Skanda Purana · Chapter 5.220

śrīmārkaṇḍeya uvāca -
tato gaccheddharādhīśa loṭaṇeśvaramuttamam /
uttare narmadākūle sarvapātakanāśanam

tatkṣaṇādeva tatsarvaṃ saptajanmārjitaṃ tvagham /
naśyate devadevasya darśanādeva tannṛpa

bālyātprabhṛti yatpāpaṃ yauvane cāpi yatkṛtam /
tatsarvaṃ vilayaṃ yāti devadevasya darśanāt

yudhiṣṭhira uvāca -
āścaryabhūtaṃ lokeṣu narmadācaritaṃ mahat /
tvayā vai kathitaṃ vipra sakalaṃ pāpanāśanam

yadekaṃ paramaṃ tīrthaṃ sarvatīrthaphalapradam /
śrotumicchāmi tatsarvaṃ dayāṃ kṛtvā vadāśu me

ye keciddurlabhāḥ praśnāstriṣu lokeṣu sattama /
tvatprasādena te sarve śrutā me saha bāndhavaiḥ

etamekaṃ paraṃ praśnaṃ sarvapraśnavidāṃ vara /
śrutvāhaṃ tvatprasādena yatra yāmi sabāndhavaḥ

śrīmārkaṇḍeya uvāca -
sādhusādhu mahāprājña yasya te matirīdṛśī /
durlabhaṃ triṣu lokeṣu tasya te nāsti kiṃcana

dharmamarthaṃ ca kāmaṃ ca mokṣaṃ ca bharatarṣabha /
kāle kāle ca yo vetti kartavyastena dhīmatā

tasmātte sampravakṣyāmi praśnasyāsyottaraṃ śubham /
yacchrutvā sarvapāpebhyo mucyante bhuvi mānavāḥ

narmadā saritāṃ śreṣṭhā sarvatīrthamayī śubhā /
viśeṣaḥ kathitastasyā revāsāgarasaṅgame

āgacchantīṃ nṛpaśreṣṭha dṛṣṭvā revāṃ mahodadhiḥ /
praṇamya ca punardevīṃ saṅgame revayā saha

saṃcintya manasā keyamiti māṃ vai saridvarā /
jñātvā saṃcintya manasā revāṃ liṅgodbhavāṃ parām

luṭhanvai sammukhastāta gato revāṃ mahodadhiḥ /
samudre narmadā yatra praviṣṭāsti mahānadī

tatra devādhidevasya samudre liṅgamutthitam /
liṅgodbhūtā mahābhāgā narmadā saritāṃ varā

layaṃ gatā tatra liṅge tena puṇyatamā hi sā /
narmadāyāṃ vasannityaṃ narmadāmbu pibansadā /
dīkṣitaḥ sarvayajñeṣu somapānaṃ dine dine

saṅgame tatra yaḥ snātvā loṭaṇeśvaramarcayet /
so'śvamedhasya yajñasya phalaṃ prāpnoti mānavaḥ

vācikaṃ mānasaṃ pāpaṃ karmaṇā yatkṛtaṃ nṛpa /
loṭaṇeśvaramāsādya sarvaṃ vilayatāṃ vrajet

kārttikyāṃ tu viśeṣeṇa kathitaṃ śaṅkareṇa tu /
tacchṛṇuṣva nṛpaśreṣṭha sarvapāpāpanodanam

samprāptāṃ kārttikīṃ dṛṣṭvā gatvā tatra nṛpottama /
caturdaśyāmupoṣyaiva snātvā vai narmadājale

saṃtarpya pitṛdevāṃśca śrāddhaṃ kṛtvā yathāvidhi /
rātrau jāgaraṇaṃ kuryātsampūjya loṭaṇeśvaram

saphalaṃ jīvitaṃ tasya saphalaṃ tasya ceṣṭitam /
paṅgavaste na sandeho janma teṣāṃ nirarthakam

ekāgramanasā yaistu na dṛṣṭo loṭaṇeśvaraḥ /
piśācatvaṃ viyonitvaṃ na bhavettasya vai kule

saṅgame tatra yo gatvā snānaṃ kṛtvā yathāvidhi /
puṇyaiścaiva tathā kuryādgītairnṛtyaiḥ prabodhanam

tataḥ prabhātāṃ rajanīṃ dṛṣṭvā natvā mahodadhim /
āmantrya snānavidhinā snānaṃ tatra tu kārayet

oṃ namo viṣṇurūpāya tīrthanāthāya te namaḥ /
sānnidhyaṃ kuru me deva samudra lavaṇāmbhasi /
ityāmantraṇamantraḥ

agniśca tejo mṛḍayā ca deho reto'dhā viṣṇuramṛtasya nābhiḥ /
evaṃ bruvan pāṇḍava satyavākyaṃ tato'vagāheta patiṃ nadīnām /
iti snānamantraḥ

