Skanda Purana · Chapter 5.218

śrīmārkaṇḍeya uvāca -
tato gaccheddharādhīśa tīrthaṃ paramaśobhanam /
jamadagniriti khyātaṃ yatra siddho janārdanaḥ

yudhiṣṭhira uvāca -
kathaṃ siddho dvijaśreṣṭha vāsudevo jagadguruḥ /
mānuṣaṃ rūpamāsthāya lokānāṃ hitakāmyayā

etatsarvaṃ yathānyāyaṃ devadevasya cakriṇaḥ /
caritaṃ śrotumicchāmi kathyamānaṃ tvayānagha

śrīmārkaṇḍeya uvāca -
āsītpūrvaṃ mahārāja haihayādhipatirmahān /
kārtavīrya iti khyāto rājā bāhusahasravān

hastyaśvarathasampannaḥ sarvaśastrabhṛtāṃ varaḥ /
vedavidyāvratasnātaḥ sarvabhūtābhayapradaḥ

māhiṣmatyāḥ patiḥ śrīmānrājā hyakṣauhiṇīpatiḥ /
sa kadācinmṛgānhantuṃ nirjagāma mahābalaḥ

bahubhirdivasaiḥ prāpto bhṛgukacchamanuttamam /
jamadagnirmahātejā yatra tiṣṭhati tāpasaḥ

reṇukāsahitaḥ śrīmānsarvabhūtābhayapradaḥ /
tasya putro'bhavadrāmaḥ sākṣānnārāyaṇaḥ prabhuḥ

sarvakṣatraguṇairyukto brahmavidbrāhmaṇottamaḥ /
toṣayanparayā bhaktyā pitarau paramārthavat

taṃ tadā cārjunaṃ dṛṣṭvā jamadagniḥ pratāpavān /
carantaṃ mṛgayāṃ gatvā hyātithyena nyamantrayat

tatheti coktvā sa nṛpaḥ sabhṛtyabalavāhanaḥ /
jagāma cāśramaṃ puṇyamṛṣestasya mahātmanaḥ

tatkṣaṇādeva sampannaṃ śriyā paramayā vṛtam /
vismayaṃ paramaṃ tatra dṛṣṭvā rājā jagāma ha

gatamātrastu siddhena paramānnena bhojitaḥ /
sabhṛtyabalavānrājā brāhmaṇena yadṛcchayā /
kimetaditi papraccha kāraṇaṃ śaktimeva ca

kāmadhenoḥ prabhāvaṃ taṃ jñātvā prāha tato dvijam /
dakṣiṇāṃ dehi me vipra kalmaṣāṃ dhenumuttamām

śataṃ śatasahasrāṇāmayutaṃ niyutaṃ param /
bhūṣitānāṃ ca dhenūnāṃ dadāmi tava cārbudam

jamadagniruvāca -
ayutaiḥ prayutairnāhaṃ śatakoṭibhiruttamām /
kāmadhenumimāṃ tāta na dadmi pratigamyatām

evamuktaḥ sa rājendrastena vipreṇa bhārata /
krodhasaṃraktanayana idaṃ vacanamabravīt

yasyedṛśaḥ kāmacāro mayyapi dvijapāṃsana /
ahaṃ te paśyatastasmānnayāmi surabhiṃ gṛhāt

dvija uvāca -
kaḥ krīḍati saroṣeṇa nirbhayo hi mahāhinā /
mṛtyudṛṣṭotareṇāpi mama dhenuṃ nayeta yaḥ

evamuktvā mahādaṇḍaṃ brahmadaṇḍamivāparam /
gṛhītvā paramakruddho jamadagniruvāca ha

yasyāsti śaktistejo vā kṣatriyasya kulādhamaḥ /
dhenuṃ nayatu me sadyaḥ kṣīṇāyuḥ saparicchadaḥ

etacchrutvā vacaḥ krūraṃ haihayaḥ śataśo vṛtaḥ /
dhāvamānaḥ kṣititale brahmadaṇḍahato'patat

huṃkṛtena tato dhenvāḥ khaḍgapāśāsipāṇayaḥ /
nirgacchantaḥ pradṛśyante kalmaṣāyāḥ sahasraśaḥ

nāsāpuṭāgrādromāgrātkirātā māgadhā gudāt /
randhrāntareṣu cotpannāḥ śataśo'tha sahasraśaḥ

evamanyo'nyamāhatya haihayaṣṭaṅkaṇāndahan /
vināśaṃ saha vipreṇa gatā hyarjunatejasā

kārtavīryo jayaṃ labdhvā saṃkhye hatvā dvijottamam /
jagāma svāṃ purīṃ hṛṣṭaḥ kṛtāntavaśamohitaḥ

tatastvarānvitaḥ prāptaḥ paścādrāmo gate ripau /
ākrandamānāṃ jananīṃ dadarśa piturantike

rāma uvāca -
kenedamātmanāśāya hyajñānātsāhasaṃ kṛtam /
mama tātaṃ jighāṃsuryo draṣṭuṃ mṛtyumihecchati

