Skanda Purana · Verses 7.27-2

// īśvara uvāca // //
sthitvā dvādaśijāgare kratu same duḥkhāpahe puṇyade ramyaṃ bhāgavataṃ śṛṇoti puruṣaḥ kṛtvā hareḥ pūjanam //
puṇyaṃ vājimakhasya koṭiguṇitaṃ saṃprāpya bhaktottamaśchittvā pāśasamūha pakṣanicayaṃ prāpnoti kṛṣṇālayam

hatyāpāpasamūhakoṭinicayairgurvaṃganā- koṭibhiḥsteyairlakṣaguṇairgurorvadhakaraiḥ saṃveṣṭito yadyapi //
śrutvā bhāgavataṃ chinatti sakalaṃ kṛtvā harerjāgaraṃ muktiṃ yāti narendra nirmalavapurbhittvā ravermaṃḍalam

ekādaśī dvādaśisaṃpraviṣṭā kṛtā nabhasye śravaṇena yuktā //
viśeṣataḥ somasutena saṃgame karoti muktiṃ prapitāmahānām

yaddīyate dvādaśivāsare śubhe viṣṇuṃ samuddiśya tathā pitṝṇām //
paryyāptamiṣṭhaiḥ kratutīrthadānairbhaktyā pradattaṃ khalu merutulyam

mahānadīṃ prāpya dinaṃ ca viṣṇostoyāṃjaliṃ yastupitṝndadāti //
śrāddhaṃ kṛtaṃ tena samāḥ sahasraṃ yacchanti kāmānpitaraḥ sutṛptāḥ

śaraṇāgatānāṃ paripālanena hyannapradānena śṛṇuṣva putra //
ṛṇapradāne dvijadevatānāṃ tadvai phalaṃ jāgaraṇen viṣṇoḥ

yaḥ svarṇadhenuṃ madhunīradhenuṃ kṛṣṇājinaṃ raupyasuvarṇameru //
brahmāṃḍadānaṃ pradadāti yāti sa vai phalaṃ jāgaraṇena viṣṇoḥ

satyena śaucena damena yatphalaṃ kṣamādayādānabalena ṣaṇmukha //
daśāśvamedhairbahudakṣiṇaiśca teṣāṃ phalaṃ jāgaraṇena viṣṇoḥ

snānena yatprāpya nadīṃ vīraṣṭhāṃ yatpiṃḍadānena piturgayāyām //
yaddhemadānātkurujāṃgale ca tatsyātphalaṃ jāgaraṇena viṣṇoḥ

hatyāyutānāṃ yadi saṃcitānisteyāni rukmasya tathāmitāni //
nihaṃtyanekāni purākṛtāni śrījāgare ye prapaṭhaṃti gītam

mārgaṃ na te saurapurasya dūtānvanāṃtaraṃ ṣaṇmukha kiṃcidanyat //
svapne na paśyaṃti ca te manuṣyā yeṣāṃ gatā jāgaraṇena nidrā

kāṣāyavastraiśca jaṭābharaiśca pūrtāgnihotraiḥ kimu cānya mantraiḥ //
dharmārthakāmavaramokṣakarīṃ ca bhadrāmekāṃ bhajasva kalikālavināśinīṃ ca

ityuktapūrvaṃ kila nāradena śreyorthabuddhyā vinatāsutāya //
kṛṣṇātparaṃ nānyadihāsti daivaṃ vrataṃ tadahnaḥ paramaṃ na kiṃcit

bhobhoḥ surāḥ śṛṇuta nārada ityavocadbhobhoḥ khagendraṛṣisiddhamunīndrasaṃghāḥ //
utkṣipya bāhumatha bhaktajanena coktaṃ naikādaśīvratasamaṃ vratamasti kiṃcit

pakṣīndra pāpapuruṣā na hariṃ bhajaṃti tadbhaktiśāstraniratā na kalau bhavaṃti //
kurvaṃti mūḍhamanaso daśamīvimiśrāmekādaśīṃ śubhadinaṃ ca parityajaṃti

ārttaḥ sadā caiva sadā ca rogī pāpī sadā caiva sadā ca duḥkhī //
sadā kulaghno'tha sadā ca nārakī viddhaṃ murārerdinamāśrayettu yaḥ

iti śrīskāṃde mahāpurāṇa ekāśītisāhasryāṃ saṃhitāyā saptame prabhāsakhaṃḍe caturthe dvārakāmāhātmye dvādaśījāgaraṇasya sarvatovareṇyatvavarṇanaṃnāma saptaviṃśatitamo'dhyāyaḥ