ājanmaśatasāhasraṃ yatpāpaṃ kṛtavānnaraḥ /
sakṛtsnānādvyapoheta pāpaughaṃ lavaṇāmbhasi

anyathā hi kuruśreṣṭha devayonirasau vibhuḥ /
kuśāgreṇāpi vibudhairna spraṣṭavyo mahārṇavaḥ

sarvaratnapradhānastvaṃ sarvaratnākarākara /
sarvāmarapradhāneśa gṛhāṇārghaṃ namo'stu te /
iti arvamantra

pitṛdevamanuṣyāṃśca saṃtarpya tadanantaram /
uttīrya tīre tasyaiva pañcabhirdvijapuṃgavaiḥ

śrāddhaṃ samācaretpaścāllokapālānurūpibhiḥ /
kṛtvāgre lokapālāṃstu pratiṣṭhāpya yathāvidhi

sampūjya ca yathānyāyaṃ tāneva brāhmaṇaiḥ saha /
sukṛtaṃ duṣkṛtaṃ paścāttebhyaḥ sarvaṃ nivedayet

bālyātprabhṛti yatpāpaṃ kṛtaṃ vārdhakayauvane /
prakhyāpayitvā tebhyo'gre lokapālānnimantrayet

bālyātprabhṛti yatkiṃcitkṛtamā janmato'śubham /
viprebhyaḥ kathitaṃ sarvaṃ tatsāṃnidhyaṃ sthiteṣu me

ityuktvā sa luṭhetpaścāttebhyo'greṇa ca sammukham /
anumānya ca tānpañca paścātsnānaṃ samācaret

śrāddhaṃ ca kāryaṃ vidhivatpitṛbhyo nṛpasattama /
evaṃ kṛte nṛpaśreṣṭha sarvapāpakṣayo bhavet

jijñāsārthaṃ tu yaḥ kaścidātmānaṃ jñātumicchati /
śubhāśubhaṃ ca yatkarma tasya niṣṭhāmimāṃ śṛṇu

snātvā tatra mahātīrthe luṭhamāno vrajennaraḥ /
pāpakarmānyato yāti dharmakarmā vrajennadīm

pāpakarmā tato jñātvā pāpaṃ me pūrvasaṃcitam /
snātvā tīrthavare tasmindānaṃ dadyādyathāvidhi

loṭaṇeśvaramabhyarcya sarvapāpaiḥ pramucyate /
avakragamanaṃ gatvā mucyate sarvapātakaiḥ

tasmātsarvaprayatnena jñātvaivaṃ nṛpasattama /
snātavyaṃ mānavaistatra yatra saṃnihito haraḥ

evaṃ snātvā vidhānena brāhmaṇān vedapāragān /
pūjayetpṛthivīpāla sarvapāpopaśāntaye

evaṃ guṇaviśiṣṭaṃ hi tattīrthaṃ nṛpasattama /
tasya tīrthasya māhātmyaṃ śṛṇuṣvaikamanā nṛpa

tatra tīrthe naraḥ snātvā saṃtarpya pitṛdevatāḥ /
śrāddhaṃ yaḥ kurute tatra pitḥṇāṃ bhaktibhāvitaḥ

dānaṃ dadāti viprebhyo gobhūtilahiraṇyakam /
ṣaṣṭivarṣasahasrāṇi koṭirvarṣaśatāni ca

vimānavaramārūḍhaḥ svargaloke mahīyate /
narmadāsarvatīrthebhyaḥ snāne dāne ca yatphalam

tatphalaṃ samavāpnoti revāsāgarasaṅgame /
suvarṇaṃ rajataṃ tāmraṃ maṇimauktikabhūṣaṇam

govṛṣaṃ ca mahīṃ dhānyaṃ tatra dattvākṣayaṃ phalam /
śubhasyāpyaśubhasyāpi tatra tīrthe na saṃśayaḥ

tatra tīrthe naraḥ kaścitprāṇatyāgaṃ yudhiṣṭhira /
karoti bhaktyā vidhivattasya puṇyaphalaṃ śṛṇu

koṭivarṣaṃ tu varṣāṇāṃ krīḍitvā śivamandire /
vedavedāṅgavidvipro jāyate vimale kule

putrapautrasamṛddho'sau dhanadhānyasamanvitaḥ /
sarvavyādhivinirmukto jīvecca śaradāṃśatam

api dvādaśayātrāsu somanāthe yadarcite /
kārttikyāṃ kṛttikāyoge tatpuṇyaṃ loṭaṇeśvare

gayā gaṅgā kurukṣetre naimiṣe puṣkare tathā /
tatpuṇyaṃ labhate pārtha loṭaṇeśvaradarśanāt

yaḥ śṛṇoti naro bhaktyā paṭhyamānamidaṃ śubham /
sarvapāpavinirmukto rudralokaṃ sa gacchati

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe loṭaṇeśvaratīrthamāhātmyavarṇanaṃ nāma viṃśatyuttaradviśatatamo'dhyāyaḥ //