ્કં બલવિદ્વિષા સકુસુમૈઃ સિદ્ધૈઃ પથિ વ્યાકુલમ્।
સેર્ષ્યં ગોપકુમારકૈસ્સકરુણં પૌરૈર્જનૈઃ સસ્મિતં
યો દૃષ્ટઃ સ પુનાતુ નો મુરરિપુઃ પ્રોત્ક્ષિપ્તગોવર્ધનઃ

(શાર્દૂલવિક્રીડિતમ્)
અન્તર્ગૃહે કૃષ્ણમવેક્ષ્ય ચોરં
બધ્વા કવાટં જનનીં ગતૈકા।
ઉલૂખલે દામનિબદ્ધમેનં
તત્રાપિ દૃષ્ટ્વા સ્તિમિતા બભૂવ

(ઉપજાતિ)
રત્નસ્થલે જાનુચરઃ કુમારઃ
સંક્રાન્તમાત્મીયમુખારવિન્દમ્।
આદાતુકામસ્તદલાભખેદાદ્
વિલોક્ય ધાત્રીવદનં રુરોદ

(ઉપજાતિ)
ઉપાસતામાત્મવિદઃ પુરાણાઃ
પરં પરસ્તાન્નિહિતં ગુહાયામ્।
વયં યશોદાશિશુબાલલીલા‍–
કથાસુધાસિન્ધુષુ લીલયામઃ

(ઉપેન્દ્રવજ્રા)
વિક્રેતુકામા કિલ ગોપકન્યા
મુરારિપાદાર્પિતચિત્તવૃત્તિઃ।
દધ્યાદિકં મોહવશાદવોચ‍–
દ્ગોવિન્દ દામોદર માધવેતિ

(ઉપજાતિ)
ઉલૂખલં વા યમિનાં મનો વા
ગોપાઙ્ગનાનાં કુચકુટ્મલં વા।
મુરારિનામ્નઃ કલભસ્ય નૂન‍–
માલાનમાસીત્ત્રયમેવ ભૂમૌ

(ઉપજાતિ)
કરારવિન્દેન પદારવિન્દં
મુખારવિન્દે વિનિવેશયન્તમ્।
વટસ્ય પત્રસ્ય પુટે શયાનં
બાલં મુકુન્દં મનસા સ્મરામિ

(ઉપજાતિ)
શમ્ભો સ્વાગતમાસ્યતામિત ઇતો વામેન પદ્માસન
ક્રૌઞ્ચારે કુશલં સુખં સુરપતે વિત્તેશ નો દૃશ્યસે।
ઇત્થં સ્વપ્નગતસ્ય કૈટભજિતશ્શ્રુત્વા યશોદા ગિરઃ
કિં કિં બાલક જલ્પસીતિ રચિતં ધૂધૂકૃતં પાતુ નઃ

(શાર્દૂલવિક્રીડિતમ્)
માતઃ કિં યદુનાથ દેહિ ચષકં કિં તેન પાતું પય‍–
સ્તન્નાસ્ત્યદ્ય કદાસ્તિ વા નિશિ નિશા કા વાન્ધકારોદયે।
આમીલ્યાક્ષિયુગં નિશાપ્યુપગતા દેહીતિ માતુર્મુહુ‍–
ર્વક્ષોજાંશુકકર્ષણોદ્યતકરઃ કૃષ્ણસ્સ પુષ્ણાતુ નઃ

(શાર્દૂલવિક્રીડિતમ્)
કાલિન્દીપુલિનોદરેષુ મુસલી યાવદ્ગતઃ ખેલિતું
તાવત્કર્બુરિકાપયઃ પિબ હરે વર્ધિષ્યતે તે શિખા।
ઇત્થં બાલતયા પ્રતારણપરાઃ શ્રુત્વા યશોદાગિરઃ
પાયાન્નસ્સ્વશિખાં સ્પૃશન્પ્રમુદિતઃ ક્ષીરેઽર્ધપીતે હરિઃ

(શાર્દૂલવિક્રીડિતમ્)
કૈલાસે નવનીતતિ ક્ષિતિતલે પ્રાગ્જગ્ધમૃલ્લોષ્ટતિ
ક્ષીરોદેઽપિ નિપીતદુગ્ધતિ લસત્સ્મેરપ્રફુલ્લે મુખે।
માત્રાજીર્ણધિયા દૃઢં ચકિતયા નષ્ટાસ્મિ દૃષ્ટઃ કયા
ધૂધૂ વત્સક જીવ જીવ ચિરમિત્યુક્તોઽવતાદ્વો હરિઃ

(શાર્દૂલવિક્રીડિતમ્)
કિઞ્ચિત્કુઞ્ચિતલોચનસ્ય પિબતઃ પર્યાયપીતસ્તનં
સદ્યઃ પ્રસ્નુતદુગ્ધબિન્દુમપરં હસ્તેન સમ્માર્જતઃ।
માત્રૈકાઙ્ગુલિલાલિતસ્ય ચુબુકે સ્મેરાનનસ્યાધરે
શૌરેઃ ક્ષીરકણાન્વિતા નિપતિતા દન્તદ્યુતિઃ પાતુ નઃ

(શાર્દૂલવિક્રીડિતમ્)
ઉત્તુઙ્ગસ્તનમણ્ડલોપરિલસત્પ્રાલમ્બમુક્તામણે‍–
રન્તર્બિમ્બિતમિન્દ્રનીલનિકરચ્છાયાનુકારિદ્યુતિ।
લજ્જાવ્યાજમુપેત્ય નમ્રવદના સ્પષ્ટં મુરારેર્વપુઃ
પશ્યન્તી મુદિતા મુદોઽસ્તુ ભવતાં લક્ષ્મીર્વિવાહોત્સવે

(શાર્દૂલવિક્રીડિતમ્)
કૃષ્ણેનામ્બ ગતેન રન્તુમધુના મૃદ્ભક્ષિતા સ્વેચ્છયા
તથ્યં કૃષ્ણ ક એવમાહ મુસલી મિથ્યામ્બ પશ્યાનનમ્।
વ્યાદેહીતિ વિદારિતે ચ વદને દૃષ્ટ્વા સમસ્તં જગ‍–
ન્માતા યસ્ય જગામ વિસ્મયપદં પાયાત્ સ નઃ કેશવઃ

(શાર્દૂલવિક્રીડિતમ્)
સ્વાતી સપત્ની કિલ તારકાણાં
મુક્તાફલાનાં જનનીતિ રોષાત્।
સા રોહિણી નીલમસૂત રત્નં
કૃતાસ્પદં ગોપવધૂકુચેષુ

(ઉપજાતિ)
નૃત્યન્તમત્યન્તવિલોકનીયં
કૃષ્ણં મણિસ્તમ્ભગતં મૃગાક્ષી।
નિરીક્ષ્ય સાક્ષાદિવ કૃષ્ણમગ્રે
દ્વિધા વિતેને નવનીતમેકમ્

(ઉપજાતિ)
વત્સ જાગૃહિ વિભાતમાગતં
જીવ કૃષ્ણ શરદાં શતં શતમ્।
ઇત્યુદીર્ય સુચિરં યશોદયા
દૃશ્યમાનવદનં ભજામહે

(રથોદ્ધતા)
ઓષ્ઠં જિઘ્રઞ્શિશુરિતિ ધિયા ચુમ્બિતો વલ્લવીભિઃ
કણ્ઠં ગૃહ્ણન્નરુણિતપદં ગાઢમાલિઙ્ગિતાઙ્ગઃ।
દોષ્ણા લજ્જાપદમભિમૃશન્નઙ્કમારોપિતાત્મા
ધૂર્તસ્વામી હરતુ દુરિતં દૂરતો બાલકૃષ્ણઃ

(મન્દાક્રાન્તા)
એતે લક્ષ્મણ જાનકીવિરહિતં માં ખેદયન્ત્યમ્બુદા
મર્માણીવ ચ ઘટ્ટયન્ત્યલમમી ક્રૂરાઃ કદમ્બાનિલાઃ।
ઇત્થં વ્યાહૃતપૂર્વજન્મચરિતો યો રાધયા વીક્ષિતઃ
સેર્ષ્યં શઙ્કિતયા સ નસ્સુખયતુ સ્વપ્નાયમાનો હરિઃ

(શાર્દૂલવિક્રીડિતમ્)
ઓષ્ઠં મુઞ્ચ હરે બિભેમિ ભવતા પાનૈર્હતા પૂતના
કણ્ઠાશ્લેષમમું જહીહિ દલિતાવાલિઙ્ગનેનાર્જુનૌ।
મા દેહિ ચ્છુરિતં હિરણ્યકશિપુર્નીતો નખૈઃ પઞ્ચતા‍–
મિત્થં વારિતરાત્રિકેલિરવતાલ્લક્ષ્મ્યાપહાસાદ્ધરિઃ

