Skanda Purana · Chapter 5.156

śrīmārkaṇḍeya uvāca -
nāsti lokeṣu tattīrthaṃ pṛthivyāṃ yannareśvara /
śuklatīrthena sadṛśamupamānena gīyate

śuklatīrthaṃ mahātīrthaṃ narmadāyāṃ vyavasthitam /
prāgudakpravaṇe deśe munisaṅghaniṣevitam

vaiśākhe ca tathā māsi kṛṣṇapakṣe caturdaśī /
kailāsādumayā sārddhaṃ svayamāyāti śaṅkaraḥ

madhyāhnasamaye snātvā paśyatyātmānamātmanā /
brahmaviṣṇvindrasahitaḥ śuklatīrthe samāhitaḥ

kārttikyāṃ tu viśeṣeṇa vaiśākhyāṃ ca narottama /
brahmaviṣṇumahādevān snātvā paśyati taddine

devarājaḥ suraiḥ sārddhaṃ vāyumārgavyavasthitaḥ /
kṛṣṇapakṣe caturdaśyāṃ snātvā paśyati śaṅkaram

gandharvāpsaraso yakṣāḥ siddhavidyādharoragāḥ /
taddine te'pi deveśaṃ dṛṣṭvā muñcanti kilbiṣam

ardhayojanavistāraṃ tadarddhenaiva cāyatam /
śuklatīrthaṃ mahāpuṇyaṃ mahāpātakanāśanam

yatra sthitaiḥ pradṛśyante vṛkṣāgrāṇi narottamaiḥ /
tatra sthitā mahāpāpairmucyante pūrvasaṃcitaiḥ

pāpopapātakairyukto naraḥ snātvā pramucyate /
upārjitā vinaśyeta bhrūṇahatyāpi dustyajā

yasmāttatraiva deveśa umayā saha tiṣṭhati /
vaiśākhyāṃ ca viśeṣeṇa kailāsādeti śaṅkaraḥ

tena tīrthaṃ mahāpuṇyaṃ sarvapātakanāśanam /
kathitaṃ brahmaṇā pūrvaṃ mayā tava tathā nṛpa

rajakena yathā dhautaṃ vastraṃ bhavati nirmalam /
tathā tatra vapuḥsnānaṃ puruṣasya bhavecchuci

pūrve vayasi pāpāni kṛtvā puṣṭāni mānavaḥ /
ahorātroṣito bhūtvā śuklatīrthe vyapohati

śuklatīrthe mahārāja rākāṃ revājalāñjalim /
kalpakoṭisahasrāṇi dattvā syuḥ pitaraḥ śivāḥ

na mātā na pitā bandhuḥ patanaṃ narakārṇave /
uddharanti yathā puṇyaṃ śuklatīrthe nareśvara

tapasā brahmacaryeṇa na tāṃ gacchanti sadgatim /
śuklatīrthe mṛto janturdehatyāgena yāṃ labhet

kārttikasya tu māsasya kṛṣṇapakṣe caturdaśīm /
ghṛtena snāpayeddevamupoṣya prayato naraḥ

snātvā prabhāte revāyāṃ dadyātsaghṛtakambalam /
sahiraṇyaṃ yathāśakti devamuddiśya śaṅkaraṃ

devasya pūraṇaṃ kuryādghṛtena ghṛtakambalam /
sa gacchati mahātejāḥ śivalokaṃ mṛto naraḥ

ekaviṃśakulopeto yāvadābhūtasamplavam /
śuklatīrthe naraḥ snātvā hyumāṃ rudraṃ ca yo'rcayet

gandhapuṣpādidhūpaiśca so'śvamedhaphalaṃ labhet /
māsopavāsaṃ yaḥ kuryāttatra tīrthe nareśvara

mucyate sa mahatpāpaiḥ saptajanmasusaṃcitaiḥ /
uṣṭrīkṣīramavikṣīraṃ navaśrāddhe ca bhojanam

vṛṣalīgamanaṃ caiva tathābhakṣyasya bhakṣaṇam /
avikraye'nṛte pāpaṃ māhiṣe'yājyayājake

vārddhuṣye paṅktigarade devabrāhmaṇadūṣake /
evamādīni pāpāni tathānyānyapi bhārata

cāndrāyaṇena naśyanti śuklatīrthe na saṃśayaḥ /
śuklatīrthe tu yaḥ snātvā tarpayetpitṛdevatāḥ

tasya te dvādaśābdāni tṛptiṃ yānti sutarpitāḥ /
pādukopānahau chatraṃ śayyāmāsanameva ca

suvarṇaṃ dhanadhānyaṃ ca śrāddhaṃ yuktahalaṃ tathā /
annaṃ pānīyasaṃhitaṃ tasmiṃstīrthe dadanti ye

hṛṣṭāḥ puṣṭā mṛtā yānti śivalokaṃ na saṃśayaḥ /
tatra tīrthe tu yo bhaktyā śivamuddiśya bhārata

bhikṣāmātraṃ tathānnaṃ ye te'pi svaryānti vai narāḥ /
yajvināṃ vratināṃ caiva tatra tīrthanivāsinām

api vālāgramātraṃ hi dattaṃ bhavati cākṣayam /
agnipraveśaṃ yaḥ kuryācchuklatīrthe samāhitaḥ

rāgadveṣavinirmukto hṛdi dhyātvā janārdanam /
sarvakāmasusampūrṇaḥ sa gacchedvāruṇaṃ puram

na rogo na jarā tatra yatra devo'ṃbhasāṃ patiḥ /
anāśakaṃ tu yaḥ kuryāttasmiṃstīrthe yudhiṣṭhira

anivartikā gatistasya rudralokādasaṃśayam /
avaśaḥ svavaśo vāpi jantustatkṣetramaṇḍale

mṛtaḥ sa tu na sandeho rudrasyānucaro bhavet /
śuklatīrthe tu yaḥ kanyāṃ śaktyā dadyādalaṃkṛtām

vidhinā yo nṛpaśreṣṭha kurute vṛṣamokṣaṇam /
tasya yatphalamuddiṣṭaṃ purāṇe rudrabhāṣitam

tadahaṃ sampravakṣyāmi śṛṇuṣvaikamanā nṛpa /
yāvanto romakūpāḥ syuḥ sarvāṅgeṣu pṛthakpṛthak

tāvadvarṣasahasrāṇi rudraloke mahīyate /
śuklatīrthe tu yaddattaṃ grahaṇe candrasūryayoḥ

vardhate tadguṇaṃ tāvaddināni daśa pañca ca /
śuklatīrthe śucirbhūtvā yaḥ karoti pradakṣiṇam

pṛthvī pradakṣiṇā tena kṛtā yattasya tatphalam /
śobhanaṃ mithunaṃ yastu rudramuddiśya pūjayet

sapta janmāni tasyaiva viyogo na ca vai kvacit /
etatte kathitaṃ rājan saṃkṣepeṇa phalaṃ mahat

śuklatīrthasya yatpuṇyaṃ yathā devācchrutaṃ mayā /
ya idaṃ śṛṇuyādbhaktyā purāṇe vihitaṃ phalam

sa labhennātra sandehaḥ satyaṃ satyaṃ punaḥ punaḥ /
putrārthī labhate putraṃ dhanārthī labhate dhanam

mokṣārthī labhate mokṣaṃ snānadānaphalaṃ mahat

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śuklatīrthamāhātmyavarṇanaṃ nāma ṣaṭpañcāśadadhikaśatatamo'dhyāyaḥ //