Skanda Purana · Chapter 7.144

// īśvara uvāca // //
tato gacchenmahādevi tṛtīyaṃ puṣkaraṃ mahat //
tasyaiva pūrvadigbhāge kiñcidīśānagocare //
kanīyaḥ saṃsmṛtaṃ kuṃḍaṃ puṣkaraṃnāma nāmataḥ

yatra madhyāhnasamaye brahmaṇā samupāsitā //
sandhyā trailokyajananī pratiṣṭhārthaṃ gatena ca

tatra yaḥ kurute snānaṃ paurṇamāsyāṃ samāhitaḥ //
samyakkṛtaṃ bhavettena snānaṃ tatrādipuṣkare

hiraṇyaṃ tatra dātavyaṃ sarvapāpāpanuttaye

iti saṃkṣepataḥ proktaṃ māhātmyaṃ tava pauṣkaram //
śrutaṃ pāpaharaṃ nṝṇāṃ sarvakāmapradaṃ tathā

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye puṣkarakuṇḍamāhātmya varṇanaṃnāma catuścatvāriṃśaduttaraśatatamo'dhyāyaḥ