Skanda Purana · Chapter 5.98

śrīmārkaṇḍeya uvāca -
tato gacchettu rājendra prabhāseśvaramuttamam /
vikhyātaṃ triṣu lokeṣu svargasopānamuttamam

yudhiṣṭhira uvāca -
prabhāsaṃ tāta me brūhi kathaṃ jātaṃ mahāphalam /
svargasopānadaṃ dṛśyaṃ saṃkṣepātkathayasva me

śrīmārkaṇḍeya uvāca -
durbhagā ravipatnī ca prabhānāmeti viśrutā /
tayā cārādhitaḥ śambhurugreṇa tapasā purā

vāyubhakṣā sthitā varṣaṃ varṣaṃ dhyānaparāyaṇā /
tatastuṣṭo mahādevaḥ prabhāyāḥ pāṇḍunandana

īśvara uvāca -
kasmātsaṃkliśyase bāle kathyatāṃ yadvivakṣitam /
ahaṃ hi bhāskaro'pyeko nānātvaṃ naiva vidyate

prabhovāca -
nānyo devaḥ striyaḥ śambho vinā bhartrā kvacitprabho /
saguṇo nirguṇo vāpi dhanāḍhyo vāpyakiṃcanaḥ

priyo vā yadi vā dveṣyaḥ strīṇāṃ bhartaiva daivatam /
durbhagatvena dagdhāhaṃ sakhīmadhye sureśvara /
bharttaryallabdhasaukhyāsmi tena kliśyāmyahaṃ bhṛśam

īśvara uvāca -
vallabhā bhāskarasyaiva matprasādādbhaviṣyasi

pārvatyuvāca -
apramāṇaṃ bhavadvākyaṃ bhāskaro'pi kariṣyati /
vṛthā kleśo bhavedasyāḥ prabhāyāḥ parameśvara

umāvākyānmaheśānadhyātastimiranāśanaḥ /
āgato gaganādbhānurnarmadottararodhasi

bhānuruvāca -
āhūto'smi kathaṃ deva hyaghāsuraniṣūdana

īśvara uvāca -
prabhāṃ pālaya bho bhāno saṃtoṣeṇa pareṇa hi

umovāca -
prabhāyā mandire nityaṃ sthīyatāṃ himanāśana /
agrapatnī samastānāṃ bhāryāṇāṃ kriyatāṃ rave

bhānuruvāca -
evaṃ devi kariṣyāmi tava vākyaṃ varānane /
etacchrutvā prabhāhūtā pratyuvāca maheśvaram

prabhovāca -
svāṃśena sthīyatāṃ deva manmathāre umāpate /
ekāṃśaḥ sthāpyatāmatra tīrthasyonmīlanāya ca

śrīmārkaṇḍeya uvāca -
sarvadevamayaṃ liṅgaṃ sthāpitaṃ tatra pāṇḍava /
prabhāseśa iti khyātaṃ sarvalokeṣu durlabham

anyāni yāni tīrthāni kāle tāni phalanti vai /
prabhāseśastu rājendra sadyaḥ kāmaphalapradaḥ

māghamāse site pakṣe saptamyāṃ ca viśeṣataḥ /
aśvaṃ yaḥ sparśayettatra yathoktabrāhmaṇe nṛpa

indratvaṃ prāpyate tena bhāskarasyāthavā padam /
snātvā paramayā bhaktyā dānaṃ dadyāddvijātaye

gopradātā labhetsvargaṃ satyalokaṃ vareśvara /
sarvāṅgasundarīṃ śubhrāṃ kṣīriṇīṃ taruṇīṃ śubhām

savatsāṃ ghaṇṭāsaṃyuktāṃ kāṃsyapātrāvadohinīm /
dadate ye nṛpaśreṣṭha na te yānti yamālayam

atha yaḥ parayā bhaktyā snānaṃ devasya kārayet /
sa prāpnoti paraṃ lokaṃ yāvadābhūtasamplavam

daurbhāgyaṃ nāśamāyāti snānamātreṇa pāṇḍava /
tatra tīrthe tu yo bhaktyā kanyādānaṃ prayacchati

brāhmaṇāya vivāhena dāpayetpāṇḍunandana /
samānavayase deyā kulaśīladhanaistathā

ye dadante mahārāja hyapi pātakasaṃyutāḥ /
teṣāṃ pāpāni līyante hyudake lavaṇaṃ yathā

svāmidrohakṛtaṃ pāpaṃ nikṣepasyāpahāriṇi /
mitraghne ca kṛtaghne ca kūṭasākṣyasamudbhavam

tadgrāmodyānabhedotthaṃ paradāraniṣevaṇam /
vārddhuṣikasya yatpāpaṃ yatpāpaṃ steyasambhavam

kūpabhedodbhavaṃ yacca baiḍālavratadhāriṇaḥ /
dāmbhikaṃ vṛkṣacchedotthaṃ vivāhasya niṣedhajam

ārāmasthatarucchedamagamyāgamanodbhavam /
svabhāryātyajane yacca parabhāryāsamīhanāt

brahmasvaharaṇe yacca garade govighātini /
vidyāvikrayaṇotthaṃ ca saṃsargādyacca pātakam

śvabiḍālavadhādghoraṃ sarpaśūdrodbhavaṃ tathā /
bhūmihartuśca yatpāpaṃ bhūmihāriṇi caiva hi

mā dadasveti yatpāpaṃ govahnibrāhmaṇeṣu ca /
tatpāpaṃ yāti vilayaṃ kanyādānena pāṇḍava

sa gatvā bhāskaraṃ lokaṃ rudraloke śubhe vrajet /
krīḍate rudralokastho yāvadindrāścaturdaśa

sarvapāpakṣaye jāte śive bhavati bhāvanā /
etadvrajati yastīrthaṃ prabhāsaṃ pāṇḍunandana

sarvatīrthaphalaṃ prāpya so'śvamedhaphalaṃ labhet /
gopradānaṃ mahāpuṇyaṃ sarvapāpakṣayaṃ param /
praśastaṃ sarvakālaṃ hi caturdaśyāṃ viśeṣataḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe prabhāsatīrthamāhātmyavarṇanaṃ nāmāṣṭanavatitamo'dhyāyaḥ //