Skanda Purana · Chapter 5.92

śrīmārkaṇḍeya uvāca -
tato gacchettu rājendra yamahāsyamanuttamam /
sarvapāpaharaṃ tīrthaṃ narmadātaṭamāśritam

yudhiṣṭhira uvāca -
yamahāsyaṃ kathaṃ jātaṃ pṛthivyāṃ dvijapuṃgava /
etatsarvaṃ mamākhyāhi paraṃ kautūhalaṃ hi me

śrīmārkaṇḍeya uvāca -
sādhu sādhu mahāprājña pṛṣṭo'haṃ nṛpanandana /
snānārthaṃ narmadāṃ puṇyāmāgataste pitā purā

rajakena yathā dhautaṃ vastraṃ bhavati nirmalam /
tathāsau nirmalo jāto dharmarājo yudhiṣṭhira

sa paśyannirmalaṃ dehaṃ hasanprovāca vismitaḥ

yama uvāca -
matpuraṃ kathamāyānti manujāḥ pāpabṛṃhitāḥ /
snānenaikena revāyāḥ prāpyate vaiṣṇavaṃ padam

samarthā ye na paśyanti revāṃ puṇyajalāṃ śubhām /
jātyandhaiste samā jñeyā mṛtaiḥ paṅgubhireva vā

samarthā ye na paśyanti revāṃ puṇyajalāṃ nadīm /
etasmātkāraṇādrājanhasito lokaśāsanaḥ

sthāpayitvā yamastatra devaṃ svargaṃ jagāma ha /
yamahāseśvare rājañjitakrodho jitendriyaḥ

viśeṣāccāśvine māsi kṛṣṇapakṣe caturdaśīm /
upoṣya parayā bhaktyā sarvapāpaiḥ pramucyate

rātrau jāgaraṇaṃ kuryāddīpaṃ devasya bodhayet /
ghṛtena caiva rājendra śṛṇu tatrāsti yatphalam

mucyate pātakaiḥ sarvairagamyāgamanodbhavaiḥ /
abhakṣyabhakṣaṇodbhūtairapeyāpeyajairapi

avāhyavāhite yatsyādadohyādohane yathā /
snānamātreṇa tasyaivaṃ yānti pāpānyanekadhā

yamalokaṃ na vīkṣeta manujaḥ sa kadācana /
pitḥṇāṃ paramaṃ guhyamidaṃ bhūmau nareśvara

dadatāmakṣayaṃ sarvaṃ yamahāsye na saṃśayaḥ /
amāvāsyāṃ jitakrodho yastu pūjayate dvijān

hiraṇyabhūmidānena tiladānena bhūyasā /
kṛṣṇājinapradānena tiladhenupradānataḥ

vidhānoktadvijāgryāya ye pradāsyanti bhaktitaḥ /
hayaṃ vā kuṃjaraṃ vātha dhūrvahau sīrasaṃyutau

kanyāṃ vasumatīṃ gāṃ ca mahiṣīṃ vā payasvinīm /
dadate ye nṛpaśreṣṭha nopasarpanti te yamam

yamo'pi bhavati prītaḥ pratijanma yudhiṣṭhira /
yamasya vāho mahiṣo mahiṣyastasya mātaraḥ

tāsāṃ dānaprabhāveṇa yamaḥ prīto bhaveddhruvam /
nāsau yamamavāpnoti yadi pāpaiḥ samāvṛtaḥ

etasmātkāraṇādatra mahiṣīdānamuttamam /
tasyāḥ śṛṅge jalaṃ kāryaṃ dhūmravastrānuveṣṭitā

āyasasya khurāḥ kāryāstāmrapṛṣṭhāḥ subhūṣitāḥ /
lavaṇācalaṃ pūrvasyāmāgneyyāṃ guḍaparvatam

kārpāsaṃ yāmyabhāgaṃ tu navanītaṃ tu nairṛte /
paścime saptadhānyāni vāyavye taṃdulāḥ smṛtāḥ

saumye tu kāñcanaṃ dadyādīśāne ghṛtameva ca /
pradadyādyamarājo me prīyatāmityudīrayan

ityuccārya dvijasyāgre yamalokaṃ mahābhayam /
asipattravanaṃ ghoraṃ yamacullī sudāruṇā

raudrā vaitaraṇī caiva kumbhīpāko bhayāvahaḥ /
kālasūtro mahābhīmastathā yamalaparvatau

krakacaṃ tailayantraṃ ca śvāno gṛdhrāḥ sudāruṇāḥ /
nirucchvāsā mahānādā bhairavo rauravastathā

ete ghorā yāmyaloke śrūyante dvijasattama /
tvatprasādena te somyāstīrthasyāsya prabhāvataḥ

dānasyāsya prabhāveṇa yamarājaprasādataḥ /
narake'haṃ na yāsyāmi dvija janmani janmani

yamahāsyasya cākhyānamidaṃ śṛṇvanti ye narāḥ /
te'pi pāpavinirmuktā na paśyanti yamālayam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe yamahāsyatīrthamāhātmyavarṇanaṃ nāma dvinavatitamo'dhyāyaḥ //