Skanda Purana · Chapter 5.120

śrīmārkaṇḍeya uvāca -
ataḥ paraṃ pravakṣyāmi kambukeśvaramuttamam /
hiraṇyakaśipurdaityo dānavo baladarpitaḥ

avadhyaḥ sarvalokānāṃ triṣu lokeṣu viśrutaḥ /
tasya putro mahātejāḥ prahlādo nāma nāmataḥ

viṣṇuprasādādbhaktyā ca tasya rājye pratiṣṭhitaḥ /
virocanastasya sutastasyāpi balireva ca

baliputro'bhavadbāṇastasmādapi ca śambaraḥ /
śambarasyānvaye jātaḥ kamburnāma mahāsuraḥ

jñātvā viṣṇumayaṃ ghoraṃ mahadbhayamupasthitam /
dānavānāṃ vināśāya nānyo hetuḥ kadācana

sa tyaktvā putradārāṃśca suhṛdbandhuparigrahān /
cacāra maunamāsthāya tapaḥ kamburmahāmatiḥ

akṣasūtrakaro bhūtvā daṇḍī muṇḍī ca mekhalī /
śākayāvakabhakṣaśca valkalājinasaṃvṛtaḥ

snātvā nityaṃ dhṛtiparo narmadājalamāśritaḥ /
pūjayaṃstu mahādevamarbudaṃ varṣasaṃkhyayā

tatastutoṣa bhagavāndevadevo maheśvaraḥ /
uvāca dānavaṃ kāle meghagambhīrayā girā

bhobhoḥ kambo mahābhāga tuṣṭo'haṃ tava suvrata /
iṣṭaṃ vratānāṃ paramaṃ maunaṃ sarvārthasādhanam

caritaṃ ca tvayā loke devadānavaduścaram /
varaṃ vṛṇīṣva bhadraṃ te yatte manasi rocate

kamburuvāca -
yadi prasanno deveśa yadi deyo varo mama /
akṣayyaścāvyayaścaiva svecchayā vicarāmyaham

daityadānavasaṅghānāṃ saṃyugeṣvapalāyitā /
bhayaṃ cānyanna vidyeta muktvā devaṃ gadādharam

tasyāhaṃ saṃyuge sādhyo yenopāyena śaṅkara /
bhavāmi na sadā kālaṃ taṃ vadasva varaṃ mama

īśvara uvāca -
mama saṃnihito yatra tvaṃ bhaviṣyasi dānava /
tatra viṣṇubhayaṃ nāsti vasātra vigatajvaraḥ

tasya devādhidevasya vedagarbhasya saṃyuge /
śaṅkhacakradharasyeśā nāhaṃ sarve surāsurāḥ

kiṃ punaryo dviṣatyenaṃ lokālokaprabhuṃ harim /
sa sukhī vartate kālaṃ na nimeṣaṃ mataṃ mama

tasmāttvaṃ parayā bhaktyā sarvabhūtahite rataḥ /
vasiṣyasi ciraṃ kālamityuktvādarśanaṃ gataḥ

gate cādarśanaṃ deve tatra tīrthe mahāmatiḥ /
sthāpayāmāsa deveśaṃ śivaṃ śāntamanāmayam

tasmiṃstīrthe mahādevaṃ sthāpayitvā divaṃ gataḥ /
tadāprabhṛti tatpārtha kambutīrthamiti śrutam /
vikhyātaṃ sarvalokeṣu mahāpātakanāśanam

kambutīrthe naraḥ snātvā vidhinābhyarcya bhāskaram /
ṛgyajuḥsāmamantraiśca stūyamāno nṛpottama

tasya puṇyaṃ samuddiṣṭaṃ brāhmaṇairvedapāragaiḥ /
tatsarvaṃ tu śṛṇuṣvādya mamaiva gadato nṛpa

ṛgyajuḥsāmagīteṣu sāṅgopāṅgeṣu yatphalam /
tatphalaṃ samavāpnoti gāyatrīmātramantravit

tatra tīrthe tu yaḥ snātvā tarpayetpitṛdevatāḥ /
pūjayeddevamīśānaṃ so'gniṣṭomaphalaṃ labhet

akāmo vā sakāmo vā tatra tīrthe kalevaram /
yastyajennātra sandeho rudralokaṃ sa gacchati

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kambukeśvaratīrthamāhātmyavarṇanaṃ nāma viṃśatyuttaraśatatamo'dhyāyaḥ //