Skanda Purana · Chapter 5.86

śrīmārkaṇḍeya uvāca -
tato gacchenmahārāja piṅgalāvartamuttamam /
saṅgamasya samīpasthaṃ revāyā uttare taṭe /
havyavāhena rājendra sthāpitaḥ piṅgaleśvaraḥ

yudhiṣṭhira uvāca -
havyavāhena bhagavannīśvaraḥ sthāpitaḥ katham /
etadākhyāhi me sarvaṃ prasādādvaktumarhasi

mārkaṇḍeya uvāca -
śambhunā retasā rājaṃstarpito havyavāhanaḥ /
prāptasaukhyena raudreṇa gauryākrīḍanacetasā

havyavāhamukhe kṣiptaṃ rudreṇāmitatejasā /
rudrasya retasā dagdhastīrthayātrākṛtādaraḥ

sāgarāṃśca nadīrgatvā kramādrevāṃ samāgataḥ /
cacāra parayā bhaktyā dhyānamugraṃ hutāśanaḥ

vāyubhakṣaḥ śataṃ sāgraṃ yāvattepe hutāśanaḥ /
tāvattuṣṭo mahādevo varado jātavedasaḥ /
saṃnidhau samupetyātha vacanaṃ cedamabravīt

īśvara uvāca -
varaṃ vṛṇīṣva havyāśa yaste manasi vartate

vahniruvāca -
namaste sarvalokeśa ugramūrte namo'stu te /
retasā tava saṃdagdhaḥ kuṣṭhī jāto maheśvara /
kṛpāṃ kuru mahādeva mama rogaṃ vināśaya

īśvara uvāca -
havyavāha bhavārogo matprasādācca satvaram /
atra tīrthe kṛtasnānaḥ svarūpaṃ pratipatsyase

ityuktvā ca mahādevastatraivāntaradhīyata /
anantaraṃ havyavāhaḥ sasnau revājale tvaran

tadaiva roganirmukto'bhavaddivyasvarūpavān /
sthāpayāmāsa deveśaṃ sa vahniḥ piṅgaleśvaram

nāmnā saṃpūjayāmāsa tuṣṭāva stutibhirmudā /
tato jagāma deśaṃ svaṃ devānāṃ havyavāhanaḥ

havyavāhena bhūpaivaṃ sthāpitaḥ piṅgaleśvaraḥ /
jitakrodho hi yastatra upavāsaṃ samācaret

atirāntraphalaṃ tasya ante rudratvamāpnuyāt /
guṇānvitāya viprāya kapilāṃ tatra bhārata

alaṃkṛtya savatsāṃ ca śaktyālaṅkārabhūṣitām /
yaḥ prayacchati rājendra sa gacchetparamāṃ gatim

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe piṅgaleśvaratīrthamāhātmyavarṇanaṃ nāma ṣaḍaśītitamo'dhyāyaḥ //