Skanda Purana · Verses 5.77-2

śrīmārkaṇḍeya uvāca -
bhīmeśvaraṃ tato gacchetsarvapāpakṣayaṃkaram /
sevitaṃ ṛṣisaṅghaiśca bhīmavratadharaiḥ śubhaiḥ

tatra tīrthe tu yaḥ snātvā sopavāso jitendriyaḥ /
japedekākṣaraṃ mantramūrdhvabāhurdivākare

tasya janmārjitaṃ pāpaṃ tatkṣaṇādeva naśyati /
saptajanmārjitaṃ pāpaṃ gāyatryā naśyate dhruvam

daśabhirjanmabhirjātaṃ śatena tu purā kṛtam /
sahasreṇa trijanmotthaṃ gāyatrī hanti kilbiṣam

vaidikaṃ laukikaṃ vāpi jāpyaṃ japtaṃ nareśvara /
tatkṣaṇāddahate sarvaṃ tṛṇaṃ tu jvalano yathā

na devabalamāśritya kadācitpāpamācaret /
ajñānānnaśyate kṣipraṃ nottaraṃ tu kadācana

tatra tīrthe tu yo dānaṃ śaktimāśritya cācaret /
tadakṣayyaphalaṃ sarvaṃ jāyate pāṇḍunandana

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe bhīmeśvaratīrthamāhātmyavarṇanaṃ nāma saptasaptatitamo'dhyāyaḥ //