(શાર્દૂલવિક્રીડિતમ્)
રામો નામ બભૂવ હું તદબલા સીતેતિ હું તૌ પિતુ‍–
ર્વાચા પઞ્ચવટીવને વિહરતસ્તામાહરદ્રાવણઃ।
નિદ્રાર્થં જનનીકથામિતિ હરેર્હુંકારતઃ શૃણ્વતઃ
સૌમિત્રે ક્વ ધનુર્ધનુર્ધનુરિતિ વ્યગ્રા ગિરઃ પાન્તુ નઃ

(શાર્દૂલવિક્રીડિતમ્)
બાલોઽપિ શૈલોદ્ધરણાગ્રપાણિ‍–
ર્નીલોઽપિ નીરન્ધ્રતમઃ પ્રદીપઃ।
ધીરોઽપિ રાધાનયનાવબદ્ધો
જારોઽપિ સંસારહરઃ કુતસ્ત્વમ્

(ઇન્દ્રવજ્રા)
બાલાય નીલવપુષે નવકિઙ્કિણીક‍–
જાલાભિરામજઘનાય દિગમ્બરાય।
શાર્દૂલદિવ્યનખભૂષણભૂષિતાય
નન્દાત્મજાય નવનીતમુષે નમસ્તે

(વસન્તતિલકા)
સવ્યે પાયસભક્તમાહિતરસં બિભ્રન્મુદા દક્ષિણે
પાણૌ શારદચન્દ્રમણ્ડલનિભં હૈયઙ્ગવીનં વહન્।
કણ્ઠે કલ્પિતપુણ્ડરીકનખમપ્યુદ્દામદીપ્તિં દધ‍–
દ્દેવો દિવ્યદિગમ્બરો દિશતુ નસ્સૌખ્યં યશોદાશિશુઃ

(શાર્દૂલવિક્રીડિતમ્)
કિઙ્કિણિકિણિકિણિરભસૈ‍–
રઙ્ગણભુવિ રિઙ્ગણૈઃ સદાટન્તમ્।
કુઙ્કુણુકુણુપદયુગલં
કઙ્કણકરભૂષણં હરિં વન્દે

(ગીતિ)
સમ્બાધે સુરભીણા‍–
મમ્બામાયાસયન્તમનુયાન્તીમ્।
લમ્બાલકમવલમ્બે
તં બાલં તનુવિલગ્નજમ્બાલમ્

(ગીતિ)
અઞ્ચિતપિઞ્છાચૂડં
સઞ્ચિતસૌજન્યવલ્લવીવલયમ્।
અધરમણિનિહિતવેણું
બાલં ગોપાલમનિશમવલમ્બે

(ગીતિ)
પ્રહ્લાદભાગધેયં
નિગમાન્તમહાગુહાન્તરાધેયમ્।
નરહરિપદાભિધેયં
વિબુધવિધેયં મમાનુસંધેયમ્

(આર્યાગીતિ)
સંસારે કિં સારં
કંસારેશ્ચરણયુગલપરિવસનમ્।
જ્યોતિઃ કિમન્ધકારે
યદન્ધકારેરનુસ્મરણમ્

(આર્યા)
કલશનવનીતચોરે
કમલાદૃક્કુમુદચન્દ્રિકાપૂરે।
વિહરતુ નન્દકુમારે
ચેતો મમ ગોપસુન્દરીજારે

(ગીતિ)
કસ્ત્વં બાલ બલાનુજઃ કિમિહ તે મન્મન્દિરાશઙ્કયા
યુક્તં તન્નવનીતપાત્રવિવરે હસ્તં કિમર્થં ન્યસેઃ।
માતઃ કઞ્ચન વત્સકં મૃગયિતું મા ગા વિષાદં ક્ષણા‍–
દિત્યેવં વરવલ્લવીપ્રતિવચઃ કૃષ્ણસ્ય પુષ્ણાતુ નઃ

(શાર્દૂલવિક્રીડિતમ્)
ગોપાલાજિરકર્દમે વિહરસે વિપ્રાધ્વરે લજ્જસે
બ્રૂષે ગોધનહુઙ્કૃતૈઃ સ્તુતિશતૈર્મૌનં વિધત્સે વિદામ્।
દાસ્યં ગોકુલપુંશ્ચલીષુ કુરુષે સ્વામ્યં ન દાન્તાત્મસુ
જ્ઞાતં કૃષ્ણ તવાઙ્ઘ્રિપઙ્કજયુગં પ્રેમ્ણાચલં મઞ્જુલમ્

(શાર્દૂલવિક્રીડિતમ્)
નમસ્તસ્મૈ યશોદાયા
દાયાદાયાસ્તુ તેજસે।
યદ્ધિ રાધામુખામ્ભોજં
ભોજં ભોજં વ્યવર્ધત

(અનુષ્ટુપ્શ્લોકમ્)
અવતારાઃ સન્ત્વન્યે
સરસિજનયનસ્ય સર્વતોભદ્રાઃ।
કૃષ્ણાદન્યઃ કો વા
પ્રભવતિ ગોગોપગોપિકામુક્ત્યૈ

(ગીતિ)
મધ્યેગોકુલમણ્ડલં પ્રતિદિશં ચામ્ભારવેર્જૃમ્ભિતે
પ્રાતર્દોહમહોત્સવે નવઘનશ્યામં રણન્નૂપુરમ્।
ફાલેબાલવિભૂષણં કટિરણત્સત્કિઙ્કિણીમેખલં
કણ્ઠેવ્યાઘ્રનખં ચ શૈશવકલાકલ્યાણકાર્ત્સ્ન્યં ભજે

(શાર્દૂલવિક્રીડિતમ્)
સજલજલદનીલં દર્શિતોદારલીલં
કરતલધૃતશૈલં વેણુવાદ્યૈ રસાલમ્।
વ્રજજનકુલપાલં કામિનીકેલિલોલં
કલિતલલિતમાલં નૌમિ ગોપાલબાલમ્

(માલિની)
સ્મિતલલિતકપોલં સ્નિગ્ધસંગીતલોલં
લલિતચિકુરજાલં ચૌર્યચાતુર્યલીલમ્।
શતમખરિપુકાલં શાતકુમ્ભાભચેલં
કુવલયદલનીલં નૌમિ ગોપાલબાલમ્

(માલિની)
મુરલિનિનદલોલં મુગ્ધમાયૂરવાલં
દલિતદનુજજાલં ધન્યસૌજન્યલીલમ્।
પરહિતનવહેલં પદ્મસદ્માનુકૂલં
નવજલધરનીલં નૌમિ ગોપાલબાલમ્

(માલિની)
સરસગુણનિકાયં સચ્ચિદાનન્દકાયં
શમિતસકલમાયં સત્યલક્ષ્મીસહાયમ્।
શમદમસમુદાયં શાન્તસર્વાન્તરાયં
સુહૃદયજનદાયં નૌમિ ગોપાલબાલમ્

(માલિની)
લક્ષ્મીકલત્રં લલિતાબ્જનેત્રં
પૂર્ણેન્દુવક્ત્રં પુરુહૂતમિત્રમ્।
કારુણ્યપાત્રં કમનીયગાત્રં
વન્દે પવિત્રં વસુદેવપુત્રમ્

(ઇન્દ્રવજ્રા)
મદમયમદમયદુરગં
યમુનામવતીર્ય વીર્યશાલી યઃ।
મમ રતિમમરતિરસ્કૃતિ‍–
શમનપરસ્સ ક્રિયાત્કૃષ્ણઃ

(આર્યા)
મૌલૌ માયૂરબર્હં મૃગમદતિલકં ચારુલાલાટપટ્ટે
કર્ણદ્વન્દ્વે ચ તાલીદલમતિમૃદુલં મૌક્તિકં નાસિકાયામ્।
હારો મન્દારમાલાપરિમલભરિતે કૌસ્તુભસ્યોપકણ્ઠે
પાણૌ વેણુશ્ચ યસ્ય વ્રજયુવતિયુતઃ પાતુ પીતામ્બરો નઃ

(સ્રગ્ધરા)
મુરારિણા વારિવિહારકાલે
મૃગેક્ષણાનાં મુષિતાંશુકાનામ્।
કરદ્વયં વા કચસંહતિર્વા
પ્રમીલનં વા પરિધાનમાસીત્

