સ્કંદ પુરાણ · શ્લોક 7.44-2

॥ સૂત ઉવાચ ॥ ॥
એતત્પુરાણમખિલં પુરા સ્કન્દેન ભાષિતમ્ ॥
ભૃગવે બ્રહ્મપુત્રાય તસ્માલ્લેભે તથાંઽગિરાઃ

તતશ્ચ ચ્યવનઃ પ્રાપ ઋચીકશ્ચ તતો મુનિઃ ॥
એવં પરંપરા પ્રાપ્તં સર્વેષુ ભુવનેષ્વપિ

સ્કાન્દં પુરાણમેતચ્ચ કુમારેણ પુરોદ્ધૃતમ્ ॥
યઃ શૃણોતિ સતાં મધ્યે નરઃ પાપાદ્વિમુચ્યતે

ઇદં પુરાણમાયુષ્યં ચતુર્વર્ણસુખપ્રદમ્ ॥
નિર્મિતં ષણ્મુખેનેહ નિયતં સુમહાત્મના

એવમેતત્સમાખ્યાતમાખ્યાનં ભદ્રમસ્તુ વઃ

મણ્ડિતં સપ્તભિઃ ખણ્ડૈઃ સ્કાન્દં યઃ શૃણુયાન્નરઃ ॥
ન તસ્ય પુણ્યસંખ્યાનં કર્તું શક્યેત કેનચિત્

ય ઇદં ધર્મમાહાત્મ્યં બ્રાહ્મણાય પ્રયચ્છતિ ॥
સ્વર્ગલોકે વસેત્તાવદ્યાવદક્ષરસંખ્યયા

યથા હિ વર્ષતો ધારા યથા વા દિવિ તારકાઃ ॥
ગંગાયાં સિકતા યદ્વત્તદ્વત્સંખ્યા ન વિદ્યતે

યો નરઃ શૃણુયાદ્ભક્ત્યા દિનાનિ ચ કિયન્તિ વૈ ॥
સર્વાર્થસિદ્ધો ભવતિ ય એતત્પઠતે નરઃ

પુત્રાર્થી લભતે પુત્રાન્ધનાર્થી લભતે ધનમ્ ॥
લભતે પતિકામા યા પતિં કન્યા મનોરમમ્

સમાગમં લભન્તે ચ બાન્ધવાશ્ચ પ્રવાસિભિઃ ॥
સ્કાન્દં પુરાણં શ્રુત્વા તુ પુમાનાપ્નોતિ વાઞ્છિતમ્

શૃણ્વતઃ પઠતશ્ચૈવ સર્વકામપ્રદં નૃણામ્

પુણ્યં શ્રુત્વા પુરાણં વૈ દીર્ઘમાયુશ્ચ વિન્દતિ॥
મહીં વિજયતે રાજા શત્રૂંશ્ચાપ્યધિતિષ્ઠતિ

વેદવિચ્ચ ભવિદ્વિપ્રઃ ક્ષત્રિયો રાજ્યમાપ્નુયાત્॥
ધનં ધાન્યં તથા વૈશ્યઃ શૂદ્રઃ સુખમવાપ્નુયાત્

અધ્યાયમેકં શૃણુયાચ્છ્લોકં શ્લોકાર્ધમેવ વા॥
યઃ શ્લોકપાદં શૃણુયાદ્વિષ્ણુલોકં સ ગચ્છતિ

શ્રુત્વા પુરાણમેતદ્ધિ વાચકં યસ્તુ પૂજયેત્॥
તેન બ્રહ્મા ચ વિષ્ણુશ્ચ રુદ્રશ્ચૈવ પ્રપૂજિતઃ

એકમપ્યક્ષરં યસ્તુ ગુરુઃ શિષ્યે નિવેદયેત્ ॥
પૃથિવ્યાં નાસ્તિ તદ્દ્રવ્યં યદ્દત્ત્વા હ્યનૃણી ભવેત્

અતઃ સંપૂજનીયસ્તુ વ્યાસઃ શાસ્ત્રોપદેશકઃ ॥
ગોભૂ હિરણ્યવસ્ત્રાદ્યૈર્ભોજનૈઃ સાર્વકામિકૈઃ

ય એવં ભક્તિયુક્તસ્તુ શ્રુત્વા શાસ્ત્રમનુત્તમમ્ ॥
પૂજયેદુપદેષ્ટારં સ શૈવં પદમાપ્નુયાત્

પુરાણશ્ર વણાદેવ અનેકભવસંચિતમ્ ॥
પાપં પ્રશમમાયાતિ સર્વતીર્થફલં લભેત્

અમૃતેનોદરસ્થેન મ્રિયન્તે સર્વદેવતાઃ ॥
કણ્ઠસ્થિતવિષેણાપિ યો જીવતિ સ પાતુ વઃ

॥ વ્યાસ ઉવાચ ॥ ॥
ઇત્યુક્ત્વોપરતે સૂતે શૌનકાદિ મહર્ષયઃ ॥
સંપૂજ્ય વિધિવત્સૂતં પ્રશસ્યાથાભ્યનન્દયન્ ॥

ઋષય ઊચુઃ ॥ ॥
કથિતો ભવતા સર્ગઃ પ્રતિસર્ગસ્તથૈવ ચ ॥
વંશાનુવંશચરિતં પુરાણાનામનુક્રમઃ

મન્વન્તરપ્રમાણં ચ બ્રહ્માણ્ડસ્ય ચ વિસ્તરઃ ॥
જ્યોતિશ્ચક્રસ્વરૂપં ચ યથાવદનુવર્ણિતમ્

ધન્યાઃ સ્મ કૃતકૃત્યાઃ સ્મ વયં તવ મુખામ્બુજાત્ ॥
સ્કાન્દં મહાપુરાણ હિ શ્રુત્વા સૂતાતિહર્ષિતાઃ

વયં મહર્ષયો વિપ્રાઃ પ્રદદ્મોઽદ્ય તવાઽઽશિષઃ ॥
વ્યાસશિષ્ય મહાપ્રાજ્ઞ ચિરં જીવ સુખી ભવ

ઇતિ દત્ત્વાઽઽશિષસ્તસ્મૈ દત્ત્વા વાસોવિભૂષણમ્ ॥
વિસૃજ્ય લોમશં સૂતં યજ્ઞકર્માણ્યથાચરન્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે ચતુર્થે દ્વારકામાહાત્મ્યે સ્કન્દમહાપુરાણશ્રવણપઠનપુસ્તકપ્રદાનપૌરાણિકવ્યાસપૂજનમાહાત્મ્યવર્ણનપૂર્વકં સમસ્તસ્કાન્દમહા પુરાણગ્રન્થસમાપ્ત્યુપસંહારસૂતસત્કારવૃત્તાન્તવર્ણનંનામ ચતુશ્ચત્વારિંશત્તમોઽધ્યાયઃ

ઇતિ શ્રીસ્કાન્દે મહાપુરાણે સપ્તમે પ્રભાસખણ્ડે ચતુર્થં દ્વારકામાહાત્મ્યં સમ્પૂર્ણમ્ ॥ (૭-૪) ॥
॥ ઇતિ શ્રીસ્કાન્દે મહાપુરાણે સપ્તમં પ્રભાસખણ્ડં સમ્પૂર્ણમ્