સ્કંદ પુરાણ · શ્લોક 7.27-2

॥ ઈશ્વર ઉવાચ ॥ ॥
સ્થિત્વા દ્વાદશિજાગરે ક્રતુ સમે દુઃખાપહે પુણ્યદે રમ્યં ભાગવતં શૃણોતિ પુરુષઃ કૃત્વા હરેઃ પૂજનમ્ ॥
પુણ્યં વાજિમખસ્ય કોટિગુણિતં સંપ્રાપ્ય ભક્તોત્તમશ્છિત્ત્વા પાશસમૂહ પક્ષનિચયં પ્રાપ્નોતિ કૃષ્ણાલયમ્

હત્યાપાપસમૂહકોટિનિચયૈર્ગુર્વંગના- કોટિભિઃસ્તેયૈર્લક્ષગુણૈર્ગુરોર્વધકરૈઃ સંવેષ્ટિતો યદ્યપિ ॥
શ્રુત્વા ભાગવતં છિનત્તિ સકલં કૃત્વા હરેર્જાગરં મુક્તિં યાતિ નરેન્દ્ર નિર્મલવપુર્ભિત્ત્વા રવેર્મંડલમ્

એકાદશી દ્વાદશિસંપ્રવિષ્ટા કૃતા નભસ્યે શ્રવણેન યુક્તા ॥
વિશેષતઃ સોમસુતેન સંગમે કરોતિ મુક્તિં પ્રપિતામહાનામ્

યદ્દીયતે દ્વાદશિવાસરે શુભે વિષ્ણું સમુદ્દિશ્ય તથા પિતૄણામ્ ॥
પર્ય્યાપ્તમિષ્ઠૈઃ ક્રતુતીર્થદાનૈર્ભક્ત્યા પ્રદત્તં ખલુ મેરુતુલ્યમ્

મહાનદીં પ્રાપ્ય દિનં ચ વિષ્ણોસ્તોયાંજલિં યસ્તુપિતૄન્દદાતિ ॥
શ્રાદ્ધં કૃતં તેન સમાઃ સહસ્રં યચ્છન્તિ કામાન્પિતરઃ સુતૃપ્તાઃ

શરણાગતાનાં પરિપાલનેન હ્યન્નપ્રદાનેન શૃણુષ્વ પુત્ર ॥
ઋણપ્રદાને દ્વિજદેવતાનાં તદ્વૈ ફલં જાગરણેન્ વિષ્ણોઃ

યઃ સ્વર્ણધેનું મધુનીરધેનું કૃષ્ણાજિનં રૌપ્યસુવર્ણમેરુ ॥
બ્રહ્માંડદાનં પ્રદદાતિ યાતિ સ વૈ ફલં જાગરણેન વિષ્ણોઃ

સત્યેન શૌચેન દમેન યત્ફલં ક્ષમાદયાદાનબલેન ષણ્મુખ ॥
દશાશ્વમેધૈર્બહુદક્ષિણૈશ્ચ તેષાં ફલં જાગરણેન વિષ્ણોઃ

સ્નાનેન યત્પ્રાપ્ય નદીં વીરષ્ઠાં યત્પિંડદાનેન પિતુર્ગયાયામ્ ॥
યદ્ધેમદાનાત્કુરુજાંગલે ચ તત્સ્યાત્ફલં જાગરણેન વિષ્ણોઃ

હત્યાયુતાનાં યદિ સંચિતાનિસ્તેયાનિ રુક્મસ્ય તથામિતાનિ ॥
નિહંત્યનેકાનિ પુરાકૃતાનિ શ્રીજાગરે યે પ્રપઠંતિ ગીતમ્

માર્ગં ન તે સૌરપુરસ્ય દૂતાન્વનાંતરં ષણ્મુખ કિંચિદન્યત્ ॥
સ્વપ્ને ન પશ્યંતિ ચ તે મનુષ્યા યેષાં ગતા જાગરણેન નિદ્રા

કાષાયવસ્ત્રૈશ્ચ જટાભરૈશ્ચ પૂર્તાગ્નિહોત્રૈઃ કિમુ ચાન્ય મન્ત્રૈઃ ॥
ધર્માર્થકામવરમોક્ષકરીં ચ ભદ્રામેકાં ભજસ્વ કલિકાલવિનાશિનીં ચ

ઇત્યુક્તપૂર્વં કિલ નારદેન શ્રેયોર્થબુદ્ધ્યા વિનતાસુતાય ॥
કૃષ્ણાત્પરં નાન્યદિહાસ્તિ દૈવં વ્રતં તદહ્નઃ પરમં ન કિંચિત્

ભોભોઃ સુરાઃ શૃણુત નારદ ઇત્યવોચદ્ભોભોઃ ખગેન્દ્રઋષિસિદ્ધમુનીન્દ્રસંઘાઃ ॥
ઉત્ક્ષિપ્ય બાહુમથ ભક્તજનેન ચોક્તં નૈકાદશીવ્રતસમં વ્રતમસ્તિ કિંચિત્

પક્ષીન્દ્ર પાપપુરુષા ન હરિં ભજંતિ તદ્ભક્તિશાસ્ત્રનિરતા ન કલૌ ભવંતિ ॥
કુર્વંતિ મૂઢમનસો દશમીવિમિશ્રામેકાદશીં શુભદિનં ચ પરિત્યજંતિ

આર્ત્તઃ સદા ચૈવ સદા ચ રોગી પાપી સદા ચૈવ સદા ચ દુઃખી ॥
સદા કુલઘ્નોઽથ સદા ચ નારકી વિદ્ધં મુરારેર્દિનમાશ્રયેત્તુ યઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયા સપ્તમે પ્રભાસખંડે ચતુર્થે દ્વારકામાહાત્મ્યે દ્વાદશીજાગરણસ્ય સર્વતોવરેણ્યત્વવર્ણનંનામ સપ્તવિંશતિતમોઽધ્યાયઃ