(ઉપેન્દ્રવજ્રા)
યાસાં ગોપાઙ્ગનાનાં લસદસિતતરા લોલલીલાકટાક્ષા
યન્નાસાચારુમુક્તામણિરુચિનિકરવ્યોમગઙ્ગાપ્રવાહે।
મીનાયન્તેઽપિ તાસામતિરભસચલચ્ચારુનીલાલકાન્તા
ભૃઙ્ગાયન્તે યદઙ્ઘ્રિદ્વયસરસિરુહે પાતુ પીતામ્બરો નઃ

(સ્રગ્ધરા)
યદ્વેણુશ્રેણિરૂપસ્થિતસુષિરમુખોદ્ગીર્ણનાદપ્રભિન્ના
એણાક્ષ્યસ્તત્ક્ષણેન ત્રુટિતનિજપતિપ્રેમબન્ધા બભૂવુઃ।
અસ્તવ્યસ્તાલકાન્તાઃ સ્ફુરદધરકુચદ્વન્દ્વનાભિપ્રદેશાઃ
કામાવેશપ્રકલ્પપ્રકટિતપુલકાઃ પાતુ પીતામ્બરો નઃ

(સ્રગ્ધરા)
દેવક્યા જઠરાકરે સમુદિતઃ ક્રીતો ગવાં પાલિના
નન્દેનાનકદુન્દુભેર્નિજસુતાપણ્યેન પુણ્યાત્મના।
ગોપાલાવલિમુગ્ધહારતરલો ગોપીજનાલઙ્કૃતિઃ
સ્થેયાદ્વો હૃદિ સન્તતં સ મધુરઃ કોઽપીન્દ્રનીલો મણિઃ

(શાર્દૂલવિક્રીડિતમ્)
પીઠે પીઠનિષણ્ણબાલકગલે તિષ્ઠન્સ ગોપાલકો
યન્ત્રાન્તઃ સ્થિતદુગ્ધભાણ્ડમપકૃષ્યાચ્છાદ્ય ઘણ્ટારવમ્।
વક્ત્રોપાન્તકૃતાઞ્જલિઃ કૃતશિરઃ કમ્પં પિબન્યઃ પયઃ
પાયાદાગતગોપિકાનયનયોર્ગણ્ડૂષફૂત્કારકૃત્

(શાર્દૂલવિક્રીડિતમ્)
યજ્ઞૈરીજિમહે ધનં દદિમહે પાત્રેષુ નૂનં વયં
વૃદ્ધાન્ભેજિમહે તપશ્ચકૃમહે જન્માન્તરે દુશ્ચરમ્।
યેનાસ્માકમભૂદનન્યસુલભા ભક્તિર્ભવદ્વેષિણી
ચાણૂરદ્વિષિ ભક્તકલ્મષમુષિ શ્રેયઃપુષિ શ્રીજુષિ

(શાર્દૂલવિક્રીડિતમ્)
ત્વયિ પ્રસન્ને મમ કિં ગુણેન
ત્વય્યપ્રસન્ને મમ કિં ગુણેન।
રક્તે વિરક્તે ચ વરે વધૂનાં
નિરર્થકઃ કુઙ્કુમપત્રભઙ્ગઃ

(ઉપજાતિ)
ગાયન્તિ ક્ષણદાવસાનસમયે સાનન્દમિન્દુપ્રભા
રુન્ધન્ત્યો નિજદન્તકાન્તિનિવહૈર્ગોપાઙ્ગના ગોકુલે।
મથ્નત્યો દધિ પાણિકઙ્કણઝણત્કારાનુકારં જવા‍–
દ્વ્યાવલ્ગદ્વસનાઞ્જલા યમનિશં પીતામ્બરોઽવ્યાત્સ નઃ

(શાર્દૂલવિક્રીડિતમ્)
અંસાલમ્બિતવામકુણ્ડલભરં મન્દોન્નતભ્રૂલતં
કિઞ્ચિત્કુઞ્ચિતકોમલાધરપુટં સાચિપ્રસારેક્ષણમ્।
આલોલાઙ્ગુલિપલ્લવૈર્મુરલિકામાપૂરયન્તં મુદા
મૂલે કલ્પતરોસ્ત્રિભઙ્ગિલલિતં જાને જગન્મોહનમ્

(શાર્દૂલવિક્રીડિતમ્)
મલ્લૈઃ શૈલેન્દ્રકલ્પઃ શિશુરિતરજનૈઃ પુષ્પચાપોઽઙ્ગનાભિ‍–
ર્ગોપૈસ્તુ પ્રાકૃતાત્મા દિવિ કુલિશભૃતા વિશ્વકાયોઽપ્રમેયઃ।
ક્રુદ્ધઃ કંસેન કાલો ભયચકિતદૃશા યોગિભિર્ધ્યેયમૂર્તિ‍–
ર્દૃષ્ટો રઙ્ગાવતારે હરિરમરગણાનન્દકૃત્પાતુ યુષ્માન્

(સ્રગ્ધરા)
સંવિષ્ટો મણિવિષ્ટરેઽઙ્કતલમધ્યાસીનલક્ષ્મીમુખે
કસ્તૂરીતિલકં મુદા વિરચયન્હર્ષાત્કુચૌ સંસ્પૃશન્।
અન્યોન્યસ્મિતચન્દ્રિકાકિસલયૈરારાધયન્મન્મથં
ગોપીગોપપરીવૃતો યદુપતિઃ પાયાજ્જગન્મોહનઃ

(શાર્દૂલવિક્રીડિતમ્)
આકૃષ્ટે વસનાઞ્ચલે કુવલયશ્યામા ત્રપાધઃકૃતા
દૃષ્ટિઃ સંવલિતા રુચા કુચયુગે સ્વર્ણપ્રભે શ્રીમતિ।
બાલઃ કશ્ચન ચૂતપલ્લવ ઇતિ પ્રાન્તસ્મિતાસ્યશ્રિયં
શ્લિષ્યંસ્તામથ રુક્મિણીં નતમુખીં કૃષ્ણસ્સ પુષ્ણાતુ નઃ

(શાર્દૂલવિક્રીડિતમ્)
ઉર્વ્યાં કોઽપિ મહીધરો લઘુતરો દોર્ભ્યાં ધૃતો લીલયા
તેન ત્વં દિવિ ભૂતલે ચ સતતં ગોવર્ધનોદ્ધારકઃ।
ત્વાં ત્રૈલોક્યધરં વહામિ કુચયોરગ્રે ન તદ્ગણ્યતે
કિં વા કેશવ ભાષણેન બહુના પુણ્યૈર્યશો લભ્યતે

(શાર્દૂલવિક્રીડિતમ્)
સન્ધ્યાવન્દન ભદ્રમસ્તુ ભવતો ભોઃ સ્નાન તુભ્યં નમો
ભો દેવાઃ પિતરશ્ચ તર્પણવિધૌ નાહં ક્ષમઃ ક્ષમ્યતામ્।
યત્ર ક્વાપિ નિષદ્ય યાદવકુલોત્તંસસ્ય કંસદ્વિષઃ
સ્મારં સ્મારમઘં હરામિ તદલં મન્યે કિમન્યેન મે

(શાર્દૂલવિક્રીડિતમ્)
હે ગોપાલક હે કૃપાજલનિધે હે સિન્ધુકન્યાપતે
હે કંસાન્તક હે ગજેન્દ્રકરુણાપારીણ હે માધવ।
હે રામાનુજ હે જગત્ત્રયગુરો હે પુણ્ડરીકાક્ષ માં
હે ગોપીજનનાથ પાલય પરં જાનામિ ન ત્વાં વિના

(શાર્દૂલવિક્રીડિતમ્)
કસ્તૂરીતિલકં લલાટફલકે વક્ષસ્થલે કૌસ્તુભં
નાસાગ્રે નવમૌક્તિકં કરતલે વેણું કરે કઙ્કણમ્।
સર્વાઙ્ગે હરિચન્દનં ચ કલયન્કણ્ઠે ચ મુક્તાવલિં
ગોપસ્ત્રીપરિવેષ્ટિતો વિજયતે ગોપાલચૂડામણિઃ

(શાર્દૂલવિક્રીડિતમ્)
કાલિન્દીબહુલપ્રવાહરભસં સંસ્તમ્ભયંસ્તત્ક્ષણાત્
શૈલાન્વિદ્રવયન્મૃગાન્વિવશયન્ગોબૃન્દમાનન્દયન્।
ગોપાન્સંભ્રમયન્મુનીન્મુકુલયન્સપ્તસ્વરાન્ જૃમ્ભય‍–
ન્નોંકારાર્થમુદીરયન્વિજયતે વંશીનિનાદઃ શિશોઃ

