Skanda Purana · Chapter 7.229

// īśvara uvāca // //
tato gacchenmahādevi gaṃgāṃ tripathagāminīm //
anarakeśato devi aiśānyāṃ diśi saṃsthitām

svayaṃbhūtāṃ dharāmadhyādānītāṃ viṣṇunā purā //
yādavānāṃ tu muktyarthaṃ sarvapāpopaśāntaye

yastatra kurute snānaṃ kathaṃcitpuṇyasaṃcayāt //
śrāddhaṃ caiva vidhānena na sa śocetkṛtākṛte

brahmāṇḍaṃ sakalaṃ dattvā yatpuṇyaphalamāpnuyāt //
tatpuṇyaṃ prāpnuyāddevi kārtikyāṃ jāhnavījale

kalau yuge tu saṃprāpte durllabhaṃ tatra darśanam//
kiṃ punaḥ snānadānaṃ tu prabhāse jāhnavījale

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye gaṃgāmāhātmyavarṇanaṃnāmaikonatriṃśaduttaradviśatatamo'dhyāyaḥ