Skanda Purana · Chapter 5.204

śrīmārkaṇḍeya uvāca -
bhṛgutīrthaṃ tato gacchettīrtharājamanuttamam /
paitāmahaṃ mahāpuṇyaṃ sarvapātakanāśanam

brahmaṇā tatra tīrthe tu purā varṣaśatatrayam /
ārādhanaṃ kṛtaṃ śambhoḥ kasmiṃścitkāraṇāntare

yudhiṣṭhira uvāca -
kimarthaṃ muniśārdūla brahmā lokapitāmahaḥ /
ārādhayaddevadevaṃ mahābhaktyā maheśvaram

ārādhyaḥ sarvabhūtānāṃ jagadbhartā jagadguruḥ /
śrotavyaṃ śrotumicchāmi mahadāścaryamuttamam

dharmaputravacaḥ śrutvā mārkaṇḍeyo munīśvaraḥ /
kathayāmāsa tadvṛttamitihāsaṃ purātanam

mārkaṇḍeya uvāca -
svaputrikāmabhigantumicchanpūrvaṃ pitāmahaḥ /
śaptastu devadevena kopāviṣṭena sattama

vedāstava vinaśyanti jñānaṃ ca kamalāsana /
apūjyaḥ sarvalokānāṃ bhaviṣyasi na saṃśayaḥ

evaṃ datte tataḥ śāpe brahmā khedāvṛtastadā /
revāyā uttare kūle snātvā varṣaśatatrayam /
toṣayāmāsa deveśaṃ tuṣṭaḥ provāca śaṅkaraḥ

pūjyastvaṃ bhavitā loke prāpte parvaṇi parvaṇi /
ahamatra ca vatsyāmi devaiśca pitṛbhiḥ saha

śrīmārkaṇḍeya uvāca -
tadāprabhṛti tattīrthaṃ khyātiṃ prāptaṃ pitāmahāt /
sarvapāpaharaṃ puṇyaṃ sarvatīrtheṣvanuttamam

tatra bhādrapade māsi kṛṣṇapakṣe viśeṣataḥ /
amāvāsyāṃ tu yaḥ snātvā tarpayetpitṛdevatāḥ

piṇḍadānena caikena tilatoyena vā nṛpa /
tṛpyanti dvādaśābdāni pitaro nātra saṃśayaḥ

kanyāgate tu yastatra nityaṃ śrāddhaprado bhavet /
avāpya tṛptiṃ tatpūrve valganti ca hasanti ca

sarveṣu pitṛtīrtheṣu śrāddhaṃ kṛtvāsti yatphalam /
tatphalaṃ samavāpnoti darśe tatra na saṃśayaḥ

paitāmahe naraḥ snātvā pūjayanpārvatīpatim /
mucyate nātra sandehaḥ pātakaiścopapātakaiḥ

tatra tīrthe mṛtānāṃ tu narāṇāṃ bhāvitātmanām /
anivartikā gatī rājanrudralokādasaṃśayam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe paitāmahatīrthamāhātmyavarṇanaṃ nāma caturadhikadviśatatamo'dhyāyaḥ //