(શાર્દૂલવિક્રીડિતમ્)
ઇતિ શ્રીકૃષ્ણકર્ણામૃતે દ્વિતીયાશ્વાસઃ સમાપ્તઃ॥
તૃતીયાશ્વાસઃ
અસ્તિ સ્વસ્ત્યયનં સમસ્તજગતામભ્યસ્તલક્ષ્મીસ્તનં
વસ્તુ ધ્વસ્તરજસ્તમોભિરનિશં ન્યસ્તં પુરસ્તાદિવ।
હસ્તોદસ્તગિરીન્દ્રમસ્તકતરુપ્રસ્તારવિસ્તારિત–
સ્રસ્તસ્વસ્તરુસૂનસંસ્તરલસત્પ્રસ્તાવિરાધાસ્તુતમ્

(શાર્દૂલવિક્રીડિતમ્)
રાધારાધિતવિભ્રમાદ્ભુતરસં લાલિત્યરત્નાકરં
સાધારણ્યપદવ્યતીતસહજસ્મેરાનનામ્ભોરુહમ્।
આલમ્બે હરિનીલગર્વગુરુતાં સર્વસ્વનિર્વાપણં
બાલં વૈણવિકં વિમુગ્ધમધુરં મૂર્ધાભિષિક્તં મહઃ

(શાર્દૂલવિક્રીડિતમ્)
કરિણામલઙ્ઘ્યગતિવૈભવં ભજે
કરુણાવલમ્બિતકિશોરવિગ્રહમ્।
યમિનામનારતવિહારિ માનસે
યમુનાવનાન્તરસિકં પરં મહઃ

(મઞ્જુભાષિણી)
અતન્ત્રિતત્રિજગદપિ વ્રજાઙ્ગના–
નિયન્ત્રિતં વિપુલવિલોચનાજ્ઞયા।
સમન્તતઃ સરસતરં વિજૃમ્ભતાં
નિરન્તરં મમ હૃદયે પરં મહઃ

(રુચિરા)
કંદર્પપ્રતિમલ્લકાન્તિવિભવં કાદમ્બિનીબાન્ધવં
વૃન્દારણ્યવિલાસિનીવ્યસનિનં વેષેણ ભૂષામયમ્।
મન્દસ્મેરમુખામ્બુજં મધુરિમવ્યામૃષ્ટબિમ્બાધરં
વન્દે કંદલિતાર્દ્રયૌવનવનં કૈશોરકં શાર્ઙ્ગિણઃ

(શાર્દૂલવિક્રીડિતમ્)
આમુક્તમાનુષમમુક્તનિજાનુભાવ–
મારૂઢવિગ્રહમગૂઢવિદગ્ધલીલમ્।
આમૃષ્ટયૌવનમમૃષ્ટકિશોરભાવ–
માદ્યં મહઃ કિમપિ માદ્યતિ માનસે મે

(વસન્તતિલકા)
તે તે ભાવાઃ સકલજગતીલોભનીયપ્રભાવા
નાનાતૃષ્ણાસુહૃદિ હૃદિ મે કામમાવિર્ભવન્તુ।
લીલાવેણુક્વણિતલસિતસ્મેરવક્ત્રારવિન્દા–
ન્નાહં જાને મધુરમપરં નન્દપુણ્યામ્બુપૂરાત્

(મન્દાક્રાન્તા)
સુકૃતિભિરાદૃતે સરસવેણુનિનાદસુધા–
રસલહરીવિહારનિરવગ્રહકર્ણપુટે।
વ્રજવરસુન્દરીમુખસરોરુહસારસિકે
મહસિ કદા નુ મજ્જતિ મદીયમિદં હૃદયમ્

(કોકિલકા)
તૃષ્ણાતુરે ચેતસિ જૃમ્ભમાણે
મુષ્ણન્મુહુર્મોહમહાન્ધકારમ્।
પુષ્ણાતુ નઃ પુણ્યદયૈકસિન્ધોઃ
કૃષ્ણસ્ય કારુણ્યકટાક્ષકેલિઃ

(ઇન્દ્રવજ્રા)
નિખિલનિગમમૌલિલાલિતં
પદકમલં પરમસ્ય તેજસઃ।
વ્રજભુવિ બહુમન્મહેતરાં
સરસકરીષવિશેષરૂષિતમ્

(અપરવત્રમ્)
ઉદારમૃદુલસ્મિતવ્યતિકરાભિરામાનનં
મુદા મુહુરુદીર્ણયા મુનિમનોઽમ્બુજામ્રેડિતમ્।
મદાલસવિલોચનવ્રજવધૂમુખાસ્વાદિતં
કદા નુ કમલેક્ષણં કમપિ બાલમાલોકયે

(પૃથ્વી)
વ્રજજનમદયોષિલ્લોચનોચ્છિષ્ટશેષી–
કૃતમપિ ચપલાભ્યાં લોચનાભ્યામુભાભ્યામ્।
સકૃદપિ પરિપાતું તે વયં પારયામઃ
કુવલયદલનીલં કાન્તિપૂરં કદા નુ

(માલિની)
ઘોષયોષિદનુગીતયૌવનં
કોમલસ્તનિતવેણુનિસ્વનમ્।
સારભૂતમભિરામસંપદાં
ધામ તામરસલોચનં ભજે

(રથોદ્ધતા)
લીલયા લલિતયાવલમ્બિતં
મૂલગેહમિવ મૂર્તિસંપદામ્।
નીલનીરદવિકાસવિભ્રમં
બાલમેવ વયમાદ્રિયામહે

(રથોદ્ધતા)
વન્દે મુરારેશ્ચરણારવિન્દ–
દ્વન્દ્વં દયાદર્શિતશૈશવસ્ય।
વન્દારુબૃન્દારકબૃન્દમૌલિ–
મન્દારમાલાવિનિમર્દભીરુ

(ઇન્દ્રવજ્રા)
યસ્મિન્નૃત્યતિ યસ્ય શેખરભરૈઃ ક્રૌઞ્ચદ્વિષશ્ચન્દ્રકી
યસ્મિન્દૃપ્યતિ યસ્ય ઘોષસુરભિં જિઘ્રન્વૃષો ધૂર્જટેઃ।
યસ્મિન્સજ્જતિ યસ્ય વિભ્રમગતિં વાઞ્છન્હરેઃ સિન્ધુર–
સ્તદ્બૃન્દાવનકલ્પકદ્રુમવનં તં વા કિશોરં ભજે

(શાર્દૂલવિક્રીડિતમ્)
અરુણાધરામૃતવિશેષિતસ્મિતં
વરુણાલયાનુગતવર્ણવૈભવમ્।
તરુણારવિન્દદલદીર્ઘલોચનં
કરુણામયં કમપિ બાલમાશ્રયે

(મઞ્જુભાષિણી)
લાવણ્યવીચીરચિતાઙ્ગભૂષાં
ભૂષાપદારોપિતપુણ્યબર્હામ્।
કારુણ્યધારાલકટાક્ષમાલાં
બાલાં ભજે વલ્લવવંશલક્ષ્મીમ્

(ઇન્દ્રવજ્રા)
મધુરૈકરસં વપુર્વિભોસ્ત–
ન્મથુરાવીથિચરં ભજામહે।
નગરીમૃગશાબલોચનાનાં
નયનેન્દીવરવર્ષવર્ષિતમ્

(ત્રિષ્ટુપ્)
પર્યાકુલેન નયનાન્તવિજૃમ્ભિતેન
વક્ત્રેણ કોમલમદસ્મિતવિભ્રમેણ।
મન્દ્રેણ મઞ્જુલતરેણ ચ જલ્પિતેન
નન્દસ્ય હન્ત તનયો હૃદયં ધુનોતિ

(વસન્તતિલકા)
કંદર્પકણ્ડૂલકટાક્ષબન્દી–
રિન્દીવરાક્ષીરભિલષ્યમાણાન્।
મન્દસ્મિતાધારમુખારવિન્દાન્
વન્દામહે વલ્લવધૂર્તપાદાન્

(ઇન્દ્રવજ્રા)
લીલાટોપકટાક્ષનિર્ભરપરિષ્વઙ્ગપ્રસઙ્ગાધિક–
પ્રીતે ગીતિવિભાગસઙ્ગરલસદ્વેણુપ્રણાદામૃતે।
રાધાલોચનલાલિતસ્ય લલિતસ્મેરે મુરારેર્મુદા
માધુર્યૈકરસે મુખેન્દુકમલે મગ્નં મદીયં મનઃ

(શાર્દૂલવિક્રીડિતમ્)
શરણાગતવજ્રપઞ્જરે
શરણે શાર્ઙ્ગધરસ્ય વૈભવે।
કૃપયા ધૃતગોપવિગ્રહે
કિયદન્યન્મૃગયામહે વયમ્

