Skanda Purana · Chapter 7.239

// īśvara uvāca // //
tato gacchenmahādevi hiraṇyāpārśvataḥ sthitam //
pratyuktaṃ nāgarādityaṃ sarvavyādhivināśanam

purā satrājitā rājñā dvāravatyāṃ gatena tu //
ārādhito bhāskaro'bhūdyādavena mahātmanā

mahāvratamupāsthāya nighnaputreṇa dhīmatā //
tasya tuṣṭastadā bhānuḥ syamantakamaṇiṃ dadau

sa maṇiḥ savate nityaṃ bhārānaṣṭau dinedine // (savate- sūte)
suvarṇasya suśuddhasya bhaktyā vratatapoyutaḥ

bhūyo'pi bhānunā prokto varaṃ brūhi varānane //
sa cāha devadeveśaṃ bhāskaraṃ vāritaskaram

yadi tuṣṭo'si me deva varadānaṃ karoṣi ca //
atraiva cāśrame puṇye nityaṃ saṃnihito bhava

evaṃ bhaviṣyatītyuktvā sūryaḥ satrājitaṃ nṛpam //
abhinaṃdya varaṃ tasya tatraivādarśanaṃ gataḥ

tenāpi nighnaputreṇa devadevasya bhāsvataḥ //
sthāpitā pratimā śubhrā tatraiva varavarṇini

śaṃkhaduṃdubhinirghoṣairbrahmaghoṣaiścapuṣkalaiḥ //
tatastunāgarānsarvānsamāhūya dvijottamān //
abravītpraṇato bhūtvā dattvā vṛttimanuttamām

yuṣmatpādaprasādena sūryasyānugraheṇa vai //
sādhayitvā tapaścograṃ sthāpitā pratimā mayā

iṃdralokādihānītā jitvā śakraṃ surāriṇā//
daśānanasya putreṇa laṃkāyāṃ sthāpitā purā

taṃ nihatya tu rāmeṇa lakṣmaṇānugatena vai//
ayodhyāyāṃ samānītā saumitrijayalakṣikā

mitrāvaruṇaputrāya vasiṣṭhāya samarpitā//
tenāpi mama tuṣṭena dvārakāyāṃ niveditā

mayāpi sthāpitā cātra jñātvā kṣetramanuttamam //
kimatra bahunoktena bhavadbhiḥ sarvathaiva hi

paripālyā prayatnena yāvaccaṃdrārkatārakam//
tasmādyuṣmākamādiṣṭā pratimeyaṃ mayā śubhā

nāgarāṇāṃ tu viprāṇāṃ someśapuravāsinām //
tasmānnāma mayā dattaṃ nāgarādityameva hi

// brāhmaṇā ūcuḥ// //
sarvameva kariṣyāmo devasya paripālanam //
yāvanmahī ca caṃdrārkau yāvattiṣṭhati sāgaraḥ //
tāvatte hyakṣayā kīrtiḥ sthāne cāsminbhaviṣyati

evamuktvā tu te sarve nāgarā dvijapuṃgavāḥ //
rājāpi tuṣṭaḥ prayayau tadā dvāravatīṃ purīm

// īśvara uvāca // //
śṛṇu devi pravakṣyāmi tasmindṛṣṭe tu yatphalam //
gośatasya prayāgeṣu samyagdattasya yatphalam //
tatphalaṃ samavāpnoti nāgarārkasya darśanāt

dāridryaduḥkhaśokārtteḥ konyosti haraṇakṣamaḥ//
prabhāse pāvane kṣetre muktvā nāgarabhāskaram

baṃdhakuṣṭhādikaṃ duḥkhaṃ ye bhajaṃtyalpabuddhayaḥ //
tatra te naiva jānaṃti vaidyaṃ nāgarabhāskaram

snātvā hiraṇyātoyena yastaṃ pūjayate naraḥ //
kalpakoṭisahasrāṇi sūryaloke mahīyate

śuklapakṣe tu saptamyāṃ yadā saṃkramate raviḥ //
mahājayā tadā khyātā saptamī bhāskarapriyā

snānaṃ dānaṃ japo homaḥ pitṛdevābhipūjanam //
sarvaṃ koṭiguṇaṃ proktaṃ bhāskarasyavaco yathā

ekaṃ yo bhojayettatra brāhmaṇaṃ sūryasaṃnidhau //
koṭibhojyaṃ kṛtaṃ tena ityāha bhagavānhariḥ

etanmayā te kathitaṃ purā noktaṃ varānane //
yaḥ śṛṇoti naro bhaktyā sa gacchedbhāskaraṃ padam

sūryasya devi nāmāni rahasyāni śṛṇuśva me//
alaṃ nāmasahasreṇa paṭhasvainaṃ śubhaṃ stavam

vikarttano vivasvāṃśca mārttaṃḍo bhāskaro raviḥ //
lokaprakāśakaḥ śrīmām̐llokacakṣurgraheśvaraḥ

lokasākṣī trilokeśaḥ karttā harttā tamisrahā //
tapanastāpanaścaiva śuciḥ saptāśvavāhanaḥ

gabhastihasto brahmā ca sarvadevanamaskṛtaḥ //
ekaviṃśaka ityeṣa nāgarārkastavaḥ smṛtaḥ

stavarāja iti khyātaḥ śarīrārogyavṛddhidaḥ

ya etena mahādevi dve saṃdhye'stamanodaye //
nāgarārkaṃ tu saṃstauti sa labhedvāṃchitaṃ phalam

iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṃḍe prathame prabhāsakṣetramāhātmye nāgarārkamāhātmyavarṇanaṃnāmaikonacatvāriṃśaduttaradviśatatamo 'dhyāyaḥ