Skanda Purana · Chapter 7.273

// īśvara uvāca // //
tato gacchenmahādevi śaṃḍatīrthamanuttamam //
sarvapāpopaśamanaṃ sarvakāmaphalapradam

tasyotpattiṃ pravakṣyāmi śṛṇuṣvaikamanāḥ priye //
purā paṃcaśirā āsīdbrahmā lokapitāmahaḥ

śirastasya mayā chinnaṃ kasmiṃścitkāraṇāṃtare //
tatra gaṃdhavatī jātā brahmaṇaḥ sā ca śoṇitaiḥ

tatrodgatā mahātālāstena tālavanaṃ smṛtam //
atha karatale lagnaṃ kapālaṃ brahmaṇo mama

śarīraṃ kṛṣṇatāṃ yātaṃ mama caiva vṛṣasya ca //
atha tīrthānyanekāni gatohaṃ pāpaśaṃkayā

na kvacidvrajate pāpaṃ tataḥ prabhāsamāgataḥ //
kṣetre tatra mayā dṛṣṭā prācī devī sarasvatī

tatra me vṛṣabhaḥ snātuṃ praviṣṭo jalamadhyataḥ //
tatkṣaṇācchvetatā prāpto muktohamapi hatyayā

karamadhye ca me lagnaṃ kapālaṃ patitaṃ tadā //
kapālamocanaścāsau liṃgarūpī sthito'bhavat

tatrāpi yo dadecchrāddhaṃ prācīdevyāstu saṃnidhau //
mātṛkaṃ paitṛkaṃ caiva tṛptaṃ kulaśataṃ tathā

bhavecca tasya tṛptistu yāvatkalpāstu saptatiḥ //
māsa āśvayuje devi kṛṣṇapakṣe caturdaśī //
tatra dadyāttu yaḥ śrāddhaṃ dakṣiṇāmūrtimāśritaḥ

yathāvittopacāreṇa supātre ca yathāvidhi //
yāvadyugasahasraṃ tu tṛptāḥ syuste pitāmahāḥ

annasuvarṇadānaṃ ca dadhikaṃbalameva ca //
tatra deyaṃ vidhānena sarvapāpopaśuddhaye

kṛṣṇarūpī vṛṣo devi yadā śvetatvamāgataḥ //
śaṃḍatīrthamitikhyātaṃ tena trailokyapūjitam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmye śaṃḍatīrthamāhātmyavarṇanaṃnāma trisaptatyuttaradviśatatamo'dhyāyaḥ