(વિયોગિની)
જગત્ત્રયૈકાન્તમનોજ્ઞભૂમિ–
શ્ચેતસ્યજસ્રં મમ સંનિધત્તામ્।
રામાસમાસ્વાદિતસૌકુમાર્યં
રાધાસ્તનાભોગરસજ્ઞમોજઃ

(ઉપજાતિ)
વયમેતે વિશ્વસિમઃ
કરુણાકરકીર્તિકિંવદન્ત્યાઙ્ગે।
અપિ ચ વિભો તવ લલિતે
ચપલતરા મતિરિયં બાલ્યે

(આર્યા)
વત્સપાલચરઃ કોઽપિ
વત્સઃ શ્રીવત્સલાઞ્છનઃ।
ઉત્સવાય કદા ભાવી–
ત્યુત્સુકે મમ લોચને॥ *
(અનુષ્ટુપ્શ્લોકમ્)
મધુરિમભરિતે મનોભિરામે
મૃદુલતરસ્મિતમુદ્રિતાનનેન્દૌ।
ત્રિભુવનનયનૈકલોભનીયે
મહસિ વયં વ્રજભાજિ લાલસાઃ સ્મઃ

(પુષ્પિતાગ્રા)
મુખારવિન્દે મકરન્દબિન્દુ–
નિષ્યન્દલીલામુરલીનિનાદે।
વ્રજાઙ્ગનાપાઙ્ગતરઙ્ગભૃઙ્ગ–
સંગ્રામભૂમૌ તવ લાલસાઃ સ્મઃ

(ઉપજાતિ)
આતામ્રાયતલોચનાંશુલહરીલીલાસુધાપ્યાયિતૈ–
ર્ગીતામ્રેડિતદિવ્યકેલિભરિતૈઃ સ્ફીતં વ્રજસ્ત્રીજનૈઃ।
સ્વેદામ્ભઃકણભૂષિતેન કિમપિ સ્મેરેણ વક્ત્રેન્દુના
પાદામ્ભોજમૃદુપ્રચારસુભગં પશ્યામિ દૃશ્યં મહઃ

(શાર્દૂલવિક્રીડિતમ્)
પાણૌ વેણુઃ પ્રકૃતિસુકુમારાકૃતૌ બાલ્યલક્ષ્મીઃ
પાર્શ્વે બાલાઃ પ્રણયસરસાલોકિતાપાઙ્ગલીલાઃ।
મૌલૌ બર્હં મધુરવદનામ્ભોરુહે મૌગ્ધ્યમુદ્રે–
ત્યાર્દ્રાકારં કિમપિ કિતવં જ્યોતિરન્વેષયામઃ

(મન્દાક્રાન્તા)
આરૂઢવેણુતરુણાધરવિભ્રમેણ
માધુર્યશાલિવદનામ્બુજમુદ્વહન્તી।
કૈશોરકે વયસિ કાપિ ચ કાન્તિયષ્ટિ–
રાલોક્યતાં કિમનયા વનદેવતા વઃ

(વસન્તતિલકા)
અનન્યસાધારણકાન્તિકાન્ત–
માક્રાન્તગોપીનયનારવિન્દમ્।
પુંસઃ પુરાણસ્ય નવં વિલાસં
પુણ્યેન પૂર્ણેન વિલોકયિષ્યે

(ઉપજાતિ)
સાષ્ટાઙ્ગપાતમભિવન્દ્ય સમસ્તભાવૈઃ
સર્વાન્સુરેન્દ્રનિકરાનિદમેવ યાચે।
મન્દસ્મિતાર્દ્રમધુરાનનચન્દ્રબિમ્બે
નન્દસ્ય પુણ્યનિચયે મમ ભક્તિરસ્તુ

(વસન્તતિલકા)
એષુ પ્રવાહેષુ સ એવ મન્યે
ક્ષણોઽપિ ગણ્યઃ પુરુષાયુષેષુ।
આસ્વાદ્યતે યત્ર કયાપિ વૃત્ત્યા
નીલસ્ય બાલસ્ય નિજં ચરિત્રમ્

(ઉપજાતિ)
નિસર્ગસરસાધરં નિજદયાર્દ્રદિવ્યેક્ષણં
મનોજ્ઞમુખપઙ્કજં મધુરસાર્દ્રમન્દસ્મિતમ્।
રસજ્ઞહૃદયાસ્પદં રમિતવલ્લવીલોચનં
પુનઃ પુનરુપાસ્મહે ભુવનલોભનીયં મહઃ

(પૃથ્વી)
સ કોઽપિ બાલઃ સરસીરુહાક્ષઃ
સા ચ વ્રજસ્ત્રીજનપાદધૂલિઃ।
મુહુસ્તદેતદ્યુગલં મદીયે
મોમુહ્યમાનોઽપિ મનસ્યુદેતુ

(ઉપજાતિ)
મયિ પ્રયાણાભિમુખે ચ વલ્લવી–
સ્તનદ્વયીદુર્લલિત: સ બાલકઃ।
શનૈઃ શનૈઃ શ્રાવિતવેણુનિસ્વનો
વિલાસવેષેણ પુરઃ પ્રતીયતામ્

(વંશસ્થવિલા)
અતિભૂમિમભૂમિમેવ વા
વચસાં વાસિતવલ્લવીસ્તનમ્।
મનસામપરં રસાયનં
મધુરાદ્વૈતમુપાસ્મહે મહઃ

(વિયોગિની)
જનનાન્તરેઽપિ જગદેકમણ્ડને
કમનીયધામ્નિ કમલાયતેક્ષણે।
વ્રજસુન્દરીજનવિલોચનામૃતે
ચપલાનિ સન્તુ સકલેન્દ્રિયાણિ મે

(કલહંસ)
મુનિશ્રેણીવન્દ્યં મદભરલસદ્વલ્લવવધૂ–
સ્તનશ્રોણીબિમ્બસ્તિમિતનયનામ્ભોજસુભગમ્।
પુનઃ શ્લાઘાભૂમિં પુલકિતગિરાં નૈગમગિરાં
ઘનશ્યામં વન્દે કિમપિ મહનીયાકૃતિ મહઃ

(શિખરિણી)
અનુચુમ્બતામપિ ચલેન ચેતસા
મનુજાકૃતેર્મધુરિમાશ્રિયં વિભોઃ।
અયિ દેવ કૃષ્ણ દયિતેતિ જલ્પતા–
મપિ નો ભવેયુરપિ નામ તાદૃશઃ

(મઞ્જુભાષિણી)
કિશોરવેષેણ કૃશોદરીદૃશાં
વિશેષદૃશ્યેન વિશાલલોચનમ્।
યશોદયા લબ્ધયશોનવામ્બુધે–
ર્નિશામયે નીલનિશાકરં કદા

(વંશસ્થવિલા)
પ્રકૃતિરવતુ નો વિલાસલક્ષ્મ્યાઃ
પ્રકૃતિજડં પ્રણતાપરાધવીથ્યામ્।
સુકૃતિકૃતપદં કિશોરભાવે
સુકૃતિકૃતપ્રણિધાનપાત્રમોજઃ

(પુષ્પિતાગ્રા)
અપહસિતસુધામદાવલેપૈ–
રધિકમનોહરમાર્દ્રમન્દહાસૈઃ।
વ્રજયુવતિવિલોચનાવલેહ્યં
રમયતુ ધામ રમાવરોધનં નઃ

(પુષ્પિતાગ્રા)
અઙ્કૂરિતસ્મેરદશાવિશેષૈ–
રશ્રાન્તહર્ષામૃતવર્ષમક્ષ્ણામ્।
સંક્રીડતાં ચેતસિ ગોપકન્યા–
ધન્યસ્તનસ્વસ્ત્યયનં મહો નઃ

(ઇન્દ્રવજ્રા)
મૃગમદપઙ્કસઙ્કરવિશેષિતવન્યમહા–
ગિરિતટગણ્ડગૈરિકઘનદ્રવવિદ્રુમિતમ્।
અજિતભુજાન્તરં ભજત ગોપવધૂપૃથુલ–
સ્તનકલશસ્થલીઘુસૃણમર્દનકર્દમિતમ્

(કોકિલકા)
આમૂલપલ્લવિતલીલમપાઙ્ગજાલૈ–
રાસિઞ્ચતી ભુવનમાદૃતગોપવેષા।
બાલ્યાકૃતિર્મૃદુલમુગ્ધમુખેન્દુબિમ્બા
માધુર્યસિદ્ધિરવતાન્મધુવિદ્વિષો નઃ

(વસન્તતિલકા)
વિરણન્મણિનૂપુરં વ્રજે
ચરણામ્ભોજમુપાસ્વ શાર્ઙ્ગિણઃ।
સરસે સરસિ શ્રિયાશ્રિતં
કમલં વા કલહંસનાદિતમ્

