Skanda Purana · Chapter 5.95

śrīmārkaṇḍeya uvāca -
tato gacchettu rājendra badaryāśramamuttamam /
sarvatīrthavaraṃ puṇyaṃ kathitaṃ śaṃbhunā purā

yaścaiṣa bhāratasyārthe tatra siddhaḥ kirīṭabhṛt /
bhrātā te phālguno nāma viddhyenaṃ naradaivatam

naranārāyaṇau dvau tāvāgatau narmadātaṭe /
jñānaṃ tasyaiva yo rājanbhaktimānvai janārdane

samaṃ paśyati sarveṣu sthāvareṣu careṣu ca /
brāhmaṇaṃ śvapacaṃ caiva tatra prīto janārdanaḥ

aikātmyaṃ paśya kaunteya mayi cātmani nāntaram /
naranārāyaṇābhyāṃ hi kṛtaṃ badarikāśramam

sthāpitaḥ śaṅkarastatra lokānugrahakāraṇāt /
trimūrtisthāpitaṃ liṅgaṃ svargamārgānumuktidam

tatra gatvā śucirbhūtvā hyekarātropavāsakṛt /
rajastamastathā tyaktvā sāttvikaṃ bhāvamāśrayet

rātrau jāgaraṇaṃ kṛtvā madhumāsāṣṭamīdine /
athavā ca caturdaśyāmubhau pakṣau ca kārayet

āśvinasya viśeṣeṇa kathitaṃ tava pāṇḍava /
snāpayetparayā bhaktyā kṣīreṇa madhunā saha

dadhnā śarkarayā yuktaṃ ghṛtena samalaṃkṛtam /
pañcāmṛtamidaṃ puṇyaṃ snāpayedvṛṣabhadhvajam

snāpyamānaṃ śivaṃ bhaktyā vīkṣate yo vimatsaraḥ /
tasya vāsaḥ śivopānte śakraloke na saṃśayaḥ

śāṭhyenāpi namaskāraḥ prayuktaḥ śūlapāṇine /
saṃsāramūlabaddhānāmudveṣṭanakaro hi yaḥ

tenādhītaṃ śrutaṃ tena tena sarvamanuṣṭhitam /
yenauṃ namaḥ śivāyeti mantrābhyāsaḥ sthirīkṛtaḥ

yaḥ punaḥ snāpayedbhaktyā ekabhakto jitendriyaḥ /
tasyāpi yatphalaṃ pārtha vakṣye talleśatastava

pīḍito vṛddhabhāvena tava bhaktyā vadāmyaham /
te yānti paramaṃ sthānaṃ bhittvā bhāskaramaṇḍalam

saṃsāre sarvasaukhyānāṃ nilayāste bhavanti ca /
āścaryaṃ jñātivargāṇāṃ dharmāṇāṃ nilayāstu te

sampannāḥ sarvakāmaiste pṛthivyāṃ pṛthivīpate /
śrāddhaṃ tatraiva yaḥ kuryānnarmadodakamiśritam

yogyaiśca brāhmaṇairrājankulīnairvedapāragaiḥ /
surūpaiśca suśīlaiśca svadāranirataiḥ śubhaiḥ

āryadeśaprasūtaiśca ślakṣṇaiścaiva surūpibhiḥ /
kārayetpiṇḍadānaṃ vai bhāskare kutapasthite

pitḥṇāṃ paramaṃ lokaṃ yadīccheddharmanandana /
varjayettānprayatnena kāṇānduṣṭāṃśca dāmbhikān

tasmātsarvaprayatnena yogyaṃ vipraṃ samāśrayet /
narakānmocayetpretānkumbhīpākapurogamān

mokṣo bhavati sarveṣāṃ pitḥṇāṃ nṛpanandana /
viprebhyaḥ kāñcanaṃ dadyātprīyatāṃ me pitāmahaḥ

annaṃ ca dāpayettatra bhaktyā vastraṃ ca bhārata /
gāṃ vṛṣaṃ medinīṃ dadyācchatraṃ śastaṃ nṛpottama

sa pumānsvargamāpnoti ityevaṃ śaṅkaro'bravīt /
prāṇatyāgaṃ tu yaḥ kuryācchikhinā salilena vā

anāśakena vā bhūyaḥ sa gacchecchivamandiram /
naranārāyaṇītīre devadroṇyāṃ ca yo nṛpa

sa vasedīśvarasyāgre yāvadindrāścaturdaśa /
punaḥ svargāccyutaḥ so'pi rājā bhavati vīryavān

sarvaiśvaryaguṇairyuktaḥ prajāpālanatatparaḥ /
tataḥ smarati tattīrthaṃ punarevāgamiṣyati

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nārāyaṇītīrthamāhātmyavarṇanaṃ nāma pañcanavatitamo'dhyāyaḥ //