Skanda Purana · Chapter 5.191

śrīmārkaṇḍeya uvāca -
siddheśvaraṃ tato gacchettasyaiva tu samīpataḥ /
amṛtasrāvi talliṅgamādyaṃ svāyambhuvaṃ tathā

dṛṣṭamātreṇa yeneha hyanṛṇo jāyate naraḥ /
purā varṣaśataṃ sāgramārādhya parameśvaram

prāpnuyuḥ paramāṃ siddhimādityā dvādaśaiva tu /
ataḥ siddheśvaraḥ proktaḥ siddhidaḥ siddhikāṅkṣiṇām

yudhiṣṭhira uvāca -
kathaṃ siddheśvare prāptāḥ siddhiṃ devā dvijottama /
ādityā iti yaccoktaṃ tanme vismāpanaṃ kṛtam

tapasyugre vyavasitā ādityāḥ kena hetunā /
samprāptāstu dvijaśreṣṭha siddhiṃ caivābhilāṣikīm

saṃkṣipya tu mayā pṛṣṭaṃ vistarāddvija śaṃsa me

mārkaṇḍeya uvāca -
aditerdvādaśādityā jātāḥ śakrapurogamāḥ /
indro dhātā bhagastvaṣṭā mitro'tha varuṇo'ryamā

vivasvānsavitā pūṣā hyaṃśumānviṣṇureva ca /
ta ime dvādaśādityā icchanto bhāskaraṃ padam

narmadātaṭamāśritya tapasyugre vyavasthitāḥ /
siddheśvare mahārāja kāśyapeyairmahātmabhiḥ

parā siddhiranuprāptā dvādaśādityasaṃjñitaiḥ /
sthāpitaśca jagaddhātā tasmiṃstīrthe divākaraḥ

svakīyāṃśavibhāgena dvādaśādityasaṃjñitaiḥ /
tadāprabhṛti tattīrthaṃ rājankhyātiṃ gataṃ bhuvi

pralaye samanuprāpte hyādityā dvādaśaiva te /
dvādaśādityato rājan sambhavanti yugakṣaye

indrastapati pūrveṇa dhātā caivāgnigocare /
gabhastipatirvai yāmye tvaṣṭā nairṛtadiṅmukhaḥ

varuṇaḥ paścime bhāge mitrastu vāyave tathā /
viṣṇuśca saumyadigbhāge vivasvānīśagocare

ūrdhvataścaiva savitā hyadhaḥ pūṣā viśoṣayan /
aṃśumāṃstu tathā viṣṇurmukhato nirgataṃ jagat

pradahanvai naraśreṣṭha babhramuśca itastataḥ /
yathaiva te mahārāja dahanti sakalaṃ jagat

tathaiva dvādaśādityā bhaktānāṃ bhāvasādhanāḥ /
prātarutthāya yaḥ snātvā dvādaśādityasaṃjñitam

paśyate devadeveśaṃ śṛṇu tasyaiva yatphalam /
vācikaṃ mānasaṃ pāpaṃ karmajaṃ yatpurākṛtam

naśyate tatkṣaṇādeva dvādaśādityadarśanāt /
pradakṣiṇaṃ tu yaḥ kuryāttasya devasya bhārata

pradakṣiṇīkṛtā tena pṛthivī nātra saṃśayaḥ /
tatra tīrthe tu saptamyāmupavāsena yatphalam

anyatra saptasaptamyāṃ labhanti na labhanti ca /
ṣaṣṭhyāṃ vāre dainakare dvādaśādityadarśanāt

pradakṣiṇaṃ tu yaḥ kuryāttasya pāpaṃ tu naśyati /
arogī saptajanmāni bhavedvai nātra saṃśayaḥ

yastu pradakṣiṇaśataṃ dadyādbhaktyā dine dine /
dadrūpiṭakakuṣṭhāni maṇḍalāni vicarcikāḥ

naśyanti vyādhayaḥ sarve garuḍeneva pannagāḥ /
putraprāptirbhavettasya ṣaṣṭyā vāsarasevanāt

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dvādaśādityatīrthamāhātmyavarṇanaṃ nāmaikanavatyuttaraśatatamo'dhyāyaḥ //