tataḥ sā rāmavākyena gatasattveva vihvalā /
udaraṃ karayugmena tāḍayantī hyuvāca tam

arjunena nṛśaṃsena kṣatriyairaparaiḥ saha /
ihāgatya pitā tena nihato bāhuśālinā

taṃ paśya nihataṃ tātaṃ gatāsuṃ gatacetasam /
saṃskṛtya vidhivatputra tarpayasva yathātatham

etacchrutvā sa vacanaṃ jananīmabhivādya tām /
pratijñāmakarodyāṃ tāṃ śṛṇuṣva ca narādhipa

triḥsaptakṛtvaḥ pṛthivīṃ niḥkṣatriyakulānvayām /
snātvā ca teṣāmasṛjā tarpayiṣyāmi te patim

tasyāpi paraśunā bāhūn kārtavīryasya durmateḥ /
chittvā pāsyāmi rudhiramiti satyaṃ śṛṇuṣva me

evaṃ pratijñāṃ kṛtvāsau jāmadagnyaḥ pratāpavān /
krodhena mahatāviṣṭaḥ saṃskṛtya pitaraṃ tataḥ

māhiṣmatīṃ purīṃ rāmo jagāma krodhamūrchitaḥ /
chittvā bāhuvanaṃ tasya hatvā taṃ kṣatriyādhamam

jagāma kṣatriyāntāya pṛthivīmavalokayan /
saptadvīpārṇavayutāṃ saśailavanakānanām

pūrvataḥ paścimāmāśāṃ dakṣiṇottarataḥ kurūn /
samantapañcake pañca cakāra rudhirahradān

sa teṣu rudhirāmbhastu hradeṣu krodhamūrchitaḥ /
pitṝn saṃtarpayāmāsa rudhireṇeti naḥ śrutam

atharcīkādaya upetya pitaro brāhmaṇarṣabham /
taṃ kṣamasveti jagadustataḥ sa virarāma ha

teṣāṃ samīpe yo deśo hradānāṃ rudhirāmbhasām /
samaṃ tapaṃ cakramiti puṇyaṃ tatparikīrtitam

nivartya karmaṇastasmātpitḥn provāca pāṇḍava /
rāmaḥ paramadharmātmā yadidaṃ rudhiraṃ mayā

kṣiptaṃ pañcasu tīrtheṣu tadbhūyāttīrthamuttamam /
tathetyuktvā tu te sarve pitaro'dṛśyatāṃ gatāḥ

evaṃ rāmasya saṃsargo devamārge yudhiṣṭhira /
sarvapāpakṣayakaro darśanātsparśanānnṛṇām

reṇukāpratyayārthāya adyāpi pitṛdevatāḥ /
dṛśyante devamārgasthāḥ sarvapāpakṣayaṃkarāḥ

tatra tīrthe tu rājendra narmadodadhisaṅgame /
sthānaṃ kṛtvā vidhānena mucyante pātakairnarāḥ

kuśāgreṇāpi kaunteya na spṛṣṭavyo mahodadhiḥ /
anena tatra mantreṇa snātavyaṃ nṛpasattama

namaste viṣṇurūpāya namastubhyamapāṃ pate /
sānnidhyaṃ kuru deveśa sāgare lavaṇāmbhasi /
iti sparśanamantraḥ

agniśca tejo mṛḍayā ca dehe reto'tha viṣṇuramṛtasya nābhiḥ /
etadbruvan pāṇḍava satyavākyaṃ tato'vagāheta patiṃ nadīnām

pañcaratnasamāyuktaṃ phalapuṣpākṣatairyutam /
mantreṇānena rājendra dadyādarghaṃ mahodadheḥ

sarvaratnanidhānastvaṃ sarvaratnākarākaraḥ /
sarvāmarapradhāneśa gṛhāṇārghaṃ namo'stu te /
ityarghamantraḥ

ā janmajanitātpāpānmāmuddhara mahodadhe /
yāhyarcito ratnanidhe parvatān pārvaṇottama /
iti visarjanamantraḥ

ko'paraḥ sāgarāddevātsvargadvāravipāṭana /
tatra sāgaraparyantaṃ mahātīrthamanuttamam

jāmadagnyena rāmeṇa tatra devaḥ pratiṣṭhitaḥ /
yatra devāḥ sagandharvā munayaḥ siddhacāraṇāḥ

upāsate virūpākṣaṃ jamadagnimanuttamam /
reṇukāṃ caiva ye devīṃ paśyanti bhuvi mānavāḥ

priyavāse śive loke vasanti kālamīpsitam /
tatra snātvā naro rājaṃstarpayanpitṛdevatāḥ

tārayennarakādghorātkulānāṃ śatamuttaram /
snātvā dattvātra sahitāḥ śrutvā vai bhaktipūrvakam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe jāmadagnyatīrthamāhātmyavarṇanaṃ nāmāṣṭādaśādhikadviśatatamo'dhyāyaḥ //