Skanda Purana · Chapter 5.207

śrīmārkaṇḍeya uvāca -
tasyāgre pāvanaṃ tīrthaṃ svarṇabindviti viśrutam /
yatra snātvā divaṃ yānti mṛtāśca na punarbhavam

tatra tīrthe tu yaḥ snātvā datte viprāya kāñcanam /
tena yattu phalaṃ proktaṃ tacchṛṇuṣva mahīpate

sarveṣāmeva ratnānāṃ kāñcanaṃ ratnamuttamam /
agnitejaḥsamudbhūtaṃ tena tatparamaṃ bhuvi

tenaiva dattā pṛthivī saśailavanakānanā /
sapattanapurā sarvā kāñcanaṃ yaḥ prayacchati

mānasaṃ vācikaṃ pāpaṃ karmaṇā yatpurā kṛtam /
tatsarvaṃ naśyati kṣipraṃ svarṇadānena bhārata

svarṇadānaṃ tu yo dattvā hyapi vālāgramātrakam /
tatra tīrthe mṛto yāti divaṃ nāstyatra saṃśayaḥ

tatra vidyādharaiḥ siddhairvimānavaramāsthitaḥ /
pūjyamāno vasettāvadyāvadābhūtasamplavam

pūrṇe tatra tataḥ kāle prāpya mānuṣyamuttamam /
suvarṇakoṭisahite gṛhe vai jāyate dvijaḥ

sarvavyādhivinirmuktaḥ sarvalokeṣu pūjitaḥ /
jīvedvarṣaśataṃ sāgraṃ rājasaṃ satsu viśrutaḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe suvarṇabindutīrthamāhātmyavarṇanaṃ nāma saptādhikadviśatatamo'dhyāyaḥ //