(વિયોગિની)
શરણમશરણાનાં શારદામ્ભોજનેત્રં
નિરવધિમધુરિમ્ણા નીલવેષેણ રમ્યમ્।
સ્મરશરપરતન્ત્રસ્મેરનેત્રામ્બુજાભિ–
ર્વ્રજયુવતિભિરવ્યાદ્બ્રહ્મ સંવેષ્ટિતં નઃ

(માલિની)
સુવ્યક્તકાન્તિભરસૌરભદિવ્યગાત્ર–
મવ્યક્તયૌવનપરીતકિશોરભાવમ્।
ગવ્યાનુપાલનવિધાવનુશિષ્ટમવ્યા–
દવ્યાજરમ્યમખિલેશ્વરવૈભવં નઃ

(વસન્તતિલકા)
અનુગતમમરીણામમ્બરાલમ્બિનીનાં
નયનમધુરિમશ્રીનર્મનિર્માણસીમ્નામ્।
વ્રજયુવતિવિલાસવ્યાપૃતાપાઙ્ગમવ્યાત્
ત્રિભુવનસુકુમારં દેવકૈશોરકં નઃ

(માલિની)
આપાદમાચૂડમતિપ્રસક્તૈ–
રાપીયમાના યમિનાં મનોભિઃ।
ગોપીજનજ્ઞાતરસાવતાદ્વો
ગોપાલભૂપાલકુમારમૂર્તિઃ

(ઇન્દ્રવજ્રા)
દિષ્ટ્યા વૃન્દાવનમૃગદૃશાં વિપ્રયોગાકુલાનાં
પ્રત્યાસન્નં પ્રણયચપલાપાઙ્ગવીચીતરઙ્ગૈઃ।
લક્ષ્મીલીલાકુવલયદલશ્યામલં ધામકામા–
ન્પુષ્ણીયાદ્વઃ પુલકમુકુલાભોગભૂષાવિશેષમ્

(મન્દ્રાક્રાન્તા)
જયતિ ગુહશિખીન્દ્રપિઞ્છમૌલિઃ
સુરગિરિગૈરિકકલ્પિતાઙ્ગરાગઃ।
સુરયુવતિવિકીર્ણસૂનવર્ષ–
સ્નપિતવિભૂષિતકુન્તલઃ કુમારઃ

(પુષ્પિતાગ્રા)
મધુરમન્દશુચિસ્મિતમઞ્જુલં
વદનમઙ્ગજમઙ્ગજવેલ્લિતમ્।
વિજયતાં વ્રજબાલવધૂજન–
સ્તનતટીવિલુઠન્નયનં વિભોઃ

(કલહંસ)
અલસવિલસન્મુગ્ધસ્નિગ્ધસ્મિતં વ્રજસુન્દરી–
મદનકદનસ્વિન્નં ધન્યં મહદ્વદનામ્બુજમ્।
તરુણમરુણજ્યોત્સ્નાકાર્ત્સ્ન્યસ્મિતસ્નપિતાધરં
જયતિ વિજયશ્રેણીમેણીદૃશાં મદયન્મહઃ

(હરિણી)
રાધાકેલિકટાક્ષવીક્ષિતમહાવક્ષઃસ્થલીમણ્ડના
જીયાસુઃ પુલકાઙ્કુરાસ્ત્રિભુવનાસ્વાદીયસસ્તેજસઃ।
ક્રીડાન્તપ્રતિસુપ્તદુગ્ધતનયામુગ્ધાવબોધક્ષણ–
ત્રાસારૂઢદૃઢોપગૂહગહના: સામ્રાજ્યસાન્દ્રશ્રિયઃ

(શાર્દૂલવિક્રીડિતમ્)
સ્મિતસ્નુતસુધાધરા મદશિખણ્ડિબર્હાઙ્કિતા
વિશાલનયનામ્બુજા વ્રજવિલાસિનીવાસિતાઃ।
મનોજ્ઞમુખપઙ્કજા મધુરવેણુનાદદ્રવા
જયન્તિ મમ ચેતસશ્ચિરમુપાસિતા વાસનાઃ

(પૃથ્વી)
જીયાદસૌ શિખિશિખણ્ડકૃતાવતંસા
સાંસિદ્ધિકી સરસકાન્તિસુધાસમૃદ્ધિઃ।
યદ્બિન્દુલેશકણીકાપરિણામભાગ્યાત્
સૌભાગ્યસીમપદમઞ્ચતિ પઞ્ચબાણઃ

(વસન્તતિલકા)
આયામેન દૃશોર્વિશાલતરયોરક્ષય્યમાર્દ્રસ્મિત–
ચ્છાયાધર્ષિતશારદેન્દુલલિતં ચાપલ્યમાત્રં શિશોઃ।
આયાસાનપરાન્વિધૂય રસિકૈરાસ્વાદ્યમાનં મુહુ–
ર્જીયાદુન્મદવલ્લવીકુચભરાધારં કિશોરં મહઃ

(શાર્દૂલવિક્રીડિતમ્)
સ્કન્ધાવારપદં વ્રજઃ કતિપયે ગોપાસ્સહાયાદયઃ
સ્કન્ધાલમ્બિનિ વત્સદામ્નિ ધનદા ગોપાઙ્ગનાસ્સ્વાઙ્ગનાઃ।
શૃઙ્ગારા ગિરિગૈરિકં શિવ શિવ શ્રીમન્તિ બર્હાણિ વા
શૃઙ્ગગ્રાહિકયા તથાપિ તદિદં પ્રાહુસ્ત્રિલોકેશ્વરમ્

(શાર્દૂલવિક્રીડિતમ્)
શ્રીમદ્બર્હિશિખણ્ડમણ્ડનજુષે શ્યામાભિરામત્વિષે
લાવણ્યૈકરસાવસિક્તવપુષે લક્ષ્મીસરઃપ્રાવૃષે।
લીલાકૃષ્ટરસજ્ઞધર્મમનસે લીલામૃતસ્રોતસે
કે વા ન સ્પૃહયન્તિ હન્ત મહસે ગોપીજનપ્રેયસે

(શાર્દૂલવિક્રીડિતમ્)
આપાટલાધરમધીરવિલોલનેત્ર–
મામોદનિર્ભરિતમદ્ભુતકાન્તિપૂરમ્।
આવિસ્મિતામૃતમનુસ્મૃતિલોભનીય–
મામુદ્રિતાનનમહો મધુરં મુરારેઃ

(વસન્તતિલકા)
જાગૃહિ જાગૃહિ ચેતો
ન ચિરાય કૃતાર્થતા ભવતઃ।
અનુભૂયતામિદમિદં
પુરઃ સ્થિતં પૂર્ણનિર્વાણમ્

(આર્યા)
ચરણયોરરુણં કરુણાર્દ્રયોઃ
કચભરે બહુલં વિપુલં દૃશોઃ।
વપુષિ મઞ્જુલમઞ્જનમેચકે
વયસિ બાલમહો મધુરં મહઃ

(દ્રુતવિલમ્બિતમ્)
માલાબર્હમનોજ્ઞકુન્તલભરાં વન્યપ્રસૂનોક્ષિતાં
શૈલેયદ્રવકૢપ્તચિત્રતિલકાં શશ્વન્મનોહારિણીમ્
લીલાવેણુરવામૃતૈકરસિકાં લાવણ્યલક્ષ્મીમયીં
બાલાં બાલતમાલનીલવપુષં વન્દે પરાં દેવતામ્

(શાર્દૂલવિક્રીડિતમ્)
ગુરુ મૃદુપદે ગૂઢં ગુલ્ફે ઘનં જઘનસ્થલે
નલિનમુદરે વીરં બાહ્વોર્વિશાલમુરઃસ્થલે।
મધુરમધરે મુગ્ધં વક્ત્રે વિશાલવિલોચને
બહુ કચભરે વન્યં વેષે મનોજ્ઞમહો મહઃ

(હરિણી)
જિહાનં જિહાનં નુ જાનેન મૌગ્ધ્યં
દુહાનં દુહાનં સુધાં વેણુનાદૈઃ।
લિહાનં લિહાનં સુદીર્ઘૈરપાઙ્ગૈ–
ર્મહાનન્દસર્વસ્વમેકં નમેત્તમ્

(ભુજઙ્ગપ્રયાતમ્)
લસદ્બર્હાપીડં લલિતલલિતસ્મેરવદનં
ભ્રમત્ક્રીડાપાઙ્ગં પ્રણતજનતાનિર્વૃતિપદમ્।
નવામ્ભોદશ્યામં નિજમધુરિમાભોગભરિતં
પરં દેવં વન્દે પરિમિલિતકૈશોરકરસમ્

