Skanda Purana · Verses 7.44-2

// sūta uvāca // //
etatpurāṇamakhilaṃ purā skandena bhāṣitam //
bhṛgave brahmaputrāya tasmāllebhe tathāṃ'girāḥ

tataśca cyavanaḥ prāpa ṛcīkaśca tato muniḥ //
evaṃ paraṃparā prāptaṃ sarveṣu bhuvaneṣvapi

skāndaṃ purāṇametacca kumāreṇa puroddhṛtam //
yaḥ śṛṇoti satāṃ madhye naraḥ pāpādvimucyate

idaṃ purāṇamāyuṣyaṃ caturvarṇasukhapradam //
nirmitaṃ ṣaṇmukheneha niyataṃ sumahātmanā

evametatsamākhyātamākhyānaṃ bhadramastu vaḥ

maṇḍitaṃ saptabhiḥ khaṇḍaiḥ skāndaṃ yaḥ śṛṇuyānnaraḥ //
na tasya puṇyasaṃkhyānaṃ kartuṃ śakyeta kenacit

ya idaṃ dharmamāhātmyaṃ brāhmaṇāya prayacchati //
svargaloke vasettāvadyāvadakṣarasaṃkhyayā

yathā hi varṣato dhārā yathā vā divi tārakāḥ //
gaṃgāyāṃ sikatā yadvattadvatsaṃkhyā na vidyate

yo naraḥ śṛṇuyādbhaktyā dināni ca kiyanti vai //
sarvārthasiddho bhavati ya etatpaṭhate naraḥ

putrārthī labhate putrāndhanārthī labhate dhanam //
labhate patikāmā yā patiṃ kanyā manoramam

samāgamaṃ labhante ca bāndhavāśca pravāsibhiḥ //
skāndaṃ purāṇaṃ śrutvā tu pumānāpnoti vāñchitam

śṛṇvataḥ paṭhataścaiva sarvakāmapradaṃ nṛṇām

puṇyaṃ śrutvā purāṇaṃ vai dīrghamāyuśca vindati//
mahīṃ vijayate rājā śatrūṃścāpyadhitiṣṭhati

vedavicca bhavidvipraḥ kṣatriyo rājyamāpnuyāt//
dhanaṃ dhānyaṃ tathā vaiśyaḥ śūdraḥ sukhamavāpnuyāt

adhyāyamekaṃ śṛṇuyācchlokaṃ ślokārdhameva vā//
yaḥ ślokapādaṃ śṛṇuyādviṣṇulokaṃ sa gacchati

śrutvā purāṇametaddhi vācakaṃ yastu pūjayet//
tena brahmā ca viṣṇuśca rudraścaiva prapūjitaḥ

ekamapyakṣaraṃ yastu guruḥ śiṣye nivedayet //
pṛthivyāṃ nāsti taddravyaṃ yaddattvā hyanṛṇī bhavet

ataḥ saṃpūjanīyastu vyāsaḥ śāstropadeśakaḥ //
gobhū hiraṇyavastrādyairbhojanaiḥ sārvakāmikaiḥ

ya evaṃ bhaktiyuktastu śrutvā śāstramanuttamam //
pūjayedupadeṣṭāraṃ sa śaivaṃ padamāpnuyāt

purāṇaśra vaṇādeva anekabhavasaṃcitam //
pāpaṃ praśamamāyāti sarvatīrthaphalaṃ labhet

amṛtenodarasthena mriyante sarvadevatāḥ //
kaṇṭhasthitaviṣeṇāpi yo jīvati sa pātu vaḥ

// vyāsa uvāca // //
ityuktvoparate sūte śaunakādi maharṣayaḥ //
saṃpūjya vidhivatsūtaṃ praśasyāthābhyanandayan //

ṛṣaya ūcuḥ // //
kathito bhavatā sargaḥ pratisargastathaiva ca //
vaṃśānuvaṃśacaritaṃ purāṇānāmanukramaḥ

manvantarapramāṇaṃ ca brahmāṇḍasya ca vistaraḥ //
jyotiścakrasvarūpaṃ ca yathāvadanuvarṇitam

dhanyāḥ sma kṛtakṛtyāḥ sma vayaṃ tava mukhāmbujāt //
skāndaṃ mahāpurāṇa hi śrutvā sūtātiharṣitāḥ

vayaṃ maharṣayo viprāḥ pradadmo'dya tavā''śiṣaḥ //
vyāsaśiṣya mahāprājña ciraṃ jīva sukhī bhava

iti dattvā''śiṣastasmai dattvā vāsovibhūṣaṇam //
visṛjya lomaśaṃ sūtaṃ yajñakarmāṇyathācaran

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye skandamahāpurāṇaśravaṇapaṭhanapustakapradānapaurāṇikavyāsapūjanamāhātmyavarṇanapūrvakaṃ samastaskāndamahā purāṇagranthasamāptyupasaṃhārasūtasatkāravṛttāntavarṇanaṃnāma catuścatvāriṃśattamo'dhyāyaḥ

iti śrīskānde mahāpurāṇe saptame prabhāsakhaṇḍe caturthaṃ dvārakāmāhātmyaṃ sampūrṇam // (७-४) //
// iti śrīskānde mahāpurāṇe saptamaṃ prabhāsakhaṇḍaṃ sampūrṇam