Skanda Purana · Chapter 7.215

// īśvara uvāca // //
tato gacchenmahādevi kumāreśvaramuttamam //
mārkaṇḍeśvarato devi dakṣiṇe nātidūrataḥ //
dhanurviṃśatibhistatra sthitaṃ svāmipratiṣṭhitam

tataḥ kṛtvā tapo ghoraṃ kārttikeyena bhābhini //
paradārāpahārotthapāpānāṃ nāśahetave

liṃgaṃ sthāpitavāṃstatra sa muktaḥ kilviṣāttataḥ //
vairāgyādyauvanaṃ tyaktvā kaumāraṃ punarādade

pitṝnhatvā sumālī ca tamārādhitavānpurā //
so'pi mukto'bhavaddevi pāpātpitṛvadhodbhavāt

kumāreśvaranāmaitatpūjitaṃ vai surāsuraiḥ //
tasyāgrataḥ kumārasya kūpastiṣṭhati bhāmini

tatra snātvā pūjayedyaḥ śūlinaṃ svāmipūjitam //
sa muktaḥ pātakaiḥ sarvairgacchetsvāmipuraṃ mahat

śātakauṃbhamayaṃ yastu tāmracūḍaṃ dvijātaye //
dadyātsvāminamuddiśya sa tu yātrāphalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsa kṣetramāhātmye kumāreśvaramāhātmyavarṇanaṃnāma pañcadaśottaradviśatatamo'dhyāyaḥ