(શિખરિણી)
સારસ્યસામગ્ર્યમિવાનનેન
માધુર્યચાતુર્યમિવ સ્મિતેન।
તારુણ્યકારુણ્યમિવેક્ષણેન
ચાપલ્યસાફલ્યમિદં દૃશોર્મે

(ઇન્દ્રવજ્રા)
યત્ર વા તત્ર વા દેવ
યદિ વિશ્વસિમસ્ત્વયિ।
નિર્વાણમપિ દુર્વારમ્–
અર્વાચીનાનિ કિં પુનઃ॥ *
(અનુષ્ટુપ્શ્લોકમ્)
રાગાન્ધગોપીજનવન્દિતાભ્યાં
યોગીન્દ્રભૃઙ્ગેન્દ્રનિષેવિતાભ્યામ્।
આતામ્રપઙ્કેરુહવિભ્રમાભ્યાં
સ્વામિન્ પદાભ્યામયમઞ્જલિસ્તે

(ઇન્દ્રવજ્રા)
અર્ધાનુલાપાન્વ્રજસુન્દરીણા–
મકૃત્રિમાણાં ચ સરસ્વતીનામ્।
આર્દ્રાશયેન શ્રવણાઞ્ચલેન
સંભાવયન્તં તરુણં ગૃણીમઃ

(ઉપજાતિ)
મનસિ મમ સંનિધત્તાં
મધુરમુખા મન્થરાપાઙ્ગા।
કરકલિતલલિતવંશા
કાપિ કિશોરી કૃપાલહરી

(ઉપગીતિ)
રક્ષન્તુ નઃ શિક્ષિતપાશુપાલ્યા
બાલાવૃતા બર્હિશિખાવતંસાઃ।
પ્રાણપ્રિયપ્રસ્તુતવેણુગીતાઃ
શીતા દૃશોઃ શીતલગોપકન્યાઃ

(ઇન્દ્રવજ્રા)
સ્મિતસ્તબકિતાધરં શિશિરવેણુનાદામૃતં
મુહુસ્તરલલોચનં મદકટાક્ષમાલાકુલમ્।
ઉરસ્તટવિલીનયા કમલયા સમાલિઙ્ગિતં
ભુવ:સ્થલમુપાગતં ભુવનદૈવતં પાતુ નઃ

(પૃથ્વી)
નયનામ્બુજે ભજત કામદુઘં
હૃદયામ્બુજે કિમપિ કારુણિકમ્।
ચરણામ્બુજે મુનિકુલૈકધનં
વદનામ્બુજે વ્રજવધૂવિભવમ્

(પ્રમિતાક્ષરા)
નિર્વાસનં હન્ત રસાન્તરાણાં
નિર્વાણસામ્રાજ્યમિવાવતીર્ણમ્।
અવ્યાજમાધુર્યમહાનિધાન–
મવ્યાદ્વ્રજાનામધિદૈવતં નઃ

(ઇન્દ્રવજ્રા)
ખેલતાં મનસિ ખેચરાઙ્ગના–
માનનીયમૃદુવેણુનિ:સ્વનૈઃ।
કાલમેઘકલહોદ્વહં મહઃ
કાનને કિમપિ નઃ કૃપાસ્પદં

(રથોદ્ધતા)
ગોપીનામભિમતગીતવેષહર્ષા–
દાપીનસ્તનભરનિર્ભરોપગૂઢમ્।
કેલીનામવતુ રસૈરુપાસ્યમાનં
કાલિન્દીપુલિનચરં પરં મહો નઃ

(પ્રહર્ષિણી)
એણીશાબવિલોચનાભિરલસશ્રોણીભરપ્રૌઢિભિ–
ર્વેણીભૂતરસક્રમાભિરભિત: શ્રેણીકૃતાભિર્વૃતાઃ।
પાણી નામ વિનોદયન્રતિપતેસ્તૂણીશયૈઃ સાયકૈ–
ર્વાણીનામપદં પરં વ્રજજનક્ષોણીપતિઃ પાતુ નઃ

(શાર્દૂલવિક્રીડિતમ્)
કાલિન્દીપુલિને તમાલનિબિડચ્છાયે પુરઃસંચર–
ત્તોયે તોયજપત્રપાત્રનિહિતં દધ્યન્નમશ્નાતિ યઃ।
વામે પાણિતલે નિધાય મધુરં વેણું વિષાણં કટિ–
પ્રાન્તે ગાશ્ચ વિલોકયન્પ્રતિકલં તં બાલમાલોકયે

(શાર્દૂલવિક્રીડિતમ્)
યદ્ગોપીવદનેન્દુમણ્ડનમભૂત્કસ્તૂરિકાપત્રકં
યલ્લક્ષ્મીકુચશાતકુંભકલશે વ્યાકોચમિન્દીવરમ્।
યન્નિર્વાણનિધાનસાધનવિધૌ સિદ્ધાઞ્જનં યોગિનાં
તન્નઃ શ્યામલમાવિરસ્તુ હૃદયે કૃષ્ણાભિધાનં મહઃ

(શાર્દૂલવિક્રીડિતમ્)
ફુલ્લેન્દીવરકાન્તિમિન્દુવદનં બર્હાવતંસપ્રિયં
શ્રીવત્સાઙ્કમુદારકૌસ્તુભધરં પીતામ્બરં સુન્દરમ્।
ગોપીનાં નયનોત્પલાર્ચિતતનું ગોગોપસઙ્ઘાવૃતં
ગોવિન્દં કલવેણુનાદનિરતં દિવ્યાઙ્ગભૂષં ભજે

(શાર્દૂલવિક્રીડિતમ્)
યન્નાભીસરસીરુહાન્તરપુટે ભૃઙ્ગાયમાનો વિધિ–
ર્યદ્વક્ષઃ કમલાવિલાસસદનં યચ્ચક્ષુષી ચેન્દ્વિનૌ।
યત્પાદાબ્જવિનિઃસૃતા સુરનદી શમ્ભોઃ શિરોભૂષણં
યન્નામસ્મરણં ધુનોતિ દુરિતં પાયાત્ સ નઃ કેશવઃ॥ *
(શાર્દૂલવિક્રીડિતમ્)
રક્ષન્તુ ત્વામસિતજલજૈરઞ્જલિઃ પાદમૂલે
મીના નાભીસરસિ હૃદયે મારબાણા મુરારેઃ।
હારાઃ કણ્ઠે હરિમણિમયા વક્ત્રપદ્મે દ્વિરેફાઃ
પિઞ્છાચૂડાસ્ચિકુરનિચયે ઘોષયોષિત્કટાક્ષાઃ

(મન્દાક્રાન્તા)
દધિમથનનિનાદૈસ્ત્યક્તનિદ્રઃ પ્રભાતે
નિભૃતપદમગારં વલ્લવીનાં પ્રવિષ્ટઃ।
મુખકમલસમીરૈરાશુ નિર્વાપ્ય દીપાન્
કબલિતનવનીતઃ પાતુ ગોપાલબાલઃ

(માલિની)
પ્રાતઃ સ્મરામિ દધિઘોષવિધૂતનિદ્રં
નિદ્રાવસાનરમણીયમુખારવિન્દમ્।
હૃદ્યાનવદ્યવપુષં નયનાભિરામ–
મુન્નિદ્રપદ્મનયનં નવનીતચોરમ્

(વસન્તતિલકા)
ફુલ્લહલ્લકવતંસકોજ્જ્વલ–
દ્ગલ્લમાગમગવીગવેષિતમ્।
વલ્લવીચિકુરવાસિતાઙ્ગુલી–
પલ્લવં કમપિ વલ્લવં ભજે

(રથોદ્ધતા)
સ્તેયં હરેર્હરતિ યન્નવનીતચૌર્યં
જારત્વમસ્ય ગુરુતલ્પકૃતાપરાધમ્।
હત્યાં દશાનનહતિર્મધુપાનગોષ્ઠીં
યત્પૂતનાસ્તનપયઃ સ પુનાતુ કૃષ્ણઃ

(વસન્તતિલકા)
માર મારમ મદીયમાનસે
માધવૈકનિલયે યદૃચ્છયા।
હે રમારમણ વાર્યતામસૌ
કઃ સહેત નિજવેશ્મલઙ્ઘનમ્

(રથોદ્ધતા)
આકુઞ્ચિતં જાનુ કરં ચ વામં
ન્યસ્યાવનૌ દક્ષિણહસ્તપદ્મે।
આલોકયન્તં નવનીતખણ્ડં
બાલં ભજે કૃષ્ણમુપાનતાઙ્ગમ્

(ઇન્દ્રવજ્રા)
મન્દારમૂલે મદનાભિરામં
બિમ્બાધરાપૂરિતવેણુનાદમ્।
ગોગોપગોપીજનમધ્યસંસ્થં
ગોપં ભજે ગોકુલપૂર્ણચન્દ્રમ્

(ઇન્દ્રવજ્રા)
જાનુભ્યામભિધાવન્તં
બાહુભ્યામપિ સુન્દરમ્।
સકુણ્ડલાલકં બાલં
ગોપાલં ચિન્તયેદુષઃ

(અનુષ્ટુપ્શ્લોકમ્)
વિહાય કોદણ્ડશરૌ મુહૂર્તં
ગૃહાણ પાણૌ મણિચારુવેણુમ્।
મયૂરબર્હં ચ નિજોત્તમાઙ્ગે
સીતાપતે રાઘવ રામચન્દ્ર

(ઉપજાતિ)
અયં ક્ષીરામ્ભોધેઃ પતિરિતિ ગવાં પાલક ઇતિ
શ્રિતોઽસ્માભિઃ ક્ષીરોપનયનધિયા ગોપતનયઃ।
અનેન પ્રત્યૂહો વ્યરચિ સતતં યેન જનની–
સ્તનાદપ્યસ્માકં સકૃદપિ પયો દુર્લભમભૂત્

(શિખરિણી)
હસ્તમાક્ષિપ્ય યાતોઽસિ
બલાત્કૃષ્ણ કિમદ્ભુતમ્।
હૃદયાદ્યદિ નિર્યાસિ
પૌરુષં ગણયામિ તે

(અનુષ્ટુપ્શ્લોકમ્)
તમસિ રવિરિવોદ્યન્મજ્જતામમ્બુરાશૌ
પ્લવ ઇવ તૃષિતાનાં સ્વાદુવર્ષીવ મેઘઃ।
નિધિરિવ નિધનાનાં દીર્ઘતીવ્રામયાનાં
ભિષગિવ કુશલં નો દાતુમાયાતુ શૌરિઃ

(માલિની)
કોદણ્ડં મસૃણં સુગન્ધિ વિશિખં ચક્રાબ્જપાશાઙ્કુશં
હૈમીં વેણુલતાં કરૈશ્ચ દધતં સિન્દૂરપુઞ્જારુણમ્।
કંદર્પાધિકસુન્દરં સ્મિતમુખં ગોપાઙ્ગનાવેષ્ટિતં
ગોપાલં મદનાધિપં તમભજં ત્રૈલોક્યરક્ષામણિમ્

(શાર્દૂલવિક્રીડિતમ્)
સાયઙ્કાલે વનાન્તે કુસુમિતસમયે સૈકતે ચન્દ્રિકાયાં
ત્રૈલોક્યાકર્ષણાઙ્ગં સુરનરગણિકામોહનાપાઙ્ગમૂર્તિમ્।
સેવ્યં શૃઙ્ગારભાવૈર્નવરસભરિતૈર્ગોપકન્યાસહસ્રૈ–
ર્વન્દેઽહં રાસકેલીરતમતિસુભગં વશ્યગોપાલકૃષ્ણમ્

(સ્રગ્ધરા)
કદમ્બમૂલે ક્રીડન્તં
વૃન્દાવનનિવેશિતમ્।
પદ્માસનસ્થિતં વન્દે
વેણું ગાયન્તમચ્યુતમ્॥ *
(અનુષ્ટુપ્શ્લોકમ્)
બાલં નીલામ્બુદાભં નવમણિવિલસત્કિઙ્કિણીજાલબદ્ધ–
શ્રોણીજઙ્ઘાન્તયુગ્મં વિપુલરુરુનખપ્રોલ્લસત્કણ્ઠભૂષમ્।
ફુલ્લામ્ભોજાભવક્ત્રં હતશકટમરુત્પૂતનાદ્યં પ્રસન્નં
ગોવિન્દં વન્દિતેન્દ્રાદ્યમરવરમજં પૂજયેદ્વાસરાદૌ

(સ્રગ્ધરા)
વન્દ્યં દેવૈર્મુકુન્દં વિકસિતકુરુવિન્દાભમિન્દીવરાક્ષં
ગોપીગોબૃન્દવીતં જિતરિપુનિવહં કુન્દમન્દારહાસમ્।
નીલગ્રીવાગ્ર્યપિઞ્છાકલનસુવિલસત્કુન્તલં ભાનુમન્તં
દેવં પીતામ્બરાઢ્યં યજ યજ દિનશસ્તં રમાયૈ મુકુન્દમ્

(સ્રગ્ધરા)
ચક્રાન્તધ્વસ્તવૈરિવ્રજમજિતમપાસ્તાવનીભારમાદ્યૈ–
રાવીતં નારદાદ્યૈર્મુનિભિરભિનુતં તત્વનિર્ણીતિહેતોઃ।
મન્ત્રી તં નિર્મલાઙ્ગં નિરુપમરુચિરં ચિન્તયેન્નીલભાસં
સાયં વિશ્વોદયસ્થિત્યપહરણપદં મુક્તિદં વાસુદેવમ્

(સ્રગ્ધરા)
કોદણ્ડમૈક્ષવમખણ્ડમિષું ચ પૌષ્પં
ચક્રાબ્જપાશસૃણિકાઞ્ચનવંશનાલમ્।
વિભ્રાણમષ્ટવિધબાહુભિરર્કવર્ણં
ધ્યાયેદ્ધરિં મદનગોપવિલાસવેષમ્

(વસન્તતિલકા)
અઙ્ગુલ્યા કઃ કવાટં પ્રહરતિ કુટિલે માધવઃ કિં વસન્તો
નો ચક્રી કિં કુલાલો ન હિ ધરણિધરઃ કિં દ્વિજિહ્વઃ ફણીન્દ્રઃ।
નાહં ઘોરાહિમર્દી કિમસિ ખગપતિર્નો હરિઃ કિં કપીન્દ્રઃ
ઇત્યેવં ગોપકન્યાપ્રતિવચનજિતઃ પાતુ વશ્ચક્રપાણિઃ॥ *
(સ્રગ્ધરા)
રાધામોહનમન્દિરાદુપગતશ્ચન્દ્રાવલીમૂચિવાન્
રાધે ક્ષેમમિહેસ્તિ તસ્ય વચનં શ્રુત્વાઽહ ચન્દ્રાવલી।
કંસ ક્ષેમમયે વિમુગ્ધહૃદયે કંસઃ ક્વ દૃષ્ટસ્ત્વયા
રાધા ક્વેતિ વિલજ્જિતો નતમુખઃ સ્મેરો હરિઃ પાતુ વઃ॥ *
(શાર્દૂલવિક્રીડિતમ્)
યા પ્રીતિર્વિદુરાર્પિતે મુરરિપો કુન્ત્યર્પિતે યાદૃશી
યા ગોવર્ધનમૂર્ધ્નિ યા ચ પૃથુકે સ્તન્યે યશોદાર્પિતે।
ભારદ્વાજસમર્પિતે શબરિકાદત્તેઽધરે યોષિતાં
યા પ્રીતિર્મુનિપત્નિભક્તિરચિતેઽપ્યત્રાપિ તાં તાં કુરુ

(શાર્દૂલવિક્રીડિતમ્)
કૃષ્ણાનુસ્મરણાદેવ
પાપસઙ્ઘાતપઞ્ચરઃ।
શતધા મોઘમાયાતિ
ગિરિર્વજ્રહતો યથા॥ *
(અનુષ્ટુપ્શ્લોકમ્)
યસ્યાત્મભૂતસ્ય ગુરોઃ પ્રસાદા–
દહં વિમુક્તોઽસ્મિ શરીરબન્ધાત્।
સર્વોપદેષ્ટુઃ પુરુષોત્તમસ્ય
તસ્યાંઘ્રિપદ્મં પ્રણતોઽસ્મિ નિત્યમ્॥ *
(ઉપજાતિ)
ઇતિ શ્રીકૃષ્ણકર્ણામૃતે તૃતીયાશ્વાસઃ સમાપ્તઃ॥
ઇતિ શ્રીકૃષ્ણકર્ણામૃતં સમાપ્તમ્॥
સમ્બદ્ધાનુબન્ધાઃ
શ્રીવેઙ્કટેશસુપ્રભાતમ્
શ્રીવેઙ્કટેશસ્તોત્રમ્
શ્રીવેઙ્કટેશપ્રપત્તિઃ
શ્રીવેઙ્કટેશમઙ્ગલાશાસનમ્
શ્રીકામાક્ષીસુપ્રભાતમ્
શ્રીકાશીવિશ્વનાથસુપ્રભાતમ્
શ્રીવિષ્ણુસહસ્રનામસ્તોત્રમ્‌